Ol Famili Kristen—“Was i Stap”
Ol Famili Kristen—“Was i Stap”
“Yumi mas was i stap na holim stretpela tingting.”—1 TES. 5:6.
1, 2. Sapos famili i laik was i stap na stap strong long lotu, ol i mas mekim wanem?
APOSEL Pol i raitim pas long ol Kristen bilong Tesalonaika na i stori long “De bilong Bikpela,” em i tok: “Ol brata, yupela i no stap long tudak na bai yupela i kirap nogut long dispela de, olsem ol stilman i save kirap nogut long tulait i bruk. Yupela olgeta i pikinini bilong lait na pikinini bilong san. Yumi no ol lain bilong nait o bilong tudak.” Pol i tok moa: “Olsem na yumi no ken slip i stap olsem ol arapela, nogat. Yumi mas was i stap na holim stretpela tingting.”—Jol. 2:31; 1 Tes. 5:4-6.
2 Tok Pol i givim long ol Tesalonaika i stret tru long ol Kristen i stap long “taim bilong las de.” (Dan. 12:4) Pinis bilong dispela taim nogut bilong Satan i kam klostu moa, olsem na Satan i strong long pulim ol manmeri husat i bihainim lotu i tru na bai ol i lusim wok bilong God. Olsem na yumi bihainim savetingting sapos yumi pilim tru tok bilong Pol long was i stap na stap strong long lotu. Bilong wanpela famili Kristen i ken was i stap, em i bikpela samting long olgeta wan wan i mas mekim wok bilong ol olsem Baibel i makim. Orait maritman, maritmeri, na ol pikinini i mas mekim wanem wok bilong helpim famili long “was i stap”?
Ol Maritman—Bihainim “Gutpela Wasman”
3. Olsem 1 Timoti 5:8 i tok, man i gat wanem wok olsem het bilong famili?
3 Baibel i tok: “Het bilong meri em man.” (1 Kor. 11:3) Wanem ol wok man i mas mekim olsem het bilong famili? Baibel i stori long wanpela wok bilong het bilong famili olsem: “Sapos wanpela man i no lukautim lain bilong en stret, na moa yet ol wanhaus bilong en, orait em i givim baksait pinis long bilip na em i nogut moa winim man i no gat bilip.” (1 Tim. 5:8) Tru tumas, man i mas lukautim famili long sait bilong skin. Tasol sapos em i laik helpim famili long was i stap long sait bilong spirit, orait em i no ken tingim wok mani tasol. Em i mas strongim famili long ol samting bilong lotu, olsem helpim olgeta long i go klostu moa long God. (Snd. 24:3, 4) Em bai mekim olsem wanem?
4. Wanem samting bai helpim wok bilong man long strongim famili long sait bilong lotu?
4 “Maritman em i stap het bilong meri bilong en, olsem Krais i stap het bilong kongrigesen,” olsem na em i mas skelim gut na bihainim pasin Jisas i mekim olsem het bilong kongrigesen. (Efe. 5:23) Tingim tok Jisas i mekim long pasin bilong em long pas gut wantaim ol disaipel. (Ritim Jon 10:14, 15.) Man i mas mekim wanem na bai wok bilong em long strongim famili long sait bilong lotu i ken kamap gutpela? Em i mas skelim gut ol tok na ol pasin Jisas i bin mekim olsem “gutpela wasman bilong sipsip,” na “bihainim gut lek mak bilong en.”—1 Pita 2:21.
5. Gutpela wasman i save long wanem ol samting bilong kongrigesen?
5 Wasman na ol sipsip bilong en i pas gut wantaim, taim ol i trastim na save gut long narapela narapela. Wasman i save gut long ol sipsip bilong en, na ol sipsip i trastim na save gut long wasman. Ol i save long nek bilong wasman na i bihainim. Jisas i tok: “Mi save long ol sipsip bilong mi. Na ol sipsip bilong mi i save long mi.” Save bilong em long kongrigesen i no antap antap tasol, nogat. Tok Grik ol i tanim olsem “save” i makim pasin bilong save gut tru long wanpela samting. Yes, Gutpela Wasman i save gut long olgeta wan wan sipsip bilong en. Em i save long ol samting olgeta wan wan i nidim, samting i givim hatwok long ol, na samting ol i strong long mekim. Man i stap gutpela piksa bilong yumi long bihainim, em i save long olgeta liklik samting bilong ol sipsip bilong en. Na ol sipsip i save gut long wasman na trastim wok bilong em long soim rot long ol.
6. Ol maritman i ken mekim wanem bilong bihainim pasin bilong Gutpela Wasman?
6 Bilong bihainim pasin bilong Krais na mekim wok olsem het bilong famili, maritman i mas lain long tingim em yet olsem wanpela wasman na famili bilong en i olsem ol sipsip. Em i mas wok strong long save gut tru long famili bilong en. Yu ting em inap save gut long ol? Yes, em inap, sapos em i toktok gut wantaim ol wan wan bilong famili, putim yau long tingting bilong ol, go pas long samting famili i mekim, pilim tru wok bilong em long wokim ol gutpela disisen long ol samting olsem famili lotu, go long ol miting, autim tok, pilai, na painim amamas. Taim maritman i lain gut long Tok Bilong God na kisim gut save long ol wan wan long famili, famili bai trastim wok bos bilong em na em bai amamas long famili i stap wanbel na mekim lotu i tru.
7, 8. Olsem wanem maritman i ken bihainim Gutpela Wasman long pasin bilong soim olsem em i sori long meri na ol pikinini?
7 Na tu, gutpela wasman i save sori long ol sipsip bilong en. Taim yumi stadi long ol tok bilong Gutnius i stori long laip na wok bilong Jisas, yumi pilim tru pasin sori Jisas i mekim long ol disaipel bilong em. Em i bin ‘lusim laip bilong em bilong helpim ol sipsip.’ Maritman i mas bihainim pasin bilong Jisas na soim olsem em i sori long meri na ol pikinini i stap aninit long em. Em i no ken bosim meri long hatpela pasin, maritman husat i laik bai God i orait long em, em bai wok yet long laikim meri bilong em ‘olsem Krais i laikim kongrigesen.’ (Efe. 5:25) Tok bilong man i mas soim olsem em i tingim meri, long wanem, i stret man i givim ona long meri.—1 Pita 3:7.
8 Bilong skulim ol pikinini, het bilong famili i mas strong long bihainim ol stiatok bilong God. Tasol tu em i mas soim olsem em i sori long ol pikinini, olsem holimpasim ol. Taim em i mas stretim ol, em i mas mekim long gutpela pasin. Sampela pikinini i no save kliagut hariap long ol samting i stret ol i mas mekim. Sapos papa i gat kain pikinini olsem, orait em i mas kamapim moa yet pasin isi. Taim ol man i wok oltaim long bihainim pasin bilong Jisas, haus i stap olsem ples we famili i pilim olsem ol i stap gut na seif. Ol kain famili olsem i pas gut wantaim Jehova olsem man bilong raitim song i tok long en.—Ritim Song 23:1-6.
9. Olsem Noa, ol maritman Kristen i gat wanem wok? Wanem samting bai helpim ol long mekim wok bilong ol?
9 Noa i bin stap long wanpela haptaim we klostu pasin nogut bai pinis. Tasol ‘taim Jehova i mekim bikpela tait i kamap long graun i pulap long ol man i sakim tok,’ em i bin “lukautim Noa, wantaim 7-pela manmeri.” (2 Pita 2:5) Noa i gat wok long helpim famili bilong em long abrusim bagarap long Bikpela Tait. Nau long taim bilong las de, ol het bilong ol famili Kristen tu i mas mekim olsem. (Mat. 24:37) Olsem na em i bikpela samting long ol i mas stadi long gutpela eksampel bilong “gutpela wasman” na wok strong long bihainim pasin bilong em!
Ol Maritmeri—Strongim Famili Bilong Yupela
10. Pasin bilong meri long daun long man i makim wanem samting?
10 Aposel Pol i tok: “Ol maritmeri i mas daun long man bilong ol, olsem ol i daun long Bikpela.” (Efe. 5:22) Dispela tok i no makim olsem maritmeri i samting nating. Paslain long God i wokim namba wan meri, Iv, God i tok: ‘I no gutpela long man i stap wanpis. Mi mas mekim kamap wanpela poroman bilong helpim em.’ (Stt. 2:18) Wok bilong i stap olsem “helpim” na “poroman”—olsem sapotim man taim em i mekim ol wok bilong lukautim famili—em wanpela wok i gat nem.
11. Olsem wanem gutpela maritmeri i strongim famili bilong em?
11 Gutpela maritmeri i mekim ol samting i save helpim famili bilong em. (Ritim Sindaun 14:1.) Meri husat i no gat gutpela tingting i no save rispek long wok bilong man olsem het bilong famili, tasol meri i gat savetingting em i save rispek tru long dispela wok. Em i no bihainim pasin bilong ol manmeri bilong dispela graun, em ol i save sakim tok na strong long bihainim tingting bilong ol yet, nogat, em i save daun long poroman bilong em. (Efe. 2:2) Meri husat i no bihainim gutpela tingting, em i save hariap long mekim tok i daunim man bilong em. Tasol meri i gat savetingting, em i save mekim ol samting bilong strongim ol pikinini bilong em na ol narapela long rispek long man bilong em. Kain meri olsem i save was gut na em i no toktok planti o tok pait wantaim man, nogut em daunim pasin bilong rispek long wok bos bilong man. Na tu, i gat wok long yusim gut mani. Meri i no gat gutpela tingting i save tromoi nating nating mani bilong famili. Tasol meri husat i sapotim gut man em i no save mekim olsem. Long sait bilong mani, em i save wok gut wantaim man. Em i save bihainim gutpela tingting na skelim gut ol samting em i baim. Em i no save putim presa long man i mas wok ovataim.
12. Olsem wanem meri inap helpim famili bilong en long “was i stap”?
12 Gutpela maritmeri i save helpim famili long “was i stap” taim em i helpim man bilong em long skulim ol pikinini long tok bilong God. (Snd. 1:8) Em i givim bel long sapotim Famili Lotu. Na tu, em i sapotim man bilong em taim em i givim tok kaunsel o stretim pikinini bilong ol. Dispela meri i narapela kain long meri husat i no wok gut wantaim man bilong en, ol pikinini bilong dispela meri i karim hevi long sait bilong skin na long sait bilong spirit!
13. Bilong wanem em i bikpela samting long meri i sapotim ol wok tiokratik man bilong en i mekim?
13 Meri husat i save sapotim man i gat wanem tingting taim em i lukim man bilong en i mekim wok insait long kongrigesen Kristen? Em i save amamas! Maski sapos man bilong en em i wanpela kongrigesen sevan, elda, o insait long Hospital Lieson Komiti, o Komiti Bilong Wokim Ol Haus Kingdom, em i amamas long gutpela wok man i holim. Bilong mekim ol tok na wok i sapotim man bilong en, ating em i mas daunim sampela laik bilong em yet. Tasol em i save olsem ol wok tiokratik man i mekim, dispela i helpim famili olgeta long “was i stap” na stap strong long sait bilong lotu.
14. (a) Wanem samting inap givim hatwok long meri i laik sapotim man bilong en? Olsem wanem em inap winim dispela hevi? (b) Olsem wanem meri inap helpim famili olgeta long stap gut?
14 Ating maritmeri bai pilim hatwok long mekim gutpela wok bilong sapotim man taim man i wokim disisen em meri i no wanbel long en. Long dispela taim tu, meri i mekim “pasin isi” na wok gut wantaim man na bai samting em i bin wokim disisen long en bai kamap gutpela. (1 Pita 3:4) Gutpela maritmeri i traim long bihainim gutpela eksampel bilong ol bilipmeri bilong bipo, olsem Sara, Rut, Abigel, na Maria, mama bilong Jisas. (1 Pita 3:5, 6) Na tu, em i bihainim pasin bilong ol meri long nau husat i gat bikpela krismas na ol i “wokabaut long pasin i holi.” (Tai. 2:3, 4) Taim maritmeri i soim olsem em i laikim na rispektim man bilong en, em i helpim marit bilong tupela na i helpim famili olgeta long stap gut. Haus bilong en em i ples we famili i stap belgut na pilim seif. Man i save tingim ol wok bilong Jehova, em bai tingim meri bilong em husat i sapotim em olsem em i dia tumas!—Snd. 18:22.
Ol Yangpela—‘Lukluk Long Ol Samting Yu No Inap Lukim Long Ai’
15. Olsem wanem ol yangpela inap wok wantaim papamama long helpim famili long “was i stap”?
15 Olsem wanem yupela ol yangpela inap wok gut wantaim papamama long helpim famili long “was i stap” na stap strong long sait bilong lotu? Tingim gutpela prais Jehova i laik givim long yu. Ating taim yu pikinini yet, papamama i bin soim yu ol piksa bilong Paradais. Taim yu wok long kamap bikpela, ating ol i yusim Baibel na ol buk na nius Kristen long helpim yu long piksaim long tingting sindaun bilong ol man long nupela taim. Pasin bilong putim tingting i go long wok bilong Jehova na mekim ol samting long laip bilong yu i stret long dispela wok, dispela bai helpim yu long “was i stap.”
16, 17. Ol yangpela i ken mekim wanem bilong winim resis bilong laip?
16 Tingim tok bilong aposel Pol i stap long 1 Korin 9:24. (Ritim.) Long dispela resis bilong kisim laip, yu mas ron olsem yu tingting strong long win. Olsem na makim rot em bai bringim yu i go long kisim dispela prais bilong laip oltaim. Planti i bin larim pasin bilong kisim ol samting bilong skin i pulim ol na ol i no lukluk moa long prais. Em longlong pasin tru! Sapos bikpela samting long laip bilong man em long kamap maniman, dispela i no mekim man i stap amamas tru. Ol samting man inap baim long mani i save stap sotpela taim tasol. Tasol yu mas lukluk long ‘ol samting yu no inap lukim long ai.’ Long wanem, ‘ol samting yu no inap lukim long ai, em bilong oltaim oltaim.’—2 Kor. 4:18.
17 ‘Ol samting yu no inap long ai’ i makim tu ol blesing bilong Kingdom. Mekim ol samting long laip bilong yu we i helpim yu long kisim ol dispela blesing. Yu bai kisim amamas tru taim yu yusim laip bilong yu long mekim wok bilong Jehova. Pasin bilong mekim wok bilong God i opim rot long yu long putim ol mak em yu inap winim long nau na long bihain. a Pasin bilong putim mak long ol wok bilong God yu laik winim, inap helpim yu long tingting strong long ol samting bilong lotu na kisim prais bilong laip oltaim.—1 Jon 2:17.
18, 19. Olsem wanem yangpela i ken save, em i tingim tok i tru olsem samting em yet i bilip long en o nogat?
18 Namba wan samting yupela ol yangpela i mas mekim bilong kirap wokabaut long rot i go long laip, em yupela i mas tingim tok i tru olsem samting yupela yet i bilip long en. Yu mekim olsem? Askim yu yet: ‘Mi save tingim tru Jehova, o mi bihainim nating papamama long mekim ol wok bilong God? Mi wok long kisim ol pasin em God i amamas long en? Mi save wok strong long bihainim gutpela sediul long mekim ol wok bilong lotu i tru, olsem beten oltaim, stadi, go long ol miting, na autim tok? Mi wok long i go klostu long God long rot bilong strongim pasin bilong mi long pas gut wantaim em?’—Jems 4:8.
19 Tingim stori bilong Moses. Maski em i stap wantaim lain i bihainim narapela kastam, em i laik bai ol man i tingim em olsem man i lotuim Jehova, na no ken tingim em olsem pikinini bilong pikinini meri bilong Fero. (Ritim Hibru 11:24-27.) Yupela ol yangpela Kristen tu i mas strong long stap gut long wok bilong Jehova. Long dispela rot yupela bai stap amamas tru, na laip bilong yupela long nau bai i gutpela, na yupela inap bilip na wetim “dispela laip em i laip tru.”—1 Tim. 6:19.
20. Long resis bilong kisim laip, husat bai kisim prais?
20 Long ol resis bilong bipo, wanpela man tasol i winim resis. Resis bilong kisim laip i no olsem. God i laik “kisim bek olgeta kain man na em i laik bai ol i kisim stretpela save long tok i tru.” (1 Tim. 2:3, 4) Planti i bin winim pinis dispela resis, na planti i wok long ron wantaim yu long nau. (Hib. 12:1, 2) Ol manmeri husat i no givap, ol bai kisim prais. Olsem na yu mas tingting strong long winim resis!
21. Bai yumi skelim wanem samting long stadi i kamap bihain long dispela?
21 Dispela ‘bikpela De bilong God i mekim olgeta manmeri i pret nogut tru,’ em bai kamap. (Mal. 4:5) Ol famili Kristen i mas redi i stap taim dispela de i kamap. Em i bikpela samting long olgeta wan wan insait long famili i mas mekim wok bilong ol olsem Baibel i makim. Yu inap mekim wanem narapela samting bilong was i stap long sait bilong spirit na strongim pasin bilong yu long pas gut wantaim God? Stadi i kamap bihain long dispela bai skelim 3-pela samting em bai helpim famili olgeta long stap strong long sait bilong lotu.
[Futnot]
a Lukim Wastaua, Novemba 15, 2010, pes 12-16; Julai 15, 2004, pes 21-23.
Yu Lainim Wanem Samting?
• Bilong wanem em i bikpela samting long ol famili Kristen i “was i stap”?
• Olsem wanem maritman inap bihainim pasin bilong Gutpela Wasman?
• Olsem wanem gutpela maritmeri inap sapotim man bilong em?
• Olsem wanem ol yangpela inap helpim famili bilong ol long was i stap long sait bilong spirit?
[Askim Bilong Stadi]
[Piksa long pes 9]
Meri i sapotim man bilong en, em i dia tumas long man