‘Savetingting Bilong God i Daun Tumas’

“Olaman! Ol blesing na savetingting na save bilong God i daun tumas olsem solwara. Yumi man i no inap tru long painim as bilong ol pasin em i save skelim ol man long en. Na yumi no inap tru long kliagut long olgeta rot bilong en.”​—ROM 11:33.

1. Wanem nambawan gutpela blesing ol Kristen i baptais pinis i kisim?

 WANEM nambawan gutpela blesing yu bin kisim? Ating pastaim yu tingim wanpela gutpela wok yu bin kisim o wanpela i givim ona long yu. Tasol nambawan gutpela blesing yumi ol Kristen i baptais pinis i kisim, em yumi inap pas gut wantaim God tru, Jehova. Dispela i mekim na ‘God i save long yumi.’​—1 Kor. 8:3; Gal. 4:9.

2. Taim yumi save long Jehova na em i save long yumi, bilong wanem dispela em i nambawan gutpela blesing tru?

² Taim yumi save long Jehova na em i save long yumi, bilong wanem dispela em i nambawan gutpela blesing tru? Dispela i olsem, long wanem, em i Bikman tru i winim olgeta narapela long heven na graun, na tu, em i Man Bilong Sambai long ol lain em i laikim tumas. Profet Nahum i tok: “Bikpela em i save mekim gutpela pasin long yumi. Long taim bilong hevi, em i save kamap olsem ples hait bilong ol manmeri bilong en, na em i helpim ol manmeri i save go long em.” (Nah. 1:7; Sng. 1:6) Tru tumas, bilong yumi ken kisim laip oltaim, yumi mas save long God tru na Pikinini bilong em, Jisas Krais.​—Jon 17:3.

3. Bilong save long God, yumi mas save long wanem ol samting?

³ Taim man i save long nem bilong God, dispela samting tasol i no makim olsem em i save long God. Nogat. Yumi mas save gut long em olsem wanpela Pren, yumi mas kliagut long ol samting em i laikim na em i no laikim. Taim wokabaut bilong yumi i stret wantaim dispela save, dispela tu i bikpela samting bilong soim olsem yumi save gut tru long God. (1 Jon 2:4) Tasol i gat narapela bikpela samting yumi mas save long en sapos yumi laik save gut long Jehova. Yumi mas save long ol samting em i bin mekim, na tu, yumi mas save olsem wanem na bilong wanem em i bin mekim ol dispela samting. Taim yumi save gut long ol samting Jehova i tingting pinis long mekim, bai yumi pilim moa yet ‘savetingting bilong God i daun tumas.’​—Rom 11:33.

God Bilong Kamapim Ol Samting Em i Tingting Pinis Long Mekim

4, 5. (a) Long Baibel, dispela tok “samting God i tingting pinis long mekim” i makim wanem samting? (b) Stori long olsem wanem man i ken bihainim narapela narapela rot bilong inapim samting em i tingting pinis long mekim.

⁴ Jehova em i God bilong kamapim ol samting em i tingting pinis long mekim, na Baibel i stori long samting em i “tingting pinis long mekim long bipo yet.” (Efe. 3:​10, 11) Wanem mining bilong dispela tok? Long Baibel, dispela tok i makim olsem God i makim pinis wanpela samting long mekim, na i gat narapela narapela rot bilong kamapim dispela samting.

⁵ Olsem: Wanpela man i laik go long wanpela hap. Em i putim mak long kamap long dispela hap, em samting em i tingting pinis long mekim. Bilong kamap long dispela hap, em inap kalap long kar, bas, o trak, na i gat narapela narapela rot em i ken bihainim. Taim em i bihainim rot em i bin makim, ating sampela samting i kamap, olsem bikpela ren, o planti trafik, o rotblok, na dispela i mekim na em i mas painim narapela rot. Tasol maski em i mas  bihainim narapela rot, em i kamap yet long hap em i bin makim.

6. Olsem wanem Jehova i soim olsem em inap bihainim narapela narapela rot bilong kamapim samting em i tingting pinis long mekim?

⁶ Jehova tu i redi long bihainim narapela narapela rot bilong kamapim samting em i tingting pinis long en long bipo yet. Jehova i larim ol ensel na ol man i makim rot ol yet i laik bihainim, em i tingim dispela na em i redi long bihainim narapela rot bilong kamapim samting em i tingting pinis long mekim. Olsem, yumi ken skelim olsem wanem Jehova i tingim Pikinini bilong promis. Pastaim, Jehova i tokim namba wan man na meri: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stt. 1:28) Olsem wanem? Pasin bikhet long gaden Iden i pasin rot bilong God long kamapim samting em i tingting pinis long mekim? Nogat tru! Taim dispela samting i kamap, wantu Jehova i bihainim narapela “rot” bilong kamapim samting em i tingting pinis long mekim. Em i tok profet olsem wanpela lain pikinini bai kamap na em bai pinisim samting nogut em Adam tupela Iv i bin kamapim.​—Stt. 3:15; Hib. 2:​14-17; 1 Jon 3:8.

7. Tok i stap long Kisim Bek 3:14 (NW) i givim wanem skul long yumi long Jehova?

⁷ Taim samting i kamap, Jehova i redi long bihainim narapela rot bilong kamapim samting em i tingting pinis long mekim, na dispela i stret wantaim tok i makim em yet. Taim Moses i bin tokim Jehova long ol samting we inap pasim em long mekim wok bilong em, Jehova i tokim em: “ ‘Mi bai kamap wanem wanem kain mi laikim.’ Na em i tok moa olsem: ‘Yu mas tokim ol Israel olsem, “Mi bai kamap em i bin salim mi i kam long yupela.” ’ ” (Kis. 3:​14, NW ) Tru tumas, Jehova inap kamap wanem wanem kain em i mas kamap bilong inapim samting em i tingting pinis long mekim! Aposel Pol i stori gut long dispela samting long Buk Rom sapta 11. Long dispela hap em i stori long wanpela diwai oliv. Taim yumi skelim dispela tok piksa, bai yumi pilim tru olsem savetingting bilong Jehova i daun tumas, maski yumi lain bilong kisim laip long heven o stap oltaim long graun.

Pikinini Bilong Promis

8, 9. (a) Wanem 4-pela samting bai helpim yumi long kliagut long tok piksa bilong diwai oliv? (b) Bekim bilong wanem askim i soim olsem Jehova i redi long bihainim narapela rot bilong kamapim samting em i tingting pinis long mekim?

⁸ Bilong yumi ken kliagut long tok piksa bilong diwai oliv, pastaim yumi mas save long 4-pela samting bilong pikinini bilong promis em ol i insait long samting Jehova i tingting pinis long mekim. Namba 1, Jehova i bin promisim Abraham olsem long rot bilong lain pikinini bilong em, olsem ol tumbuna pikinini, ‘olgeta lain pipol long graun bai ol i askim God long givim blesing long ol.’ (Stt. 22:​17, 18) Namba 2, lain Israel i kamap long rot bilong Abraham, ol i inap kamap ‘lain manmeri i mekim wok pris.’ (Kis. 19:​5, 6) Namba 3, taim planti bilong lain Israel i sakim Mesaia, Jehova i bihainim narapela rot long kamapim ‘lain manmeri i mekim wok pris.’ (Mat. 21:43; Rom 9:​27-29) Namba 4, maski Jisas em i namba wan pikinini bilong lain pikinini bilong Abraham, ol narapela tu inap insait long dispela lain pikinini.​—Gal. 3:​16, 29.

⁹ Buk Revelesen i kamapim sampela save moa long dispela 4-pela samting. Olsem, 144,000 manmeri bai mekim wok king na pris wantaim Jisas long heven. (Rev. 14:​1-4) Baibel i kolim ol olsem “lain bilong Israel.” (Rev. 7:​4-8) Tasol olsem wanem? Olgeta bilong lain 144,000 ol i Israel bilong skin, ol Juda tasol? Bekim bilong dispela askim i soim olsem Jehova i redi long bihainim narapela rot bilong kamapim samting em i tingting pinis long mekim. Nau yumi ken skelim olsem wanem pas aposel Pol i raitim long ol Rom i helpim yumi long bekim dispela askim.

‘Lain Manmeri i Mekim Wok Pris’

10. Ol manmeri bilong lain Israel inap kamap wanem samting?

¹⁰ Olsem yumi stori pinis, pastaim ol manmeri bilong lain Israel tasol inap kamap ‘lain  manmeri i mekim wok pris na stap ol manmeri bilong God.’ (Ritim Rom 9:​4, 5.) Tasol wanem samting bai kamap taim Pikinini bilong promis i kam? Lain Israel bilong skin bai inapim dispela namba 144,000 na kamap ol Israel bilong spirit, em ol namba tu lain pikinini bilong Abraham?

11, 12. (a) Long wanem taim God i kirap makim ol lain husat bai insait long Kingdom bilong heven? Planti Juda long dispela taim i mekim wanem? (b) Olsem wanem Jehova i bin inapim ‘namba olgeta’ bilong dispela lain em ol bai kamap pikinini bilong Abraham?

¹¹ Ritim Rom 11:​7-10. Long taim bilong ol aposel, lain Juda i sakim Jisas. Olsem na rot i op long ol man bilong ol narapela lain inap insait long lain pikinini bilong Abraham, i no ol Juda tasol. Tasol long Pentikos 33 C.E., taim God i kirap long makim ol man husat bai kamap ‘lain manmeri i mekim wok pris,’ sampela Juda i gat gutpela bel ol i insait long dispela lain. Ol i sampela tausen tasol, ol i olsem “hap lain” bilong lain Juda olgeta.​—Rom 11:5.

¹² Tasol olsem wanem Jehova bai inapim ‘namba olgeta’ bilong lain pikinini bilong Abraham? (Rom 11:​12, 25) Skelim bekim bilong aposel Pol, em i tok: “I no olsem tok bilong God i lus nating. Nogat. Long wanem, planti bilong ol man i kamap long lain Israel [bilong skin], ol i no Israel tru. Maski ol i kamap long lain bilong Abraham, long ai bilong God i no olgeta i stap olsem pikinini tru bilong Abraham. . . . Ol pikinini i kamap long lain bilong Abraham, ol i no pikinini tru bilong God. Tasol ol pikinini i kamap long rot bilong promis, long ai bilong God ol i pikinini bilong Abraham.” (Rom 9:​6-8) Olsem na Jehova i no ting olsem ol man husat i insait long lain pikinini, ol i mas tumbuna pikinini bilong Abraham long sait bilong skin.

Tok Piksa Bilong Diwai Oliv

13. (a) Tok piksa bilong diwai oliv i makim wanem samting? (b) Rop i makim wanem? (c) Diwai i makim wanem? (d) Ol han i makim wanem?

¹³ Aposel Pol i tok dispela lain husat i kamap ol pikinini bilong Abraham, ol i olsem ol han bilong diwai oliv. a (Rom 11:21) Tok piksa bilong diwai oliv bilong gaden i makim truim bilong ol samting bilong kontrak bilong Abraham olsem God i tingting pinis long en. Rop bilong diwai i holi na i makim Jehova, em i Man i givim laip long lain Israel bilong spirit. (Ais. 10:20; Rom 11:16) Diwai i makim Jisas olsem nambawan pikinini bilong lain pikinini bilong Abraham. Ol han bilong diwai i makim ‘namba olgeta’ bilong nambatu lain pikinini bilong Abraham.

14, 15. “God i bin rausim” husat long diwai oliv bilong gaden? Em i skruim husat i go long en?

¹⁴ Long tok piksa bilong diwai oliv, ol Juda  bilong skin husat i sakim Jisas, ol i olsem ol han bilong diwai oliv em “God i bin rausim.” (Rom 11:17) Olsem na ol i no inap insait long lain pikinini bilong Abraham. Tasol husat bai kisim ples bilong ol? Ol Juda bilong skin ol i hambak long ol i kam long lain bilong Abraham, ol bai no wanbel long bekim bilong dispela askim. Tasol Jon Bilong Baptais i bin tokim ol pinis olsem Jehova inap mekim ol ston i kamap ol pikinini bilong Abraham, sapos em i laik mekim olsem.​—Luk 3:8.

¹⁵ Orait Jehova i mekim wanem bilong kamapim samting em i tingting pinis long mekim? Pol i tok olsem God bai skruim ol han bilong wel diwai oliv i go long diwai oliv bilong gaden, ol i bilong kisim ples bilong ol han God i bin rausim. (Ritim Rom 11:​17, 18.) Olsem na ol Kristen God i bin makim bilong ol narapela lain, olsem sampela long kongrigesen long Rom, ol i olsem ol han bilong wel diwai oliv em God i skruim i go long diwai oliv bilong gaden. Long dispela rot ol i insait long lain pikinini bilong Abraham. Pastaim ol i olsem ol han bilong wel diwai oliv, ol i no gat rot bilong insait long kontrak bilong Abraham. Tasol Jehova i opim rot long ol inap kamap olsem ol Juda bilong spirit.​—Rom 2:​28, 29.

16. Olsem wanem aposel Pita i stori long God i kamapim lain Israel bilong spirit?

¹⁶ Aposel Pita i stori long dispela olsem: “Yupela ol man i bilip [lain Israel bilong spirit, ol Kristen bilong ol arapela lain i insait long en], olsem na em [Jisas Krais] i dia tumas long yupela. Tasol long ol man i no bilip, ‘dispela ston ol wokman i sakim, em i kamap ston i stap antap long kona bilong haus.’ Na em i kamap ‘ston i mekim ol i pundaun na bikpela ston i bagarapim bel bilong ol.’ . . . Tasol yupela i ‘wanpela lain God i makim, yupela ol pris i mekim wok king, yupela wanpela lain holi, yupela ol manmeri bilong God stret. Na yupela i ken tokaut long olgeta hap long ol gutpela pasin’ bilong dispela man i bin singautim yupela long lusim tudak na kam insait long gutpela lait bilong em. Bipo yupela i no lain manmeri  bilong God, tasol nau yupela i lain manmeri bilong em. Pastaim God i no bin marimari long yupela, tasol nau em i marimari long yupela.”​—1 Pita 2:​7-10.

17. Olsem wanem Jehova i mekim samting ‘em ol man i no save mekim’?

¹⁷ Jehova i mekim samting em planti man bai ting em i narapela kain tru. Pol i tok dispela “em samting ol [man] i no save mekim.” (Rom 11:24) Bilong wanem i olsem? Ol man bai ting em narapela kain tru long skruim han bilong wel diwai oliv i go long diwai oliv bilong gaden, tasol sampela fama long taim bilong ol aposel i bin mekim olsem. b Na olsem tasol, Jehova tu i bin mekim narakain samting. Ol Juda i ting, ol man bilong ol arapela lain i no inap karim gutpela kaikai. Tasol Jehova i mekim ol dispela man i kamap hap bilong “wanpela lain” i karim kaikai bilong Kingdom. (Mat. 21:43) Long 36 C.E. God i makim Kornilius, em i namba wan man bilong arapela lain husat i kamap Kristen God i bin makim. Long dispela taim rot i op long ol man bilong ol arapela lain em ol i no bin katim skin, ol inap kamap han bilong diwai oliv bilong gaden.​—Apo. 10:​44-48. c

18. Wanem rot i op long ol Juda bilong skin bihain long 36 C.E.?

¹⁸ Olsem wanem? Dispela i makim olsem bihain long 36 C.E., i no gat rot moa long ol Juda bilong skin long insait long lain pikinini bilong Abraham? Nogat, i no olsem. Pol i tok: “Ol dispela han em i bin rausim [ol Juda bilong skin], sapos ol i kirap gen long bilip, orait God bai skruim ol i go bek gen long diwai. . . . Yu bin stap han bilong wel diwai oliv na God i bin katim yu na skruim yu i go long diwai oliv bilong gaden, em samting ol i no save mekim. Olsem na tru tumas, em bai isi moa long God i kisim ol han bilong diwai oliv bilong gaden na skruim ol i go bek long diwai em pastaim ol i bin stap long en.” d​—Rom 11:​23, 24.

“God Bai Kisim Bek Olgeta Israel”

19, 20. Olsem tok piksa bilong diwai oliv i makim, Jehova bai mekim wanem samting?

¹⁹ Yes, olsem Jehova i tingting pinis long en, ol samting bilong “lain Israel bilong God” i wok long kamap long rot i nambawan tru. (Gal. 6:16) Olsem Pol i tok, “God bai kisim bek olgeta Israel.” (Rom 11:26) Long taim Jehova i makim, “olgeta Israel”​—em olgeta bilong lain Israel bilong spirit​—ol bai mekim wok king na pris long heven. I no gat wanpela samting inap pasim Jehova long kamapim samting em i tingting pinis long mekim!

²⁰ Olsem Baibel i tok profet long en, lain pikinini bilong Abraham​—Jisas Krais na lain 144,000​—ol bai givim ol blesing long “olgeta manmeri bilong graun.” (Rom 11:12; Stt. 22:18) Dispela bai helpim olgeta manmeri bilong God. Tru tumas, taim yumi tingim wok bilong Jehova long kamapim samting em i tingting pinis long en long bipo yet, yumi kirap nogut long “ol blesing na savetingting na save bilong God i daun tumas.”​—Rom 11:33.

[Ol Futnot]

Yu Tingim Yet?

• Pasin bilong Jehova long inapim ol samting em i tingting pinis long mekim i givim yumi wanem skul long pasin bilong em?

• Long Rom sapta 11, wanem mining bilong . . .

tok piksa bilong diwai oliv?

rop bilong en?

diwai?

ol han bilong en?

• Bilong wanem pasin bilong skruim han i go long diwai ‘em samting ol man i no save mekim’?

[Askim Bilong Stadi]

[Blok/Piksa long pes 24]

 Skruim Han Bilong Wel Diwai Oliv​—Wai?

▪ Lucius Junius Moderatus Columella, em wanpela soldia bilong Rom na fama husat i bin stap long taim bilong ol aposel. Em i gat nem olsem man bilong raitim 12-pela buk i stori long wok fama samting.

Long namba 5 buk, em i kolim wanpela savetok bilong bipo: “Man husat i brukim graun bilong gaden oliv, i olsem em i askim ol diwai oliv long karim kaikai; man i putim pekpek bilong bulmakau long gaden, i olsem em i askim strong ol diwai long karim kaikai; man i katim han bilong ol diwai, i olsem em i fosim ol diwai long karim kaikai.”

Na tu, em i stori long ol diwai i gro gut tasol ol i no karim kaikai, na bilong stretim dispela hevi em i tok: “Em gutpela long wokim hul long diwai na putim kru bilong wel diwai oliv i go insait long hul; dispela bai mekim na diwai i karim kaikai.”

[Piksa long pes 23]

Yu kliagut long tok piksa bilong diwai oliv?