“Wanpela Gutpela Wasman na Pren Tru”

JOHN (JACK) BARR, em i wanpela memba bilong lain Gavening Bodi Bilong Ol Witnes Bilong Jehova, em i pinisim wok bilong em hia long graun long Sarere moning, Disemba 4, 2010. Em i gat 97 krismas. Ol man i tok em i “wanpela gutpela wasman na pren tru.”

Brata Barr i bon long Aberdeen, Skotlan, em las bon bilong famili i gat 3-pela pikinini. Papamama bilong em ol i Kristen God i bin makim. Planti taim Brata Barr i stori long amamas bilong famili bilong em taim em i yangpela. Em i amamas tru long papamama bilong em i stap gutpela piksa em i ken bihainim.

Taim Brata Barr em i tineja, em i hatwok tru long toktok wantaim ol man em i no save long ol. Tasol em i bin wok strong tru long winim dispela hevi, na long wanpela Sande apinun long 1927, taim em i gat 14 krismas, em i tokim papa bilong em olsem em i redi long autim tok wantaim em long ol haus. Dispela em i kirap bilong wok bilong em. Kirap long dispela de na i go inap long taim em i dai, Brata Barr i givim bel long autim gutnius.

Wanpela bikpela eksiden i painim mama bilong em na klostu mama i dai. Dispela i mekim na yangpela Jack i kirap tingting gut long as bilong i stap bilong yumi ol man, na long 1929 em i dediketim laip bilong em long Jehova na kisim baptais taim rot i op, em long 1934. Na long 1939, em i kamap wanpela bilong famili Betel long London, Inglan. Dispela em kirap bilong fultaim sevis bilong em, em i mekim inap 71 yia.

Long Oktoba 29, 1960, Brata Barr i kisim wanpela gutpela poroman tru, em i maritim Mildred Willett husat i bin mekim wok painia na wok misineri inap longpela taim pinis. Brata na Sista Barr i gat nem olsem ol i pas gut wantaim na stap gutpela piksa, na ol i stap olsem i go inap long Mildred i pinisim wok bilong em hia long graun long Oktoba 2004. Brata na Sista Barr i bin ritim Baibel wantaim long olgeta de bilong ol yia tupela i bin marit.

Ol man husat i save long Jack Barr, ol i tingim em olsem man husat i save givim gutpela skultok​—oltaim tok bilong em i kamapim stretpela tingting, na i gutpela, na Baibel i as bilong en. Em i man bilong wok strong, em i gutpela wasman i save tingim ol narapela na em i gutpela pren. Ol tok bilong em na ol beten bilong em i kamapim klia olsem em i laikim tumas tok i tru na em i pas gut wantaim Jehova.

Yumi bai misim tru Brata Barr, tasol yumi amamas wantaim em long em i kisim pinis laip we em i no inap i dai moa. Em samting em i bin wet tru long kisim na planti taim em i toktok long en. Em dispela samting tasol em i laik kisim.​—1 Kor. 15:​53, 54. a

[Futnot]