Yu Save Amamas Tru Long Tok Bilong God?

LORRAINE i tok: “Taim mi kirap ritim Baibel long olgeta de, em i hatwok long mi, na mi no kisim amamas long en. Mi no kisimgut as bilong ol tok, na taim mi ritim, tingting bilong mi i wokabaut.”

Sampela moa ol i tokaut olsem taim ol i kirap nupela long ritim Baibel, ol i no kisim amamas long en. Tasol ol i ritim ritim na ol i no les, long wanem, ol i save i stret long ol i mas ritim Ol Skripsa Holi. Marc i tok: “Em isi long larim ol samting i pulim nabaut tingting na mi no ritim Baibel na mekim stadi. Mi mas beten planti taim na taitim bun tru bambai wok bilong ritim Baibel i kamap samting mi save mekim long olgeta de.”

Orait yu ken mekim wanem bilong kisim pasin bilong laikim moa yet Tok Bilong God? Olsem wanem yu ken kisim amamas long ritim? Tingim ol tok i stap daunbilo.

Ol Mak Bilong Winim na Pasin Bilong Mekim

Taim yu laik ritim Baibel, beten na putim tingting olgeta i go long en. Askim Jehova long helpim yu long kisim laik bilong stadi long Tok bilong em. Beten askim em long helpim tingting na bel bilong yu long kliagut moa long savetingting bilong em. (Sng. 119:34) Sapos yu no mekim olsem, ating i no longtaim na bai yu mekim nating stadi long Baibel, na bihain bai yu lusim laik bilong mekim. Lynn i tok: “Sampela taim mi ritim Baibel hariap tumas na sampela gutpela tok bilong en i lus na mi no kisim liklik. Planti taim mi no kisimgut ol bikpela tok. Tasol mi save beten askim Jehova long helpim mi long bosim gut tingting, na dispela i mekim na tingting bilong mi i no wokabaut.”

Tingim tru ol samting yu lainim. Tingim, pasin bilong kisimgut na bihainim ol tok i tru bilong Baibel em inap helpim yu long i stap laip. Olsem na yu mas wok strong long painim ol tok i helpim yu na bihainim ol dispela tok. Chris i tok: “Mi save painim ol tok i helpim mi long luksave long ol tingting kranki i stap long tingting na bel bilong mi. Mi amamas taim mi lukim olsem Baibel na planti buk na nius bilong yumi i gat ol tok i save helpim mi, maski ol man bilong raitim i no save long mi.”

Putim ol mak yu inap winim. Traim long kisim sampela nupela save long ol man Baibel i stori long ol. Yu inap painim planti gutpela stori bilong ol long buk Insight on the Scriptures o Watch Tower Publications Index. Taim yu save gut long ol man na meri em Baibel i stori long ol, em ol i gat ol pasin na filings bilong ol, i olsem yu lukim ol long ai bilong yu.

Lainim ol nupela rot bilong toktok gut wantaim ol man long Baibel. (Apo. 17:​2, 3) Sophia i save tingim dispela samting taim em i stadi. Em i tok: “Mi gat laik long lainim ol nupela rot bilong toktok gut wantaim ol man long wok autim tok na long ol narapela taim, bambai mi ken kamapim klia ol tok i tru bilong Baibel. Wastaua i gutpela tul tru bilong helpim yumi long mekim olsem.”​—2 Tim. 2:15.

Piksaim long tingting ol stori bilong Baibel. Hibru 4:12 i tok: “Tok bilong God i gat laip.” Taim yu ritim Baibel, pilim ol tok bilong God na piksaim long tingting ol samting ol man bilong Baibel i bin lukim. Traim long harim ol samting ol i harim, na pilim ol samting ol i  pilim. Tingim ol samting i bin painim ol na olsem wanem dispela i stret wantaim ol samting i painim yu. Kisim skul long ol samting ol i bin mekim. Dispela bai helpim yu long kisimgut ol stori bilong Baibel na putim gut long tingting.

Ol skripsa i hatwok long kisimgut, makim hap taim bilong stadi long ol na painim ol tok i kamapim mining bilong ol bambai yu ken kliagut long ol. Makim bikpela hap taim bilong mekim stadi. Ating sampela gutpela askim bai kamap em yu mas stadi moa long en. Lukim long dikseneri ol wed yu no klia long en, na skelim ol futnot na indeks bilong Baibel. Sapos yu wok strong long kisim save long ol skripsa na bihainim ol tok yu ritim, bai yu kisim bikpela amamas moa long Tok Bilong God olsem man bilong raitim song, em i tok: “Mi save holim tok bilong yu [God] oltaim oltaim. Na dispela tok i save mekim bel bilong mi i amamas tru.”​—Sng. 119:111.

No ken hariap hariap long ritim. Bihainim gutpela tingting bilong makim hap taim bilong stadi. Em i mas stret wantaim hap taim yu makim bilong redim ol tok bilong ol miting bilong kongrigesen. Raquel i tok: “Planti taim bel bilong mi i no stap isi, na mi hatwok long putim tingting i go long stadi. Olsem na mi save mekim ol sotpela stadi. Dispela i mekim na stadi i save helpim mi gut.” Chris i tok: “Taim mi pilim olsem mi mas mekim hariap stadi bilong mi, nau bel i gat tok, long wanem, mi no inap tingim planti tok. Ol dispela tok i no go daun long bel bilong mi.” Olsem na no ken hariap long mekim stadi.

Kisim pasin bilong laikim moa yet tok bilong God. Aposel Pita i tok: “Olsem ol nupela bebi i laikim tumas susu, yupela i mas lain long laikim tumas gutpela susu i kam long tok bilong God. Na . . . yupela bai kamap strong na God bai kisim bek yupela.” (1 Pita 2:2) Ol bebi i no gat wok long lain long laikim susu. Dispela laik i stap pinis long ol. Tasol Baibel i tok yumi mas wok long kisim pasin bilong laikim tok bilong God. Sapos yu ritim wanpela pes tasol bilong Baibel long olgeta de, i no longtaim na bai yu kisim dispela laik. Pastaim yu hatwok, tasol i no longtaim na bai yu kisim amamas long en.

Tingim tingim long bel ol tok bilong Baibel. Sapos yu tingim gut long bel ol tok yu ritim, dispela bai helpim yu gut. Em bai helpim yu long bungim save yu gat long ol narapela narapela skripsa. I no longtaim na bai yu kisim savetingting, em samting yu bai amamas tru long en.​—Sng. 19:14; Snd. 3:3.

 Hap Taim Yu Lusim Bai Helpim Yu

Bilong holimpas pasin bilong stadi gut oltaim, yu mas wok strong, tasol bai yu kisim gutpela samting tru long en. Bai yu kliagut moa long mining bilong ol tok. (Hib. 5:​12-14) Pasin bilong skelim gut ol samting na savetingting yu kisim long Baibel bai mekim yu stap amamas, bel isi, na belgut. Ol savetingting i stap long Baibel em i olsem wanpela “diwai bilong givim laip” long ol man i holimpas na bihainim.​—Snd. 3:​13-18.

Sapos yu stadi gut long Baibel, bai yu pilim tru hevi bilong narapela. (Snd. 15:14) Em bai helpim yu long givim long man ol gutpela tok em Baibel i as bilong en. Sapos ol tok yu ritim long Baibel na long ol buk bilong “gutpela wokboi i gat savetingting” i stiaim ol disisen yu mekim, ol tok bilong Jehova bai givim nupela strong long yu na helpim yu long sanap strong. (Mat. 24:45) Bai yu tingim olsem ol gutpela samting bai kamap, na bai yu larim tok bilong Baibel i bosim wokabaut bilong yu. Na tu, olgeta samting yu mekim bilong pas gut wantaim God bai kamap gutpela.​—Sng. 1:​2, 3.

Sapos pasin bilong laikim tru God i pulap long bel bilong yu, dispela bai kirapim yu long autim bilip bilong yu long ol man. Dispela tu inap givim bikpela amamas long yu. Sophia i wok strong long putim kain kain skripsa long tingting na yusim ol bilong kirapim tingting bilong man bilong haus, na bai wok Kristen bilong em i kamap gutpela na em i amamas long en. Em i tok: “Taim mi autim tok bilong Baibel na mi lukim tingting bilong ol man i kirap, mi amamas tru.”

Tasol pasin bilong amamas long Tok Bilong God i save helpim yumi long wanpela bikpela samting tru​—em long pas gut wantaim Jehova. Taim yu stadi long Baibel, bai yu kisim save long ol lo bilong Jehova, na pilim tru pasin laikim na stretpela pasin bilong em, na pasin bilong em long givim samting. I no gat narapela wok i bikpela samting olsem dispela o inap helpim yu gut olsem. Givim bel tru long stadi long Baibel. Hap taim yu lusim long mekim olsem, em i gat gutpela pe bilong en.​—Sng. 19:​7-11.

[Blok/Ol Piksa long pes 5]

ROT BILONG RITIM BAIBEL

▪ Taim yu laik ritim Baibel, beten na putim tingting olgeta i go long en.

▪ Tingim tru ol samting yu lainim.

▪ Putim ol mak yu inap winim.

▪ Lainim ol nupela rot bilong toktok gut wantaim ol man long Baibel.

▪ Piksaim long tingting ol stori bilong Baibel.

▪ Ol skripsa i hatwok long kisimgut, makim hap taim bilong stadi long ol na painim ol tok i kamapim mining bilong ol bambai yu ken kliagut long ol.

▪ No ken hariap hariap long ritim.

▪ Kisim pasin bilong laikim moa yet tok bilong God.

▪ Tingim tingim long bel ol tok bilong Baibel.

[Piksa long pes 4]

Taim yu ritim Baibel, piksaim olsem yu yet i stap insait long dispela stori