“Bringim Ol Skrol”

APOSEL POL i mekim dispela tok taim em i tokim Timoti, wanwok misineri bilong em, long bringim sampela samting i gat ol rait long en. Pol i tok long wanem ol kain skrol? I gat wanem as na em i mekim dispela tok? Na askim bilong em inap givim wanem skul long yumi?

Taim Pol i raitim dispela tok long 65 C.E. samting, ol i bin brukim ol 39 buk bilong Ol Skripsa Hibru i go long 22 o 24 buk, na planti bilong ol i stap long ol narapela narapela skrol. Profesa Alan Millard i tok olsem long taim bilong Pol ol dispela skrol i gat bikpela pe, “tasol . . . ol man i gat mani ol inap baim.” Sampela i gat rot long ol inap kisim wanpela. Olsem: Man Itiopia i gat wanpela skrol long karis bilong em na “em i wok long ritim strong buk bilong profet Aisaia.” Em i “wanpela bikman i wok aninit long Kandasi, kwin bilong ol Itiopia. Em i save bosim olgeta mani samting bilong kwin.” I luk olsem em i gat mani inap long baim sampela skrol i gat ol tok bilong God long en.​—Apo. 8:​27, 28.

Pol i tokim Timoti: “Taim yu kam, yu mas bringim dispela longpela saket mi bin lusim long Troas wantaim Karpus. Na bringim ol skrol, na tu, yu mas bringim ol dispela skin bilong animal i gat ol rait long en.” (2 Tim. 4:13) Dispela i makim olsem Pol yet i mas i gat sampela ol buk samting. Long laibreri bilong em, Tok Bilong God i mas nambawan samting. Wanpela saveman bilong Baibel, A. T. Robertson i stori long “ol skin bilong animal” long dispela ves, em i tok: “Em ol olpela kopi bilong ol buk bilong Olpela Testamen. Skin bilong animal i gat rait long en i gat bikpela pe moa winim ol pepa bilong wel pitpit.” Long taim Pol i yangpela, ‘Gamaliel em i tisa bilong em.’ Gamaliel em man bilong skulim ol man long Lo Bilong Moses na ol man i rispektim em. Olsem na yumi ken ting Pol i bin holim sampela kopi bilong ol skrol i gat Tok Bilong God long en.​—Apo. 5:34; 22:3.

Ol Kristen i Yusim Ol Skrol

Tasol planti man i no gat ol skrol bilong ol yet bilong Baibel. Orait, olsem wanem planti Kristen long dispela taim inap harim o ritim Tok Bilong God? Yumi inap kisim sampela save long dispela samting long pas Pol i bin raitim long Timoti long bipo. Em i tok: “Taim mi no kam yet, yu mas mekim yet wok bilong rit long ai bilong ol man, na givim ol gutpela tok, na skulim ol man.” (1 Tim. 4:13) Pasin bilong rit long ai bilong ol manmeri em samting ol i save mekim long ol miting bilong kongrigesen Kristen, em wanpela pasin lain bilong God i save mekim kirap long taim bilong Moses na i kam.​—Apo. 13:15; 15:21; 2 Kor. 3:15.

Timoti em i wanpela elda, na em i mas “mekim yet wok” long ritim strong Tok Bilong God, dispela bai helpim ol man husat i no gat kopi bilong ol yet. Long taim bilong ritim Tok Bilong God long ai bilong ol man, olgeta manmeri i  save putim gut yau na bai wanpela tok i no ken lus nating, na taim ol i go long haus, ol papamama na pikinini i bin stori long ol dispela tok ol i harim long ol miting.

Longpela bilong Detsi Skrol i gat tok bilong Aisaia long en, em inap olsem 7 mita samting. I gat stik long tupela arere bilong ol skrol na i gat karamap bilong lukautim, dispela i mekim ol skrol i hevi. Ating planti Kristen i no inap karim planti skrol i go long autim tok. Maski sapos Pol i holim sampela skrol bilong em yet long yusim, ating em i no inap karim olgeta skrol bilong em long taim em i raun. Em i bin lusim sampela long haus bilong pren bilong em Karpus long Troas.

Skul Yumi Kisim Long Pasin Bilong Pol

Em namba tu taim Pol i kalabus long Rom, na paslain long em i bin tokim Timoti long bringim ol skrol samting, em i tok: “Mi mekim pinis dispela gutpela pait, mi ran pinis long dispela resis, . . . Kirap long nau na i go, wanpela kraun bilong stretpela pasin i wetim mi i stap.” (2 Tim. 4:​7, 8) Ating em i raitim dispela tok long 65 C.E. samting, long taim Niro i mekim nogut long ol Kristen. Long dispela taim em i bin karim bikpela hevi long kalabus. Em i save olsem i no longtaim na ol bai kilim em i dai. (2 Tim. 1:16; 4:6) Yumi ken save long as na Pol i laik tru long kisim ol skrol bilong em. Em i bilip olsem em i bin winim pinis dispela gutpela pait, tasol em i laik tru long stadi long Tok Bilong God bilong kisim yet strong.

Ating Timoti i stap yet long Efesus taim em i kisim tok bilong Pol. (1 Tim. 1:3) Bilong lusim Efesus na bihainim rot i go long Troas na i go long Rom, em i mas raun inap olsem 1,600 kilomita. Long seim pas, Pol i tokim Timoti: “Yu mas wok strong tru long kam kamap paslain long taim bilong kol.” (2 Tim. 4:21) Yumi no save, Timoti i bin painim wanpela sip long kisim em i go long Rom long taim olsem Pol i laikim o nogat, Baibel i no tokaut long dispela.

Yumi inap kisim wanem skul long tok bilong Pol long ‘ol skrol na ol skin bilong animal i gat ol rait long en’? Long dispela hap taim long laip bilong em we em i gat bikpela hevi tru, em i gat bikpela laik yet long ritim Tok Bilong God. Yumi luksave olsem, long dispela rot em i stap strong long sait bilong spirit na mekim yet wok bilong God, na tu, em inap strongim ol narapela.

Long nau, sapos yumi gat wanpela Baibel olgeta, em gutpela samting tru! Sampela bilong yumi i gat planti narapela narapela Baibel. Olsem Pol, yumi mas kisim pasin bilong amamas long kisim bikpela save moa long tok bilong Baibel. Namba tu pas Pol i bin raitim long Timoti, em i laspela bilong ol 14 pas em holi spirit i bin kirapim em long raitim. Tok em i mekim long Timoti i stap klostu long pinis bilong dispela buk. Tok em i mekim long Timoti long ‘bringim ol skrol, na ol skin bilong animal i gat ol rait long en,’ em wanpela bilong ol laspela samting em i laik kisim.

Yu gat strongpela laik long mekim dispela gutpela pait bilong bilip i go inap long pinis, olsem Pol i bin mekim? Yu laik wok strong yet long mekim wok bilong Jehova na insait long wok bilong autim tok i go inap long Bikpela i tok em i pinis? Sapos olsem, bihainim tok Pol i givim long ol Kristen. Em i tok: “Oltaim yu mas tingim ol samting yu mas mekim na tingim wok tisa bilong yu,” na yu ken mekim olsem long rot bilong amamas na stadi oltaim long Baibel. Nau planti man moa inap kisim Baibel na em i isi long yusim, winim ol skrol.​—1 Tim. 4:16.

[Mep/Ol Piksa long pes 18,19]

(Bilong save ol dispela rait i stap we long pes, lukim buk o magasin)

Efesus

Troas

Rom