I Stret Ol Yangpela i Kisim Baptais?

CARLOS, a wanpela papa Kristen long Filipins, i tok: “Mi amamas tru olsem pikinini meri bilong mi i kamap wanpela wokmeri bilong Jehova, na mi save em tu i amamas.” Wanpela papa long Grik i tok: “Mi na meri bilong mi i amamas olsem 3-pela pikinini bilong mipela i bin baptais na kamap Witnes Bilong Jehova taim ol i tineja. Ol i wok long kamap strong na ol i amamas long mekim wok bilong Jehova.”

I gat as na ol papamama Kristen i amamas tru taim ol pikinini bilong ol i kisim baptais, tasol maski ol i amamas, sampela taim bel bilong ol i no stap isi. Wanpela mama i tok: “Mi bin amamas tru, tasol tu mi tingting planti.” Wai na em i pilim olsem? Em i tok: “Mi kliagut olsem nau pikinini bilong mi i mas tokim Jehova long ol samting em i mekim.”

Pasin bilong mekim wok bilong Jehova olsem wanpela Witnes i baptais pinis, em i wanpela mak olgeta yangpela i mas i gat laik long winim. Tasol ating ol papamama Kristen i tingting, ‘Mi save olsem pikinini bilong mi i wok long kamap strong, tasol em i gat strong inap long sakim pasin pamuk samting na stap klin long ai bilong Jehova?’ Ating sampela narapela i gat askim olsem, ‘Taim laik bilong kisim mani kago i kirap pulim pikinini bilong mi, em bai givim bel yet na amamas long mekim wok bilong God?’ Wanem tok bilong Baibel inap helpim papamama long save olsem ol pikinini bilong ol i redi long baptais o nogat?

Mas Kamap Disaipel

Baibel i no makim hamas krismas wanpela i mas i gat bilong kisim baptais, tasol em i stori long ol mak bilong spirit man i mas winim na bai em i ken kisim baptais. Jisas i tokim ol disaipel: “Yupela i mas i go na kamapim ol disaipel long olgeta lain man, na baptaisim ol.” (Mat. 28:19) Olsem na baptais i bilong ol lain husat i stap pinis olsem disaipel bilong Krais.

Wanem mining bilong dispela tok disaipel? Buk Insight on the Scriptures i tok: “Bikpela mining bilong dispela tok i olsem man i bilip long ol tok bilong Krais, na i bihainim gut ol dispela tok.” Olsem wanem? Ol yangpela inap kamap olsem disaipel tru bilong Krais? Wanpela sista husat i bin mekim wok misineri long Latin Amerika winim 40 yia, i stori long em yet na tupela susa bilong em olsem: “Mipela i bikpela inap long save olsem mipela i laik mekim wok  bilong Jehova na stap long Paradais. Dediket bilong mipela i helpim mipela long sanap strong taim ol traim bilong ol yangpela i painim mipela. Mipela i no bel hevi long mipela i bin dediket long God taim mipela i yangpela tru.”

Hau bai yu save olsem pikinini bilong yu i kamap wanpela disaipel bilong Krais pinis? Baibel i tok: “Yumi lukim pasin bilong wanpela man na yumi ken save, em i gutpela na stretpela man o em i man nogut. Na long wankain pasin tasol, yumi ken save long ol pikinini tu.” (Snd. 20:11) Tingim sampela samting pikinini i mekim na i soim ‘klia olsem em i wok long kamap strong moa.’​—1 Tim. 4:15.

Mak Bilong Disaipel Tru

Olsem wanem? Pikinini bilong yu i save harim tok? (Kol. 3:20) Em i save mekim ol wok long haus yu tokim em long mekim? Baibel i stori long Jisas taim em i gat 12-pela krismas, olsem: “Em i stap daun yet long [papamama bilong em].” (Luk 2:51) Tru, i no gat wanpela pikinini bai harim tok bilong papamama long olgeta taim. Tasol ol Kristen tru i mas “bihainim gut lek mak bilong [Jisas].” Olsem na ol yangpela husat i gat tingting long baptais ol i mas i gat nem olsem ol i save bihainim tok bilong papamama.​—1 Pita 2:21.

Tingim ol dispela askim: Pikinini bilong yu i save ‘wok long painim Kingdom pastaim’ long rot bilong wok autim tok? (Mat. 6:33) Em i amamas long autim gutnius long ol narapela? O yu mas strong long kirapim em long i go autim tok na toktok wantaim ol man long haus? Em i tingim wok bilong em olsem pablisa i no baptais? Em i gat laik long mekim gobek long ol man em i bungim long teritori husat i gat laik long harim tok? Em i save tokaut long ol wanskul na ol tisa olsem em i wanpela Witnes Bilong Jehova?

Pasin bilong i go long ol miting i bikpela samting long em? (Sng. 122:1) Em i save amamas long bekim tok long Stadi Wastaua na Baibel Stadi Bilong Kongrigesen? Em i amamas long insait long Skul Tiokratik Bilong Autim Tok?​—Hib. 10:​24, 25.

Olsem wanem? Pikinini bilong yu i wok strong long bihainim stretpela pasin long rot bilong abrusim ol poroman nogut long skul na long ol narapela hap? (Snd. 13:20) Em i save laikim wanem kain musik, muvi, TV program, vidio gem, na em i save lukim wanem ol Web-sait long Intenet? Ol tok na pasin bilong em i kamapim klia olsem em i gat laik long bihainim ol lo bilong Baibel?

Olsem wanem long save bilong pikinini bilong yu long Baibel? Em inap kamapim long tok bilong em yet ol samting em i bin lainim long Famili Lotu? Em inap eksplenim gut ol bikpela tok i tru bilong Baibel? (Snd. 2:​6-9) Em i gat laik long ritim na stadi long ol buk na nius em gutpela wokboi i gat savetingting i kamapim? (Mat. 24:45) Em i save mekim ol askim long sampela tok na ves bilong Baibel?

Ol dispela askim inap helpim yu long skelim olsem pikinini bilong yu i wok long kamap strong long ol samting bilong spirit o nogat.  Taim yu skelim pinis ol dispela askim, ating bai yu ting olsem em i mas mekim gut moa sampela samting paslain long em i baptais. Tasol sapos wokabaut bilong em i kamapim klia olsem em i disaipel na em i bin dediketim laip bilong em long God, ating bai yu orait long em i ken kisim baptais.

Ol Yangpela Inap Litimapim Nem Bilong Jehova

Planti wokboi bilong God i bin stap gut long em taim ol i yangpela o taim ol i liklik pikinini. Tingim Josep, Samuel, Josaia, na Jisas. (Stt. 37:2; 39:​1-3; 1 Sml. 1:​24-28; 2:​18-20; 2 Sto. 34:​1-3; Luk 2:​42-49) Na tingim 4-pela pikinini meri bilong Filip em ol i bin mekim tok profet, ating papa i bin skulim ol taim ol i yangpela tru.​—Apo. 21:​8, 9.

Wanpela Witnes long Grik i tok: “Mi baptais taim mi gat 12-pela krismas. I no gat wanpela taim mi bel hevi long disisen bilong mi long kisim baptais. Em 24 yia i go pinis, na mi bin autim tok fultaim inap 23 yia. Pasin bilong laikim tru Jehova i bin helpim mi long karim ol hevi i save painim ol yangpela. Taim mi gat 12-pela krismas, save bilong mi long Baibel i no wankain olsem long nau. Tasol mi save olsem mi laikim Jehova na mi laik mekim wok bilong em inap oltaim oltaim. Mi amamas long em i bin helpim mi long mekim yet wok bilong em.”

Maski man i yangpela o lapun, taim em i kamapim klia olsem em i disaipel tru, em i mas kisim baptais. Aposel Pol i tok: “Long bel man i save bilip na em i kamap stretpela man, tasol long maus em i save tokaut long dispela bilip bilong en long ai bilong ol manmeri, na God i kisim bek em.” (Rom 10:10) Taim yangpela disaipel bilong Krais i kisim baptais, em yet na papamama bilong em i winim wanpela bikpela mak. No ken larim wanpela samting i pasim yu o pikinini bilong yu long kisim dispela bikpela amamas em yupela inap kisim.

[Futnot]

[Blok long pes 5]

Stretpela Tingting Long Baptais

Sampela papamama i ting baptais bilong pikinini bilong ol i gutpela samting, tasol i gat ol hevi bilong en tu. Tasol yu ting baptais na wok bilong God inap mekim na ol samting bilong laip bilong man i no inap kamap gutpela? Baibel i no tok olsem. Sindaun 10:22 i tok: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.” Na Pol i tokim yangpela Timoti: “Tru tumas, pasin bilong givim bel tru long God na tingting olsem ol samting yu holim pinis em inap long yu, dispela em i rot bilong kisim planti samting.”​—1 Tim. 6:6.

Tru, em i no isi long mekim wok bilong Jehova. Jeremaia i bin karim planti hevi long wok bilong em olsem profet bilong God. Tasol em i stori long wok bilong em long lotuim God tru, olsem: “Yu bin givim tok bilong yu long mi na mi kisim, olsem man i kisim kaikai. Na dispela tok bilong yu i mekim mi i amamas na belgut tru, long wanem, mi bilong yu, God Bikpela I Gat Olgeta Strong.” (Jer. 15:16) Jeremaia i save olsem wok bilong God i as bilong amamas bilong em. Graun Satan i bosim i as bilong planti hevi. Ol papamama i mas helpim ol pikinini bilong ol long luksave long dispela samting.​—Jer. 1:19.

 [Blok/Piksa long pes 6]

Pikinini i Mas Wet Pastaim na Baptais Bihain?

Maski pikinini i winim ol mak bilong kisim baptais, sampela taim papamama i tok em i mas wet pastaim na kisim baptais bihain. Ating i gat wanem as na ol i tok olsem?

Mi pret olsem sapos pikinini bilong mi i baptais, nogut bihain em i mekim bikpela rong na kongrigesen bai rausim em. Olsem wanem? I stret long ting olsem God i no inap skelim pasin bilong yangpela husat i surikim taim bilong kisim baptais? Solomon i tokim ol yangpela, olsem: “Lukaut, God bai i skelim pasin bilong yupela long kot bilong en.” (Sav. 11:9) Na tok Pol i mekim i go long olgeta man maski ol i gat hamas krismas, em i tok: “Yumi olgeta wan wan bai tokaut long God long as bilong ol samting yumi bin mekim.”​—Rom 14:12.

Ol man i lotuim God, maski ol i baptais o i no baptais, God bai skelim ol long ol samting ol i bin mekim. No ken lusim tingting, Jehova i save lukautim ol wokboi bilong em, olsem ‘em i no inap larim wanpela traim i kamap long ol i winim strong bilong ol.’ (1 Kor. 10:13) Sapos ol i “holimpas gutpela tingting” na sakim ol traim, ol i ken save olsem God bai helpim ol. (1 Pita 5:​6-9) Wanpela mama Kristen i tok: “Ol pikinini husat i kisim baptais, ol i gat planti risen moa long stap longwe long ol samting nogut bilong graun. Pikinini man bilong mi i kisim baptais taim em i gat 15 krismas, na em i ting olsem baptais i lukautim em. Em i tok, ‘Yu no tingting long mekim samting i brukim lo bilong Jehova.’ Baptais i strongim laik bilong man long bihainim stretpela pasin.”

Sapos long rot bilong ol tok na pasin bilong yu, yu bin skulim pikinini bilong yu long bihainim tok bilong Jehova, orait yu ken save olsem pikinini bai bihainim yet tok bilong Jehova bihain long em i kisim baptais. Sindaun 20:7 i tok: “Sapos papa i stretpela man na i save bihainim gutpela pasin, orait ol pikinini bilong en i ken amamas.”

Mi laik bai pikinini bilong mi i winim sampela mak pastaim. Ol yangpela i mas lain long mekim wok, na bai ol i ken lukautim ol yet long bihain. Tasol hevi inap painim ol sapos papamama i kirapim ol long tingim bikpela skul na gutpela wok mani olsem namba wan bikpela samting, na lotu i tru, nogat. Jisas i tok long wanpela “sid,” em tok bilong Kingdom, we i no save gro, olsem: “Sid i bin pundaun namel long ol rop i gat nil, dispela i makim man i harim tok bilong kingdom, tasol ol wari bilong laip long dispela taim na strong bilong mani long giamanim man, ol i karamapim tok na em i no karim kaikai.” (Mat. 13:22) Pasin bilong putim ol mak we i mekim ol samting bilong spirit i stap namba tu na wok mani na bikpela skul i stap namba wan, dispela inap daunim laik bilong yangpela long mekim wok bilong God.

Wanpela elda i stori long ol yangpela husat i winim ol mak bilong kisim baptais tasol ol papamama i pasim ol, em i tok: “Sapos papamama i pasim yangpela long kisim baptais, dispela inap mekim na em i bel hevi na em i no wok strong moa long mekim wok bilong God.” Na wanpela wasman raun i tok: “Yangpela inap kirap long ting olsem long sait bilong spirit ol narapela i gutpela moa long em. Na ating em bai traim kisim namba long dispela graun na bai em i ken pilim olsem em inap mekim sampela gutpela wok.”

[Piksa]

Yunivesiti i mas i stap namba wan?

[Piksa long pes 3]

Pasin yangpela i mekim inap soim olsem em i wanpela disaipel

[Ol Piksa long pes 3]

Redim ol miting na bekim tok

[Piksa long pes 4]

Bihainim tok bilong papamama

[Piksa long pes 4]

Insait long wok bilong autim tok

[Piksa long pes 4]

Beten