Mekim Ol Samting i Kamap Gutpela Hau?

GUTPELA LAIP​—ol man i laikim dispela kain tok! Sampela i bin kisim gutpela wok mani na ol i kamap maniman na kisim biknem. Na sampela i laik bai ol samting ol i mekim i kamap gutpela, tasol wok bilong ol i no kamapim wanpela gutpela samting.

Sapos yu laik mekim samting i kamap gutpela, orait yu mas putim tingting bilong yu i go long dispela samting. Tupela narapela bikpela samting, em hau yu yusim taim na strong bilong yu, na pasin bilong yu long go pas long mekim ol samting.

Planti Kristen i lukim olsem pasin bilong insait tru long wok autim tok i givim bikpela amamas long ol. Taim ol yangpela na lapun i insait long fultaim sevis, dispela i helpim ol na ol samting ol i mekim i kamap gutpela. Tasol sampela inap les liklik long autim tok, na dispela wok i kamap olsem namba tu samting long laip bilong ol na ol i wok strong long winim ol narapela mak. Olsem wanem dispela samting inap kamap? Yu inap mekim wanem na bai yu no lusim tingting long ol bikpela samting? Na olsem wanem ‘ol samting yu mekim inap kamap gutpela’?​—Jos. 1:8.

Ol Spot Samting Bihain Long Skul

Ol yangpela Kristen i mas balensim gut ol samting ol i mekim bihain long skul na wok bilong God. Ol yangpela husat i mekim olsem, ol samting ol i mekim bai kamap gutpela na i stret yumi tok amamas long ol.

Tasol sampela yangpela Kristen, ol i insait tru long ol spot na ol narapela samting ol i amamas long mekim bihain long skul. I no gat rong long ol kain samting olsem. Tasol ol yangpela Kristen i mas askim ol yet: ‘Ol dispela samting inap pulim bikpela hap taim bilong mi o olsem wanem? Mi bai poromanim wanem kain lain? Taim mi insait long ol dispela samting, dispela bai kirapim mi long bihainim wanem kain pasin? Na wanem samting inap kamap bikpela samting long laip bilong mi?’ Ating yu save olsem man inap insait tru long ol dispela samting na em bai i no gat taim o strong i stap yet bilong mekim ol samting bilong pas gut wantaim God. Olsem na yu ken luksave long as na yumi mas putim ol bikpela samting i go pas.​—Efe. 5:​15-17.

Tingim Wiktor. a Em i tok: “Taim mi gat 12-pela krismas, mi joinim volibal tim. Bihain liklik, mi bin winim planti prais. Mi inap kisim biknem long dispela spot.” Tasol Wiktor i tingting planti long samting em spot i mekim long ol wok lotu bilong em. Wanpela taim ai i hevi na em i slip taim em i ritim Baibel. Na tu, em i luksave olsem em i kisim liklik amamas long wok autim tok. Em i tok: “Spot i pinisim strong bilong mi, na i no longtaim na mi lukim olsem em i pinisim laik bilong mi long mekim wok bilong God. Mi save olsem mi no mekim ol samting mi inap long mekim.”

Bikpela Skul

Baibel i tok Kristen i gat wok long lukautim famili bilong em, na wok bilong lukautim ol long samting bilong skin i insait long dispela. (1 Tim. 5:8) Tasol olsem wanem? Em i mas kisim digri long yunivesiti bilong mekim olsem?

I gutpela long skelim samting bikpela skul inap mekim long pasin bilong man long pas gut wantaim Jehova. Bilong stori gut long dispela samting, yumi ken tingim wanpela eksampel bilong Baibel.

Baruk em i kuskus bilong profet Jeremaia. Wanpela taim em i kirap laikim tumas long  kisim biknem na em i no tingim moa ol gutpela wok bilong Jehova em i holim. Jehova i luksave long dispela na long rot bilong Jeremaia em i givim tok lukaut long Baruk, em i tok: “Yu laik bai ol gutpela samting tasol i ken kamap long yu? Yu mas lusim dispela kain tingting.”​—Jer. 45:5.

Baruk i laik bai wanem “ol gutpela samting” i mas kamap long em? Ating em i gat laik long kisim biknem namel long ol Juda. O ating ol dispela gutpela samting i makim ol gutpela samting bilong skin. Em i lusim tingting long ol bikpela samting, em ol samting bilong spirit. (Fili. 1:10) Baruk i bin putim yau long tok lukaut Jehova i givim em long rot bilong Jeremaia, olsem na laip bilong em i no lus.​—Jer. 43:​5, 6.

Yumi kisim wanem skul long dispela stori? Skultok Baruk i kisim i soim olsem sampela tingting bilong em i kranki. Em i laik bai ol gutpela samting tasol i kamap long em. Sapos yu gat wok mani inap long lukautim yu yet, orait yu ting yu mas lusim taim, mani, na strong long kisim sampela skul moa bilong inapim sampela mak em yu o papamama o sampela wanblut bilong yu i laik bai yu mas winim?

Tingim Grzegorz, em man bilong programim ol kompiuta. Ol wanwok i kirapim em long kisim wanpela kos we em inap skul gut moa long dispela wok. I no longtaim na em i no gat taim moa long mekim ol wok bilong God. Em i tok: “Long olgeta taim bel bilong mi i no stap isi. Maus bilong bel i gat tok, long wanem, mi no inap winim ol mak bilong spirit em mi bin putim.”

Bisi Tumas Long Wok Mani

Tok Bilong God i kirapim ol Kristen tru long wok hat, na sapos ol i bosman o wokman, ol i mas mekim gut wok bilong ol. Aposel Pol i tok: “Olgeta samting yupela i mekim, yupela i mas mekim olsem yupela i mekim long Jehova na i no long ol man, na givim bel olgeta na strong olgeta long mekim.” (Kol. 3:​22, 23) Pasin bilong wok hat em i gutpela samting, tasol yumi mas mekim narapela samting tu​—yumi mas pas gut wantaim Man Bilong Wokim yumi. (Sav. 12:13) Sapos Kristen i bisi tumas long wok skin bilong em, ol wok bilong God inap kamap namba tu samting long laip bilong em.

Pasin bilong bisi tumas long wok skin inap pinisim strong em Kristen i mas i gat bilong stap strong long sait bilong spirit na bilong helpim famili. King Solomon i tok man i “mekim planti wok oltaim” em i olsem man i traim long “holimpas win.” Sapos Kristen i putim olgeta tingting bilong em long wok mani, em inap kisim bikpela presa inap longpela taim. Kain man olsem inap kalabus long wok mani bilong em na dispela inap mekim na em i taiet tru na i les long olgeta samting. Sapos olsem, yu ting em inap ‘amamas long olgeta samting em i mekim’? (Sav. 3:​12, 13; 4:6) Na bikpela samting moa, yu ting em bai i gat strong inap  long em i ken lukautim famili bilong em na mekim ol wok bilong God?

Janusz i stap long Isten Yurop, na em i bin bisi tumas long wok bisnis bilong em long wokim ol plaua gaden. Em i tok: “Ol ausaitman i tok amamas long mi, bikos mi gat planti aidia bilong mekim wok na mi inap pinisim gut olgeta wok. Tasol dispela i nogutim mi long sait bilong spirit na mi lusim wok autim tok. I no longtaim na mi no go moa long ol miting. Mi kisim pasin antap, na mi sakim tok kaunsel ol elda i givim long mi na mi lusim kongrigesen.”

Ol Samting Yu Mekim Inap Kamap Gutpela

Yumi bin skelim 3-pela samting we Kristen inap bisi tru long en na em bai lusim pasin bilong givim bel tru long God. Olsem wanem? Yu insait long wanpela bilong ol? Sapos olsem, ol askim, ol skripsa, na ol tok i stap hia inap  helpim yu long save, ol samting yu mekim i wok long kamap gutpela o nogat.

Ol spot samting bihain long skul: Yu insait long en inap long wanem mak? Ol dispela samting i kisim hap taim em bipo yu bin yusim bilong mekim ol wok bilong God? Yu no amamas tumas moa long bung wantaim ol wanbilip? Sapos olsem, gutpela sapos yu bihainim pasin bilong King Devit husat i beten long Jehova olsem: “Yu mas soim rot long mi na mi ken bihainim.”​—Sng. 143:8.

Wanpela wasman sekit i helpim Wiktor, em yumi stori pinis long em. Dispela wasman i tokim em olsem: “Yu save amamas tru long stori long volibal.” Wiktor i tok: “Dispela tok i mekim mi kirap nogut. Mi luksave olsem mi givim bel tumas long volibal. I no longtaim na mi lusim ol ausait pren bilong volibal tim na mi painim ol pren insait long kongrigesen.” Long nau, Wiktor i givim bel long mekim wok bilong Jehova insait long kongrigesen bilong em. Em i tok: “Askim ol pren, papamama, o ol elda bilong kongrigesen, olsem ol i ting ol samting long skul yu insait long en i helpim yu long i go klostu long Jehova o i pulim yu i go longwe long em?”

Yu ken kamapim long ol elda long kongrigesen bilong yu olsem yu laik mekim sampela wok moa bilong God. Olsem wanem? Yu inap helpim ol lapun husat i nidim helpim, olsem stap liklik taim wantaim ol, o go baim kaikai samting bilong ol, o mekim sampela wok bilong haus? Maski yu gat hamas krismas, ating yu inap autim tok fultaim, na tokim ol narapela man long as na yu stap amamas.

Bikpela skul: Jisas i tok man i no ken ‘givim biknem long em yet.’ (Jon 7:18) Olsem wanem? Taim yu skelim olsem yu bai skul inap long wanem mak, yu bin “skelim gut wanem ol samting i bikpela samting moa”?​—Fili. 1:​9, 10.

Grzegorz, man bilong programim ol kompiuta, em i mekim sampela senis long laip bilong em. Em i tok: “Mi tingim tru skultok ol elda i givim, na mi lusim samting mi bin tingting long mekim. Mi luksave olsem mi no gat wok long kisim sampela skul moa. Dispela bai pinisim nating taim na strong bilong mi.” Grzegorz i insait moa long ol wok bilong kongrigesen. Bihain, em i gretiuet long wanpela skul em nau ol i kolim Baibel Skul Bilong Ol Singel Brata. Yes, em i “yusim gut taim” na bai em i ken kisim sampela skul moa i kam long God.​—Efe. 5:16.

Wok mani: Olsem wanem? Yu bisi tumas long wok mani bilong yu na yu no tingim moa ol wok bilong God? Yu save lusim hap taim bilong toktok gut wantaim famili bilong yu? Na taim yu gat tok insait long kongrigesen, yu save mekim ol tok i kamap gutpela moa? Yu save toktok wantaim ol narapela long ol samting i strongim ol? Baibel i tok: ‘Yu mas aninit long God tasol na bihainim ol lo bilong em,’ long dispela rot Jehova bai blesim yu na yu bai ‘amamas long wok bilong yu.’​—Sav. 2:24; 12:13.

Janusz, em yumi stori pinis long em, wok bisnis bilong em i no kamap gutpela, bisnis i pundaun. Em i no gat wok na em i gat bikpela dinau, na em i askim Jehova long helpim em. Janusz i stretim ol samting long sindaun bilong em, na nau em i wanpela painia oltaim na elda bilong kongrigesen. Em i tok: “Taim mi pilim olsem ol samting mi gat em inap long mi, na mi yusim strong bilong mi long mekim ol wok bilong God, orait tingting na bel bilong mi i stap isi.”​—Fili. 4:​6, 7.

Lusim hap taim bilong skelim gut tingting tru bilong yu na wanem samting i bikpela samting long laip bilong yu. Taim yu mekim wok bilong Jehova, oltaim ol samting yu mekim bai kamap gutpela. Putim wok bilong Jehova i stap nambawan samting long laip bilong yu.

Bilong mekim olsem, ating yu mas mekim sampela senis long sindaun bilong yu, olsem lusim ol samting i no bikpela samting. Long dispela rot bai yu save long “laik bilong God, em dispela laik em i gutpela, na em i orait, na i gutpela olgeta.” (Rom 12:2) Na ‘ol samting yu mekim inap kamap gutpela’ taim yu givim bel olgeta long mekim wok bilong God.

[Futnot]

[Blok/Piksa long pes 31]

Rot Bilong Mekim Ol Samting i Kamap Gutpela

Planti samting tru inap pulim tingting bilong yu, olsem na yu ken mekim wanem na bai yu tingim yet ol bikpela samting? Long rot bilong ol askim i stap daunbilo, skelim tingting tru bilong yu na ol samting i bikpela samting long laip bilong yu:

OL SPOT SAMTING BIHAIN LONG SKUL

▪ Taim yu insait long ol dispela samting, bai yu stap wantaim ol man i bihainim wanem kain pasin?

▪ Yu bai lusim bikpela hap taim long mekim ol dispela samting?

▪ Ol dispela samting inap kamap nambawan bikpela samting long yu?

▪ Ol i kisim hap taim em bipo yu bin yusim bilong mekim ol wok bilong lotu?

▪ Yu bai bung wantaim wanem kain ol man?

▪ Yu laikim moa ol dispela man, winim ol wanbilip?

BIKPELA SKUL

▪ Sapos yu gat wok mani inap long lukautim yu, yu mas lusim sampela taim, mani, na strong bilong kisim sampela skul moa?

▪ Tru tru yu mas i go long yunivesiti na bai yu inap lukautim yu yet?

▪ Dispela bai mekim wanem long pasin bilong yu long i go long ol miting?

▪ Yu bin “skelim gut wanem ol samting i bikpela samting moa”?

▪ Yu gat wok long strongim bilip bilong yu olsem Jehova bai lukautim yu?

WOK MANI

▪ Wok mani bilong yu i mekim na yu gat taim long ‘amamas long olgeta samting yu mekim’?

▪ Bihain long wok, yu gat strong yet long lukautim famili na mekim ol wok bilong God?

▪ Yu gat inap taim bilong toktok gut wantaim famili bilong yu?

▪ Yu bisi tumas long wok mani bilong yu na yu no tingim moa ol wok bilong God?

▪ Wok mani i mekim na yu no mekim gut ol tok bilong yu long kongrigesen?

[Piksa long pes 30]

Jehova i tokim Baruk long no ken tingting strong long kisim ol gutpela samting