Bai Yu Bihainim Tok Bilong Jehova?
Bai Yu Bihainim Tok Bilong Jehova?
“Mi no laik tru long ol rot i abrusim rot bilong yu.”—SNG. 119:128.
1, 2. (a) Taim yu laik kisim save long wanem rot yu mas bihainim, ating yu bai amamas long wanem kain tok lukaut? Bilong wanem i olsem? (b) Jehova i givim wanem ol tok lukaut long lain i lotu long em? I gat wanem as na em i mekim olsem?
TINGIM dispela: I gat wanpela hap yu mas i go long en. Bilong painimaut long wanem rot yu mas bihainim, yu askim wanpela gutpela pren husat i save gut long rot. Taim em i stori long rot yu mas bihainim, ating em bai tok: “Was gut taim yu kamap long mausrot. Sain i stap long rot i no klia tumas. Planti manmeri i bihainim na ol i paul long rot.” Ating bai yu amamas long em i tingim yu na yu bai bihainim dispela tok lukaut bilong em. Jehova i olsem dispela pren. Em i stori gut long wanem rot yumi mas bihainim bilong kisim laip oltaim, tasol tu, em i tok lukaut long ol samting nogut inap pulim yumi i go long rot i no stret.—Lo 5:32; Ais. 30:21.
2 Long dispela stadi na stadi i kamap bihain long en, bai yumi stori long ol samting em Pren bilong yumi, God Jehova, i tok lukaut long yumi long en. Yumi mas tingim, Jehova i givim tok lukaut long yumi, long wanem, em i tingim na laikim yumi. Em i laik bai yumi go kamap gut long hap yumi laik i go long en. Bel bilong em i save hevi tru long lukim ol manmeri i pundaun long ol pasin nogut na paul long rot. (Ese. 33:11) Long dispela stadi, yumi bai skelim 3-pela samting nogut em inap pulim yumi. Namba 1, em ol man. Namba 2, em bel na tingting bilong yumi yet, na namba 3, em ol samting i no gat as bilong en, olsem ol samting nating; tasol ol inap bagarapim yumi. Yumi mas save long ol dispela samting nogut, na yumi mas save long olsem wanem Jehova i skulim yumi long sakim ol. Wanpela man bilong raitim song i tokim Jehova olsem: “Mi no laik tru long ol rot i abrusim rot bilong yu.” (Sng. 119:128) Yu gat wankain tingting? Nau yumi ken skelim olsem wanem yumi ken strongim dispela tingting na bihainim.
No Ken Bihainim “Planti Man”
3. (a) Taim yumi no kliagut long rot yumi mas bihainim, olsem wanem hevi inap painim yumi sapos yumi bihainim nating ol narapela? (b) Wanem bikpela stiatok i stap long Kisim Bek 23:2?
3 Taim yu laik i go long wanpela longwe hap, bai yu mekim wanem sapos yu no kliagut long wanem rot yu mas bihainim? Ating bai yu tingting long bihainim rot em ol narapela man i bihainim, na moa yet sapos yu lukim planti man i go long dispela seim rot. Hevi inap painim yu sapos yu mekim olsem. Ating ol dispela man i no go long wankain hap yu laik i go long en, o nogut ol tu i paul long rot. Olsem na i gutpela long tingim stiatok i olsem as bilong wanpela lo God i givim long lain Israel bilong bipo. Ol man husat i mekim wok jas o stap olsem witnes long kot, ol i kisim tok lukaut long ol i no ken ‘bihainim pasin planti man i bihainim.’ (Ritim Kisim Bek 23:2.) Yumi ken save, em i isi tru long ol manmeri i gat sin i larim ol wanlain i pulim ol na ol i paulim kot. Tasol yu ting dispela stiatok long no ken bihainim pasin em planti man i mekim, i stori tasol long ol samting long sait bilong kot? Nogat tru.
4, 5. Olsem wanem ol wanlain i putim presa long Josua na Kalep long bihainim tingting bilong ol? Wanem samting i helpim tupela long sakim ol?
4 Tru tumas, pasin bilong bihainim nating “planti man” inap pulim yumi long olgeta kain taim. Em inap kamap wantu na i hatwok tru long sakim. Tingim ol samting ol wanlain bilong Josua na Kalep i mekim. I gat 12-pela man i bin go long Graun Bilong Promis bilong lukstil long en, na tupela i insait long dispela lain. Taim ol i kam bek, 10-pela bilong ol i givim ripot nogut i bagarapim bel bilong ol man. Ol i tok sampela man bilong dispela hap ol i traipela man tru, ol i tumbuna bilong ol Nefilim—em ol pikinini bilong ol bikhet ensel na ol meri bilong graun. (Stt. 6:4) I no stret ol i tok olsem, long wanem, ol dispela traipela man nogut i bin bagarap long Bikpela Tait planti handret yia paslain long dispela, na i no gat wanpela bilong ol i bin abrusim bagarap. Tasol ol Israel i bilipim ol tok dispela 10-pela man i kamapim, long wanem, bilip bilong ol i no strong. Taim bilip bilong man i no strong, em i no trastim God moa, em i kirap bilipim ol tingting giaman bilong ol man. I no longtaim na planti Israel i bilip olsem i no gutpela long ol i go insait long Graun Bilong Promis olsem Jehova i tokim ol long mekim. Josua na Kalep i mekim wanem long dispela taim we bel bilong ol man i no stap isi?—Nam. 13:25-33, NW.
5 Ol i no bihainim nating tok bilong planti man. Maski ol Israel i les tru long harim, dispela tupela man i mekim tok tru na ol i sambai long en—maski ol Israel i tok long stonim ol! Wanem samting i mekim na ol i gat strongpela bel? Wanpela bikpela samting em bilip bilong ol. Ol manmeri i gat bilip ol i luksave olsem ol tok bilong ol man i no gat as bilong en, i narapela kain long ol tok promis bilong God Jehova. Bihain tupela man i kamapim amamas bilong ol long pasin bilong Jehova long truim olgeta tok promis bilong em. (Ritim Josua 14:6, 8; 23:2, 14.) Josua na Kalep i pas gut wantaim God bilong ol, na ol i no laik tru long bihainim nating bikpela lain manmeri i no gat bilip na mekim God i bel hevi. Olsem na ol i stap strong, ol i stap gutpela piksa tru long yumi long nau.—Nam. 14:1-10.
6. Long wanem ol samting yumi inap pilim olsem yumi mas bihainim ol samting “planti man” i mekim?
6 Sampela taim yu pilim olsem yu mas bihainim samting planti man i mekim? Long nau ol manmeri husat i stap longwe long Jehova na tok bilas long ol lo bilong em, ol i planti tru. Long sait bilong kisim amamas, ol dispela manmeri i save kamapim ol tingting i no gat as bilong en. Ating ol i strong olsem pasin pamuk, pasin pait, na wok bilong ol spirit nogut em planti program long TV, ol muvi, na vidio gem i kamapim, ol i no inap bagarapim man. (2 Tim. 3:1-5) Taim yu makim ol amamas yu na famili bilong yu i laik kisim, yu save larim maus bilong bel bilong ol arapela i stiaim ol disisen bilong yu na maus bilong bel bilong yu? Sapos yu mekim olsem, i olsem yu bihainim nating ol samting planti man i mekim.
7, 8. (a) Olsem wanem yumi ken lain long yusim ‘save bilong yumi long skelim ol samting’? Olsem wanem dispela pasin i winim pasin bilong yusim wanpela lista i gat ol lo long en? (b) Bilong wanem yu amamas long pasin em planti yangpela Kristen i bihainim?
7 Jehova i givim yumi gutpela presen bilong helpim yumi long wokim ol disisen—em ‘save bilong yumi long skelim ol samting.’ Tasol yumi mas ‘yusim dispela save planti taim’ na bai yumi lain long mekim gut wok long en. (Hib. 5:14) Sapos yumi bihainim nating ol samting planti man i mekim o sapos i gat ol lo long ol samting em maus bilong bel i mas makim, orait bai yumi no lain long yusim tingting bilong yumi yet long skelim ol samting. Long dispela as lain bilong Jehova i no gat lista bilong ol muvi, ol buk, na ol sait bilong Intenet em ol i no ken lukim. Ol samting bilong dispela graun i save senis klostu klostu, olsem na kain lista olsem bai kamap olpela hariap. (1 Kor. 7:31) Na tu, sapos yumi bihainim nating ol man, bai yumi no mekim wok bilong yumi yet long skelim gut ol stiatok bilong Baibel na beten na wokim ol disisen em ol dispela stiatok i as bilong en.—Efe. 5:10.
8 Sampela taim ol man i no amamas long yumi long ol disisen yumi mekim em Baibel i as bilong en. Ol yangpela Kristen long skul inap pilim bikpela presa long lukim na mekim ol samting olgeta narapela i lukim na mekim. (1 Pita 4:4) Olsem na yumi amamas tru olsem i gat ol Kristen, ol yangpela na lapun, i bihainim pasin bilong Josua na Kalep long bilip na ol i no bihainim ol samting planti man i mekim.
No Ken Bihainim “Bel na Ai Bilong Yupela”
9. (a) Taim yumi raun i go long wanpela hap, bilong wanem i no gutpela long bihainim nating laik bilong yumi yet? (b) Bilong wanem lo i stap long Namba 15:37-39 i stret long lain bilong God bilong bipo?
9 Nau bai yumi skelim namba 2 samting em inap pulim yumi, em bel na tingting bilong yumi. Olsem wanem? Sapos yu raun i go long wanpela hap, bai yu tromoi mep na bihainim nating laik bilong yu, olsem kirap bihainim olgeta rot i gat ol naispela samting long lukim? Sapos yu mekim olsem, bai yu no kamap long hap yu laik i go long en. Orait tingim narapela lo Jehova i bin givim long lain Israel bilong bipo. Sapos long nau i gat lo long yumi mas putim ol string na blupela tret long klos bilong yumi, ating planti manmeri bai paul long dispela pasin. (Ritim Namba 15:37-39.) Tasol yu save long as na Jehova i bin tokim ol Israel long mekim olsem? Pasin bilong bihainim dispela lo i helpim ol long stap narapela kain long ol haiden lain i stap klostu long ol. Dispela em i bikpela samting sapos ol i laik bai Jehova i ken orait yet long ol. (Wkp. 18:24, 25) Tasol dispela lo i kamapim klia tu olsem ol laik bilong bel inap pulim yumi long lusim rot i go long laip oltaim. Olsem wanem dispela inap kamap?
10. Olsem wanem Jehova i kamapim klia olsem em i save gut long pasin bilong yumi ol man?
10 Tingim tok Jehova i mekim bilong kamapim as na em i givim dispela lo long lain bilong em: “Yupela i no ken bihainim bel na ai bilong yupela, em yupela i save bihainim na mekim pasin nogut tru.” (Nam. 15:39, NW ) Jehova i save gut tru long pasin bilong yumi ol man. Em i save gut olsem ol samting yumi lukim long ai, em i isi tru long pulim bel bilong yumi. Olsem na Baibel i tok lukaut olsem: “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?” (Jer. 17:9) Yu luksave long as na i stret Jehova i mekim tok lukaut long ol Israel? Em i save olsem ol bai lukim ol haiden lain i stap klostu long ol, na samting ol i lukim bai pulim ol. Ating ol bai i gat laik long luk wankain olsem ol dispela man i no bilip, na kirap bihainim tingting na pasin bilong ol.—Snd. 13:20.
11. Olsem wanem ol samting yumi lukim inap kirapim bel bilong yumi?
11 Long taim bilong yumi, em i isi moa long ol samting yumi lukim long ai i kirapim bel bilong yumi. Planti samting long nau em bilong kirapim man long tingim laik bilong skin. Orait, olsem wanem yumi inap bihainim stiatok bilong Namba 15:39? Tingim: Sapos ol man yu stap wantaim ol long skul, long ples wok, o insait long komiuniti, ol i werim ol klos i pas tumas o i no haitim gut skin, yu ting dispela inap mekim sampela samting long yu? Yu ting samting yu lukim bai kirapim ‘bel na ai bilong yu’ na yu bai bihainim pasin bilong ol? Sapos olsem, ating bai yu tingting long lusim pasin bilong yu long werim ol klos i stret, na bihainim stail bilong ol.—Rom. 12:1, 2.
12, 13. (a) Yumi mas mekim wanem sapos sampela taim ai bilong yumi i lukluk long ol samting i no stret long lukim? (b) Wanem samting inap helpim yumi na yumi no kirapim ol narapela long mekim pasin nogut?
12 Yumi mas wok strong moa long kisim pasin bilong bosim gut bel. Sapos sampela taim ai bilong yumi i lukluk long ol samting i no stret long lukim, orait yumi mas tingim tok em gutpela man Jop i pasim long bel, em i bin wokim disisen olsem em bai laikim tasol meri bilong en na no ken aigris long ol yangpela meri. (Jop 31:1) Na tu, King Devit i tok: “Mi no ken orait [“lukluk,” NW ] long pasin nogut. Nogat tru.” (Sng. 101:3) Ol samting em inap bagarapim klinpela maus bilong bel bilong yumi na pasin bilong yumi long pas gut wantaim Jehova, yumi mas tingim olsem ol i samting nogut tru. Dispela i makim tu olgeta samting i pulim ai bilong yumi na i kirapim yumi long mekim pasin nogut.
13 Na tu, yumi no laik pulim ol narapela long mekim pasin nogut, na long dispela rot yumi kamap olsem samting nogut tru. Olsem na yumi tingim tru tok Baibel i mekim long yumi mas bilas long pasin i soim rispek na gutpela tingting. (1 Tim. 2:9) Yumi no ken tingim laik bilong yumi yet na makim wanem kain klos i stret. Yumi mas tingim gut maus bilong bel na tingting bilong ol narapela, yumi tingim bel isi bilong ol i bikpela samting moa, winim laik bilong yumi. (Rom 15:1, 2) Planti tausen yangpela insait long kongrigesen Kristen ol i stap gutpela piksa tru long dispela samting. Yumi amamas long ol i no bihainim ‘bel na ai bilong ol,’ na ol i laik amamasim Jehova long olgeta samting ol i mekim—long pasin bilong bilas tu!
No Ken Bihainim Ol Samting i “Samting Nating Tasol”
14. Samuel i givim wanem tok lukaut long pasin bilong laikim ol samting i olsem “samting nating tasol”?
14 Tingim olsem yu wokabaut long bikpela ples drai nating. Bihain liklik, yu ting yu lukim wara, tasol no gat wara i stap. I no gat wanpela samting! Wanem samting inap kamap sapos yu lusim rot na go long hap yu ting yu lukim wara long en? Yu inap lus na dai long dispela ples drai. Na olsem tasol, Jehova i save long hevi inap kamap sapos yumi bihainim ol samting i olsem samting nating tasol. Tingim wanpela eksampel. Ol Israel i laik i stap wankain long ol narapela lain i sindaun klostu long ol, em ol i gat ol king bilong graun i bosim ol. Dispela laik i wanpela bikpela sin, long wanem, i olsem ol i givim baksait long Jehova olsem King bilong ol. Jehova i orait long ol i gat ol king bilong graun, tasol em i tokim profet bilong em Samuel long givim tok lukaut long pasin bilong laikim ol samting i olsem “samting nating tasol.”—Ritim 1 Samuel 12:21.
15. Long wanem ol rot i olsem ol Israel i bihainim ol samting nating tasol?
15 Olsem wanem? Ol Israel i ting ol king bilong graun ol i samting tru na gutpela moa, winim Jehova? Sapos ol i ting olsem, orait ol i bihainim ol samting nating tasol! Na ol inap kirap bihainim planti narapela tingting giaman bilong Satan. Ol king bilong graun inap pulim ol long lotuim ol giaman god. Ol man i lotuim giaman god ol i ting ol samting ol inap lukim long ai—olsem ol god ol i wokim long diwai na ston—ol i samting tru na ol inap bilip long ol, winim God em ol i no inap lukim, em Jehova, husat i bin wokim olgeta samting. Tasol olsem aposel Pol i tok, ol imis i “samting nating.” (1 Kor. 8:4) Ol i no inap lukluk, harim, toktok, o mekim wanpela samting. Yu inap lukim ol na tatsim ol, tasol sapos yu lotu long wanpela, tru tumas, yu bihainim ol samting nating tasol—em ol samting i no gat as bilong en na i kamapim bagarap tasol.—Sng. 115:4-8.
16. (a) Olsem wanem Satan i pulim planti man long nau long bihainim ol samting nating tasol? (b) Taim yumi tingim God Jehova, olsem wanem yumi ken tok ol samting bilong skin i samting nating tasol?
16 Satan i save gut yet long pasin bilong kirapim ol man long bihainim ol samting nating tasol. Olsem, em i bin pulim planti man long lukluk long ol samting bilong skin bilong helpim ol long i stap gut. Ol man inap ting mani, kago, na wok i gat bikpela pe i helpim ol. Tasol olsem wanem ol samting bilong skin inap helpim ol man, taim bikpela sik o hevi bilong mani i painim ol, o taim bikpela win o guria samting i bagarapim ples? Na olsem wanem ol samting bilong skin inap helpim ol taim ol i pilim olsem laip i no gat as bilong en, ol i no save ol bai mekim wanem, na ol i no save long bekim bilong ol bikpela askim bilong laip? Olsem wanem mani kago inap helpim ol taim ol i dai? Sapos yumi bilip long ol samting bilong skin, bai yumi bel hevi. Ol samting bilong skin i no inap mekim yumi amamas tru, na ol i no inap helpim yumi long abrusim sik na dai. Ol i samting nating tasol. (Snd. 23:4, 5) Tasol God bilong yumi, Jehova, em inap tru long helpim yumi! Taim yumi pas gut wantaim em, long dispela rot tasol yumi inap i stap gut. Dispela i wanpela gutpela blesing tru! Yumi no ken tru bihainim ol samting nating tasol na givim baksait long God.
17. Ol tok lukaut bilong dispela stadi i kirapim yu long mekim wanem?
17 Em i gutpela samting tru long Jehova i stap Pren bilong yumi na Man i stiaim laip bilong yumi. Sapos yumi wok yet long bihainim ol tok lukaut bilong Jehova long dispela tripela samting nogut we inap pulim yumi—em planti man, bel na tingting bilong yumi yet, na ol samting i olsem samting nating tasol—orait bai yumi inap kisim laip oltaim. Long stadi i kamap bihain long dispela, bai yumi skelim narapela tripela tok lukaut em Jehova i givim bilong helpim yumi long heitim na abrusim ol rot i save paulim planti man.—Sng. 119:128.
Wanem Tingting Bilong Yu?
Olsem wanem yu yet inap bihainim ol stiatok i stap long ol dispela skripsa?
[Askim Bilong Stadi]
[Piksa long pes 11]
Sampela taim yu laik bihainim pasin em planti man i mekim?
[Piksa long pes 13]
Olsem wanem hevi inap kamap sapos yu kirap nating long bihainim laik bilong bel?
[Piksa long pes 14]
Yu bilip long ol samting nating tasol?
