Malolo Bilong God—Em Wanem Samting?
Malolo Bilong God—Em Wanem Samting?
“I gat malolo bilong sabat i stap yet bilong ol manmeri bilong God.”—HIB. 4:9.
1, 2. Stat 2:1-3 i givim wanem save long yumi? Bai yumi kisim bekim bilong wanem ol askim?
LONG namba wan sapta bilong Buk Stat, yumi kisim save olsem insait long 6-pela de, God i bin redim dispela graun bilong ol manmeri i ken i stap long en. Ol dispela de i no gat 24 aua long en, nogat, ol wan wan de i makim bikpela haptaim. Baibel i tok long pinis bilong wan wan de olsem: “Nait i go pinis na moning i kamap.” (Stt. 1:5, 8, 13, 19, 23, 31) Tasol taim Baibel i stori long de namba 7 long Stat 2:1-3, yumi no lukim dispela tok.
2 Baibel i no tok long de namba 7 olsem “nait i go pinis na moning i kamap,” olsem na yumi ken ting taim Moses i raitim Buk Stat long 1513 B.C.E., de namba 7—em de bilong God long malolo—i no pinis yet. Na tu, long narapela hap bilong Baibel, God i tok ol man inap i go insait long malolo bilong em. Yu ting God i malolo yet long nau? Sapos olsem, hau bai yumi inap i go insait long malolo bilong em? Em i bikpela samting tru long yumi mas save long bekim bilong ol dispela askim.
Jehova i Malolo Yet?
3. Olsem wanem tok bilong Jisas long Jon 5:16, 17 i soim olsem de namba 7 i no pinis yet long taim bilong em?
3 I gat tupela as na yumi inap tok olsem long taim bilong Jisas na ol Kristen bilong pastaim, de namba 7 i no pinis yet. Tok Jisas i bin mekim long sampela birua bilong em i helpim yumi long save long wanpela as. Ol i birua long Jisas, long wanem, em i bin oraitim ol sikman long de Sabat. Ol i ting i no stret long oraitim sikman long Sabat, long wanem, Lo Bilong Moses i tok olsem Sabat em i de bilong malolo long ol wok. Jisas i bekim tok long ol olsem: “Papa bilong mi i wok i stap i kam inap long nau, na mi tu mi wok i stap.” (Jon 5:16, 17) I olsem Jisas i laik tok: “Mi na Papa bilong mi i mekim wankain wok. Papa bilong mi i mekim wok long Sabat bilong em long planti tausen yia, na em i wok i stap yet, so mi tu mi ken wok long Sabat.” Tok bilong Jisas i soim olsem de namba 7, em de bilong God long malolo long wokim ol samting long graun, dispela de i no pinis yet long taim bilong Jisas. a Tasol maski em de malolo bilong God, Jehova i wok yet long inapim ol samting em i tingting pinis long mekim long ol man na long dispela graun.
4. Olsem wanem tok bilong Pol i soim olsem de namba 7 i no pinis yet long taim bilong ol Kristen bilong pastaim?
4 I gat narapela as na yumi save olsem de namba 7 i no pinis yet long taim bilong Jisas na ol Kristen bilong pastaim. Aposel Pol i stori long malolo bilong God long pas em i bin raitim long ol Hibru. Long sapta 4 long pas bilong em, paslain long em i kolim gen tok bilong Stat 2:2, em i tok: “Yumi ol lain husat i soim olsem yumi gat bilip, yumi go insait long dispela malolo.” (Stt. 2:2; Hib. 4:3, 4, 6, 9) Dispela i soim olsem de namba 7 i no pinis yet long taim bilong Pol. Orait dispela de namba 7 bai pinis long wanem taim?
5. Jehova i mekim wanem long de namba 7? God bai inapim ol samting em i tingting pinis long mekim long wanem taim?
5 Bilong bekim dispela askim, yumi mas tingim olsem Jehova i bin makim de namba 7 olsem wanpela spesel de. Stat 2:3 (NW ), i tok: “God i blesim de namba 7 na mekim i kamap holi.” Jehova i tok dispela de i holi, long wanem, em i makim dispela de bilong pinisim ol wok em i tingting pinis long mekim long graun. Em i tok pinis olsem ol man na meri i bihainim tok bilong em, ol bai stap long graun na lukautim graun na olgeta samting i stap long en. (Stt. 1:28) As na God Jehova na Jisas Krais, em “Bikpela bilong de Sabat,” ol “i wok i stap i kam inap long nau,” em bilong kamapim ol samting God i tingting pinis long mekim long graun. (Mat. 12:8) Olsem na de bilong God long malolo bai i stap yet i go inap long em i inapim ol samting em i tingting pinis long mekim. Dispela de bai stap i go inap long pinis bilong 1,000 yia bilong Krais long mekim wok king.
No Ken “Bihainim Dispela Pasin Bilong Sakim Tok”
6. Pasin bilong husat i stap olsem tok lukaut long yumi? Yumi kisim wanem skul long pasin ol i mekim?
6 God i bin tokaut klia long Adam na Iv long ol samting em i tingting pinis long mekim long graun, tasol tupela i sakim. Bihain long Adam na Iv i bikhet, planti milion manmeri tu i no bihainim tok bilong God. Lain bilong God, em lain Israel, ol tu i sakim tok bilong em planti taim. Na Pol i tok lukaut long ol Kristen long taim bilong em olsem nogut sampela bilong ol i sakim tok olsem ol Israel. Em i tok: “Yumi mas wok strong tru long i go insait long dispela malolo, nogut wanpela man i pundaun long sin na bihainim dispela pasin bilong sakim tok.” (Hib. 4:11) Tok bilong Pol i soim olsem ol manmeri i sakim tok, ol i no inap go insait long malolo bilong God. Dispela i makim wanem samting long yumi? Yu ting dispela i makim olsem sapos yumi no mekim wok i stret wantaim ol samting God i tingting pinis long en, bai yumi no inap i go insait long malolo bilong God? Em i bikpela samting long yumi kisim save long bekim bilong dispela askim, na stadi hia bai stori moa long dispela. Tasol pastaim bai yumi stori long pasin nogut ol Israel i mekim na as na ol i no go insait long malolo bilong God.
“Ol Bai i No Inap i Go Insait Long Malolo Bilong Mi”
7. I gat wanem as na Jehova i kisim bek ol Israel long Isip? Ol Israel i mas mekim wanem?
7 Long yia 1513 B.C.E., Jehova i tokim wokboi bilong em Moses long samting em i laik mekim long lain Israel. God i tok: “Mi kam daun bilong kisim bek ol long han bilong ol Isip na bilong bringim ol i go long wanpela bikpela graun i gat planti gris na ol kaikai i save kamap gutpela tumas.” (Kis. 3:8) Jehova i kisim bek ol Israel long kalabus bilong Isip na mekim ol i kamap lain bilong em, olsem em i bin tok promis long Abraham. (Stt. 22:17) God i givim ol lo long ol Israel we inap helpim ol long i stap wanbel wantaim God na i stap pren bilong em. (Ais. 48:17, 18) Em i tokim ol Israel: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret.” (Kis. 19:5, 6) Olsem na ol Israel inap i stap olsem lain bilong God sapos ol i bihainim ol lo bilong em.
8. Wanem samting inap painim ol Israel sapos ol i bihainim tok bilong God?
8 Tingim ol gutpela samting inap painim ol Israel! Jehova i tok promis olsem sapos ol i bihainim tok bilong em, em bai mekim gut long graun, ol gaden wain, na ol animal bilong ol. Em i tok promis tu long lukautim ol long ol birua. (Ritim 1 King 10:23-27.) Rot i op long ol inap i stap fri na bosim ol yet, na ol inap mekim olsem tu long taim bilong Jisas, em long taim ol Rom i bosim planti kantri. Jehova i laik bai lain Israel i stap gutpela piksa em ol narapela kantri i ken bihainim. Em i laik bai olgeta i kliagut olsem ol man i bihainim tok bilong em, em God tru, ol bai kisim blesing long em.
9, 10. (a) Bilong wanem i no stret long ol Israel i laik i go bek long Isip? (b) Yu ting ol Israel inap lotuim Jehova long pasin em i laikim sapos ol i go bek long Isip?
9 Rot i op long ol Israel long larim Jehova i yusim ol bilong kamapim samting em i tingting pinis long mekim. Ol inap kisim ol blesing long Jehova, na tu, ol inap helpim olgeta narapela lain long graun long kisim blesing. (Stt. 22:18) Tasol planti bilong lain Israel i no ting em i bikpela samting long stap olsem lain bilong God na long stap gutpela piksa ol narapela lain i ken bihainim. Ol i tok ol i laik i go bek long Isip! (Ritim Namba 14:2-4.) Tasol sapos ol i go bek long Isip, ol i no inap lotuim Jehova long pasin em i laikim na stap gutpela piksa ol narapela lain i ken bihainim. Sapos ol i kamap wokboi gen long Isip, ol i no inap i stap fri long bihainim Lo Bilong God na em bai i no inap lusim ol sin bilong ol. Taim ol i tok olsem ol i laik i go bek long Isip, ol i tingim ol yet tasol. Ol i no tingim God na samting em i tingting pinis long mekim. Long dispela as Jehova i tok: “Mi les tru long lain pipol bilong dispela taim na mi tok, ‘Long bel bilong ol, ol i save lusim stretpela rot. Na ol i no save long ol pasin bilong mi.’ Olsem na mi belhat na tok tru antap olsem, ‘Ol bai i no inap i go insait long malolo bilong mi.’ ”—Hib. 3:10, 11; Sng. 95:10, 11.
10 Laik bilong ol long go bek long Isip i soim olsem ol i no ting ol blesing ol i kisim long Jehova i bikpela samting. Dispela bikhet lain Israel i laikim ol gutpela kaikai ol i bin kisim long Isip. (Nam. 11:5) Ol i olsem Iso, em i no ting namba bilong em olsem fesbon pikinini i bikpela samting na em i salim dispela namba bilong kisim wanpela plet kaikai.—Stt. 25:30-32; Hib. 12:16.
11. Ol Israel husat i bin lusim Isip ol i no bilip long Jehova. Olsem wanem? Dispela i senisim samting Jehova i tingting pinis long mekim?
11 Maski ol Israel husat i bin lusim Isip i no holimpas bilip bilong ol long Jehova, em i no senisim samting em i tingting pinis long mekim long lain Israel. Ol pikinini bilong ol i bihainim tok, winim ol papamama. Ol dispela pikinini i bihainim tok Jehova i givim long ol long go insait long Graun Bilong Promis na kisim dispela graun. Josua 24:31 i tok: “Taim Josua i stap yet ol Israel i save lotu long Bikpela. Na bihain long Josua i dai ol i lotu yet long Bikpela. Ol i mekim olsem i go inap long taim ol hetman i bin lukim ol samting Bikpela i bin mekim bilong helpim ol Israel, ol tu i dai pinis.”
12. Olsem wanem yumi ken save olsem ol Kristen long nau inap i go insait long malolo bilong God?
12 Tasol ol dispela Israel husat i bin bihainim tok, ol i go lapun na ol i dai. Ol Israel i kamap bihain, ol i “lusim tingting long Bikpela na ol samting em i bin mekim bilong helpim ol Israel.” Ol i kirap “mekim pasin nogut long ai bilong Bikpela” na lotuim ol giaman god. (Het. 2:10, 11) Ol Israel i sakim tok, olsem na ol i no stap wanbel moa wantaim God. Olsem na dispela Graun Bilong Promis i no stap olsem “ples malolo” bilong ol. Pol i tok long ol dispela Israel olsem: “Sapos Josua i bin kisim ol i go insait long wanpela ples malolo, orait bihain i no gat wok long God i tokaut long narapela de.” Na em i tok moa: “Olsem na i gat malolo bilong sabat i stap yet bilong ol manmeri bilong God.” (Hib. 4:8, 9) “Ol manmeri bilong God” em Pol i toktok long ol, em ol Kristen. Dispela i makim ol lain husat i bin stap aninit long Lo Bilong Moses paslain long ol i kamap Kristen, na tu, ol lain husat i no bin stap aninit long dispela Lo Bilong Moses. Tok bilong Pol i makim olsem ol Kristen long nau inap i go insait long malolo bilong God.
Sampela Kristen i No Go Insait Long Malolo Bilong God
13, 14. (a) Long taim bilong Moses, ol Israel i mas mekim wanem bilong i go insait long malolo bilong God? (b) Long taim bilong Pol, ol Kristen i mas mekim wanem bilong i go insait long malolo bilong God?
13 Pol i rait long ol Kristen Hibru, long wanem, sampela bilong ol i no mekim wok i stret wantaim samting God i tingting pinis long mekim. (Ritim Hibru 4:1.) Ol i mekim wanem? Ol i bihainim yet sampela tok bilong Lo Bilong Moses. Tru, inap 1,500 yia, lain bilong God i mas bihainim Lo Bilong Moses bambai God i ken orait long ol. Tasol bihain long Jisas i dai, ol i no gat wok moa long bihainim Lo Bilong Moses. Sampela Kristen i no kliagut long dispela, olsem na ol i ting ol i mas bihainim yet sampela hap bilong Lo. b
14 Pol i tokim ol dispela Kristen Hibru olsem Jisas em i gutpela hetpris i winim olgeta narapela hetpris em ol i gat sin. Em i soim olsem nupela kontrak i gutpela moa winim kontrak God i bin mekim wantaim ol Israel. Na tu, em i kamapim olsem bikpela tempel bilong Jehova i “bikpela na gutpela moa” na i winim tempel ‘em ol man i bin wokim long han.’ (Hib. 7:26-28; 8:7-10; 9:11, 12) Pol i yusim Sabat long Lo Bilong Moses olsem eksampel bilong stori long olsem wanem ol Kristen inap i go insait long malolo bilong Jehova. Em i tok: “I gat malolo bilong sabat i stap yet bilong ol manmeri bilong God. Man husat i go insait long malolo bilong God, em tu i malolo long wok bilong em yet, wankain olsem God i bin malolo long wok bilong em yet.” (Hib. 4:8-10) Ol dispela Kristen Hibru i no ken tingting moa olsem ‘long wok bilong man yet,’ olsem wok em i mekim bilong bihainim Lo Bilong Moses, God bai orait long em. Kirap long Pentikos 33 C.E., pasin bilong Jehova long orait long man, dispela i olsem presen em i amamas long givim long ol man i bilip bilong Jisas Krais.
15. Olsem wanem yumi save yumi mas bihainim tok bilong Jehova sapos yumi laik i go insait long malolo bilong em?
15 Bilong wanem ol Israel long taim bilong Moses i no bin i go insait long Graun Bilong Promis? Em long wanem ol i no bihainim tok bilong Jehova. Bilong wanem ol Kristen long taim bilong Pol i no bin i go insait long malolo bilong God? Long wanem, ol i mekim wankain samting. Ol i sakim tok bilong Jehova. Ol i no bilip olsem Jehova i laik bai ol lain bilong em i lotu long em long narapela pasin na ol i no ken bihainim moa Lo Bilong Moses.
Rot Bilong Go Insait Long Malolo Bilong God Long Nau
16, 17. (a) Olsem wanem ol Kristen inap i go insait long malolo bilong God long nau? (b) Long stadi i kamap bihain, yumi bai stori long wanem samting?
16 Long nau, i no gat wanpela bilong yumi i gat tingting olsem ol Kristen i mas bihainim Lo Bilong Moses na bai God i ken kisim bek ol. Tok Pol i mekim long ol Efesus i klia tru, em i tok: “Long rot bilong dispela bikpela pasin helpim God i kisim bek yupela, long wanem, yupela i bilip. Na dispela i no samting yupela yet i mekim, nogat, em i presen i kam long God. Em i no pe bilong ol wok em man i mekim.” (Efe. 2:8, 9) Olsem na long nau, hau bai ol Kristen i go insait long malolo bilong God? Tingim: Jehova i makim dispela de bilong malolo bilong inapim samting em i tingting pinis long mekim long graun na long ol manmeri i bihainim tok. Long rot bilong oganaisesen bilong em, Jehova i tokaut long yumi long ol samting em i tingting pinis long kamapim na long ol samting em i laik yumi mas mekim. Yumi inap i go insait long malolo bilong Jehova sapos yumi harim tok bilong em na wok wantaim oganaisesen bilong em.
17 Sapos yumi no bihainim tok bilong gutpela wokboi i gat savetingting o yumi bihainim tasol ol samting yumi yet i ting i bikpela samting, orait yumi sakim samting Jehova i tingting pinis long mekim. Na sapos yumi sakim ol samting Jehova i tingting pinis long mekim, orait yumi no inap i stap pren bilong em. Long stadi i kamap bihain long dispela, yumi bai stori long sampela samting inap kamap na i givim rot long yumi long soim olsem yumi gat pasin bilong bihainim tok. Long dispela kain taim ol disisen yumi wokim bai soim olsem yumi go insait pinis long malolo bilong God o nogat.
[Ol Futnot]
a Ol pris na ol Livai i wok long tempel long de Sabat, na dispela i no brukim Lo Bilong Moses. God i makim Jisas long i stap hetpris bilong yumi. So taim Jisas i mekim wok long de Sabat, em wok Jehova i givim em, em i no mekim rong.—Mat. 12:5, 6.
b Yumi no save, bihain long Pentikos 33 C. E., sampela Kristen Hibru i bin ofaim ol sakrifais long Bikpela De Bilong God i Tekewe Sin Bilong Ol Manmeri o nogat. Tasol sapos ol i bin mekim, dispela i soim olsem ol i no rispektim ofa Jisas i bin mekim. Yumi save olsem sampela Kristen Hibru i bin bihainim yet ol kastam em Lo Bilong Moses i as bilong en.—Gal. 4:9-11.
Ol Askim Bilong Skelim Long Bel
• Long de namba 7, Jehova i laik mekim wanem?
• Olsem wanem yumi save de namba 7 i no pinis yet?
• Bilong wanem ol Israel long taim bilong Moses na sampela Kristen long taim bilong Pol i no go insait long malolo bilong God?
• Olsem wanem yumi inap i go insait long malolo bilong God long nau?
[Askim Bilong Stadi]
[Blurb long pes 27]
Yumi inap i go insait long malolo bilong Jehova sapos yumi bihainim tok bilong em na wok gut wantaim oganaisesen bilong em
[Ol Piksa long pes 26]
Lain bilong God long nau i mas mekim wanem bilong i go insait long malolo bilong em?
