Askim

Yu ting yumi inap makim stret hamas tok profet long Ol Skripsa Hibru i makim Mesaia?

Taim yumi skelim gut Ol Skripsa Hibru yumi inap luksave long planti tok profet em ol i bin kamap tru long Jisas Krais. Ol dispela tok profet i stori long i stap bilong en, taim em bai kamap Mesaia, ol samting em bai mekim, pasin ol man bai mekim long em, na wok God Jehova i makim em long mekim. Ol dispela samting i helpim yumi long save olsem Jisas em i Mesaia. Tasol sapos yumi laik makim hamas tok profet stret i stori long Mesaia i stap insait long Ol Skripsa Hibru, orait yumi mas was gut.

Olgeta man i no wanbel long wanem ol tok profet bilong Baibel i makim Mesaia. Long buk, The Life and Times of Jesus the Messiah, Alfred Edersheim i tok olsem rait bilong ol rabai bilong bipo i tok olsem 456 hap bilong Ol Skripsa Hibru i makim Mesaia, maski planti bilong ol dispela hap i no kolim dispela tok Mesaia. Tasol taim man i skelim gut ol dispela 456 hap, i hatwok long kliagut olsem sampela bilong ol dispela tok profet i stori long Jisas Krais o nogat. Olsem, Edersheim i tok ol Juda i ting Stat 8:11 em wanpela tok profet i stori long Mesaia. Ol i tok olsem “pisin balus i bin kisim lip bilong diwai oliv long Maunten Bilong Mesaia.” Edersheim i kamapim tu Kisim Bek 12:​42, na em i stori long tingting kranki bilong ol Juda long dispela skripsa olsem: “Moses i bin lusim ples drai na i kam, olsem tasol Mesaia bai lusim Rom na i kam.” Planti saveman na ol arapela man tu bai hatwok tru long bilip olsem dispela tupela skripsa na tingting kranki em ol Juda i kamapim, i stori long Jisas Krais.

Na sapos yumi tingim tasol ol tok profet em Jisas Krais i bin truim, bai yumi hatwok yet long makim namba stret bilong ol tok profet i stori long Mesaia. Olsem, Aisaia sapta  53 i gat sampela tok profet i stori long Mesaia. Aisaia 53:​2-7 i tok: “Dispela wokman i no gat nem . . . Ol man i bin givim baksait long em na rabisim em . . . Dispela wokman i bin karim ol hevi na pen bilong yumi. Long asua bilong sin bilong yumi tasol em i bin kisim bagarap . . . [Em i] olsem pikinini sipsip ol i kisim i go bilong kilim.” Olsem wanem? Sapta 53 bilong Aisaia i olsem wanpela tok profet tasol i makim Mesaia, o ol wan wan hap bilong dispela sapta em ol narapela narapela tok profet?

Tingim tu Aisaia 11:​1, em i tok: “Lain bilong Jesi i stap olsem as bilong diwai ol i katim pinis. Tasol nupela kru bai i kamap long dispela as bilong diwai.” Long ves 10 dispela tok profet i kamap gen, na tok i wankain liklik. Olsem wanem? Dispela tupela ves i makim tupela tok profet o em i makim wanpela tok profet tasol em ol i kolim gen? Tingting yumi kisim long hamas tok profet i stap long Aisaia sapta 53 na Aisaia sapta 11, dispela em i bikpela samting taim yumi laik kaunim hamas tok profet bilong Mesaia i stap.

Olsem na yumi no ken makim stret namba bilong ol tok profet i stap long Ol Skripsa Hibru na i stori long Mesaia. Oganaisesen bilong Jehova i bin wokim ol lista i kamapim planti tok profet i stori long Jisas na ol truim bilong ol. * Ol dispela lista inap helpim na strongim yumi taim yumi mekim stadi bilong yumi yet na famili stadi na wok autim tok bilong yumi. Na tu, ol tok profet bilong Mesaia, maski namba bilong ol i hamas, ol i kamapim klia tru olsem Jisas em i Krais, o Mesaia.

[Futnot]