Askim

Ol namba long ripot bilong sevis yia i makim wanem samting?

Long olgeta yia, yumi gat laik tru long lukim ripot bilong sevis yia i stap long Wok Kingdom Bilong Yumi. Yumi amamas tru long lukim ol wok em lain bilong Jehova i bin mekim long autim tok bilong Kingdom na skulim ol man long olgeta hap bilong graun. Tasol bilong ripot i ken strongim yumi, yumi mas kliagut long ol samting ripot i stori long en na long ol namba i stap long ripot. Tingim ol dispela eksampel.

Sevis yia. Em i save kirap long Septemba 1 na i go inap long Ogas 31. Wok Kingdom Bilong Yumi i save kamapim ripot bilong sevis yia i go pinis. Olsem, Wok Kingdom bilong Februeri 2011 i kamapim ripot bilong sevis yia bilong 2010, dispela sevis yia i kirap long Septemba 1, 2009, na i go inap long Ogas 31, 2010.

Hamas pablisa na averes pablisa. Dispela tok “pablisa” i makim ol Witnes Bilong Jehova i baptais pinis, na ol arapela husat i winim mak bilong autim tok bilong Kingdom tasol ol i no baptais yet. Dispela tok “hamas pablisa” i makim namba bilong ol pablisa long mun we namba bilong ol pablisa i antap tru, winim ol arapela mun bilong sevis yia. Sampela taim ol leit ripot i insait long dispela namba. Olsem na sampela taim ol i kaunim wanpela pablisa tupela taim. Tasol ol pablisa husat i bin autim tok na ol i lusim tingting long putim ripot, ol i no insait long dispela namba. Olsem na em i bikpela samting long ol pablisa i mas putim ripot long taim stret long olgeta wan wan mun. “Averes pablisa” i makim namba bilong olgeta ripot bilong olgeta mun na ol i divaidim long 12.

Hamas aua. Wok Kingdom bilong Februeri 2011 i tok ol Witnes Bilong Jehova i bin lusim 1.6 bilion aua long wok autim tok. Dispela namba i no makim olgeta aua yumi lusim long mekim wok lotu bilong yumi, long wanem, yumi no kaunim ol aua yumi lusim bilong mekim wok sepeding, go long ol miting, na mekim stadi bilong yumi yet na tingim tingim ol dispela tok long bel.

Mani ol i tromoi. Long sevis yia bilong 2010, ol Witnes Bilong Jehova i bin tromoi winim 155 milion dola long lukautim ol painia salim, ol misineri, na ol wasman raun. Mani ol i tromoi bilong prinim ol buk na nius samting i no insait long dispela; na mani bilong lukautim 20,000 volantia bilong Betel long olgeta hap, dispela tu i no insait long en.

Hamas i kisim bret na wain long Memorial. Dispela em namba bilong ol manmeri long olgeta hap husat i baptais na ol i kisim bret na wain long Memorial. Olsem wanem? Dispela namba i makim namba tru bilong ol Kristen God i bin makim em ol i stap long graun? Ating i no olsem. Kain kain samting inap mekim na sampela inap popaia na ting ol i bilong i go long heven, olsem bilip bilong ol long bipo o sik bilong tingting. Olsem na yumi no inap save long namba stret bilong ol Kristen God i bin makim em ol i stap yet long graun, na yumi no gat wok long save. Gavening Bodi i no gat lista bilong olgeta nem bilong ol Kristen husat i kisim bret na wain long Memorial. *

Yumi kliagut olsem sampela bilong ol Kristen God i bin makim, em ol “wokboi bilong God bilong yumi,” ol bai stap yet long graun taim traipela hevi i kirap. (Rev. 7:​1-3) Inap long dispela taim, ol Kristen God i bin makim bai i go pas long mekim wok em ripot bilong sevis yia i kamapim​—⁠em bikpela wok tru bilong autim tok na skulim ol man.

[Futnot]