Jehova Em i “God Husat i Save Givim Bel Isi”

“God husat i save givim bel isi em i ken i stap wantaim yupela.”​—⁠ROM 15:⁠33.

1, 2. Stat sapta 32 na 33 i stori olsem wanem long tupela brata? Wanem samting i bin kamap?

 TINGIM dispela: Klostu nau tupela brata bai bung. Ol bai bung klostu long Penuel, em klostu long Jabok veli long hap is bilong wara Jordan. Dispela tupela brata em Iso na Jekop, na inap longpela taim ol i no bin lukim narapela narapela. Inap 20 yia paslain long dispela, Iso i bin salim rait bilong em olsem fesbon i go long Jekop. Taim Iso i harim olsem Jekop i laik kam bek long ples, em i go wantaim 400 man na bungim Jekop. Taim Jekop i harim dispela, em i pret. Em i ting, nogut brata bilong en i belhat yet na i laik kilim em i dai. So Jekop i salim ol wokboi i go givim ol animal olsem presen long Iso. Taim ol narapela narapela wokboi i go kamap long Iso na givim ol animal long en, ol i save tokim em olsem em ol presen i kam long brata bilong en. Namba bilong ol animal Jekop i salim i winim 550.

² Wanem samting i kamap taim tupela i bung? Jekop i soim olsem em i gat strongpela bel na em i gat pasin daun. Taim em i wokabaut i go long Iso em i brukim skru 7-pela taim long em! Tasol paslain long Jekop i mekim olsem, em i mekim nambawan bikpela samting. Em i beten long Jehova na askim em long lukautim em na bai Iso i no ken mekim nogut long em. Jehova i harim beten bilong Jekop. Baibel i tok Iso i ran i go bungim Jekop na holim em na kis long em.​—⁠Stt. 32:​11-20; 33:​1-4.

3. Yumi kisim wanem skul long stori bilong Jekop na Iso?

³ Dispela stori i helpim yumi long save olsem yumi mas mekim olgeta samting yumi inap long mekim bilong stretim hevi yumi gat wantaim narapela insait long kongrigesen. Sapos yumi no mekim, bel isi na pasin wanbel bilong kongrigesen bai bagarap. Jekop i no bin mekim wanpela rong. Em i no gat wok long tok sori  long Iso. Iso yet i bin ting olsem rait bilong em olsem fesbon i samting nating na em i salim long Jekop bilong kisim kaikai wanpela taim tasol. Tasol Jekop i mekim olgeta samting em inap mekim bilong i stap wanbel wantaim em. (Stt. 25:​31-34; Hib. 12:16) Eksampel bilong Jekop i soim olsem yumi mas wok strong tru long stap bel isi wantaim ol bratasista Kristen. Na dispela i soim tu olsem taim yumi askim Jehova long helpim yumi long mekim olsem, em i save harim beten bilong yumi. I gat planti narapela eksampel long Baibel i soim yumi olsem wanem yumi ken i stap bel isi wantaim ol arapela. Bai yumi stori long sampela bilong ol.

Nambawan Gutpela Eksampel Bilong Bihainim

4. God i mekim wanem bilong kisim bek ol man long sin na dai?

⁴ Jehova em i nambawan gutpela eksampel long pasin bilong mekim ol samting bilong i stap wanbel wantaim narapela. Em i “God husat i save givim bel isi.” (Rom 15:33) Tingim ol samting Jehova i bin mekim bilong yumi ken i stap pren bilong em. Yumi ol tumbuna pikinini bilong Adam na Iv, olsem na yumi save mekim sin. Na man i mekim sin, em i mas i dai. (Rom 6:23) Tasol God i laikim yumi tumas, olsem na em i laik kisim bek yumi long sin na dai. So em i salim Pikinini bilong en, Jisas, long lusim heven na kam daun. Na Jisas i bon long graun olsem man i gutpela olgeta na em i dai bilong tekewe sin bilong yumi. Jisas i amamas long bihainim laik bilong Papa na givim laip bilong em bilong helpim yumi. (Jon 10:​17, 18) Na bihain Jehova i kirapim bek Jisas na em i kisim laip long heven. Long heven Jisas i givim pe bilong sakrifais bilong em long Jehova. Dispela sakrifais, o pe bilong baim bek man, i mekim na ol man husat i tanim bel bai i no dai moa.​—⁠Ritim Hibru 9:​14, 24.

5, 6. Olsem wanem sakrifais bilong Jisas i helpim ol man long kamap pren bilong God?

⁵ Sin i mekim na ol man i kamap birua bilong God. Olsem wanem sakrifais bilong Jisas i helpim ol man? Aisaia 53:5 i tok: “Ol i bin paitim em nogut na skin bilong en i bin bruk nabaut, na long dispela pen em i karim em i mekim yumi i kamap orait gen, na yumi stap gut tru.” Sakrifais bilong Jisas i mekim na ol man husat i bihainim tok, ol i ken kamap pren bilong God. Baibel i tok tu olsem: “Dispela man i givim pe bilong baim bek man long rot bilong blut bilong en, na i mekim yumi kamap fri. Yes, ol rong bilong yumi i tekewe.”​—⁠Efe. 1:⁠7.

⁶ Baibel i tok long Jisas olsem: “God i laik bai olgeta samting i mas pulap long dispela man.” Dispela i makim olsem God i mekim wok long Jisas long kamapim ol samting em i tingting pinis long mekim. Na God i laik mekim wanem? Em i laik ‘mekim olgeta arapela samting i kamap wanbel wantaim em yet long rot bilong blut’ bilong Jisas Krais. Ol samting God i mekim i kamap wanbel wantaim em, o mekim i kamap pren bilong em, em “ol samting long heven” na “ol samting long graun.” Em wanem ol samting?​—⁠Ritim Kolosi 1:​19, 20.

7. “Ol samting long heven” em wanem samting? Na “ol samting long graun” em wanem samting?

⁷ Long rot bilong sakrifais bilong Jisas, God i kolim ol Kristen em i bin makim olsem “stretpela manmeri” na ol i kamap pikinini bilong em na ol i ‘stap wanbel wantaim em.’ (Ritim Rom 5:⁠1.) Baibel i kolim ol olsem “ol samting long heven,” long wanem, God i kirapim bek ol bilong i stap laip wantaim Jisas Krais long heven. Ol “bai stap king na bosim graun” na mekim wok pris. (Rev. 5:10) “Ol samting long graun” i makim ol manmeri husat i tanim bel na ol bai stap laip oltaim long graun.​—⁠Sng. 37:⁠29.

8. Olsem wanem eksampel bilong Jehova inap helpim yu taim ol hevi i kamap insait long kongrigesen?

⁸ Tok Pol i mekim long ol Kristen long Efesus​—⁠em God i bin makim ol​—⁠i soim olsem em i tingim tru pe bilong baim bek man. Em i tok olsem “marimari i pulap long God” na “em i mekim yumi i kisim laip wantaim Krais, na em i mekim olsem maski yumi stap olsem daiman long ol rong bilong yumi.” Em i tok God i kisim bek yumi “long rot bilong bikpela pasin helpim.” (Efe. 2:​4, 5) Yumi olgeta, lain bilong kisim laip long heven na lain bilong kisim laip long  graun, i tingim tru marimari na bikpela pasin helpim bilong God. Yumi amamas long olgeta samting Jehova i bin mekim long helpim ol man long i stap wanbel wantaim em. Sampela taim ol hevi i kamap na ol inap bagarapim pasin wanbel insait long kongrigesen. Long kain taim olsem, yumi mas tingim eksampel bilong God na mekim ol samting bilong i stap bel isi wantaim ol bratasista.

Kisim Skul Long Eksampel Bilong Abraham na Aisak

9, 10. Abraham i bin mekim wanem bilong soim olsem em i laik stap bel isi wantaim ol arapela?

⁹ Baibel i tok: “ ‘Abraham i bilip long Jehova, olsem na long ai bilong em Abraham i olsem stretpela man,’ na Abraham i kisim nem olsem ‘pren bilong Jehova.’ ” (Jems 2:23) Wanpela rot we Abraham i kamapim olsem em i bilip long Jehova, em pasin bilong em long mekim ol samting bilong i stap wanbel wantaim ol arapela. Olsem, kros i kamap namel long ol wokman i lukautim ol animal bilong Abraham na ol wokman i lukautim ol animal bilong Lot. (Stt. 12:5; 13:⁠7) Abraham na Lot i pasim tok olsem i gutpela long tupela i mas bruk na go sindaun long narapela narapela hap. Tingim samting Abraham i bin mekim. Maski em i gat bikpela krismas moa na em i pren bilong Jehova, em i no ting em i mas wokim disisen long samting em na Lot bai mekim, nogat. Samting em i mekim i soim olsem em i laik i stap bel isi wantaim Lot.

¹⁰ Abraham i tokim Lot: “Mitupela i wanblut. Nogut mitupela i kros, na nogut ol wokman bilong mitupela tu i kros. Lukim bikpela hap graun i stap. Mobeta yu makim wanpela hap bilong yu yet, na yu lusim mi na yu go long en. Sapos yu laik i go long han sut, orait mi ken i go long han kais. Na sapos yu laik i go long han kais, orait bai mi go long han sut.” Lot i makim graun i nambawan tru na i gat bikpela gris long en. Abraham i wanbel long disisen bilong Lot na em i no kros long em. (Stt. 13:​8-11) Yumi save long dispela, long wanem, taim ol birua i kam kisim Lot, kwiktaim Abraham i go helpim em.​—⁠Stt. 14:​14-16.

11. Abraham i mekim wanem bilong i stap bel isi wantaim ol Filistia?

¹¹ Tingim tu ol samting Abraham i mekim bilong stap bel isi wantaim ol Filistia, em ol tu i stap long Kenan. Ol Filistia i kisim hulwara em ol wokman bilong Abraham i bin digim long Berseba. Taim dispela samting i kamap, Abraham i no mekim wanpela tok o wanpela samting. Bihain, king bilong Filistia i kam lukim Abraham long mekim kontrak bilong i stap wanbel wantaim em. Abraham i wanbel long mekim gutpela pasin long ol lain tumbuna bilong king. Bihain long dispela, Abraham i tokim king long hulwara ol i bin kisim. King i kirap nogut long harim dispela na em i givim bek hulwara long Abraham. Na Abraham i stap wanbel yet wantaim ol Filistia, maski em i man bilong narapela ples.​—⁠Stt. 21:​22-31, 34.

12, 13. (a) Olsem wanem Aisak i bihainim eksampel bilong papa bilong en? (b) Olsem wanem Jehova i blesim pasin bilong Aisak long i stap wanbel wantaim ol arapela?

¹² Aisak i laikim pasin bilong i stap bel isi wankain olsem papa bilong en Abraham. Em i mekim ol samting bilong i stap wanbel wantaim ol Filistia. Kaikai i sot, olsem na Aisak na famili bilong en i lusim ples drai bilong Berlahairoi long Negev na muv i go long Gerar, em hap graun i gutpela moa. Dispela hap em bilong ol Filistia. Jehova i blesim Aisak na gaden bilong en i karim planti kaikai na em i kisim planti sipsip na bulmakau. Dispela i mekim na ol Filistia i jeles long em. Ol i no laik bai Aisak i kisim planti samting moa, olsem na ol i kisim graun na pulimapim long ol hulwara bilong en. Bihain, king bilong Filistia i tokim Aisak: “Yu mas lusim mipela.” Olsem na bilong i stap wanbel wantaim ol Filistia, Aisak i bihainim tok bilong king.​—⁠Stt. 24:62; 26:​1, 12-17.

¹³ Bihain long Aisak na famili i lusim dispela hap, ol wokman bilong en i digim narapela hulwara. Ol wokman bilong Filistia i kros wantaim ol wokman bilong Aisak na tok dispela wara em bilong ol. Olsem papa bilong en, Aisak i no laik kros long dispela samting. Olsem na em i tokim ol wokman bilong en long digim narapela  hulwara. Ol Filistia i kros long dispela tu. Bilong i stap bel isi wantaim ol, Aisak wantaim famili bilong en i muv gen na go long narapela hap. Ol wokman bilong en i digim narapela hulwara long dispela hap na Aisak i kolim dispela hulwara olsem “Ples bilong sindaun gut.” Bihain, em i muv i go long Berseba we graun i gutpela moa. Long dispela hap Jehova i blesim em na tokim em: “Yu no ken pret. Mi stap wantaim yu. Mi bai mekim gut long yu na mekim ol tumbuna pikinini bilong yu i kamap planti, long wanem, mi laikim tru wokman bilong mi, Abraham.”​—⁠Stt. 26:​17-25.

14. Taim king bilong Filistia i kam bilong wokim kontrak wantaim Aisak, Aisak i mekim wanem bilong soim olsem em i laik i stap bel isi wantaim king?

¹⁴ Tru, ating Aisak inap pait long rait bilong em long yusim ol hulwara em ol wokman bilong en i digim. King bilong Filistia i save olsem Jehova i bin blesim olgeta samting Aisak i mekim. Taim king i kam wantaim ol ofisa bilong en long lukim Aisak long Berseba bilong mekim wanpela kontrak, king i tok: “Nau mipela i save pinis olsem, God i stap wantaim yu.” Tasol bilong i stap wanbel, Aisak i bin muv planti taim liklik. Em i no laik kros. Long dispela taim tu, taim king na ol ofisa i kam lukim em, Aisak i soim olsem em i laik i stap bel isi wantaim king. Baibel i tok: “Aisak i mekim wanpela bikpela kaikai bilong ol na ol i kaikai na dring. Na long moningtaim tru, ol i kirap na ol i mekim strongpela promis olsem ol bai i sindaun gut wantaim. Na Aisak i tok, ‘Yupela i ken i go wantaim bel isi.’ Na ol i lusim em na i go.”​—⁠Stt. 26:​26-31.

Kisim Skul Long Eksampel Bilong Josep

15. Bilong wanem ol brata bilong Josep i no save mekim gutpela toktok long em?

¹⁵ Baibel i tok Jekop, pikinini bilong Aisak, em i “man bilong stap isi.” (Stt. 25:27) Olsem yumi lainim pinis, Jekop i bin mekim olgeta samting em inap mekim bilong i stap bel isi wantaim brata bilong en, Iso. Jekop i bihainim gutpela eksampel bilong papa bilong en Aisak. Yu ting ol pikinini bilong Jekop i kisim skul long eksampel bilong papa bilong ol? Jekop i laikim Josep moa yet, winim ol arapela 11-pela pikinini man bilong en. Josep i save bihainim tok na rispektim papa, na papa i save trastim em. (Stt. 37:​2, 14) Tasol Baibel i tok ol brata bilong Josep i jeles nogut tru long em na ol i no save mekim gutpela toktok long em. Ol i heitim em tru, olsem na ol i salim em olsem wokboi nating na tokim papa bilong em olsem wanpela wel animal i kilim em i dai.​—⁠Stt. 37:​4, 28, 31-33.

16, 17. Olsem wanem pasin Josep i mekim long ol brata bilong en i soim olsem em i laik i stap bel isi wantaim ol?

¹⁶ Jehova i blesim Josep. Bihain, Josep i kamap praim minista bilong Isip, olsem nambatu bikman long Isip. Taim bikpela hangre i kamap long Kenan, ol brata bilong Josep i kam long Isip bilong baim kaikai. Taim ol i bungim Josep, ol i no luksave long em bikos em i werim klos bilong ol Isip. (Stt. 42:​5-7) Josep inap mekim wankain pasin long ol brata bilong en olsem ol i bin mekim long em na papa. Tasol nogat, em i mekim ol samting bilong stap bel isi wantaim ol. Na taim ol soim olsem ol i sori long samting ol i bin mekim, Josep i tokim ol long em i husat. Em i tok: “Yupela i no ken bel hevi na yupela i no ken bel nogut long dispela pasin yupela i bin mekim long mi. Nogat. God yet i bin salim mi i kam paslain long yupela bilong helpim yupela bai yupela i no ken i dai.” Na bihain “Josep i holim olgeta brata bilong en wan wan, na em i krai na givim kis long ol.”​—⁠Stt. 45:​1, 5, 15.

¹⁷ Orait papa bilong ol Jekop i dai pinis, na ol brata bilong Josep i wari olsem em bai bekim pasin nogut long ol. Taim ol i toktok wantaim Josep long dispela, em i krai na tok: “Yupela i no ken pret. Bai mi lukautim yupela wantaim ol pikinini bilong yupela.” Long dispela taim tu, Josep i soim olsem em man bilong laikim tru bel isi. Em i ‘mekim gutpela toktok long ol na mekim bel bilong ol i stap isi.’​—⁠Stt. 50:​15-21.

Ol Eksampel “Bilong Skulim Yumi”

18, 19. (a) Yu kisim wanem skul long ol eksampel yumi bin stori long en? (b) Bai yumi kisim wanem save long stadi i kamap bihain long dispela?

¹⁸ Pol i tok: “Olgeta tok ol i bin raitim long  bipo, ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:⁠4) Yumi kisim wanem skul long Man i stap nambawan gutpela eksampel, em Jehova, na long eksampel bilong Abraham, Aisak, Jekop, na Josep?

¹⁹ Sapos yumi tingim olgeta samting Jehova i mekim bilong helpim yumi long kamap pren bilong em, orait bai yumi mekim olgeta samting yumi inap mekim bilong i stap bel isi wantaim ol arapela. Skul yumi kisim long Abraham, Aisak, Jekop, na Josep i soim olsem ol papamama inap stap gutpela piksa long ol pikinini bilong ol na skulim ol long i stap wanbel wantaim ol arapela. Na tu, yumi kisim save olsem Jehova i save blesim ol man husat i wok strong long i stap bel isi wantaim ol arapela. Dispela i helpim yumi long save long as na Pol i tok olsem Jehova em i “God husat i save givim bel isi.” (Ritim Rom 15:33; 16:20.) Stadi i kamap bihain long dispela bai stori long as na Pol i tok yumi mas wok strong long mekim ol samting i save kamapim bel isi na olsem wanem yumi ken mekim olsem.

Yu Lainim Wanem Samting?

• Paslain long Jekop i bungim Iso, em i mekim wanem bilong i stap bel isi wantaim em?

• Jehova i bin mekim bikpela samting bilong helpim ol man long kamap pren bilong em. Dispela i kirapim yu long mekim wanem?

• Yu kisim wanem skul long eksampel bilong Abraham, Aisak, Jekop, na Josep?

[Askim Bilong Stadi]

[Ol Piksa long pes 23]

Wanem nambawan bikpela samting Jekop i bin mekim bilong i stap bel isi wantaim Iso?