Wanpela Bikpela Miting Tru

“TAIM dispela miting i pinis yupela bai tok, ‘Dispela miting bilong olgeta yia em nau tasol yumi mekim, em i narapela kain tru winim ol arapela yumi bin mekim!’ ” Stephen Lett bilong Gavening Bodi Bilong Ol Witnes Bilong Jehova, i mekim dispela tok bilong kirapim moa yet tingting bilong ol manmeri i stap long odiens. Ol i bung long miting bilong Sosaiti Wastaua Bilong Pennsylvania, em dispela miting ol i save mekim wanpela taim long olgeta yia, na dispela em namba 126. Em i kamap long Oktoba 2, 2010, long Haus Kibung Bilong Ol Witnes Bilong Jehova long Jersey City, New Jersey, long Amerika. Wanem sampela bikpela tok i bin kamap long dispela miting?

Long namba wan tok bilong program, Brata Lett i mekim tok i stori long karis bilong Jehova long heven olsem i stap long Buk Esekiel. Dispela bikpela karis i naispela tumas i makim oganaisesen bilong God, em Jehova i stiaim. Brata Lett i tok, hap bilong oganaisesen i stap long heven em ol ensel i insait long en, em i save spit tru olsem laitning, em i bihainim tingting bilong Jehova wantu tasol. Na hap bilong oganaisesen bilong God Jehova i stap long graun em tu i wok long spit i go. Brata Lett i kamapim sampela nupela samting em oganaisesen bilong God long graun i bin mekim long nau.

Olsem, ol i pasim sampela brens na bungim ol i kamap wanpela. Dispela senis i opim rot long planti husat i bin wok long Betel long ol dispela kantri long ol i ken putim wok bilong autim tok i stap nambawan. Brata Lett i kirapim odiens long beten yet olsem Gavening Bodi, em mausman bilong gutpela wokboi, i ken wok yet long stap gut long God na bihainim savetingting.​—⁠Mat. 24:​45-47.

Ol Gutpela Ripot na Ol Intaviu

Tab Honsberger, husat i insait long Brens Komiti long Haiti, i givim ripot long hevi em guria bilong Janueri 12, 2010 i bin kamapim, em guria i bin kilim i dai 300,000 manmeri. Em i tok ol pris pasto i tokim ol manmeri olsem God i givim strafe long ol man i dai, long wanem, ol i no bilip long em, tasol em i lukautim ol gutpela man. Tasol planti tausen raskol i bin ranawe lusim kalabus taim guria i pundaunim banis bilong haus kalabus. Planti gutpela manmeri bilong Haiti i kisim save long as tru bilong ol hevi bilong nau na dispela i mekim gut bel bilong ol. Brata Honsberger i kamapim tok bilong wanpela gutpela brata em meri bilong en i dai long dispela guria, em i tok: “Mi krai yet i kam inap long nau. Mi no save bai mi bel hevi inap long wanem taim, tasol mi amamas long pasin laikim oganaisesen bilong Jehova i mekim long mi. Mi bilip olsem gutpela samting bai kamap na mi gat laik long kamapim dispela long ol arapela.”

 Mark Sanderson, bipo em i stap long Brens Komiti long Filipins na nau em i insait long Betel famili long Brooklyn, i givim ripot long Filipins. Pes bilong em i lait tru taim em i stori olsem inap 32 mun namba bilong ol pablisa bilong Kingdom long Filipins i wok long i go antap, na namba bilong ol Baibel stadi i winim tru namba bilong ol pablisa. Em i stori long Miguel, wanpela man i bin kilim i dai tumbuna pikinini bilong em. Miguel i wok strong tru long kotim na kalabusim dispela kilman. Bihain, taim Miguel i autim tok long haus kalabus, em i bungim dispela kilman. Maski Miguel i tingting planti, em i mekim pasin isi taim em i toktok wantaim dispela kilman. Bihain em i stadi wantaim dispela man, na dispela man i kisim tok i tru na kirap laikim tru Jehova. Nau dispela man i baptais pinis. Miguel i gutpela pren bilong em na em i wok long helpim dispela nupela brata long lusim kalabus kwiktaim. *

Bihain long dispela, Mark Noumair, em wanpela tisa bilong Dipatmen Bilong Ol Skul Tiokratik, i intaviuim 6-pela marit. Alex na Sarah Reinmueller, David na Krista Schafer, na Robert na Ketra Ciranko. Alex Reinmueller, em helpim bilong Komiti Bilong Wokim Ol Buk Samting, i stori long olsem wanem em i bin putim tok i tru long bel bilong em taim em gat 15 krismas na mekim wok painia long Kanada, na planti taim em wanpela tasol i save autim tok. Mark i askim em husat long Betel i bin helpim em tru, Brata Reinmuller i kolim nem bilong 3-pela gutpela brata na em i stori long olsem wanem ol i bin helpim em long pas gut moa wantaim Jehova. Meri bilong em, Sarah, i stori long pasin pren bilong em wantaim wanpela sista husat i bin holimpas bilip, na long dispela as em i stap kalabus long Saina inap planti yia. Sarah i tok, long rot bilong beten em i lain long bilip na wetim Jehova i helpim em.

David Schafer, wanpela helpim bilong Komiti Bilong Wok Tisa, i givim biknem long mama bilong em husat i gat strongpela bilip, na em i stori long ol brata em ol i mekim wok mani long katim ol diwai, olsem ol i bin helpim em long mekim wok painia haptaim long taim em i yangpela. Meri bilong em, Krista, i stori long helpim em i bin kisim long pasin bilong ol lapun bratasista long Betel long “lukautim gut ol liklik samting,” olsem Jisas i bin tok long mekim.​—⁠Luk 16:⁠10.

Robert Ciranko, wanpela helpim bilong Komiti Bilong Raitim Tok, em i stori long fopela bubu bilong em, ol i kam long Hangari na ol i bilong lain Kristen God i bin makim. Taim em i yangpela, em i kirap nogut tru taim em i go long ol bikpela kibung long 1950 samting na luksave olsem oganaisesen bilong Jehova i  bikpela tru, winim kongrigesen bilong em. Meri bilong em, Ketra, i stori long em i bin lain long pasin bilong stap gut long God taim em i mekim wok painia long wanpela kongrigesen we i gat pasin apostet na ol narapela hevi. Em i sanap strong na bihain em i kamap painia salim long wanpela kongrigesen we em i pilim tru pasin wanbel bilong ol.

Bihain long dispela, Manfred Tonak, i givim ripot long Itiopia. Dispela ples i stap long bipo yet, taim ol man i bin raitim Baibel, na nau i gat winim 9,000 pablisa bilong gutnius. Planti bilong ol i stap long biktaun Addis Ababa o klostu long en. Ol ples i stap longwe i nidim sampela pablisa moa. Bilong stretim dispela samting, singaut i go long ol Witnes bilong Itiopia husat i stap long ol arapela kantri, long kam na autim tok long ol hap i stap longwe. Planti i bin kam na strongim bel bilong ol asples Witnes, na taim ol i autim tok ol i bungim ol man i amamas long harim tok.

Bikpela samting bilong dispela miting em ol tok i stori long ol Witnes Bilong Jehova long Rasia na ol hevi ol i karim long sait bilong kot. Aulis Bergdahl bilong Brens Komiti bilong Rasia i stori long pasin birua ol man i mekim long ol Witnes long Rasia, na moa yet long Moscow, kirap long bipo yet na i kam. Philip Brumley, bilong Dipatmen Bilong Lo long brens ofis bilong Amerika, i stori long ol gutpela samting i kamap insait long sampela mun i go pinis taim Yuropian Kot ov Human Raits (ECHR) i harim 9-pela komplein ol man i sutim long ol Witnes. Kot i tok dispela 9-pela komplein i no gat as bilong en, na long sampela komplein, Kot i stori gut tru long olsem wanem tok ol i sutim i no stret. Yumi no save yet wanem samting bai kamap, tasol Brata Brumley i ting disisen Kot i mekim bai helpim sampela kot kes long ol arapela kantri.

Bihain long dispela gutpela tok, Brata Lett i tokaut olsem ECHR i orait long harim kot kes bilong baim takis i bin i stap longpela taim namel long gavman bilong Frans na ol Witnes Bilong Jehova. Ol man i save rispektim tru ECHR, na dispela lain i no save harim ol kot nating nating. Inap long nau, ECHR i bin harim 39 kes olgeta bilong ol Witnes Bilong Jehova, na yumi winim 37 bilong ol dispela kot kes. Brata Lett i kirapim olgeta manmeri bilong God long beten long God Jehova long dispela samting.

Richard Morlan i mekim laspela ripot, em wanpela tisa bilong Skul Bilong Ol Elda Bilong Kongrigesen. Em i stori long dispela skul na amamas bilong ol elda husat i bin go long en.

Ol Arapela Tok Gavening Bodi i Mekim

Guy Pierce bilong Gavening Bodi i mekim wanpela tok i stori gut long yiateks bilong 2011, “Nem bilong Jehova em ples hait bilong  yumi.” (Sef. 3:​12, NW ) Em i tok lain bilong Jehova i ken amamas long planti samting long nau, tasol tu em i taim bilong tingting gut na was i stap. Bikpela de bilong Jehova i kam klostu, tasol ol man i wok yet long painim ples hait long lotu giaman, ol gavman, na mani kago, na ol man i mekim ol samting bilong amamas tasol na lusim tingting long ol hevi. Bilong painim ples hait tru, yumi mas singaut long nem bilong Jehova. Dispela i makim olsem yumi mas save gut long em, rispektim em tru, trastim em, na yusim olgeta samting yumi gat bilong soim olsem yumi laikim em tru.

David Splane bilong Gavening Bodi i mekim narapela tok na tim bilong en i kirapim tru tingting bilong odiens, nem bilong tok em “Yu Insait Pinis Long Malolo Bilong God?” Em i tok olsem malolo bilong God i no makim olsem God i stap nating, nogat. Jehova na Pikinini bilong em i “wok i stap” long dispela de bilong malolo bilong inapim ol samting God i tingting pinis long mekim hia long graun. (Jon 5:17) Olsem wanem yumi inap i go insait long malolo bilong God? Yumi mas lusim pasin bilong mekim sin na no ken ting yumi kamap stretpela man long rot bilong ol wok yumi mekim. Na tu, yumi mas bilip na tingim ol samting God i tingting pinis long mekim, na wok strong long sapotim dispela samting em i laik mekim. Sampela taim, dispela i hatwok, tasol yumi mas bihainim ol tok oganaisesen bilong Jehova i givim long yumi. Brata Splane i kirapim odiens long mekim olgeta samting ol inap mekim bilong i go insait long malolo bilong God.

Brata Anthony Morris bilong Gavening Bodi i mekim laspela tok, nem bilong en, “Yumi Wetim Wanem Samting?” Brata Morris i mekim tok olsem wanpela gutpela papa na i kirapim odiens long tingim tru ol tok profet em yumi wetim truim bilong en, em ol samting ol manmeri i stap gut long God i wetim. Wanpela bilong ol dispela tok profet em singaut ol man bai mekim olsem, “Nau em i taim bilong bel isi na gutpela sindaun!” na narapela em bagarap bilong lotu giaman. (1 Tes. 5:​2, 3; Rev. 17:​15-17) Brata Morris i tok taim yumi harim long nius olsem samting nogut i kamap, tasol i no truim ol kain tok profet olsem, yumi no ken tok, “Dispela i mas Armagedon.” Em i tok yumi mas bihainim pasin em Maika 7:7 i kamapim na stap isi na amamas long wetim Jehova. Na tu, em i kirapim olgeta long i go klostu moa long Gavening Bodi wankain olsem ol soldia long bikpela pait i save go klostu long narapela narapela. Em i tok: “Yupela olgeta manmeri i bilip long Bikpela, yupela sanap strong, na bel bilong yupela i ken kisim strong oltaim.”​—⁠Sng. 31:⁠24.

Long laspela hap bilong dispela miting, ol i mekim sampela bikpela toksave. Geoffrey Jackson bilong Gavening Bodi i toksave long ol bai wokim tu The Watchtower long simpol Inglis bilong stadi, na i bilong traim tasol. Em bilong helpim ol man i gat sampela save long tok Inglis. Bihain Stephen Lett i toksave olsem, Gavening Bodi bai stretim rot bilong mekim sepeding visit long ol wasman distrik na meri bilong ol husat i stap long Amerika. Na em i toksave tu olsem, nem bilong Ministerial Trening Skul bai senis na ol bai kolim olsem Baibel Skul Bilong Ol Singel Brata. Na em i mekim narapela toksave olsem i gat nupela skul, nem bilong en Baibel Skul Bilong Ol Marit Kristen. Dispela skul bai givim trening long ol marit na bai ol i ken mekim bikpela wok moa long oganaisesen bilong Jehova. Na tu, Brata Lett i toksave olsem Skul Bilong Ol Wasman Bilong Raun na Meri Bilong Ol na Skul Bilong Ol Memba Bilong Brens Komiti na Meri Bilong Ol bai kamap tupela taim long olgeta yia long Patterson. Na ol bai stretim rot we ol bratasista husat i go pinis long dispela skul ol i ken i go gen.

Bilong pinisim program, John E. Barr husat i gat 97 krismas na em i stap memba bilong Gavening Bodi longpela taim, i mekim wanpela beten ol man i pilim tru. * Long pinis bilong dispela miting, olgeta bratasista i pilim olsem, tru tumas dispela em i wanpela bikpela de tru.

[Ol Futnot]

[Rait long pes 19]

Odiens i amamas tru long ol intaviu

[Rait long pes 20]

Jehova i bin blesim wok autim tok long Itiopia