Yu Tingim Yet?

Olsem wanem? Yu bin ritim gut ol tok bilong ol nupela Wastaua? Yu ken traim bekim ol dispela askim i stap daunbilo:

• Wanem 3-pela samting inap helpim yumi long sakim kain kain pasin giaman?

Tripela samting i olsem: (1) Kisim pasin bilong pret long God. (1 Pita 3:12) (2) Yusim Baibel bilong skulim maus bilong bel. (3) Wok strong long amamas long ol samting yu holim pinis.​—4/15, pes 6-7.

• Olsem wanem yumi save olsem pasin bilong tingim ol bikpela samting i no makim olsem yumi mas pes drai tasol na yumi no malolo na amamas liklik?

Yumi ken tingim eksampel bilong Jisas. Em i save amamas long kaikai wantaim ol arapela. Em i no save siries tumas. Ol arapela, na ol pikinini tu, ol i amamas long i go klostu long em.​—4/15, pes 10.

• Tupela marit i ken mekim wanem sapos ol i luksave olsem bihain long ol i kamapim pikinini ol i no pas gut moa olsem bipo?

Narapela i mas tokim narapela olsem em i laikim em tru. Man i mas wok strong tru long mekim meri bilong em i stap bel isi. Tupela wantaim i mas wok long kamapim gut laik na filings bilong ol.​—5/1, pes 12-​13.

• Diwai oliv long Rom sapta 11 i makim wanem samting?

Diwai oliv i makim namba tu lain pikinini bilong Abraham, em Israel bilong spirit. Jehova i olsem rop bilong diwai na Jisas i olsem diwai. Taim ol Israel bilong skin i sakim Jisas, God i skruim ol man bilong ol arapela lain husat i kamap bilipman i go long diwai, na long dispela rot em i inapim namba bilong namba tu lain pikinini bilong Abraham.​—5/15, pes 22-​25.

• Yumi inap autim wanem gutpela nius long ol man i stap rabis?

Gutpela nius i olsem: God i makim Jisas olsem King. Em i Bikman bilong pinisim pasin bilong i stap rabis. Bilong wanem yumi tok olsem? Long wanem, em bai bosim olgeta manmeri na em i gat strong long mekim ol samting; na em i mekim pasin sori long ol rabisman; na em inap pinisim as bilong pasin bilong i stap rabis, em pasin bilong yumi ol man long tingim yumi yet tasol.​—6/1, pes 7.

• Wanem mining bilong tok Jisas i mekim taim em i tokim Kaiafas olsem: “Yu yet yu tok olsem”?​—⁠Mat. 26:​63, 64.

Dispela tok, “yu yet yu tok olsem” em wanpela pasin bilong ol Juda long tok bokis long makim olsem wanpela hap tok i tru. Hetpris Kaiafas i bin askim Jisas olsem em i Krais, Pikinini Bilong God o nogat. Bekim bilong Jisas: “Yu yet yu tok olsem,” i kamapim klia olsem Jisas em i Pikinini Bilong God.​—6/1, pes 18.

• Olsem wanem? Ol pikinini Jisas inap kamapim ol inap insait long pe bilong baim bek ol man?

Nogat. Jisas inap kamapim lain tumbuna em planti bilion manmeri i gutpela olgeta, tasol ol pikinini Jisas inap kamapim ol i no insait long pe bilong baim bek ol man. Laip bilong Jisas i gutpela olgeta i wankain stret olsem laip bilong Adam. (1 Tim. 2:⁠6)​—6/15, pes 13.

• Ol Kristen i ken mekim wanem bilong soim olsem ol i bihainim tok bilong Aposel 20:​29, 30 we i tok lukaut long ol giaman tisa?

Ol i no toktok wantaim ol giaman tisa o singautim ol i kam long haus bilong ol. (Rom 16:17; 2 Jon 9-11) Ol Kristen i no ritim ol buk bilong ol, o lukim ol long TV, o ritim o bekim ol tok bilong ol long Intenet we ol i kamapim ol bilip bilong ol.​—7/15, pes 15-​16.

• Husat i mas skulim ol pikinini long God?

Olsem Baibel i tok, papamama i mas wok wantaim long skulim ol pikinini. (Snd. 1:8; Efe. 6:⁠4) Wok painimaut i soim olsem taim papamama wantaim i wok long skulim ol pikinini, dispela i save helpim ol pikinini.​—8/1, pes 6-7.