Ritim Baibel Dispela i Strongim Mi

Stori bilong Marceau Leroy

“BIPO bipo tru God i mekim kamap skai na graun.” Mi hait insait long rum bilong mi na ritim dispela tok. Wai na mi mekim olsem? Em long wanem papa bilong mi i no bilip long God, na mi save long tingting bilong em long dispela buk mi holim long han, em Baibel.

Mi no bin ritim Baibel bipo, na dispela tok mi ritim long Buk Stat i kirapim tru tingting bilong mi. Mi kisim tingting olsem, ‘Dispela tok i kamapim klia as na ol lo i bosim ol samting bilong heven na graun i wok gut wantaim. Em ol lo mi save tingting long en!’ Olsem na mi kirap rit long 8 klok nait i go 4 klok long moning. Pasin bilong mi long ritim Baibel long olgeta de i kirap long dispela taim. Mi laik stori long olsem wanem pasin bilong ritim Baibel i bin strongim mi long laip bilong mi.

“Yu Mas Ritim Long Olgeta De”

Mi bon long 1926, long Vermelles, wanpela ples long noten Frans we i gat main bilong ston kol. Long taim bilong Wol Woa 2, kantri i gat bikpela wok long ston kol. Mi wok long main, olsem na gavman i orait long mi no ken insait long ami. Bilong kisim gutpela wok moa, mi kirap stadi long redio na elektrisiti. Na mi kisim save olsem ol lo i bosim ol samting bilong heven na graun i wok gut tru. Taim mi gat 21 krismas, wanpela klasmeit i givim mi wanpela Baibel, na em i tok, “Em wanpela buk i gutpela long ritim.” Taim mi ritim pinis Baibel olgeta, mi bilip olsem em i Tok Bilong God, na em i givim long ol man.

Mi ting olsem ol neiba bilong mi bai amamas long ritim Baibel, olsem na mi kisim 8-pela Baibel. Tasol mi kirap nogut taim ol i tok bilas na birua long mi. Sampela wanblut i pret na mekim tok lukaut olsem, “Taim yu kirap ritim dispela buk, bai yu pilim olsem yu mas ritim long olgeta de!” Tru tumas mi mekim save long ritim Baibel, na mi no bel hevi liklik long dispela. Em i kamap pasin bilong mi.

Sampela neiba i luksave olsem mi gat laik long Baibel, olsem na ol i givim mi sampela buk samting bilong ol Witnes Bilong Jehova em ol i bin kisim. Ol kain buklet olsem One World, One Govenment a (long piksa em long tok Frans) i stori long as na Baibel i tok Kingdom Bilong God tasol inap helpim ol man. (Mat. 6:10) Mi laik wok strong moa yet long autim dispela gutpela tok long ol arapela.

Namba 1 man long kisim Baibel long mi em  Noël, em pren bilong mi taim mipela i liklik yet. Em i wanpela Katolik, so em i stretim rot bilong mipela i ken bung wantaim wanpela man husat i stadi long kamap pris. Mi pret, tasol mi bin ritim Song 115:​4-8 na Matyu 23:​9, 10 na mi save olsem God i no orait long yusim ol imis bilong mekim lotu na i no stret long kolim biknem long ol pris pasto. Dispela i strongim mi long sambai long nupela lotu bilong mi. Dispela i mekim na Noël i kisim tok i tru, na inap long nau em i stap olsem wanpela gutpela Witnes.

Mi go visitim susa bilong mi. Man bilong en i gat ol buk i stori long wok bilong ol spirit nogut na ol spirit nogut i mekim nogut long em. Pastaim mi pilim olsem mi no gat strong, tasol ol Baibel ves olsem Hibru 1:14 i helpim mi long save olsem ol ensel bilong Jehova i sapotim mi. Taim tambu i bihainim ol stiatok bilong Baibel na rausim olgeta samting bilong ol spirit nogut, ol spirit nogut i no mekim nogut long em moa. Susa na tambu bilong mi, tupela i kamap strongpela Witnes.

Long 1947 wanpela Witnes bilong Amerika, Arthur Emiot, i kam long haus bilong mi. Mi amamas na askim em olsem ol Witnes i save bung we. Em i tokim mi olsem i gat wanpela grup long Liévin, em i stap longwe olsem 10 kilomita. Long dispela taim em hatwok long baim baisikol, so inap planti mun mi wokabaut i go kam long ol miting. Inap 8-pela yia gavman i bin tambuim wok bilong ol Witnes Bilong Jehova long Frans. Long kantri olgeta i bin i gat 2,380 Witnes, planti bilong ol i bin kam long Polan. Tasol long Septemba 1, 1947, gavman bilong Frans i orait gen long wok bilong mipela. Ol i kamapim gen brens ofis long Paris long Villa Guibert. I no gat wanpela painia long Frans, olsem na Informant (nau yumi kolim Wok Kingdom Bilong Yumi) bilong Disemba 1947 i singautim ol pablisa long mekim wok painia oltaim. Ol bai autim tok inap 150 aua long olgeta wan wan mun. (Long 1949 ol i daunim aua i go 100.) Mi wanbel long tok bilong Jisas long Jon 17:​17, olsem, “Tok bilong [God] em i tok i tru,” na mi kisim baptais long 1948. Na long Disemba 1949, mi kamap wanpela painia.

Lusim Kalabus na Go Bek Long Dunkerque

Mi no stap longpela taim long fes asainmen bilong mi long Agen long sauten Frans. Mi no wok moa long ol main, olsem na gavman i tok mi mas go insait long ami. Mi no laik insait long ami, olsem na ol i salim mi i go long kalabus. Ol i no larim mi long kisim wanpela Baibel, tasol mi inap kisim sampela pes bilong Buk Song. Taim mi ritim ol dispela pes, dispela i strongim mi. Taim mi lusim kalabus mi mas wokim disisen: Bai mi lusim fultaim sevis na painim wok na kisim gutpela sindaun o nogat? Pasin bilong ritim Baibel i helpim mi long wokim dispela disisen. Mi tingim tok bilong Pol long Filipai 4:​11-13: “God i givim pawa long mi, na long dispela rot mi gat strong long mekim olgeta samting.” Mi pasim tok long mi bai mekim yet wok painia. Long 1950, mi kisim wanpela nupela asainmen. Em bilong i go long Dunkerque, em taun we mi bin autim tok long pastaim.

Taim mi kamap long hap, mi no gat wanpela samting. Wol Woa 2 i bin bagarapim tru dispela taun na i hatwok long painim ples slip. Mi go visitim wanpela famili em bipo mi save autim tok long ol, na mama bilong haus i amamas tru na tok: “Aiyo Mista Leroy, yu lusim kalabus pinis, a? Man bilong mi i tok sapos i gat planti man olsem yu, orait bai i no gat woa.” Ol i gat wanpela gest haus, so ol i tok mi inap i stap long en inap long taim ol turis i kam. Long dispela seim de, Evans, brata bilong Arthur Emiot, i givim wok long mi. b Long haba em i mekim wok bilong tanim tok na em i laik painim wanpela sekiuriti bilong was long wanpela sip. Em i kisim mi i go long wanpela ofisa bilong sip. Bihain long mi lusim kalabus, mi bun nating tru. Na taim Evans i tokim ofisa long as na mi bun nating, ofisa i tokim  mi long kisim kaikai long frits long laik. Long dispela de, mi kisim ples slip, wok mani, na kaikai! Dispela i bin strongim bilip bilong mi long tok Jisas i mekim long Matyu 6:​25-33.

Taim ol turis i kam, mi na wanwok painia bilong mi, Simon Apolinarski, i mas painim narapela ples slip. Tasol mipela i gat strongpela tingting long stap yet long asainmen bilong mipela. Mipela kisim ples slip long haus bilong ol hos, we mipela slip long kunai i drai. Long san mipela raun long autim tok. Mipela autim tok long papa bilong dispela haus bilong ol hos, na em wanpela bilong planti man i bin kisim tok i tru. I no longtaim na wanpela tok lukaut i kamap long niuspepa i go long ol manmeri bilong Dunkerque olsem “ol Witnes Bilong Jehova i kirap mekim bikpela wok long dispela hap.” Tasol ol Witnes long dispela hap em mi na Simon na liklik lain pablisa tasol! Long taim bilong hevi mipela kisim strong long rot bilong tingim tingim ol samting yumi bilip na wet long en na long samting Jehova i bin mekim bilong lukautim mipela. Taim mi kisim nupela asainmen long 1952, Dunkerque i gat 30 pablisa.

Kisim Strong Bilong Mekim Nupela Wok

Mi stap sotpela taim long Amiens siti, na bihain ol i makim mi long mekim wok painia salim long Boulogne-Billancourt, long Paris. Mi bin gat planti Baibel stadi, na bihain sampela bilong ol i insait long fultaim sevis na wok misineri. Wanpela yangpela man, Guy Mabilat, i kisim tok i tru na bihain em i kamap wasman sekit na wasman distrik. Bihain, em i lukautim wok konstraksen bilong faktori bilong Betel, dispela faktori i stap yet long Louvires, longwe liklik long Paris. Taim mi autim tok mi stori planti long Baibel, dispela i mekim na ol tok bilong en i stap strong long tingting bilong mi. Dispela i givim amamas long mi na helpim mi long kamap gutpela tisa moa.

Long 1953, mi kirap nogut tru long ol i makim mi long kamap wasman sekit long Alsace-Lorraine, em wanpela ples i bin stap aninit long wok bos bilong Jemani tupela taim namel long 1871 na 1945. Olsem na mi mas lainim sampela tok Jeman. Taim mi kirap mekim wok sekit, i no gat planti kar, TV, o taipraita long dispela hap na no gat transista redio o kompiuta. Tasol mi no bel hevi na pilim olsem mi sot long planti samting, nogat. Mi save amamas tru. Mi bihainim tok bilong Baibel olsem ai i mas “lukluk long wanpela samting tasol,” olsem na mi mekim wok bilong Jehova na i no gat planti samting bilong pulim nabaut tingting bilong mi.​—Mat. 6:​19-22.

“Kingdom i Win” Kibung bilong 1955 i bikpela samting long mi. Long dispela kibung mi bungim meri mi bai maritim, Irène Kolanski, husat i kirap mekim wok painia wanpela yia  paslain long mi. Papamama bilong em ol i bilong Polan, na inap longpela taim ol i bin i stap strongpela Witnes. Adolf Weber i bin visitim ol long Frans. Em i bin lukautim gaden bilong Brata Russell na em i kam long Yurop long autim gutnius. Mi na Irène i marit long 1956, na mi tupela i wok sekit wantaim. Em i bin sapotim mi gut inap planti yia!

Tupela yia bihain, narapela samting i kamap na mi kirap nogut tru​—ol i makim mi olsem wasman distrik. I no gat planti brata inap mekim wok, so mi mekim yet wok sekit na visitim sampela kongrigesen. Mi bisi stret! Mi autim tok inap 100 aua long olgeta mun, na long olgeta wik mi mas mekim ol tok, visitim 3-pela buk stadi, sekim ol rekod, na redim ol ripot. Olsem wanem bai mi gat taim long ritim Tok Bilong God? Mi lukim olsem i gat wanpela rot tasol​—mi rausim ol pes long wanpela olpela Baibel na karim ol wantaim mi. Taim mi wetim man, mi save ritim sampela pes. Dispela sotpela taim we mi ritim Baibel na kisim nupela strong i helpim mi long mekim yet asainmen bilong mi.

Long 1967, ol i singautim mitupela Irène long kamap memba bilong Betel famili long Boulogne-Billancourt. Mi kirap mekim wok long Dipatmen Bilong Wok Autim Tok, na winim 40 yia, mi holim yet dispela wok. Wanpela amamas bilong dispela wok em long bekim ol pas we i gat ol askim long tok bilong Baibel long en. Mi amamas tru long skelim gut Tok Bilong God na mekim ol wok “bilong strongim sait bilong gutnius”! (Fili. 1:7) Na tu, mi amamas long kamapim tok bilong Baibel long taim famili Betel i mekim teks bilong de long moningtaim. Long 1976, ol i makim mi long mekim wok long Brens Komiti bilong Frans.

Nambawan Gutpela Rot

Mi bin karim sampela hevi, tasol samting i traim mi tru long nau em hevi bilong lapun na helt i pasim mitupela Irène long mekim wok. Tasol pasin bilong ritim na stadi long Baibel i helpim mitupela long stap strong long bilip. Mipela i amamas long kalap long bas i go long teritori bilong kongrigesen na autim bilip bilong mipela long ol arapela. Sapos yu bungim ol yia mitupela i mekim fultaim sevis, em inap 120 yia. Na mipela i laik kirapim ol bratasista husat i laik bai laip bilong ol i gat amamas long en na i gat gutpela wok long mekim, long insait long dispela wok. Taim King Devit i raitim tok bilong Song 37:​25, em i “lapun pinis,” tasol olsem Devit, mi tu “no lukim God i givim baksait long wanpela stretpela man.”

Long laip bilong mi, Jehova i bin strongim mi long rot bilong Tok bilong em. Winim 60 yia i go pinis, ol wanblut i bin tok mi bai ritim Baibel long olgeta de. Tok bilong ol i tru. Mi bin ritim Baibel long olgeta de, na mi no bel hevi long dispela!

[Ol Futnot]

[Piksa long pes 5]

Mi na Simon

[Piksa long pes 5]

Taim mi mekim wok wasman distrik

[Piksa long pes 5]

Wankain Baibel olsem namba wan Baibel mi bin kisim

[Piksa long pes 6]

De mipela i marit

[Piksa long pes 6]

Mi na Irène i amamas long ritim na stadi long Tok Bilong God