Yu Inap Bihainim Pasin Bilong Finias Taim Hevi i Painim Yu?

EM GUTPELA samting tru long mekim wok elda long kongrigesen. Tasol Baibel i tokaut olsem wok elda i gat hatwok bilong en. Taim brata o sista i mekim rong, ol elda i mas i stap olsem jas na mekim “wok bilong Bikpela.” (2 Sto. 19:6) O ating elda i kisim wanpela asainmen we em i pilim olsem em i no inap mekim, olsem Moses i bin pilim na long pasin daun em i tok: “Mi wanem kain man na bai mi inap i go long king bilong Isip?”​—Kis. 3:11.

Holi spirit i bin kirapim ol man long raitim Baibel, na holi spirit i save makim ol elda. Olsem na Baibel i gat ol eksampel bilong helpim ol elda long mekim wok bilong ol. Finias em i pikinini bilong Eleasar na tumbuna pikinini bilong Aron, olsem na em bai kamap hetpris. I gat 3-pela samting i bin kamap long laip bilong em i kamapim klia olsem ol elda long nau i mas i gat strongpela bel, gutpela tingting, na bilip long Jehova taim hevi i kamap.

‘Em i Hariap i Go’

Finias em i yangpela man taim lain Israel i stap long ples stret bilong Moap. Baibel i tok: “Ol man bilong Israel i stat long pamuk nabaut wantaim ol meri Moap . . . Na ol Israel i . . . lotu long ol giaman god.” (Nam. 25:​1, 2) Jehova i mekim wanpela sik nogut i kamap long ol bikhetman na ol i dai. Yu ting Finias i pilim olsem wanem taim em i harim stori bilong dispela samting?

Stori i go moa olsem: “Moses wantaim ol manmeri i krai i stap klostu long dua bilong haus sel bilong God, na ol i lukim wanpela man bilong Israel i kisim wanpela meri bilong Midian i go insait long haus sel bilong em yet.” (Nam. 25:6) Pris Finias bai mekim wanem? Em i yangpela man, na dispela man Israel i mekim rong em i wanpela hetman husat i go pas long lotu.​—Nam. 25:14.

Tasol Finias i save pret long Jehova, em i no pret long ol man. Taim em i lukim tupela, wantu em i kisim spia na bihainim tupela i go insait long haus sel na em i sutim ol. Jehova i gat wanem tingting long pasin bilong Finias long i no pret na wokim stretpela disisen hariap? Wantu Jehova i stopim dispela sik na em i praisim Finias, em i wokim kontrak wantaim em olsem oltaim lain tumbuna bilong em bai i stap pris.​—Nam. 25:​7-13.

Ol elda Kristen long nau i no ken pait. Tasol olsem Finias, ol elda i mas redi long wokim stretpela disisen hariap na no ken pret. Olsem, Guilherme i bin mekim wok elda inap sampela mun tasol, na ol i askim em long mekim wok long wanpela komiti bilong harim kot. Brata i mekim rong em wanpela elda husat i bin helpim Guilherme taim em i yangpela. Guilherme i tok: “Mi pilim hatwok long insait long dispela kot. Mi hatwok long slip long nait. Mi wok long skelim olsem wanem mi inap mekim wok jas i stret wantaim ol lo bilong Jehova, na mi no larim filings bilong mi i bosim disisen mi mekim. Mi beten inap sampela de na mekim wok painimaut long ol  buk na nius bilong Baibel.” Dispela i strongim bel bilong em na em inap mekim dispela wok na helpim brata i mekim rong.​—1 Tim. 4:​11, 12.

Taim hevi i kamap insait long kongrigesen na ol elda i no pret long mekim ol samting na ol i wokim ol stretpela disisen hariap, ol i stap olsem gutpela eksampel long bilip na pasin bilong i stap gut long Jehova. Tasol ol arapela Kristen tu i mas i gat strongpela bel na tokaut long ol bikpela rong ol i kisim save long en. Na tu, bilong i stap gut long Jehova, yumi no ken poroman wantaim wanpela pren o wanblut i raus long kongrigesen.​—1 Kor. 5:​11-13.

Gutpela Tingting i Pasim Hevi

Finias i no bihainim nating pasin bilong yangpela long kirap kwik na mekim samting. Nogat. Tingim olsem wanem em i bihainim gutpela tingting taim em i harim stori bilong narapela samting i kamap. Lain bilong Ruben, Gat, na hap lain bilong Manase i bin sanapim alta klostu long wara Jordan. Ol arapela Israel i ting ol i wokim dispela alta bilong lotuim ol god giaman na ol i redi long go pait long ol.​—Jos. 22:​11, 12.

Finias i mekim wanem? Finias wantaim ol hetman bilong Israel, ol i bihainim gutpela tingting na toktok wantaim ol lain husat i bin wokim dispela alta. Na dispela lain i tokaut klia olsem dispela alta em bilong “lotu long Bikpela tasol.” Long dispela rot hevi i no kamap.​—Jos. 22:​13-34.

Sapos wanpela Kristen i harim olsem wanbilip i mekim pasin nogut, em savetingting long bihainim pasin bilong Finias! Gutpela tingting i pasim yumi long bel nogut long ol brata bilong yumi o long kamapim sampela pasin kranki bilong ol.​—Snd. 19:11.

Olsem wanem gutpela tingting inap helpim ol elda long bihainim pasin bilong Finias? Jaime, em mekim wok elda winim 10-pela yia, i tok: “Taim wanpela pablisa i kirap stori long hevi em i gat wantaim narapela, kwiktaim mi askim Jehova long helpim mi na bai mi no ken wansait, nogat, mi laik kamapim ol gutpela stiatok bilong Baibel. Wanpela taim wanpela sista i kam na tokim mi olsem em i bel hevi long pasin wanpela brata i bin mekim long em, em wanpela brata husat i holim wok long narapela kongrigesen. Dispela brata em i pren bilong mi na mi yet inap toktok wantaim em, tasol mi no mekim olsem. Mi toktok gut wantaim dispela sista long sampela stiatok bilong Baibel. Na sista i wanbel long em yet bai toktok wantaim dispela brata pastaim. (Mat. 5:​23, 24) Tasol ol i no kamap wanbel hariap. So mi kirapim dispela sista long tingim sampela arapela stiatok bilong Baibel. Sista i ting em i gutpela samting long beten gen na fogivim brata.”

Wanem samting i kamap? Jaime i tok: “Sampela mun bihain, dispela sista i kam toktok wantaim mi. Em i stori olsem bihain dispela brata i sori long tok em i bin mekim. Brata i bin stretim rot long wok wantaim em long  autim tok na em i tok amamas long sista. Hevi i pinis. Mi amamas olsem gutpela samting i kamap na mi no insait long dispela hevi na kirapim narapela long ting olsem mi mekim wansait pasin.” Baibel i tok: ‘No ken hariap i go sutim tok long narapela long kot.’ (Snd. 25:8) Bilong strongim pasin wanbel, ol elda i gat gutpela tingting i save kirapim ol Kristen husat i gat hevi wantaim narapela long bihainim ol stiatok bilong Baibel.

Em i Kisim Tingting Bilong Jehova

Finias i holim gutpela wok olsem pris bilong lain God i bin makim. Olsem yumi stori pinis, Finias i gat strongpela bel na gutpela tingting maski em i yangpela. Tasol samting i helpim em tru long winim ol hevi em pasin bilong em long bilip long Jehova.

Ol man bilong Gibea, bilong lain Benjamin, i bin reipim na kilim i dai meri bilong wanpela man Livai. Bihain ol arapela lain bilong Israel i redi long go pait long lain Benjamin. (Het. 20:​1-11) Paslain long ol i go pait, ol i beten askim Jehova long helpim ol, tasol tupela taim ol i lus long pait, na planti man i dai. (Het. 20:​14-25) Bihain long dispela ol i no kliagut long ol i mas mekim wanem. Nogut ol i ting Jehova i no harim ol beten bilong ol na em i no laik bai ol i stretim dispela rong ol man Gibea i bin mekim

Finias, nau em hetpris bilong Israel, i bilip strong yet long Jehova. Em i beten olsem: “Bai mipela i go pait gen long ol brata bilong mipela, ol lain bilong Benjamin, o bai mipela i lusim?” Jehova i helpim ol long daunim lain bilong Benjamin na ol i kukim taun Gibea olgeta.​—Het. 20:​27-48.

Yumi kisim wanem skul long dispela? Sampela hevi insait long kongrigesen i stap yet maski ol elda i wok strong long stretim na beten askim God long helpim ol. Sapos samting olsem i kamap, ol elda i mas tingim tok bilong Jisas: “Wok yet long askim [olsem beten], na yupela bai kisim. Wok yet long painim, na yupela bai lukim. Wok yet long paitim dua, na dua bai op long yupela.” (Luk 11:9) Maski i luk olsem bekim bilong wanpela beten i no kam kwik, ol wasman i save olsem Jehova bai bekim beten long taim em yet i makim.

Olsem, wanpela kongrigesen long Aialan i nidim tru wanpela Haus Kingdom, tasol hetman bilong dipatmen bilong wokim ol haus long dispela hap i no laikim ol. Em i tok nogat long olgeta plen ol brata i laik bihainim bilong sanapim Haus Kingdom long hap graun ol i gat. I luk olsem ol i mas kisim tok orait long bikman i bosim dipatmen bilong wokim ol haus long kantri olgeta. Yu ting beten bai helpim ol olsem em i bin helpim lain Israel long taim bilong Finias?

Wanpela elda bilong dispela hap i tok: “Bihain long mipela i beten planti taim na prea strong, mipela i go long nambawan ofis bilong dipatmen bilong wokim ol haus. Ol i tokim mi olsem mipela i no inap lukim bikman inap sampela wik bihain. Tasol rot i op we mipela inap bung wantaim em inap 5-pela minit. Taim em i lukim ol plen mipela i bin stretim, em i tok orait long mipela i ken go het long mekim wok. Kirap long dispela taim na i go, hetman long hap bilong mipela i wok strong long helpim mipela. Dispela ekspiriens i helpim mipela long save olsem beten i gat bikpela strong.” Tru tumas, Jehova bai harim beten bilong ol elda husat i bilip na wetim em.

Finias i gat bikpela wok long Israel. Tasol em i gat strongpela bel, gutpela tingting, na em i bilip long God, olsem na em inap winim ol hevi i kamap. Na Jehova i amamas long pasin bilong Finias long wok strong long lukautim kongrigesen bilong God. Inap 1,000 yia bihain, holi spirit i kirapim Esra long tok: ‘Na Finias, pikinini bilong Eleasar, i bin bosim wok ol i mekim. Na Bikpela i stap wantaim Finias.’ (1 Sto. 9:​19, 20) Yumi laik bai dispela tok i makim tu olgeta lain husat i go pas long lukautim lain bilong God long nau, na long olgeta Kristen husat i stap gut long mekim wok bilong em.