Yu Larim Jehova i Stap Helpim Bilong Yu?

“Wok yet long painim Kingdom pastaim na stretpela pasin bilong God na em bai givim olgeta dispela samting long yupela.”​—MAT. 6:33.

1, 2. (a) Long Galesia 6:​16, “Israel bilong God” i makim husat? (b) Long Matyu 19:​28, “12-pela lain bilong Israel” i makim husat?

 TAIM yu ritim nem Israel long Baibel, yu save tingim wanem samting? Yu save tingim Aisak pikinini bilong Jekop, husat bihain i kisim nem Israel? O yu save tingim ol tumbuna bilong en, em ol lain Israel bilong bipo? Baibel i stori tu long Israel bilong spirit, o “Israel bilong God.” Em dispela lain 144,000, em holi spirit i makim ol bilong kamap king na pris long heven. (Gal. 6:16; Rev. 7:4; 21:12) Tasol Baibel i yusim dispela nem bilong makim narapela lain tu. Yumi kisim save long dispela taim yumi ritim Matyu 19:28.

² Jisas i tok: “Long taim bilong wokim ol samting i kamap nupela, taim Pikinini bilong man i sindaun long sia king bilong en, yupela ol man i bin bihainim mi, yupela tu bai sindaun long 12-pela sia king, na stap olsem jas na skelim 12-pela lain bilong Israel.” Long dispela ves, “12-pela lain bilong Israel” i makim ol man husat bai kisim laip oltaim long Paradais hia long graun. Na lain 144,000 bai mekim wok jas na pris bilong helpim ol.

3, 4. Olsem wanem lain God i bin makim i stap gutpela piksa?

³ Olsem ol pris na ol Livai bilong bipo, ol Kristen long nau husat God i bin makim, ol i pilim olsem wok bilong Jehova ol i mekim em i samting i dia tumas. (Nam. 18:20) Ol lain God i makim i no gat tingting olsem ol bai kisim wanpela hap hia long graun. Nogat. Revelesen 4:​10, 11 i tok olsem ol bai stap long heven na mekim yet wok bilong Jehova, long dispela hap ol bai wok king na pris wantaim Jisas Krais.​—Ese. 44:28.

 ⁴ Taim ol Kristen God i bin makim i stap yet long graun, i stap bilong ol i soim olsem Jehova em helpim bilong ol. Wok bilong God ol i mekim em i nambawan bikpela samting long ol. Aposel Pita i tok: “Yupela i mas wok strong tru long kisim dispela samting God i singautim na makim bilong yupela long kisim.” (2 Pita 1:10) Ol Kristen God i bin makim i mekim olsem long rot bilong bilip long ofa bilong Krais na bihainim em oltaim. Save na sindaun bilong ol i narapela narapela, tasol ol i no larim ol samting ol i no inap mekim i pasim ol na ol i mekim liklik wok tasol. Nogat. Ol i putim wok bilong God i stap nambawan samting long laip bilong ol na ol i mekim olgeta samting ol i inap long mekim. Tru tumas, ol i stap olsem gutpela piksa long ol manmeri husat i laik kisim laip hia long graun.

5. Olsem wanem olgeta Kristen i ken soim olsem Jehova i stap olsem helpim bilong ol? Bilong wanem em i hatwok long mekim olsem?

⁵ Jisas i tok olsem olgeta Kristen, maski ol i wet long kisim laip long heven o long graun, ol ‘i mas givim baksait long ol laik bilong ol yet na karim diwai pos bilong ol’ na oltaim bihainim em. (Mat. 16:24) Planti milion manmeri husat i wet long kisim laip long Paradais hia long graun ol i bihainim dispela pasin long lotuim God na bihainim Krais. Ol i no gat tingting long mekim liklik wok tasol sapos ol i save olsem ol inap mekim bikpela wok moa. Planti ol i lusim sampela samting bilong skin na bai ol ken kamap painia oltaim. Sampela i painia haptaim inap sampela mun insait long olgeta wan wan yia. Sampela arapela ol i no inap mekim wok painia, tasol ol i wok strong long mekim wok autim tok. Ol i olsem Maria, husat i bin kapsaitim sanda long Jisas. Jisas i tok: “Em i mekim gutpela pasin long mi. . . . Meri i mekim samting em inap long mekim.” (Mak 14:​6-8) Yumi stap long graun em Satan i bosim, olsem na ating em i hatwok long mekim olgeta samting yumi gat laik long mekim. Yumi mas wok strong na bilip long Jehova. Nau bai yumi skelim 4-pela rot we yumi inap mekim olsem.

Wok Long Painim Kingdom Pastaim

6. (a) Olsem wanem ol man bilong dispela graun i soim olsem ol i tingim ol samting bilong nau tasol? (b) Bilong wanem i gutpela moa long bihainim pasin bilong Devit?

⁶ Jisas i skulim ol disaipel long painim Kingdom pastaim na stretpela pasin bilong God. Planti taim ol man bilong graun i save mekim ol samting bilong helpim ol yet tasol. Baibel i kolim ol dispela kain man olsem ol “man bilong bungim ol samting bilong graun tasol.” (Ritim Song 17:​1, 13-15.) Ol dispela man i no save tingim Jehova. Planti ol i tingting long kisim gutpela sindaun, mekim bikpela long ol pikinini, na bungim ol samting bilong lukautim ol pikinini long bihain. Ol i tingting long kisim ol samting bilong nau tasol. Devit i no olsem. Em i laik bai em i gat “gutpela nem” long ai bilong Jehova. Bihain, pikinini bilong em Solomon i tok olsem yumi olgeta i mas mekim olsem. (Sav. 7:​1, NW, futnot.) Olsem Asap, Devit i save olsem nambawan bikpela samting long laip bilong en, em bilong i stap pren bilong Jehova. Dispela i givim amamas long Devit. Long taim bilong yumi, planti Kristen i soim olsem wok bilong Jehova ol i mekim em i bikpela samting moa, winim wok mani bilong ol. Ol i soim olsem Jehova i stap helpim bilong ol.

7. Wanpela brata i kisim wanem blesing taim em i putim Kingdom i stap nambawan?

⁷ Jean-Claude i stap long Ripablik Bilong Sentral Afrika, em i wanpela elda i marit na i gat 3-pela pikinini. I hatwok long painim wok long dispela hap, na man i gat wok bai mekim olgeta samting em inap mekim bilong holim dispela wok. Long wanpela de, maneja i tokim Jean-Claude long em i mas wok long nait. Wok bai kirap long 6:30 long apinun, na em bai mekim 7-pela de long wik. Jean-Claude i tokim em olsem em i mas lukautim famili long sait bilong skin, tasol tu em i mas helpim ol long pas gut wantaim God. Na tu, em i tok olsem em i gat wok long helpim kongrigesen. Maneja i tokim em: “Yu laki na yu gat wok, olsem na lusim tingting long olgeta arapela samting, olsem meri bilong yu, ol pikinini bilong yu, na ol hevi bilong  yu. Yu mas givim laip olgeta bilong yu long mekim wok tasol. Makim samting yu laikim: lotu bilong yu o wok bilong yu.” Sapos dispela i kamap long yu, bai yu mekim wanem? Jean-Claude i save sapos ol i pinisim em long wok, God bai lukautim em. Em i gat planti wok bilong God em bai mekim yet, na Jehova bai lukautim famili bilong em long ol samting ol i mas i gat. So em i go long neks miting. Bihain, em i redi long go long wok maski em i no save ol i pinisim em o nogat. Long dispela taim stret, fon i ring. Ol i pinisim maneja long wok, tasol brata bilong yumi i holim yet wok.

8, 9. Olsem wanem yumi inap i stap olsem ol pris na ol Livai na soim olsem Jehova i stap helpim bilong yumi?

⁸ Ating wankain samting i painim sampela bilong yupela. Ating yu bin tingting planti long olsem wanem yu bai lukautim famili bilong yu sapos ol i pinisim yu long wok. (1 Tim. 5:8) Tasol maski kain samting olsem i kamap long yu o nogat, ating ol samting i bin painim yu i helpim yu long kliagut olsem God i no save lusim ol man husat i tingim em olsem helpim bilong ol na ol i putim wok bilong em i stap nambawan long laip bilong ol. Taim Jisas i tokim ol disaipel long “wok yet long painim Kingdom,” em i promisim ol long God bai givim ol arapela samting long ol, olsem kaikai, dring, na klos.​—Mat. 6:33.

⁹ Tingim ol Livai em ol i no kisim wanpela hap graun. Wok bilong ol long Israel em long go pas long mekim lotu i tru, olsem na ol i mas bilip olsem Jehova bai stap helpim bilong ol na em bai lukautim ol long sait bilong skin. (Nam. 18:20) Maski yumi no mekim wok long wanpela tempel olsem ol pris na ol Livai i bin mekim, yumi tu inap bilip strong long Jehova. Yumi wok long kamap klostu moa long pinis bilong dispela taim nogut, olsem na em i bikpela samting tru long yumi mas bilip long God long lukautim yumi.​—Rev. 13:17.

Painim Stretpela Pasin Bilong God

10, 11. Taim sampela i makim wok ol bai mekim, olsem wanem ol i kamapim olsem ol i bilip long God? Kamapim wanpela eksampel.

¹⁰ Na tu, Jisas i tokim ol disaipel long painim stretpela pasin bilong God pastaim. (Mat. 6:33) Dispela i makim olsem yumi bihainim tingting bilong Jehova long wanem samting i stret na wanem samting i no stret, na yumi no bihainim tingting bilong ol man. (Ritim Aisaia 55:​8, 9.) Paslain long ol i kisim save long tok i tru, sampela manmeri i bin groim brus o salim ol smok samting, skulim ol man long pait long woa, o wokim o salim ol samting bilong pait. Tasol taim ol i kisim save long tok i tru, planti bilong ol i senisim wok bilong ol na winim mak bilong kisim baptais.​—Ais. 2:4; 2 Kor. 7:1; Gal. 5:14.

¹¹ Andrew i bin mekim olsem. Taim em na meri bilong en i kisim save long Jehova, ol i pasim tok long lotuim em. Andrew i laikim tru wok em i mekim, tasol em i lusim dispela wok. Wai? Long wanem, oganaisesen em i wok long en i mekim ol samting bilong woa, na em i laik bihainim pasin i stret olsem Jehova i makim. Taim Andrew i lusim wok, em i gat tupela pikinini na mani inap long lukautim famili inap sampela mun tasol. Olsem ol Livai long bipo, i luk olsem em i no gat ol samting bilong lukautim em yet. Em i bilip long God na kirap painim wok. Long nau taim ol i tingim ol samting i bin kamap long ol, Andrew na famili bilong en inap tok olsem dispela tok i tru: “Yupela i no ken ting, Bikpela i no gat strong bilong kisim bek yupela.” (Ais. 59:1) Ol i no tingting long kisim planti samting bilong skin, na long dispela rot Andrew na meri bilong en inap mekim wok painia. Em i tok sampela taim ol i bin tingting planti long mani, ples slip, helt bilong ol, na long krismas bilong ol i wok long i go antap. Tasol Jehova i bin helpim ol long olgeta taim. Tupela i  save tru olsem pasin bilong mekim wok bilong Jehova em i nambawan gutpela wok ol man inap mekim. a​—Sav. 12:13.

12. Bilong painim stretpela pasin bilong God pastaim, yumi mas i gat wanem pasin? Kamapim stori bilong sampela long hap bilong yu husat i bin mekim olsem.

¹² Jisas i tokim ol disaipel: “Sapos bilip bilong yupela i kain olsem sais bilong sid mastet, orait bai yupela i tokim dispela maunten, ‘Kirap na go long hap,’ na bai em i kirap na i go. Na bai yupela inap mekim olgeta samting.” (Mat. 17:20) Bai yu wok yet long painim stretpela pasin bilong God pastaim sapos dispela i givim hatwok long yu? Sapos yu gat tupela tingting long dispela samting, orait toktok wantaim ol arapela insait long kongrigesen. Ol ekspiriens bilong ol long olsem wanem Jehova i bin helpim ol inap strongim bilip bilong yu.

Tenkyu Long Jehova

13. Taim yumi wok strong long mekim wok bilong Jehova, yumi mas bilip long wanem samting?

¹³ Sapos yu amamas long mekim wok bilong Jehova, yu ken bilip olsem em bai lukautim yu long olgeta samting yu nidim, olsem em i bin mekim long ol Livai. Tingim Devit. Maski em i hait i stap insait long wanpela keiv, em i bilip olsem God bai helpim em. Yumi tu inap bilip long Jehova maski i luk olsem i no gat man inap helpim yumi. Tingim Asap, taim em i “go insait long haus bilong [God],” em inap kliagut long samting i givim hevi long em. (Sng. 73:17) Long wankain pasin, yumi mas bilip olsem Jehova bai givim yumi ol samting yumi nidim na bai yumi ken pas gut yet wantaim em. Taim yumi bilip olsem long Jehova, dispela i soim olsem yumi tingim wok lotu bilong yumi i bikpela samting maski wanem wanem samting i kamap long yumi. Yumi bai larim Jehova i stap olsem helpim bilong yumi.

14, 15. Yumi mas mekim wanem taim senis i kamap long tingting yumi bin i gat long mining bilong sampela tok bilong Baibel? Bilong wanem yumi mas mekim olsem?

¹⁴ Yu save bilip long Jehova taim em i helpim yumi long kliagut long ‘ol bikpela tok hait bilong em’ i stap long Baibel? (1 Kor. 2:​10-13) Aposel Pita em i gutpela piksa long dispela samting. Jisas i tokim ol Juda: “Sapos yupela i no kaikai bodi bilong Pikinini bilong man na dringim blut bilong em, orait yupela bai i no gat laip i stap long yupela.” Planti disaipel i ting olsem Jisas i tok long bodi na blut tru bilong em, na ol i tok: “Em mekim wanem kain tok? Husat inap putim yau long dispela tok?” Na ol i “lusim em na ol i go bek long ol samting bipo ol i save mekim.” Tasol Pita i tok: “Bikpela, bai mipela i go long husat? Ol tok bilong yu i bringim man i go long laip oltaim.”​—Jon 6:​53, 60, 66, 68.

¹⁵ Pita i no kliagut long tok bilong Jisas. Tasol em i bilip olsem Jehova i givim wok long Jisas long helpim ol man long kliagut long tok i tru. Long nau, taim senis i kamap long tingting yumi bin i gat long mining bilong sampela tok bilong Baibel, yu trai long kliagut long as bilong dispela senis? (Snd. 4:18) Ol Beria long taim bilong Pol i “laik tru long kisim tok, na ol i skelim gut ol Rait Holi long olgeta de.” (Apo. 17:11) Sapos yu bihainim pasin bilong ol, bai yu pilim moa yet olsem wok bilong God yu mekim em i bikpela samting. Yu bai amamas tru long Jehova i stap olsem helpim bilong yu.

Maritim Man o Meri i Bihainim Bikpela

16. Olsem 1 Korin 7:39 i makim, olsem wanem ol singel Kristen i ken larim God i stap olsem helpim bilong ol?

¹⁶ Narapela rot we ol Kristen i save tingim laik bilong God, em taim ol i bihainim tok bilong Baibel long maritim “man [o meri] i bihainim Bikpela.” (1 Kor. 7:39) Planti Kristen i stap singel, long wanem, ol i no laik brukim dispela lo. God i save lukautim gut ol lain husat i mekim olsem. Devit i mekim wanem taim em i pilim olsem em i stap wanpis na i no gat helpim? Em i askim Jehova long helpim em. Devit i tok: “Mi save tokim em long olgeta wari na olgeta hevi i kamap long mi. Taim bel bilong mi i hevi moa, na mi ting bai mi bagarap.” (Sng. 142:​1-3) Jeremaia i stap singel na em i stap gut long God na  mekim wok bilong en inap planti yia. Ating sampela taim em i bin pilim olsem em i stap wanpis. Yu ken skelim eksampel bilong em long sapta 8 bilong buk God’s Word for Us Through Jeremiah.

17. Wanpela singel sista i save mekim wanem taim em i pilim olsem em i stap wanpis?

¹⁷ Wanpela sista long Amerika i tok olsem em i no bin wokim disisen long i stap singel. Em i laik marit taim em i bungim gutpela man. Mama bilong en, husat i no Witnes, em i no wari long pikinini meri bai maritim husat. Em i laik bai em i mas marit tasol. Na dispela sista i tokim mama olsem ‘asua bai go long yu sapos mi gat hevi insait long marit, yu laikim dispela?’ Tasol taim mama i lukim olsem pikinini bilong en i gat gutpela wok mani na i stap amamas, em i no toktok tumas long pikinini i mas marit. Sampela taim sista i save pilim olsem em i stap wanpis. Em i tok: “Mi save bilip strong long Jehova. Em i no save lusim mi.” Wanem samting i helpim sista long bilip long Jehova? Sista i tok: “Long rot bilong prea, mi pilim olsem God i stap tru na mi no stap wanpis. God Antap Tru i putim yau long tok bilong mi, olsem na mi amamas na pilim olsem mi gat nem.” Sista i bilipim tok bilong Baibel olsem: “Amamas bilong givim samting i winim amamas bilong kisim samting.” So em i traim long helpim ol arapela na em i no gat tingting olsem ol i mas bekim sampela samting long em. Em i tok moa: “Taim mi tingting long samting mi ken mekim bilong helpim narapela, dispela i save givim amamas long mi.” (Apo. 20:35) Jehova i stap olsem helpim bilong em, na em i amamas long mekim wok bilong God.

18. Yu mas mekim wanem bilong i stap insait long lain em Jehova i lukautim?

¹⁸ Maski yu stap olsem wanem, yu ken larim God i stap olsem helpim bilong yu. Sapos yu mekim olsem, bai yu stap namel long lain manmeri bilong em husat i stap amamas. (2 Kor. 6:​16, 17) Long dispela rot yu bai stap insait long lain Jehova i lukautim, wankain olsem em i bin lukautim ol wokboi bilong en long bipo. (Ritim Lo 32:​9, 10.) Namel long ol lain man, God i bin makim lain Israel bilong lukautim, na em inap makim yu tu olsem man em bai lukautim na tingim tru.​—Sng. 17:8.

[Futnot]

Wanem Bekim Bilong Yu?

Olsem wanem yumi ken soim olsem yumi bilip long Jehova

• taim yumi painim Kingdom pastaim na stretpela pasin bilong God?

• taim yumi amamas long samting Jehova i givim long yumi?

• taim yumi bihainim lo bilong God long maritim Kristen i bihainim Bikpela tasol?

[Askim Bilong Stadi]

[Rait long pes 13]

Taim wok bilong Jehova i stap nambawan bikpela samting long yumi, Jehova i stap olsem helpim bilong yumi

[Piksa long pes 15]

Eksampel bilong Jeremaia i strongim yumi