Mekim Isi Bel Bilong Ol Man i Krai Sori
Mekim Isi Bel Bilong Ol Man i Krai Sori
“Bikpela . . . i salim mi long strongim bel bilong ol manmeri i sori na i krai.” —AIS. 61:1, 2.
1. Olsem wanem Jisas i helpim ol man i krai sori? Bilong wanem em i mekim olsem?
JISAS KRAIS i tok: “Kaikai bilong mi em long mekim laik bilong man i bin salim mi i kam na long inapim wok em i givim long mi.” (Jon 4:34) Jehova i givim wanpela wok long Jisas. Taim Jisas i mekim dispela wok, em i kamapim wankain pasin laikim long ol man olsem Papa bilong em i save kamapim. (1 Jon 4:7-10) Aposel Pol i stori long wanpela rot we Jehova i kamapim pasin laikim taim em i kolim Jehova olsem “God bilong mekim isi bel bilong ol man.” (2 Kor. 1:3) Jisas i kamapim wankain pasin laikim taim em i mekim wok bilong em hia long graun, olsem Aisaia i bin tok profet long en. (Ritim Aisaia 61:1, 2.) Jisas i tokaut olsem tok bilong Aisaia i makim em. (Luk 4:16-21) Taim Jisas i mekim wok bilong em, em i mekim isi bel bilong ol man i krai sori na strongim bel bilong ol.
2, 3. Bilong wanem ol disaipel bilong Krais i mas mekim isi bel bilong ol arapela?
2 Olgeta disaipel bilong Jisas i mas bihainim pasin bilong em long mekim isi bel bilong ol man i krai sori. (1 Kor. 11:1) Pol i tok: “Wok yet long mekim isi bel bilong narapela narapela na strongim narapela narapela.” (1 Tes. 5:11) Yumi mas wok strong moa long mekim isi bel bilong ol man, long wanem, nau yumi stap long ‘taim nogut i givim hatwok long ol man.’ (2 Tim. 3:1) Planti taim ol gutpela man i mas sindaun namel long ol arapela husat i mekim sampela tok o pasin i bagarapim bel bilong ol na mekim ol i bel hevi.
3 Olsem tok profet bilong Baibel i makim, nau long taim bilong las de planti man i ‘laikim tumas mani, i litimapim nem bilong ol yet, i gat pasin antap, i tok nogut long ol arapela, i sakim tok bilong papamama, ol i no tok tenkyu, ol i no stap gut long narapela, ol i no gat pasin bilong laikim ol wanfamili, ol i no laik kamap wanbel, ol i gat pasin bilong bagarapim gutnem bilong ol arapela, ol i no gat pasin bilong bosim bel, ol i wail olgeta, ol i no laikim ol gutpela pasin, ol i birua long ol pren bilong ol, ol i gat strongpela het, ol i pulap long pasin antap, ol i no laikim God, nogat, ol i laikim kain kain amamas.’ Kain pasin olsem i wok long kamap strong moa yet, long wanem, “ol man nogut na ol man bilong giaman i go nogut moa.”—2 Tim. 3:2-4, 13.
4. Olsem wanem long ol samting bilong dispela graun long taim bilong yumi?
4 Yumi no kirap nogut long ol dispela samting, long wanem, Baibel i tok “graun olgeta i stap long han bilong Satan.” (1 Jon 5:19) “Graun olgeta” i makim ol samting bilong wok politik, lotu, wok bisnis, na ol samting Satan i yusim bilong kirapim ol man long bihainim tingting bilong em. I stret Baibel i kolim Satan olsem “hetman bilong dispela graun” na “god bilong dispela graun.” (Jon 14:30; 2 Kor. 4:4) Ol samting i wok long go nogut moa, long wanem, nau Satan i belhat tru. Em i save olsem em i gat sotpela taim tasol bilong i stap. (Rev. 12:12) Yumi save God i no inap larim Satan na pasin nogut bilong dispela graun i stap longpela taim moa. Na tu, Jehova bai stretim tok Satan i sutim long wok king bilong Em. Ol dispela samting i mekim isi bel bilong yumi!—Stt., sapta 3; Jop, sapta 2.
Ol i Autim Gutnius Long Olgeta Hap
5. Olsem wanem tok profet long wok bilong autim tok i wok long kamap tru nau long taim bilong las de?
5 Jisas i tok profet olsem: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” (Mat. 24:14) Olsem Jisas i tok, lain bilong Jehova i stap long olgeta hap bilong graun i autim gutnius bilong Kingdom Bilong God. Long nau, winim 7,500,000 Witnes Bilong Jehova insait long 107,000 kongrigesen i mekim dispela wok. Jisas i bin autim tok na skulim ol man long Kingdom Bilong God, na ol Witnes Bilong Jehova i mekim wankain samting. (Mat. 4:17) Long rot bilong dispela wok, ol i mekim isi bel bilong planti man i krai sori. Insait long 2-pela yia i go pinis, 570,601 manmeri i kisim baptais na kamap Witnes Bilong Jehova!
6. Wok autim tok bilong yumi i wok long karim kaikai, yu ting wanem long dispela?
6 Long nau ol Witnes Bilong Jehova i wokim ol buk na nius bilong Baibel long 500 tokples samting. I no gat wanpela lain i bin mekim kain wok olsem! Maski lain bilong Jehova i stap long graun Satan i bosim, ol i bisi long mekim wok bilong Jehova na ol i wok long kamap planti moa. Dispela i no inap tru long kamap sapos holi spirit bilong God i no helpim ol na stiaim ol. Ol i autim gutnius long olgeta hap bilong graun, long dispela rot ol man husat i putim yau long tok bilong Kingdom, ol i ken kisim wankain bel isi olsem lain bilong Jehova.
Mekim Isi Bel Bilong Ol Wanbilip
7. (a) Bilong wanem yumi no ken ting God i mas pinisim olgeta samting i save mekim yumi bel hevi? (b) Olsem wanem yumi save olsem yumi inap sanap strong taim ol man i mekim nogut long yumi?
7 Yumi stap long graun we pasin nogut i pulap long en, olsem na yumi olgeta bai karim pen na hevi. Yumi no ken ting God i mas rausim olgeta bel hevi bilong yumi paslain long em i pinisim pasin nogut bilong dispela graun. Taim dispela samting i no kamap yet, pasin bilong ol man long mekim nogut long yumi bai traim yumi na kamapim klia yumi bai stap gut long Jehova na sapotim wok king bilong em o nogat. (2 Tim. 3:12) Tasol Papa bilong yumi long heven bai helpim yumi na mekim isi bel bilong yumi. Long dispela rot yumi inap stap olsem ol Kristen long Tesalonaika em God i bin makim ol, ol i bin “sanap strong na holimpas bilip” long taim ol man i mekim nogut long ol na givim pen na hevi long ol.—Ritim 2 Tesalonaika 1:3-5.
8. Baibel i kamapim wanem ol tok i soim olsem Jehova i save mekim isi bel bilong ol wokboi bilong em?
8 Tru tumas, Jehova i save mekim isi bel bilong ol wokboi bilong em taim ol i karim hevi. Olsem, taim kwin nogut Jesebel i laik kilim i dai profet Elaija, Elaija i pret na ranawe na tokaut olsem em i laik dai. Tasol Jehova i no sutim tok long Elaija, nogat, em i mekim isi bel bilong Elaija na strongim em long mekim yet wok profet. (1 Kin., sapta 19) Narapela eksampel i kamapim pasin bilong Jehova long mekim isi bel bilong ol lain bilong em, em helpim em i bin givim long kongrigesen long taim bilong ol aposel. Baibel i tok, ol Kristen long olgeta hap bilong Judia, Galili, na Samaria i stap bel isi na i kamap strong. Na “kongrigesen i wokabaut long pasin bilong pret long Jehova na i kisim bel isi long rot bilong holi spirit na i wok long kamap bikpela moa.” (Apo. 9:31) Yumi tu i tenkyu tru long bel isi yumi kisim long rot bilong holi spirit!
9. Bilong wanem pasin bilong kisim save long Jisas inap mekim isi bel bilong yumi?
9 Yumi ol Kristen i bin kisim save long Jisas Krais na yumi bihainim pasin bilong em, dispela i mekim isi bel bilong yumi. Jisas i tok: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela. Karim hap plang bilong mi na kisim skul long mi, long wanem, mi man bilong pasin isi na pasin daun, na yupela bai kisim nupela strong. Hap plang bilong mi i gutpela na samting mi askim yupela long karim i no hevi.” (Mat. 11:28-30) Taim yumi lain long gutpela pasin Jisas i bin mekim long ol man na yumi wok long bihainim pasin bilong em, yumi inap kisim bel isi maski yumi karim hevi.
10, 11. Husat long kongrigesen inap mekim isi bel bilong ol arapela?
10 Na tu, ol arapela insait long kongrigesen inap mekim isi bel bilong yumi. Olsem, tingim ol samting ol elda i ken mekim bilong helpim ol pablisa em bilip bilong ol i go slek. Jems i tok: “Olsem wanem? I gat wanpela namel long yupela i sik? Orait em i mas singautim ol hetman bilong kongrigesen i kam, na ol i ken beten long em.” Dispela inap helpim ol olsem wanem? “Beten bilong man i bilip bai mekim sikman i kamap orait, na Jehova bai helpim em long kamap strong. Na tu, sapos man i bin mekim sin, orait God bai fogivim em.” (Jems 5:14, 15) Na i gat ol arapela insait long kongrigesen husat inap mekim isi bel bilong yumi, i no ol elda tasol.
11 Planti taim ol meri i pilim olsem em i isi moa long toktok wantaim narapela meri taim ol i gat hevi. Ol sista i gat bikpela krismas na save inap givim gutpela tok long ol yangpela sista. Ating ol samting i painim ol yangpela sista i wankain long ol samting i bin painim ol dispela sista i gat bikpela krismas. Pasin bilong ol long putim gut yau na pilim tru hevi inap helpim tru ol yangpela sista. (Ritim Taitus 2:3-5.) Na tu, ol elda na ol arapela inap “mekim gut bel bilong ol man i bel hevi,” na ol i gat wok long mekim olsem. (1 Tes. 5:14, 15) Na i gutpela long tingim olsem God “i save mekim isi bel bilong yumi. Olsem na yumi inap mekim isi bel bilong ol arapela man em ol i gat kain kain hevi.”—2 Kor. 1:4.
12. Bilong wanem em i bikpela samting long go long ol miting Kristen?
12 Wanpela gutpela rot bilong kisim bel isi em long ol miting Kristen. Tok bilong Baibel yumi save harim long ol miting i save strongim bel bilong yumi. Long Baibel yumi ritim stori olsem Judas na Sailas i bin “givim planti gutpela tok long ol brata na strongim ol.” (Apo. 15:32) Paslain na bihain long ol miting bilong yumi, ol bratasista i save mekim ol tok i strongim narapela narapela insait long kongrigesen. Olsem na maski yumi karim wanpela hevi, em i gutpela moa long bung wantaim ol wanbilip Kristen. Pasin bilong stap wanpis bai mekim hevi i go bikpela moa. (Snd. 18:1) Mobeta yumi bihainim tok bilong aposel Pol, em i tok: “Yumi wan wan i mas tingim ol arapela namel long yumi, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim, olsem sampela i save mekim, nogat. Yumi mas strongim bel bilong narapela narapela na mekim moa yet taim yumi lukim dispela de i kam klostu.”—Hib. 10:24, 25.
Baibel i Mekim Isi Bel Bilong Yumi
13, 14. Ol Rait Holi i save mekim isi bel bilong yumi long wanem ol rot?
13 Maski yumi baptais pinis o nau tasol yumi kirap long kisim save long God na ol samting em i tingting pinis long kamapim, Baibel inap mekim isi bel bilong yumi. Pol i tok: “Olgeta tok ol i bin raitim long bipo, ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:4) Baibel inap mekim isi bel bilong yumi na helpim yumi long stap ‘redi na inap tru long mekim olgeta kain gutpela wok.’ (2 Tim. 3:16, 17) Stretpela save long ol samting God i tingting pinis long mekim na pasin bilong bilip na wet long gutpela samting, i save mekim isi bel bilong yumi. Olsem na yumi mas givim bel tru long ritim Baibel na ol buk na nius bilong Baibel, dispela inap mekim isi bel bilong yumi na helpim yumi long kain kain rot.
14 Jisas i stap olsem gutpela piksa long pasin bilong yusim ol Rait Holi bilong skulim na mekim isi bel bilong ol arapela. Bihain long em i bin kirap bek, Jisas i kamap long tupela disaipel bilong em. Jisas i helpim ol long kliagut tru long tok i stap long Rait Holi. Ating dispela i bin mekim isi bel bilong tupela. (Luk 24:32) Aposel Pol i bin bihainim pasin bilong Jisas na yusim Rait Holi long toktok gut wantaim ol man. Ol lain i putim yau long tok bilong em long Beria, ol i bin i gat “laik tru long kisim tok, na ol i skelim gut ol Rait Holi long olgeta de.” (Apo. 17:2, 10, 11) So em i bikpela samting long nau long dispela taim nogut long ritim Baibel long olgeta de na larim tok bilong en wantaim ol buk na nius bilong yumi i helpim yumi. Dispela i save mekim isi bel bilong yumi na i helpim yumi long wetim gutpela samting bai kamap.
Sampela Rot Moa Bilong Mekim Isi Bel Bilong Ol Arapela
15, 16. Wanem sampela samting yumi inap mekim bilong mekim isi bel bilong ol brata bilong yumi?
15 I gat planti samting yumi inap mekim bilong helpim na mekim isi bel bilong ol brata bilong yumi. Olsem, yumi inap go long stua o maket bilong kisim kaikai bilong ol bratasista husat i sik o lapun. Ating yumi inap helpim ol long mekim sampela wok long haus bilong ol. Long dispela rot yumi soim olsem yumi tingim ol. (Fili. 2:4) Yumi inap tokim ol brata bilong yumi olsem yumi laikim tru ol gutpela wok ol i save mekim na ol gutpela pasin ol i save kamapim, olsem pasin laikim, strongpela bel, na pasin bilong bilip.
16 Wanpela samting yumi inap mekim bilong mekim isi bel bilong ol lapun em long visitim ol na putim yau long ol taim ol i stori long ol samting i bin painim ol na ol blesing ol i kisim long mekim wok bilong Jehova. Ating dispela bai strongim yumi na mekim isi bel bilong yumi! Yumi ken ritim Baibel o ol buk na nius bilong yumi long ol lain yumi visitim. O ating yumi inap redim stadi bilong Wastaua o hap bilong Baibel Stadi Bilong Kongrigesen wantaim ol. O yumi inap lukim wanpela DVD bilong yumi wantaim ol, o ritim o kamapim ol gutpela ekspiriens i stap long ol buk na nius bilong yumi.
17, 18. Bilong wanem yumi ken bilip tru olsem Jehova bai helpim na mekim isi bel bilong ol gutpela wokboi bilong em?
17 Sapos yumi save olsem wanpela brata o sista i nidim helpim, orait yumi save beten askim God long helpim ol. (Rom 15:30; Kol. 4:12) Taim yumi karim pen na hevi, long wanem, taim nogut i bungim yumi o taim yumi laik mekim isi bel bilong ol arapela, yumi ken holim wankain bilip olsem Devit, em i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Sng. 55:22) Oltaim Jehova bai mekim isi bel bilong yumi na helpim yumi. Em i no inap lusim ol gutpela wokboi bilong em.
18 God i bin tokim ol wokboi bilong em long bipo olsem: “Mi yet mi save strongim bel bilong yupela.” (Ais. 51:12) Jehova bai mekim wankain samting long yumi na em bai blesim ol samting yumi mekim bilong mekim isi bel bilong ol arapela. Maski yumi bai kisim laip long heven o long graun, tok Pol i mekim long ol Kristen God i bin makim, inap mekim isi bel bilong yumi, em i tok: “Bikpela bilong yumi Jisas Krais, wantaim God Papa bilong yumi, i laikim yumi tru. Na em i marimari long yumi na i mekim bel bilong yumi i stap gut oltaim oltaim. Na em i helpim yumi long bilip na wetim God i mekim gut tru long yumi. Na em i ken strongim bel bilong yupela, na helpim yupela long bihainim tru olgeta gutpela pasin na long mekim ol gutpela tok.”—2 Tes. 2:16, 17.
Yu Tingim Yet?
• Wok autim tok bilong yumi i go bikpela olsem wanem?
• Wanem sampela samting yumi inap mekim bilong mekim isi bel bilong ol arapela?
• Baibel i mekim wanem tok i soim olsem Jehova i save mekim isi bel bilong ol manmeri bilong em?
[Askim Bilong Stadi]
[Piksa long pes 28]
Yu save mekim isi bel bilong ol man i krai sori?
[Piksa long pes 30]
Ol yangpela na ol lapun inap strongim bel bilong ol arapela
