Mi Kisim Amamas Long Mekim Wok Bilong Jehova

Stori bilong Fred Rusk

Long taim mi liklik, tok bilong Devit long Song 27:10 i stret long mi, em i tok: “Maski papa na mama i givim baksait long mi, Bikpela bai i lukautim mi.” Larim mi stori long olsem wanem dispela i bin kamap tru.

MI KAMAP bikpela long koten fam bilong bubu man bilong mi long Jojia, Amerika, long taim bilong bikpela hevi bilong mani long 1930 samting. Papa bilong mi i bin bel hevi tru taim mama na nupela bebi brata bilong mi i dai, olsem na em i lusim mi stap wantaim wido papa bilong em na em i go painim wok na stap long wanpela siti i stap longwe. Bihain, em i traim long stretim rot bilong kisim mi i go stap wantaim em, tasol dispela i no kamap.

Ol bikpela pikinini meri bilong bubu man i lukautim ol samting bilong haus. Bubu man i no man bilong lotu, tasol ol pikinini meri i save lotu long Sauten Baptis na ol i strong long mi mas bihainim lotu bilong ol. Ol i tok long paitim mi sapos mi no go lotu long olgeta Sande. Dispela i mekim na taim mi liklik yet, mi no gat laik long lotu. Tasol mi save amamas long go long skul na pilai ol spot.

Visit We i Senisim Laip Bilong Mi

Wanpela apinun long 1941, taim mi gat 15 krismas, wanpela lapun man na meri bilong em ol i kam long haus bilong mipela. Ol famili i tokim mi olsem em “ankol bilong yu, Talmadge Rusk.” Mi no bin save long em, tasol mi kisim save olsem em na meri bilong em ol i Witnes Bilong Jehova. Tok em i kamapim long laik bilong God long ol man bai stap oltaim long graun i narapela kain long samting mi bin harim long lotu. Planti long famili i no laik tru long harim tok tupela i mekim. Olsem na ol i no larim tupela i kam moa long haus. Tasol anti bilong mi Mary, husat i winim mi long 3-pela krismas, i kisim wanpela Baibel na ol buk na nius we i stori long dispela laik bilong God.

Kwiktaim anti Mary i bilip olsem em i painim pinis tok i tru bilong Baibel, olsem na em i baptais long 1942 olsem wanpela Witnes Bilong Jehova. Tok Jisas i mekim i bin kamap tru long em: “Ol wanhaus bilong man bai kamap birua bilong en.” (Mat. 10:​34-36) Ol famili i bin mekim nogut tru long em. Bikpela anti bilong mi i gat nem long taun, olsem na em i pasim tok wantaim bikman bilong taun na arestim ankol Talmadge. Ol i kotim em long em i salim ol buk samting na em i no kisim tok orait long mekim, olsem na em i lus long kot.

Niuspepa bilong taun i kamapim tok em  bikman bilong taun i mekim long ol manmeri long kot olsem: “Ol buk na nius em dispela man i wok long tilim . . . i nogut olsem posin.” Dispela bikman i mekim wok tu olsem jas. Ankol bilong mi i apil long dispela kes na em i winim, tasol em i stap 10-pela de long kalabus.

Anti Mary i Helpim Mi

Anti Mary i stori long nupela bilip bilong em long mi, na tu, em i kirap autim tok long ol neiba. Mi go wantaim em long wanpela stadi we em i save mekim long wanpela man husat i kisim buk The New World. a Meri bilong dispela man i tok olsem man bilong em i ritim dispela buk nait olgeta. Maski mi no laik hariap tumas long insait long ol samting bilong lotu, samting mi wok long lainim i kirapim tru bel bilong mi. Tasol i no ol tok bilong Baibel tasol i mekim mi bilip olsem ol Witnes i lain bilong God. Em pasin birua ol man i mekim long ol i kirapim mi long bilip.

Olsem, wanpela taim bihain long mi na anti Mary i klinim tomato gaden, mitupela i kam bek na lukim olsem ol bikpela anti i bin kukim ol litresa bilong anti Mary wantaim masin pikap na ol rekod bilong harim ol tok bilong Baibel. Mi belhat nogut tru, tasol wanpela anti i tok, “Bihain yu bai tenkyu long mipela long samting mipela i mekim nau.”

Long 1943, ol i rausim anti Mary long haus bikos em i no laik lusim nupela lotu bilong em na pasin bilong autim tok long ol neiba. Long dispela taim, mi bin kisim save olsem God i gat nem, Jehova, na em God bilong pasin laikim na sori, na em i no save kukim ol man long hel. Maski mi no go yet long wanpela miting, mi kisim save tu olsem Jehova i gat wanpela gutpela oganaisesen.

Bihain, taim mi wok long katim gras, wanpela kar i kam isi na wanpela bilong tupela man insait long kar i askim mi sapos mi Fred. Taim mi painimaut olsem ol i Witnes, mi tok, “Larim mi kalap na yumi go long wanpela hap we yumi ken toktok.” Anti Mary i bin toksave long ol long kam lukim mi. Wanpela bilong ol em Shield Toutjian, em wanpela wasman raun husat i strongim mi na stiaim mi long sait bilong lotu long taim stret we mi nidim helpim. Ol famili i birua tru long mi taim mi sambai long ol bilip bilong ol Witnes Bilong Jehova.

Anti Mary i stap long Virginia na em i raitim pas long mi na tok olsem sapos mi laik lotuim Jehova, mi ken i go stap wantaim em. Wantu, mi wanbel long i go. Long wanpela Fraide nait long Oktoba 1943, mi putim sampela kago long wanpela boks na pasim long rop long wanpela diwai longwe long haus. Long Sarere, mi kisim boks na wokabaut long baksait long haus bilong ol neiba na kalap long wanpela kar i go long taun. Mi go kamap long siti  bilong Roanoke na bungim anti Mary long haus bilong Edna Fowlkes.

Kamap Strong, Baptais, Betel

Edna em wanpela Kristen God i bin makim na em i gat pasin sori tru, wankain olsem bilip meri Lidia long Baibel. Edna i baim rent long wanpela haus na em i kisim anti Mary long stap wantaim em. Na tu, meri bilong brata bilong Edna, wantaim tupela pikinini meri bilong em i stap wantaim Edna. Dispela tupela pikinini meri​—⁠Gladys na Grace Gregory​—⁠bihain ol i kamap misineri. Gladys i gat 90 krismas samting nau, na em i mekim yet wok long brens bilong Japan.

Taim mi stap long haus bilong Edna, mi go long olgeta miting, na tu, mi kisim skul long mekim wok autim tok. I no gat wanpela samting i pasim mi long stadi long Tok Bilong God na long go long ol miting, na dispela i helpim mi long save gut moa long Jehova. Long Jun 14, 1944, mi kisim baptais. Anti Mary wantaim Gladys na Grace Gregory i kirap mekim wok painia na ol i kisim wanpela asainmen long noten Virginia. Ol i bin helpim long kirapim wanpela kongrigesen long Leesburg. Long kirap bilong 1946, mi kirap mekim wok painia klostu long hap ol i stap long en. Na long dispela yia yet, mipela olgeta i go long kibung intenesenel long Cleveland, Ohio. Dispela kibung i kamap long Ogas 4 i go 11.

Long dispela kibung, Nathan Knorr, husat i go pas long oganaisesen, i tokaut long plen bilong surikim Brooklyn Betel i go bikpela. Na tu, ol bai wokim nupela haus slip na surikim haus bilong wokim ol buk samting i go bikpela. Ol i nidim tru planti yangpela brata. Mi gat bikpela laik long mekim wok bilong Jehova long dispela hap. Olsem na mi givim aplikesen, na bihain long sampela mun, long Disemba 1, 1946, mi go long Betel.

Bihain long wanpela yia, wasman bilong dipatmen bilong prinim ol buk na nius, Max Larson, i kam lukim mi long hap mi wok long en long Dipatmen Bilong Salim Pas. Em i tokim mi olsem mi bai wok long Dipatmen Bilong Wok Autim Tok. Long dispela asainmen, mi lain long mekim wok long ol stiatok bilong Baibel na long olsem wanem oganaisesen bilong Jehova i save wok, moa yet taim mi wok wantaim T. J. (Bud) Sullivan, em wasman bilong dipatmen.

Papa bilong mi i kam visitim mi planti taim long Betel. Taim em i go lapun em i bin kamap man bilong lotu. Long laspela visit bilong em long 1965, em i tok, “Yu ken kam na visitim mi, tasol mi no inap kam visitim yu moa long hia.” Mi bin visitim em sampela taim paslain long em i dai. Em i bilip strong olsem em bai go long heven. Mi laik tru olsem Jehova i tingim em, na long kirap bek, em bai stap long graun na amamas long stap laip oltaim long  Paradais, na i no long heven we em i ting long i go.

Ol Arapela Bikpela Kibung na Konstraksen

Ol kibung i bin mekim na tok i tru i go bikpela na i helpim mi long kamap gutpela moa long wok bilong Jehova. Ol kibung intenesenel long Yankee Stediam long New York namel long 1950 i go 1960 i bin mekim olsem. Long 1958, i gat 253,922 manmeri bilong 123 narapela kantri i kam bung long kibung long Yankee Stediam na Polo Grounds. Wanpela samting i kamap long dispela kibung em mi no inap lusim tingting long en. Mi wok long ofis bilong lukautim kibung na Brata Knorr i hariap i kam long mi na tok, “Fred, mi no bin makim wanpela brata long toktok wantaim ol painia em ol i stap nau long wanpela bikpela haus bung ol i rentim i stap klostu long hia. Inap yu siksti i go long ol na stori long ol long samting yu inap tingim?” Mi beten planti na taim mi kamap long hap, mi sotwin stret.

Taim namba bilong ol kongrigesen i go planti long New York siti long 1950 na 1960 samting, ol haus em ol i save rentim bilong mekim ol miting i no inap. Olsem na long 1970 i go 1990, ol i baim 3-pela bikpela haus long Manhattan na ol i stretim ol bilong mekim ol haus bung. Mi bin stap siaman bilong ol komiti bilong wokim ol dispela haus, na mi inap tingim ol gutpela pasin bilong Jehova long blesim ol kongrigesen long wok wantaim long givim mani na pinisim ol dispela haus, na ol dispela haus i stap yet olsem ples bilong mekim lotu i tru.

Ol Senis Long Laip

Wanpela de long 1957, mi wokabaut long pak namel long Haus Betel na haus bilong prinim ol buk samting, na ren i pundaun. Mi lukim wanpela naispela sista husat nau tasol i kirap wok long Betel, em i wokabaut i go. Em i no gat ambrela, olsem na mi serim ambrela bilong mi wantaim em. Em hau mi bungim Marjorie, na long de mitupela i marit long 1960 na i kam inap nau, mitupela i stap gut wantaim long wok bilong Jehova long taim nogut na gutpela taim. Mipela i selebretim 50 yia bilong marit long Septemba 2010.

Bihain stret long mipela i kam bek long holide bilong marit, Brata Knorr i tokim mi olsem ol i makim mi long kamap olsem wanpela tisa bilong Skul Gileat. Em wanpela gutpela samting tru! Long 1961 i go 1965, 5-pela klas i kamap na i stap inap planti mun we ol brata long ol brens i kisim spesel trening long lukautim wok bilong brens. Long Oktoba samting long 1965, ol i sotim ol klas i go 5-pela mun, na long dispela taim ol i kirap gen long trenim ol bratasista husat bai mekim wok misineri.

Long 1972, mi lusim wok tisa bilong Skul Gileat, long wanem, ol i makim mi long  mekim wok wasman bilong Dipatmen Bilong Raitim Ol Pas. Pasin bilong mekim wok painimaut long stretim ol hevi na bekim ol kain kain askim i bin helpim mi long kliagut long ol tok bilong Baibel, na long rot bilong yusim ol stiatok bilong God long helpim ol arapela.

Na long 1987, ol i makim mi long wok long wanpela nupela dipatmen ol i kolim Hospital Infomesen Sevis. Mipela wokim ol bung bilong skulim ol elda husat i stap insait long Hospital Lieson Komiti, mipela i skulim ol long pasin bilong toktok wantaim ol dokta, jas, na welfe long bilip bilong yumi long blut em Baibel i as bilong en. Wanpela bikpela hevi em olsem ol dokta i save givim blut long ol Witnes pikinini na ol i no kisim tok orait bilong ol papamama, na planti taim ol dokta i kisim tok orait bilong kot bilong mekim olsem.

Taim mipela i tokim ol dokta long ol narapela marasin ol i ken mekim wok long en, ol i save tok ol i no gat o em i bikpela mani tumas. Taim dokta i tok olsem, mi save tokim em, “Plis, soim han bilong yu long mi.” Taim em i mekim, mi save tok, “Han bilong yu inap mekim gutpela wok tru bilong helpim man i no laik kisim blut.” Dispela tok bilong litimapim wok dokta i kirapim em long tingim samting em i save pinis long en​—⁠planti blut bai i no lus nating taim em i mekim gut wok long scalpel, em naip bilong katim sikman.

Insait long 20 yia i go pinis, Jehova i blesim tru wok bilong skulim ol dokta na jas. Tingting bilong ol i senis tru taim ol i kliagut long bilip bilong yumi long blut. Ol i kisim save olsem ol wok painimaut i kamapim klia olsem i gat ol narapela samting olsem senis bilong blut i save wok gut. Na i gat planti dokta na ol haus sik we ol i amamas long mekim wok long ol dispela samting na ol i ken salim ol sikman i go long en.

Kirap long 1996, mi na Marjorie i wok long Wastaua Ediukesen Senta long Patterson, New York, em i stap olsem 110 kilomita long hap not bilong Brooklyn. Long dispela hap, mi wok liklik taim long Dipatmen Bilong Wok Autim Tok, na bihain mi insait long wok bilong skulim ol brata long brens na ol wasman raun. Inap 12-pela yia nau, mi wok gen olsem wasman bilong Dipatmen Bilong Raitim Ol Pas, em ol i muvim long Brooklyn i go long Patterson.

Ol Hevi Bilong Lapun

Mi gat 85 krismas samting, olsem na mi pilim hatwok liklik long mekim ol wok bilong mi long Betel. Mi gat sik kensa winim 10-pela yia nau. Mi pilim wankain olsem Hesekia, we Jehova i larim em i stap laip sampela yia moa. (Ais. 38:⁠5) Meri bilong mi i gat sik Alsaima, na mitupela i wok wantaim long karim dispela hevi. Marjorie i bin stap olsem gutpela wokmeri bilong Jehova, na em i bin helpim ol yangpela, na em i stap gutpela poroman na helpim bilong mi. Em i bin stap olsem gutpela sumatin na tisa bilong Baibel, na planti lain mipela i bin helpim, ol i save tingim yet mipela.

Anti Mary i gat 87 krismas na em i dai long Mas 2010. Em i bin mekim gut wok olsem tisa bilong Tok Bilong God na helpim ol arapela long bihainim lotu i tru. Em i mekim wok autim tok fultaim inap planti yia. Mi amamas tru long em i bin helpim mi long kisim save long tok i tru bilong Baibel na long bihainim em long kamap wokman bilong God, Jehova. Ol i planim anti Mary klostu long man bilong em, husat i bin mekim wok misineri long Israel. Mi bilip tru olsem Jehova i tingim ol na em bai kirapim ol bek.

Taim mi tingim bek dispela 67 yia mi bin mekim wok bilong Jehova, mi tenkyu tru long ol gutpela blesing mi kisim. Mi bin amamas tru long mekim laik bilong Jehova! Mi bilip tru long bikpela pasin helpim bilong God, olsem na mi wet long promis bilong Pikinini bilong em: “Olgeta manmeri i bin tingim nem bilong mi na lusim haus o brata o susa o papa o mama o pikinini o graun, bai ol i kisim planti moa na ol bai kisim laip oltaim.”​—⁠Mat. 19:⁠29.

[Futnot]

[Piksa long pes 19]

Long koten fam bilong bubu man long Jojia, Amerika, 1928

[Piksa long pes 19]

Anti Mary na Ankol Talmadge

[Piksa long pes 20]

Anti Mary, Gladys, na Grace

[Piksa long pes 20]

Mi kisim baptais, Jun 14, 1944

[Piksa long pes 20]

Long Dipatmen Bilong Wok Autim Tok long Betel

[Piksa long pes 21]

Mi na anti Mary long 1958 kibung intenesenel long Yankee Stediam

[Piksa long pes 21]

Mi na Marjorie long de mipela i marit

[Piksa long pes 21]

Mitupela long 2008