Askim

Yumi inap save long aua stret ol i bin nilim Jisas Krais long pos?

Dispela askim i kamap, long wanem, stori bilong Mak na aposel Jon long dai bilong Jisas i no wankain. Mak i tok: “Long namba 3 aua, ol [soldia] i nilim em long pos.” (Mak 15:25) Jon i tok “em klostu long namba 6 aua” taim Pailat i putim Jisas long han bilong ol Juda bilong nilim em long pos. (Jon 19:​14-16) Ol man bilong skelim tok bilong Baibel, ol i kamapim narapela narapela tingting long as na i luk olsem stori bilong tupela i no wankain. Tasol i no gat planti tok long Baibel bilong kamapim klia as na tupela stori hia i no wankain. Tasol sapos yumi skelim tingting bilong ol man bilong bipo long ol taim na aua samting, dispela inap helpim yumi.

Long taim bilong ol aposel, ol Juda i save brukim taim bilong san i lait i go long 12-pela aua, kirap long taim san i kam antap. (Jon 11:⁠9) Olsem na “namba 3 aua” i kirap long 8 klok i go inap long 9 klok long moningtaim na “namba 6 aua” i pinis klostu long belo. Tru, san i save kam antap na i go daun long ol narapela narapela taim insait long yia, olsem na haptaim em lait bilong san i stap antap, i no wankain long taim bilong kol na long taim bilong san. Na tu, bilong save long aua bilong de, ol i save lukim san i stap we long skai. Olsem na taim ol i kolim aua, ol i no inap kolim taim stret. Taim Ol Skripsa Grik i kolim taim bilong sampela samting i bin kamap, Baibel i save kolim olsem namba 3, namba 6, o namba 9 aua​—⁠olsem klostu long dispela taim. (Luk 23:44; Jon 19:14; Apo. 10:​3, 9, 30) Sampela taim Baibel kolim taim stret olsem “namba 7 aua” sapos em i bikpela samting long kolim aua stret insait long stori.​—⁠Jon 4:⁠52.

Stori bilong 4-pela Gutnius long taim bilong de we ol samting i bin kamap long laspela de bilong Jisas long graun, ol i stret wantaim. Fopela stori wantaim i makim olsem ol bikpris na hetman i bin bung long moningtaim tru na ol i kisim Jisas i go na putim em long han bilong Gavana Bilong Rom, em Pontius Pailat. (Mat. 27:1; Mak 15:1; Luk 22:66; Jon 18:28) Matyu, Mak na Luk i tok, kirap long namba 6 aua, taim ol i nilim pinis Jisas long pos, tudak i karamapim olgeta hap “i go inap long namba 9 aua.”​—⁠Mat. 27:​45, 46; Mak 15:​33, 34; Luk 23:⁠44.

Samting inap givim tingting long yumi long aua ol i bin nilim Jisas long pos, em olsem: Taim ol i laik nilim wanpela man long pos, pastaim ol i save wipim em. Sampela taim ol i save wipim man nogut tru na em i dai. Pastaim Jisas wanpela i karim pos i go, tasol bihain narapela man i mas kisim na karim, dispela i soim olsem ol i bin mekim save tru long Jisas. (Luk 23:26; Jon 19:17) Sapos man i ting wok bilong wipim Jisas i insait long dispela strafe bilong nilim man long pos, orait ating haptaim i mas lus paslain long ol i nilim Jisas long pos. Ating wanpela i tingim taim ol i kirap wipim Jisas, na narapela i tingim taim stret ol i nilim Jisas long pos. Ating dispela em as na ol i kolim narapela narapela aua ol i bin nilim Jisas long pos.

Aposel Jon i bin raitim stori bilong Jisas planti yia bihain long ol narapela i bin raitim Gutnius. Olsem na em inap ritim stori ol i bin raitim. Tru, Jon i no kolim aua i wankain long aua Mak i bin kolim. Tasol dispela i kamapim klia olsem Jon i no bin raitim nating wankain tok tasol olsem Mak i bin raitim, nogat. Spirit bilong God i bin kirapim Jon na Mak wantaim long raitim stori bilong ol. Tru, i no gat planti tok long Baibel i kamapim klia as na ol i bin kolim narapela narapela aua, tasol yumi inap bilip tru long stori bilong ol Gutnius.