Jehu i Givim Bel Long Sapotim Lotu i Tru

JEHU i sapotim lotu i tru. Na taim em i mekim olsem em i wok strong, na em i no westim taim, em i no save les, em i givim bel na em i gat strongpela bel. Jehu i kamapim ol pasin we i gutpela long yumi bihainim.

Jehu i kisim wok taim sindaun bilong lain Israel i stap nogut tru. Kwin nogut Jesebel, em man bilong em Ahap i dai pinis, na mama bilong King Joram, i wok long kirapim ol manmeri long mekim pasin nogut. Em i kirapim ol manmeri long lotuim Bal na i no Jehova, em i kilim i dai ol profet bilong God, na em i kirapim ol man long “bihainim ol giaman god” na “mekim posin.” (2 Kin. 9:22; 1 Kin. 18:​4, 13) Jehova i tokaut olsem olgeta lain bilong Ahap wantaim Joram na Jesebel i mas dai. Jehu i mas go pas long mekim dispela samting.

Baibel i kirap stori long Jehu olsem, em i sindaun toktok wantaim ol ofisa bilong ami taim ol Israel i wok long pait wantaim ol Siria long Ramot Gileat. Jehu em wanpela ami ofisa husat i gat bikpela namba, na ating em i komanda bilong ami bilong Israel. Profet Elisa i salim wanpela yangpela profet i go makim Jehu long kamap king. Em i makim Jehu i kamap king na tokim em long kilim i dai olgeta man long lain bilong Ahap.​—⁠2 Kin. 8:28; 9:​1-10.

Taim ol arapela ofisa i askim Jehu long as na dispela profet i visitim em, em i no laik tokim ol. Tasol taim ol i strong long em i mas tokaut, orait em i kamapim olgeta samting. Na em wantaim ol arapela ofisa i stat long plen long olsem wanem ol bai kilim i dai Joram na bai em i kisim ples bilong Joram. (2 Kin. 9:​11-14) I luk olsem ol ofisa i no wanbel long pasin bilong Ahap na Jesebel long bosim kantri. Long dispela as, Jehu i bin skelim gut tru samting em i mas mekim bilong inapim wok bilong em.

King Joram i kisim bagarap long pait na em i bin ranawe i go long taun Jesril bilong kamap orait. Jehu i save olsem bilong plen bilong em i ken wok, stori bilong samting em i laik mekim i no ken kamap long taun Jesril. Olsem na em i tokim ol ofisa: “No ken larim wanpela man i lusim Ramot na i go long Jesril na tokaut long dispela samting yumi laik mekim.” (2 Kin. 9:​14, 15) Ating Jehu i ting olsem sampela soldia bai stap long sait bilong Joram na helpim Joram. Jehu i no laik givim sans long ol long mekim olsem.

EM I SPIT NOGUT TRU!

Jehu i no laik bai ol i save olsem em bai kam, olsem na em i kalap long karis bilong em i kam long Jesril, em 72 kilomita longwe long Ramot Gileat. Taim em i siksti i kam long Jesril, wanpela gad i stap long taua i lukim “bikpela lain man” bilong Jehu i kam. (2 Kin. 9:17) I luk olsem Jehu i kisim bikpela lain ami i kam wantaim em bilong helpim em, long wanem, samting em bai mekim, i no isi.

 Gad long taua i luksave olsem Jehu i ronim wanpela bilong ol karis, na em i tok: “Em i mekim ol hos i spit nogut tru na pulim karis i kam.” (2 Kin. 9:20) Ating Jehu i save spit taim em i ronim karis, tasol long dispela taim i luk olsem em i spit nogut tru.

Jehu i no bekim tok long tupela soldia em king i salim i go long em. Na bihain King Joram na king bilong Juda, Ahasia, ol i sindaun long karis bilong ol yet na i go bungim Jehu. Joram i askim Jehu olsem: “Olgeta samting i stap i orait, o nogat?” Jehu i bekim tok olsem: “Bai i orait olsem wanem, sapos mama bilong yu Jesebel, i wok yet long bihainim ol giaman god na i mekim ol pasin nogut na ol pasin bilong mekim posin.” Joram i kirap nogut long dispela bekim na em i laik ranawe. Tasol kwiktaim Jehu i taitim strong banara bilong em na sutim i go na spia i kisim lewa bilong Joram na em i pundaun na dai insait long karis bilong em. Ahasia i ranawe, tasol bihain Jehu i painim em na tokim ol soldia long kilim em tu i dai.​—⁠2 Kin. 9:​22-24, 27.

Narapela long lain bilong Ahap husat i mas dai em kwin nogut Jesebel. I stret Jehu i kolim em “dispela meri nogut.” Taim Jehu i kam insait long Jesril, em i lukim Jesebel i stap long haus king na i lukluk long windo i kam daun. Kwiktaim Jehu i tokim ol wokman bilong haus king long tromoi Jesebel i kam daun. Nau Jehu i mekim ol hos na karis bilong em i krungutim bodi bilong dispela meri husat i bin paulim olgeta Israel. Bihain, Jehu i kilim i dai planti man long lain bilong man nogut Ahap.​—⁠2 Kin. 9:​30-34; 10:​1-14.

Tru dispela i no samting bilong amamas, tasol yumi mas tingim olsem long dispela taim bipo Jehova i save mekim wok long ol wokman bilong em long givim strafe long ol birua bilong em. Baibel i tok: “God i save pinis olsem, King Ahasia bai i go lukim King Joram, na em i makim dispela taim bilong bagarapim Ahasia. Na taim Ahasia i go i stap wantaim Joram, orait tupela i go bungim Jehu, pikinini bilong Nimsi. Jehu em man Bikpela yet i bin makim bilong bagarapim ol lain bilong Ahap.” (2 Sto. 22:⁠7) Taim Jehu i tromoi bodi bilong Joram i go daun long graun bilong Nabot, long dispela taim em i luksave olsem dispela i truim tok Jehova i mekim bilong bekim rong Ahap i bin mekim taim em i kilim i dai Nabot. Na tu, Jehova i bin tokim Jehu long “bekim stret pasin nogut” bilong Jesebel.​—⁠2 Kin. 9:​7, 25, 26; 1 Kin. 21:​17-19.

Long nau, ol wokboi bilong Jehova i no save pait wantaim ol birua bilong lotu i tru. God i tok: “Bekim rong, em wok bilong mi.” (Hib. 10:30) Tasol bilong rausim ol pasin nogut we inap bagarapim kongrigesen, ol elda i mas  strong long mekim ol samting olsem Jehu. (1 Kor. 5:​9-13) Na olgeta bratasista i mas strong long abrusim pasin bilong bung wantaim ol rauspela man.​—⁠2 Jon 9-11.

JEHU I BIHAINIM JEHOVA WANPELA TASOL

Samting i kirapim Jehu long mekim wok bilong em i stap ples klia long tok em i mekim long gutpela man Jonadap, em i tok: “Yu kam wantaim mi na bai yu save, mi strong long bihainim Bikpela tasol.” Jonadap i orait long dispela, na em i kalap long karis na i go wantaim em long Samaria. Long dispela hap Jehu i mekim tok bilong “trikim ol manmeri i save lotuim Bal, bilong em i ken kilim olgeta i dai.”​—⁠2 Kin. 10:​15-17, 19.

Jehu i tokaut olsem em i laik mekim “wanpela bikpela ofa” long Bal. (2 Kin. 10:​18, 19) Wanpela saveman i tok, “tok bilong Jehu i kleva stret.” Dispela tok “i save makim ‘pasin bilong mekim ofa,’ tasol tu, em inap makim pasin bilong ‘kilim i dai’ ol man i tromoi lotu i tru.” Jehu i laik bai olgeta man husat i save lotuim Bal i mas stap long dispela bung, olsem na em i bungim ol long haus bilong Bal na tokim ol long werim klos bilong lotu. Orait bihain long ol “i mekim pinis ofa bilong paia i kukim olgeta,” Jehu i singautim 80 soldia bilong kilim i dai ol manmeri i lotuim Bal. Bihain em i bagarapim haus lotu bilong Bal na ol i mekim dispela haus lotu i kamap haus pekpek.​—⁠2 Kin. 10:​20-27.

Tru, Jehu i bin kapsaitim planti blut. Tasol stori bilong Baibel i kamapim olsem em i gat strongpela bel na em i bin helpim lain Israel na ol i no stap aninit moa long hatpela wok bos bilong Jesebel na famili bilong em. Bilong man i go pas long Israel i ken mekim ol dispela samting, em i mas stap olsem man i gat strongpela bel, na i tingting strong long samting em i laik mekim, na em i mas givim bel tru long samting em i mekim. Wanpela Baibel dikseneri i tok: “Dispela wok i hatwok long mekim, tasol em i no givap, em i inapim gut dispela wok. Sapos em i bin sori na marimari long ol, orait ating em bai no inap pinisim pasin bilong lotuim Bal long lain Israel.”

Ating yu luksave olsem i gat sampela samting i kamap long ol Kristen long nau na ol i mas bihainim sampela pasin bilong Jehu. Olsem, yumi bai mekim wanem taim traim i kamap bilong pulim yumi long insait long samting Jehova i no laikim? Yumi mas i gat strongpela bel na strong long sakim hariap dispela samting. Pasin bilong yumi long givim bel tru long God i mekim na yumi bihainim Jehova wanpela tasol.

BIHAINIM LO BILONG JEHOVA

Pinis bilong dispela stori i stap olsem wanpela tok lukaut long yumi. Jehu i bihainim pasin nogut na lotuim bulmakau gol long Betel na Dan. (2 Kin. 10:29) Bilong wanem man husat i bin givim bel tru long lotu i tru, em i kirap orait long lotuim ol imis?

Ating Jehu i ting olsem bilong kingdom bilong Israel na kingdom bilong Juda i ken i stap narapela narapela, ol i mas i gat lotu bilong ol yet. Olsem na bilong tupela lain i no ken kamap wanpela lain gen, Jehu i mekim wankain samting olsem ol arapela king bilong Israel i bin mekim. Em i laik kirapim ol long lotuim ol bulmakau gol. Tasol dispela bai soim olsem em i no bilip moa long Jehova, husat i bin mekim em i kamap king.

Jehova i mekim gutpela tok long Jehu, long wanem, em i bin bihainim laik bilong God. Tasol Jehu “i no strong long bihainim gut olgeta lo bilong God, Bikpela bilong Israel.” (2 Kin. 10:​29-31) Taim yumi tingim ol samting Jehu i bin mekim long pastaim, ating yumi bai kirap nogut na pilim sori long em i no strong moa long bihainim ol lo bilong God. Tasol dispela inap givim skul long yumi. Yumi no ken ting pasin bilong yumi long pas gut wantaim Jehova em i samting nating. Long olgeta de yumi mas wok long kamapim olsem yumi stap gut long God long rot bilong stadi long Baibel, tingim tingim long bel ol dispela tok, na beten long Papa bilong yumi long heven. Em nau, yumi mas lukautim gut pasin bilong yumi long givim bel olgeta long bihainim ol lo bilong Jehova.​—⁠1 Kor. 10:12.

[Blok long pes 4]

Stori Bilong Jehu Long Ol Buk Bilong Bipo

Sampela man bilong skelim tok bilong Baibel i gat tupela tingting olsem ol man Baibel i stori long ol, ol i bin stap tru o nogat. Olsem na yumi laik save, i gat sampela arapela buk samting i stori long Jehu?

I gat 3-pela olpela rait bilong Asiria i kolim stret nem bilong dispela king bilong Israel. Wanpela bilong ol i soim olsem Jehu, o ating mausman bilong em, i brukim skru na givim presen long King Salmaneser Namba 3 bilong Asiria. Rait aninit long dispela piksa i tok: “Presen Jehu (Ia-ú-a), pikinini bilong Omri (Hu-um-ri) i givim; mi kisim long em, silva, gol, wanpela saplu-dis gol, wanpela naispela botol gol em as bilong en i sap, ol kap na ol baket gol, tin, stik bilong king, na ol samting ol i wokim long diwai.” Jehu i no “pikinini bilong Omri,” tasol ol i yusim dispela tok bilong makim ol king i kamap bihain long Omri, long wanem, Omri i gat biknem na em i bin kamapim Samaria, biktaun bilong Israel.

I no gat narapela olpela rait i stori long dispela presen Jehu i givim long king, olsem na yumi no save em tru o nogat. Tasol maski i olsem, king i kolim nem bilong Jehu 3-pela taim​—⁠wanpela long rait ol i bin sapim long ston, narapela long imis bilong Salmaneser, na wanpela long ol rekod bilong ol king bilong Asiria. Ol dispela olpela rait i kamapim olsem Jehu em wanpela man i bin stap tru.