“Nau Skin i Bagarap, Tasol Bihain Bai Mi Orait!”

Stori bilong Sara Van Der Monde

Ol man i save tokim mi, “Sara yu gat naispela smail. I gat wanem as na yu save amamas long olgeta taim?” Mi save tokim ol olsem mi wetim gutpela samting. Olsem: “Nau skin i bagarap, tasol bihain bai mi orait!”

MI BON long 1974 long Paris, Frans. Mama i hatwok long karim mi na bihain ol i luksave olsem mi gat wanpela sik bilong kru (cerebral palsy). Hanlek i no inap wok gut, na toktok bilong mi i no klia. Na tu, mi kisim sik epilepsi, olsem na i isi long mi kisim ol arapela sik.

Taim mi gat 2-pela krismas, famili bilong mi i muv i go long Melbourne, Australia. Tupela yia bihain Papa i lusim mi na Mama. Em namba wan taim mi pilim olsem mi stap klostu tru long God. Mama em wanpela Witnes Bilong Jehova, na em i kisim mi i go oltaim long ol miting Kristen. Long dispela hap mi kisim save olsem God i laikim mi na lukautim mi. Dispela samting wantaim pasin bilong Mama long laikim na strongim mi, i helpim mi long pilim olsem mi stap gut maski sindaun bilong mipela i senis.

Na tu, Mama i lainim mi long beten long Jehova. Mi lukim olsem em i isi moa long mekim beten, winim pasin bilong toktok. Taim mi beten mi no gat hatwok long kolim ol tok, nogat. Mi ken kamapim long tingting tasol. Ol man i hatwok long kliagut long tok mi mekim. Tasol mi amamas long save olsem Jehova i kliagut long olgeta samting, maski mi kamapim ol tok long tingting o mi no kolim gut long maus.​—⁠Sng. 65:⁠2.

Mi Lain Long Karim Ol Hevi

Sik i mekim na taim mi gat 5-pela krismas ol i mas taitim ol stik ain long 2-pela lek bilong mi bilong helpim mi long wokabaut. Tasol skru bilong lek bilong mi i guria na mi no wokabaut gut. Na taim mi gat 11-pela krismas, mi no inap wokabaut moa. Bihain, mi mas i gat wanpela masin i helpim mi long lusim bet na sindaun long wilsia i gat moto long en, na mi ken stiaim long han.

Tru, sampela taim sik i mekim mi bel hevi. Tasol mi tingim tok mipela famili i save mekim: “No ken tingting planti long ol samting yu no inap mekim, bisi long ol samting yu inap mekim.” Dispela tok i helpim mi long lain long raun long hos, stiaim seil bot, pul long kanu, kem long bus, na draiv long hap i no gat man! Mi save amamas long penim ol piksa, samapim ol kain kain samting, na wokim ol sospen graun.

Sampela i ting sik i mekim na mi no inap wokim disisen bilong mi yet long lotuim God. Taim mi gat 18 krismas, wanpela tisa long skul i laik kirapim mi long go stap mi yet na bai mi no ken kalabus long lotu bilong mama. Tisa i tok em bai helpim mi long painim ples slip. Tasol mi tokim em olsem mi no inap lusim bilip bilong mi, na  mi bai lusim mama taim mi inap lukautim mi yet.

Bihain liklik long dispela, mi kisim baptais na kamap wanpela Witnes Bilong Jehova. Tupela yia bihain, mi muv i go long wanpela liklik flet. Dispela i mekim mi amamas, long wanem, mi inap kisim sampela helpim na long seim taim lukautim mi yet.

Wanpela Askim Mi Kirap Nogut Long En

I gat ol arapela samting tu i kamap i traim bilip bilong mi. Wanpela de mi kirap nogut tru taim wanpela wanskul​—⁠em tu i gat bagarap bilong skin​—⁠i askim mi long maritim em. Pastaim mi amamas long dispela samting. Wankain olsem planti yangpela meri, mi laik tru long i gat wanpela poroman. Tasol maski mitupela i gat wankain sindaun, dispela i no makim olsem marit bilong mipela bai gat amamas long en. Na tu, dispela man i no wanbilip. Bilip, wok, na ol mak mipela i laik winim i no wankain liklik. Em bai hatwok tru long mipela i sindaun gut wantaim. Mi gat strongpela tingting long bihainim tok bilong God long maritim wanbilip tasol. (1 Kor. 7:39) Olsem na long gutpela pasin mi tokim dispela man olsem mi no inap maritim em.

I kam inap long nau, mi save olsem mi wokim gutpela disisen. Na mi bilip tru olsem mi bai stap amamas long nupela taim God i promis long kamapim. (Sng. 145:16; 2 Pita 3:13) Paslain long dispela samting i kamap, mi bai strong long stap gut yet long Jehova na amamas long sindaun bilong mi long nau.

Mi gat laik tru long stap long dispela taim we mi bai lusim wilsia bilong mi na ran spit i go. Long dispela taim mi bai singaut olsem, “Bipo skin bilong mi bagarap, tasol nau mi gat gutpela helt inap oltaim oltaim!”