Ol “Tripman” Long Graun Bilong Satan
Ol “Tripman” Long Graun Bilong Satan
“Ol dispela manmeri i holimpas bilip . . . na ol i tokaut olsem ol i man em ol arapela i no save long ol na ol i stap olsem tripman long ples ol i sindaun long en.”—HIB. 11:13.
1. Jisas i tok wanem long ol Kristen tru na dispela graun?
JISAS i tok long ol disaipel bilong em olsem: “Ol i stap namel long ol manmeri.” Tasol em i tok moa: “Ol i no bilong dispela graun, olsem mi tu mi no bilong dispela graun.” (Jon 17:11, 14) Tok bilong Jisas i kamapim klia tingting ol Kristen i mas i gat long pasin bilong dispela graun bikos Satan em i god “bilong dispela graun.” (2 Kor. 4:4) Maski ol Kristen i stap long dispela graun, ol i no bilong dispela graun. Olsem na Baibel i tok, ol Kristen “i stap olsem ol man bilong narapela ples.” Ol i stap olsem ol “tripman” long dispela graun.—1 Pita 2:11.
Ol i Stap Olsem Ol “Tripman”
2, 3. Bilong wanem yumi inap tok olsem Enok, Noa, Abraham na Sara i stap olsem ol “man em ol arapela i no save long ol na ol i stap olsem tripman”?
2 Long olgeta taim ol gutpela wokboi bilong Jehova i save stap narapela kain long ol man bilong dispela graun. Yumi ken tingim Enok na Noa. Baibel i tok, ol “i bin i stap pren tru bilong God.” (Stt. 5:22-24; 6:9) Ol i strongim bel na tokaut long strafe bilong Jehova bai painim ol manmeri nogut long graun bilong Satan. (Ritim 2 Pita 2:5; Jut 14, 15.) Ol i bin bihainim stretpela pasin maski ol i stap namel long ol man i mekim pasin nogut. Long dispela as, Baibel i tok long Enok olsem ‘God i amamas long em’ na Baibel i tok tu long Noa olsem “wokabaut bilong en i stret long ai bilong God.”—Hib. 11:5; Stt. 6:9.
3 Yumi inap kisim skul tu long pasin bilong Abraham na Sara. Ol i bihainim tok bilong God taim em i tokim ol long lusim gutpela sindaun bilong ol long taun Ur long hap bilong Kaldia na stap olsem ol tripman long narapela hap. (Stt. 11:27, 28; 12:1) Aposel Pol i tok: “Abraham i bilip, olsem na taim God i bin singautim em, em i bihainim tok na em i go long wanpela ples God i promis long givim em. Na em i lusim ples bilong en na i go maski em i no save long wanem hap em bai go long en. Em i bilip na em i go sindaun long graun bilong promis olsem wanpela man bilong narapela ples i go stap long narapela kantri. Em i stap long haus sel wantaim Aisak na Jekop. Tripela wantaim ol i man God i bin givim wankain promis long ol.” (Hib. 11:8, 9) Na tu, Pol i tok olsem long ol dispela wokman bilong Jehova: “Ol dispela manmeri i holimpas bilip bilong ol i go inap long ol i dai. Taim ol i stap laip ol i no lukim truim bilong ol tok promis God i bin mekim long ol. Tasol ol i luksave olsem truim bilong ol dispela tok promis bai kamap bihain na ol i amamas long ol. Na ol i tokaut olsem ol i man em ol arapela i no save long ol na ol i stap olsem tripman long ples ol i sindaun long en.”—Hib. 11:13.
Wanpela Tok Lukaut Long Ol Israel
4. Jehova i givim wanem tok lukaut long lain Israel paslain long em i givim graun long ol?
4 Abraham i bin i gat planti lain tumbuna. Na God i mekim ol i kamap olsem wanpela lain, em lain Israel, na em i givim graun na ol lo ol i mas bihainim. (Stt. 48:4; Lo 6:1) Ol Israel i mas tingim olsem dispela graun i bilong Jehova na i no bilong ol. (Wkp. 25:23) Maski ol i mekim wok long dispela graun, ol i mas bihainim ol lo bilong Jehova. Na tu, ol lain Israel i mas tingim olsem ol i “no inap kisim laip long kaikai tasol,” na olgeta gutpela samting ol i gat i kam long Jehova. (Lo 8:1-3) Em as na paslain long Jehova i givim graun long ol, em i tok lukaut olsem: “God, Bikpela bilong yumi, i bin promis long ol tumbuna bilong yumi, Abraham na Aisak na Jekop, long em bai i givim yupela wanpela kantri i gat ol gutpela bikpela taun, yupela yet i no bin wokim. Na ol planti gutpela gutpela samting bai i pulap long ol haus bilong yupela, em ol samting yupela yet i no bin putim insait. Na bai i gat sampela hul wara i stap, yupela i no bin wokim. Na bai i gat ol gaden wain na gaden oliv i stap, yupela i no bin planim. . . . Na taim yupela i kaikai olgeta kain kaikai yupela i laikim na yupela i pulap orait yupela lukaut gut bai yupela i no lusim tingting long Bikpela.”—Lo 6:10-12.
5. Bilong wanem Jehova i no orait moa long lain Israel? Em i makim wanem nupela lain?
5 Tasol lain Israel i sakim dispela tok lukaut. Taim ol i go insait long Graun Bilong Promis na kirap sindaun long ol gutpela haus na ol i gat planti kaikai na wain, ol i lusim tingting long Jehova. Long taim bilong Nehemia, sampela lain Levi i sem taim ol i toktok long ol samting i bin kamap, olsem yumi lukim long Nehemia 9:25-27. (Ritim.) Ol i tok ol manmeri “i kaikai planti gutpela kaikai na i kamap patpela na ol i amamas tru.” Lain Israel i bikhet long God, na ol i kilim i dai ol profet em i salim i go bilong givim tok lukaut long ol. Olsem na Jehova i larim ol birua bilong ol i bosim ol. (Hos. 13:6-9) Bihain, taim Rom i bosim Israel, lain Israel i kilim i dai Mesaia em God i tok promis long en! Olsem na Jehova i no orait moa long ol i stap lain bilong em. Na em i makim wanpela nupela lain, em “lain Israel bilong God.”—Gal. 6:16; Mat. 21:43; Apo. 7:51, 52.
Ol “i No Insait Long Ol Samting Bilong Dispela Graun”
6, 7. (a) Bai yu stori olsem wanem long tok Jisas i mekim long ol disaipel bilong em na dispela graun? (b) Olsem Pita i tok, bilong wanem ol Kristen i mas wok yet long soim olsem ol i no insait long ol samting bilong dispela graun?
6 Long kirap bilong dispela stadi, yumi kisim save olsem Jisas, Het bilong kongrigesen Kristen, i tok ol disaipel bilong em i no ken insait long ol samting bilong dispela graun bilong Satan. Paslain long Jisas i dai, em i tokim ol disaipel: “Sapos yupela i insait long ol samting bilong dispela graun, orait ol manmeri bai laikim yupela, long wanem, yupela i bilong ol. Tasol mi bin makim yupela namel long ol manmeri bilong graun, na yupela i no insait long ol samting bilong dispela graun, olsem na ol i heitim yupela.”—Jon 15:19.
7 Bihain, i gat ol Kristen i stap long planti narapela hap em Rom i bosim. Ol Kristen i mas wok yet bilong kamapim olsem ol i no insait long ol samting bilong dispela graun. Ol i mas sakim wokabaut na pasin bilong ol man em ol i stap namel long ol. Maski ol i stap long wanem wanem hap, ol i mas stap narapela kain. Inap olsem 30 yia bihain long Jisas i dai, aposel Pita i raitim pas i go long ol Kristen bilong pastaim na i tok: “Ol pren tru, yupela i stap olsem ol man bilong narapela ples na ol tripman, mi tokim yupela long wok yet long sakim ol laik bilong bel, em ol dispela laik i save pait long yupela. Mekim yet ol gutpela pasin namel long ol manmeri bilong graun.”—1 Pita 1:1; 2:11, 12.
8. Wanpela saveman i tok wanem bilong soim olsem ol Kristen bilong pastaim i no insait long ol samting bilong dispela graun?
8 Ol Kristen i bin stap olsem “ol man bilong narapela ples na ol tripman” long taim Rom i bosim planti hap. Wanpela saveman i tok, planti taim ol man i bin mekim nogut tru long ol Kristen. Na ol i sutim tok olsem ol Kristen i no bilip long God, long wanem, ol i no insait long ol bikpela bung bilong lotu giaman. Ol man i kolim ol olsem “ol man bilong heitim tru ol manmeri” bikos ol i no bung wantaim ol manmeri na insait long ol amamas na ol bikpela bung we i pulap long ol pasin bilong lotu giaman na pasin pamuk.
No Ken Givim Bel Olgeta Long Ol Samting Bilong Graun
9. Olsem wanem yumi kamapim olsem yumi no “man bilong heitim tru ol manmeri”?
9 Olsem ol Kristen bilong pastaim, yumi tu i no insait long ol samting bilong “dispela taim nogut bilong nau.” (Gal. 1:4) Olsem na planti man i no kliagut long i stap na wokabaut bilong yumi. Sampela man i heitim yumi. Tasol yumi no “man bilong heitim tru ol manmeri” olsem sampela man i ting. Yumi kamapim olsem yumi laikim tru ol man taim yumi go long haus bilong ol na tokim ol long gutnius bilong Kingdom bilong God. (Mat. 22:39; 24:14) Yumi save autim tok long Kingdom bilong Jehova, long wanem, yumi bilip olsem klostu nau em bai pinisim ol gavman bilong graun. Dispela Kingdom, em Krais i King bilong en, bai kamapim nupela taim i gat stretpela pasin long en.—Dan. 2:44; 2 Pita 3:13.
10, 11. (a) Long wanem rot yumi save mekim wok long ol samting bilong graun? (b) Long wanem ol rot ol Kristen i no givim bel olgeta long mekim wok long ol samting bilong graun?
10 Yumi save olsem nau i no taim bilong kisim gutpela sindaun, long wanem, klostu nau graun bilong Satan bai pinis. Aposel Pol i tok: “Taim i sot pinis.” Em i tok olsem ol man i kisim ol samting i “mas i stap olsem ol man i no gat ol samting. Na ol man i mekim wok long samting bilong graun, ol i mas i stap olsem ol man i no givim bel olgeta long dispela samting. Long wanem, ol samting i kamap long dispela graun i wok long senis.” (1 Kor. 7:29-31) Long wanem rot yumi save mekim wok long ol samting bilong graun long nau? Yumi mekim olsem long rot bilong yusim nupela teknoloji na ol nupela rot bilong salim ol tok i go i kam. Dispela i helpim yumi long skulim ol man long tok bilong Baibel long planti kantri na yumi mekim olsem long planti tokples. Na tu, yumi mas wok na kisim mani bilong lukautim yumi yet. Na yumi baim ol samting yumi nidim long i stap bilong yumi long wan wan de. Tasol yumi no givim bel olgeta long ol samting bilong dispela graun. Dispela i makim olsem mani, ol samting yumi gat, na wok yumi holim, i no stap nambawan samting long laip bilong yumi.—Ritim 1 Timoti 6:9, 10.
11 Narapela rot we ol Kristen i no givim bel olgeta long mekim wok long ol samting bilong graun, em taim ol i no tingting tumas long kisim bikpela skul. Planti man i ting olsem man i mas go long yunivesiti, kisim gutpela wok, na kisim planti mani. Tasol olsem ol tripman, yumi no gat wankain tingting olsem ol. Yumi no save wok strong long kisim “ol gutpela samting” we inap kirapim yumi long hambak na kisim biknem long dispela graun. (Jer. 45:5; Rom 12:16) Yumi tingim tok lukaut bilong Jisas: “Ai bilong yupela i mas op na yupela i mas sakim olgeta kain pasin mangal, long wanem, maski man i gat planti samting, em i no kisim laip long ol dispela samting em i holim.” (Luk 12:15) Olsem na ol yangpela Kristen i mas tingim olsem nambawan bikpela samting em long mekim wok bilong Jehova. Ol i mas kisim skul long mak we ol inap long lukautim ol yet bambai ol inap givim bel olgeta, laip, strong, na tingting olgeta bilong mekim wok bilong Jehova. (Luk 10:27) Sapos ol i mekim olsem, ol i no inap “stap rabis long ai bilong God.”—Luk 12:21; ritim Matyu 6:19-21.
No ken Tingting Planti Long Ol Samting Bilong Skin
12, 13. Olsem wanem pasin bilong bihainim tok bilong Jisas long Matyu 6:31-33 i mekim yumi i stap narapela kain long ol man bilong graun?
12 Ol wokman bilong Jehova i no holim wankain tingting olsem ol man bilong dispela graun long ol samting bilong skin. Jisas i tok: “No ken tingting planti na tok, ‘Bai yumi kaikai wanem samting?’ o, ‘Bai yumi dring wanem samting?’ o, ‘Bai yumi werim wanem samting?’ Em ol samting ol manmeri bilong ol arapela lain i wok strong long kisim. Papa bilong yupela long heven i save olsem yupela i nidim ol dispela samting. Wok yet long painim Kingdom pastaim na stretpela pasin bilong God na em bai givim olgeta dispela samting long yupela.” (Mat. 6:31-33) Planti bratasista bilong yumi i luksave olsem Papa bilong yumi long heven i save givim ol samting ol i nidim.
13 Em i gutpela long ting olsem samting yumi holim em inap long yumi. (1 Tim. 6:6) Ol man bilong graun i no gat kain tingting olsem. Olsem: Taim ol yangpela i marit, planti bilong ol i laik kisim planti samting wantu tasol. Ol i laik kisim wanpela haus, tebol na sia samting, na nupela TV na sterio samting. Tasol ol Kristen i stap olsem ol tripman, olsem na ol i mas bosim laik bilong ol, na baim ol samting long skel tasol. Em gutpela samting olsem planti i no save tromoi nating taim na mani long kisim ol dispela samting bambai ol i gat bikpela haptaim na strong long mekim wok bilong Jehova. Sampela inap mekim wok painia, wok long Betel, mekim wok wasman raun, o mekim wok misineri. Yumi amamas long wok ol brata bilong yumi i mekim long givim bel olgeta long mekim wok bilong Jehova.
14. Yumi lainim wanem samting long tok piksa bilong Jisas?
14 Long wanpela tok piksa bilong Jisas, em i tok olsem “ol wari bilong laip long dispela taim na strong bilong mani long giamanim man” inap mekim na yumi slek long mekim wok bilong God. (Mat. 13:22) Tasol dispela samting i no inap kamap sapos yumi amamas long stap olsem ol tripman long dispela graun. Bai yumi “lukluk long wanpela samting tasol” na putim tingting bilong yumi long mekim wok bilong God, na putim Kingdom bilong em i stap nambawan long laip bilong yumi.—Mat. 6:22.
“Ol Manmeri i Stap Longwe Long God, Ol Bai Pinis”
15. Jon i tok wanem long ol manmeri i stap longwe long God?
15 Wanpela bikpela as na ol Kristen i stap olsem “ol man bilong narapela ples na ol tripman,” em ol i bilip olsem klostu nau ol man i bihainim Satan ol bai bagarap. (1 Pita 2:11; 2 Pita 3:7) Dispela save i stiaim ol samting yumi mekim long laip bilong yumi, olsem ol disisen yumi mekim, ol samting yumi laikim, na ol mak yumi putim long winim. Aposel Jon i tokim ol Kristen long ol i no ken laikim pasin na ol samting bilong dispela graun, long wanem, “ol manmeri i stap longwe long God, ol bai pinis na laik bilong ol tu bai pinis, tasol man i bihainim laik bilong God em bai stap oltaim oltaim.”—1 Jon 2:15-17.
16. Olsem wanem yumi soim olsem yumi insait long “lain” bilong Jehova em ol i stap narapela kain long ol man i bihainim Satan?
16 Jehova i tokim lain Israel olsem sapos ol i bihainim tok bilong em, ‘ol bai kamap lain manmeri bilong em stret.’ (Kis. 19:5) Taim lain Israel i bihainim tok bilong God, pasin bilong ol long lotu na sindaun na wokabaut bilong ol i stap narapela kain long ol arapela lain. Long nau tu, lain bilong Jehova i stap narapela kain long ol man i bihainim Satan. Baibel i tokim yumi long “givim baksait long olgeta samting i no stret wantaim laik bilong God na long givim baksait long olgeta laik nogut bilong dispela graun. Na tu, dispela pasin i skulim yumi long bihainim gutpela tingting na stretpela pasin na pasin bilong givim bel tru long God nau long dispela taim. Na long wankain taim yumi wet long dispela gutpela samting yumi bilip long en. Na yumi wet long nambawan God na long Krais Jisas, Seivia bilong yumi, long kamap ples klia. Em i bin givim em yet bilong kisim bek yumi long olgeta kain pasin bilong kalapim lo, na long mekim wanpela lain pipol i kamap klin na i stap lain pipol bilong em yet. Em wanpela lain pipol i givim bel tru long mekim ol gutpela wok.” (Tai. 2:11-14) Ol Kristen God i bin makim na planti milion “arapela sipsip” husat i sapotim ol, ol i stap olsem “lain” bilong Jehova.—Jon 10:16.
17. Bilong wanem oltaim ol Kristen God i bin makim na ol arapela sipsip bai amamas olsem ol i bin stap olsem ol tripman long dispela graun bilong Satan?
17 Ol Kristen God i bin makim i “wet long dispela gutpela samting,” em long mekim wok king wantaim Krais long heven. (Rev. 5:10) Ol arapela sipsip i wet long kisim laip oltaim long graun. Taim dispela samting i kamap, ol bai i no stap moa olsem ol tripman long dispela graun bilong Satan. Ol bai gat ol naispela haus na planti gutpela kaikai. (Sng. 37:10, 11; Ais. 25:6; 65:21, 22) Ol bai no lusim tingting long Jehova olsem ol Israel i bin mekim. Oltaim ol bai tingim olsem olgeta samting ol i gat, i kam long Jehova, em ‘God i bosim olgeta hap bilong graun.’ (Ais. 54:5) Oltaim ol Kristen God i bin makim na ol arapela sipsip bai amamas olsem ol i bin stap olsem ol tripman long dispela graun bilong Satan.
Bai Yu Bekim Olsem Wanem?
• Long wanem rot ol bilipman bilong bipo i stap olsem ol tripman?
• Ol Kristen bilong pastaim i bihainim wanem pasin long taim bilong ol?
• Olsem wanem ol Kristen tru i no givim bel olgeta long mekim wok long ol samting bilong graun?
• Bilong wanem bai yumi amamas olsem yumi bin stap olsem ol tripman long dispela graun bilong Satan?
[Askim Bilong Stadi]
[Piksa long pes 18]
Ol Kristen bilong pastaim i no insait long ol amamas i gat pait na pasin pamuk
