Em i Stap Gutpela Piksa o Tok Lukaut Long Yu?
Em i Stap Gutpela Piksa o Tok Lukaut Long Yu?
“God bilong Israel . . . i ken skulim yumi long ol pasin em i laik yumi mekim, na bai yumi ken wokabaut long rot em yet i makim.”—AIS. 2:3.
1, 2. Olsem wanem ol stori bilong ol manmeri long Baibel inap helpim yumi?
YU BAI wanbel olsem i gat planti gutpela samting long Baibel em yu inap lainim. Yu inap ritim stori bilong ol bilipman na meri em yu ken bihainim pasin bilong ol. (Hib. 11:32-34) Na tu, yu inap ritim stori bilong ol man na meri em yu no ken bihainim tingting na pasin bilong ol. Pasin bilong ol i stap olsem tok lukaut long yu.
2 Baibel i kamapim stori bilong sampela man em ol i bin stap gutpela piksa na tok lukaut long yumi. Tingim Devit, em i bin stap olsem wasman bilong sipsip na bihain em i kamap strongpela king. Em i bin stap olsem gutpela piksa long pasin bilong laikim tok i tru na long bilip long Jehova. Tasol Devit i bin mekim ol bikpela sin, olsem em i mekim pasin adaltri wantaim Batseba na kilim i dai Uria. Na em i no bin bihainim stretpela tingting na kaunim ol manmeri. Long dispela stadi, bai yumi skelim stori bilong pikinini bilong Devit, em Solomon. Em i bin stap olsem king na em i bin raitim sampela buk bilong Baibel. Pastaim bai yumi skelim 2-pela rot we em i stap olsem gutpela piksa.
“Savetingting Bilong Solomon”
3. Bilong wanem yumi ken tok Solomon i olsem gutpela piksa?
3 Jisas, em Man i Winim Solomon, i bin stori long King Solomon i olsem gutpela piksa long yumi. Jisas i tokim sampela Juda olsem: “Long taim bilong kot, kwin bilong saut bai kirap bek wantaim lain pipol bilong dispela taim na em bai kamapim asua bilong dispela lain, long wanem, em i lusim wanpela ples i stap longwe tru bilong harim savetingting bilong Solomon. Tasol harim! wanpela man i winim Solomon em i stap long hia.” (Mat. 12:42) Solomon i bin gat nem olsem man i gat savetingting, na em i kirapim yumi long kisim savetingting.
4, 5. Olsem wanem Solomon i kisim gutpela savetingting? Yumi inap kisim gutpela savetingting long wanem rot?
4 Taim Solomon i kamap king, God i kamap long em long wanpela driman na askim em long tokaut long samting em i laikim. Solomon i tok em i laikim gutpela savetingting. Em i save olsem i gat planti samting em i mas lain yet long en. (Ritim 1 King 3:5-9.) God i amamas olsem king i askim long savetingting. Olsem na God i givim em “planti gutpela tingting na save,” na em i givim tu “biknem na planti mani samting” long em. (1 Kin. 3:10-14) Jisas i tok Solomon i bin i gat bikpela savetingting, olsem na taim kwin bilong Seba i harim dispela, em i kam longwe tru long bungim Solomon na harim savetingting bilong em.—1 Kin. 10:1, 4-9.
5 Yumi no ken ting olsem yumi inap kisim savetingting long rot bilong mirakel. Solomon i tok Jehova yet i “save givim gutpela tingting na save,” tasol em i tok tu olsem yumi mas wok strong long kisim dispela samting. Em i tok: “Yu mas putim yau gut long olgeta tok i save givim yu gutpela tingting. Na yu mas wok strong long kisim gutpela save.” Solomon i tok tu olsem yumi mas “askim,” na “wok hat long painim” gutpela tingting na save. (Snd. 2:1-6) Dispela i soim olsem yumi inap kisim gutpela savetingting.
6. Olsem wanem yumi inap bihainim gutpela piksa bilong Solomon?
6 I gutpela long yumi askim yumi yet, ‘Mi laikim gutpela savetingting olsem Solomon?’ Hevi bilong mani i mekim na planti man i tingting tasol long mani na wok bilong ol. O hevi bilong mani i stiaim ol disisen ol i mekim long wanem kain ediukesen ol bai kisim na hamas yia ol bai lusim bilong kisim dispela ediukesen. Olsem wanem long yu na famili bilong yu? Ol samting yu makim i soim olsem yu “wok hat long painim” savetingting bilong God, olsem yu wok long painim mani samting? Olsem wanem? I gat wok long yu senisim tingting bilong yu long mani na ediukesen bambai yu inap wok strong long kisim savetingting? Savetingting yu kisim bai helpim yu oltaim oltaim. Solomon i tok: “Pikinini, sapos yu bihainim gutpela tingting bai yu save long olgeta gutpela rot bilong wokabaut. Bai yu save long bihainim ol gutpela na stretpela pasin na long mekim wankain pasin long olgeta man.”—Snd. 2:9.
Bel Isi i Stap Taim Lotu i Tru i Stap Nambawan
7. Wanem samting i mekim na ol i wokim wanpela naispela tempel bilong God?
7 Bihain tasol long Solomon i kamap king, em i laik senisim haus lotu sel em ol i bin yusim kirap long taim bilong Moses. Olsem na em i tokim ol man long wokim wanpela naispela tempel. (1 Kin. 6:1) Yumi kolim olsem tempel bilong Solomon, tasol em i no tingting bilong em yet long wokim dispela tempel bilong kisim biknem, nogat. Devit yet i as bilong dispela tingting. God i bin givim ol plen long Devit bilong wokim tempel na ol samting i stap long en. Na tu, Devit i givim bikpela hap mani bilong sanapim dispela tempel. (2 Sml. 7:2, 12, 13; 1 Sto. 22:14-16) Tasol God i tokim Solomon long sanapim tempel. Na ol i pinisim dispela wok insait long 7 na hap yia.—1 Kin. 6:37, 38; 7:51.
8, 9. (a) Olsem wanem pasin bilong Solomon long i no les long mekim wok i helpim yumi? (b) Wanem samting i kamap taim Solomon i putim lotu i tru i stap nambawan?
8 Solomon i stap gutpela piksa long pasin bilong i no les long mekim wok bilong sanapim tempel na putim lotu i tru i stap nambawan. Taim wok bilong sanapim tempel i pinis na ol i putim Bokis Kontrak i go insait long en, Solomon i beten long ai bilong ol manmeri. Long beten, em i askim Jehova long harim beten bilong ol wokboi bilong em, husat i lukluk i kam long tempel na beten. (1 Kin. 8:6, 29) Ol Israel na ol manmeri bilong ol arapela kantri inap lukluk i kam long tempel na beten. Ol i wokim dispela tempel bilong litimapim nem bilong God.—1 Kin. 8:30, 41-43, 60.
9 Wanem samting i kamap taim Solomon i putim lotu i tru i stap nambawan? Bihain long ol i dediketim tempel, ol manmeri i “amamas tru, long wanem, ol i tingting long olgeta gutpela samting Bikpela i bin mekim long ol Israel, . . . bilong inapim dispela promis em i bin mekim long wokman bilong en, Devit.” (1 Kin. 8:65, 66) Insait long 40 yia Solomon i mekim wok king, ol manmeri i gat planti gutpela samting na ol i stap bel isi. (Ritim 1 King 4:20, 21, 25.) Song 72 i stori long dispela samting na i helpim yumi long kliagut long ol blesing em yumi bai kisim aninit long wok king bilong Man i Winim Solomon, em Jisas Krais.—Sng. 72: 6-8, 16.
Pasin Bilong Solomon i Olsem Tok Lukaut
10. Solomon i mekim wanem bikpela popaia?
10 Bilong wanem yumi ken tok ol samting Solomon i mekim long laip bilong em i olsem tok lukaut long yumi? Ating nambawan samting yumi tingim em ol meri bilong em bilong narapela kantri na ol nambatu lain meri. Baibel i tok: “Taim em i lapun, ol dispela meri bilong en i pulim tingting bilong en i go long ol giaman god. Olsem na Solomon i lusim pasin bilong papa bilong en, Devit, na Solomon i no bihainim tru God.” (1 Kin. 11:1-6) Tru, yumi no laik mekim wankain popaia olsem Solomon. Tasol yu ting dispela samting tasol i stap olsem tok lukaut long yumi? Yumi ken skelim sampela narapela samting long laip bilong Solomon em ating yumi no tingim tumas. Ol dispela samting inap stap tu olsem tok lukaut long yumi.
11. Yumi inap lainim wanem samting long fes marit bilong Solomon?
11 Solomon i mekim wok king inap 40 yia. (2 Sto. 9:30) Orait yumi ken lainim wanem samting long 1 King 14:21? (Ritim.) Olsem ves i kamapim, taim Solomon i dai, pikinini bilong em Rehoboam i kamap king taim em i gat 41 krismas. “Nama bilong kantri Amon” em mama bilong em. Dispela i makim olsem paslain long Solomon i kamap king, em i bin maritim meri bilong narapela kantri em ol i stap birua bilong lain Israel na ol i save lotuim ol god giaman. (Het. 10:6; 2 Sml. 10:6) Yumi no save sapos Nama i bin lotuim yet ol god giaman o em i bin kamap wanpela meri i lotuim Jehova olsem Rahap na Rut. (Rut 1:16; 4:13-17; Mat. 1:5, 6) Olsem na long rot bilong Nama, Solomon i gat ol tambu na ol famili bilong lain Amon, em ol i no lotuim Jehova.
12, 13. Long kirap bilong wok king bilong Solomon, em i mekim wanem bikpela popaia? Ating em inap givim wanem ol eskius?
12 Ol samting Solomon i mekim long laip bilong em i go nogut moa bihain long em i kamap king. Em i “maritim pikinini meri bilong king bilong Isip na long dispela pasin em i mekim kontrak wantaim king bilong Isip, bai tupela kantri i ken i stap gut na i no gat pait. Solomon i bringim meri bilong en i kam long Jerusalem long Taun Bilong Devit.” (1 Kin. 3:1) Yu ting dispela meri Isip i kamap meri i lotuim Jehova olsem Rut? Baibel i no tok olsem, nogat, Baibel i tok, Solomon i wokim wanpela haus bilong dispela meri wantaim ol wokmeri bilong em bilong Isip ausait long Taun Bilong Devit. Bilong wanem? Long wanem, i tambu tru long ol man i save lotuim ol god giaman long stap klostu long Bokis Kontrak.—2 Sto. 8:11.
13 Ating Solomon i ting sapos em i maritim pikinini bilong king bilong Isip, dispela em i gutpela samting na inap strongim pasin pren i stap namel long Israel na Isip. Tasol dispela i no stret. Paslain tru long dispela, God i bin tokim lain bilong em long ol i no ken maritim ol lain bilong Kenan. Na tu, em i bin kolim lista bilong ol kantri long graun Kenan em ol i mas sakim. (Kis. 34:11-16) Olsem wanem? Ating Solomon i bin ting olsem em inap maritim wanpela meri Isip bikos kantri Isip i no insait long dispela lista? Maski sapos em i yusim dispela olsem wanpela eskius, yu ting God bai orait long dispela? Solomon i no tingim tok Jehova i bin mekim, olsem hevi bai painim wanpela Israel husat i maritim ol lain bilong narapela kantri, long wanem, ol inap pulim em long lotuim ol god giaman.—Ritim Lo 7:1-4.
14. Olsem wanem yumi inap larim pasin bilong Solomon i stap olsem tok lukaut long yumi?
14 Olsem wanem? Bai yumi larim pasin bilong Solomon i stap olsem tok lukaut long yumi? Wanpela sista inap givim eskius na sakim lo bilong God na i no “maritim man i bihainim Bikpela.” (1 Kor. 7:39) O yumi inap givim sampela eskius long ol narapela samting. Olsem: Wanpela inap givim eskius long insait long wanpela spot tim bilong skul maski i no gat wok long em i mekim olsem. O ating wanpela inap givim eskius na em i no ken baim takis. O wanpela i giaman bikos em i sem long tokaut long samting tru em i bin mekim. Tasol yumi mas tingim; hevi inap painim yumi taim yumi givim ol eskius na sakim tok bilong God, wankain olsem Solomon.
15. Olsem wanem Jehova i marimari long Solomon? Yumi mas tingim wanem samting?
15 Maski Solomon i bin maritim pikinini meri bilong king bilong narapela kantri, God i bin givim em savetingting taim em i askim God long en, na tu, God i bin givim em planti mani kago. (1 Kin. 3:10-13) Solomon i bin sakim ol lo bilong God, tasol Jehova i marimari long em. Jehova i no rausim wok king bilong em wantu tasol o givim strafe long em. God i save olsem yumi no gutpela olgeta, na em i wokim yumi long das tasol. (Sng. 103:10, 13, 14) Tasol yumi mas tingim: Ol samting yumi mekim inap mekim sampela samting long yumi long nau o long bihain.
Planti Meri Tumas!
16. Solomon i sakim wanem tok bilong God?
16 Long Song Bilong Solomon, King Solomon i litimapim nem bilong wanpela yangpela meri. Em i tok dispela meri i luk nais tumas winim 60 kwin na 80 namba 2 lain meri. (Sol. 6:1, 8-10) Ating dispela em namba bilong ol meri na ol namba 2 lain meri bilong em long dispela taim. Maski sapos sampela bilong ol dispela meri o olgeta bilong ol i lotuim Jehova, Solomon i sakim lo bilong God. Long rot bilong Moses, God i tok olsem king bilong Israel i no ken “maritim planti meri, long wanem, ol bai i mekim em i givim baksait long Bikpela.” (Lo 17:17) Tasol gen, Jehova i no rausim wok king bilong Solomon. God i blesim yet Solomon na yusim em long raitim Buk Song Bilong Solomon long Baibel.
17. Yumi mas tingim wanem samting?
17 Olsem wanem? Dispela i makim olsem Solomon inap sakim tok bilong God na em i no kisim strafe long dispela? O yumi tu inap sakim tok bilong God na yumi no kisim strafe? Nogat, i no olsem. Dispela i soim olsem God i save mekim pasin isi long man inap sampela haptaim. Tingim: Man inap sakim tok bilong God na em i no kisim hevi long dispela samting wantu tasol. Tasol dispela i no makim olsem em bai i no karim hevi long pasin em i mekim. Tingim tok bilong Solomon: “Ol man i no kisim bekim kwiktaim long rong bilong ol, olsem na dispela i kirapim tingting bilong ol manmeri na ol i strong long mekim pasin nogut.” Na em i tok moa: ‘Mi save tu olsem, “Man i aninit long God, bai i stap gut.” ’—Sav. 8:11, 12.
18. Olsem wanem pasin bilong Solomon i kamapim klia olsem tok bilong Galesia 6:7 i tru?
18 Sori tru, Solomon i no luksave long dispela samting. Em i bin mekim ol gutpela wok na kisim planti blesing i kam long Jehova. Tasol bihain, isi isi em i kirap long mekim ol popaia. Na em i kisim pasin bilong sakim ol lo bilong Jehova. Aposel Pol i tok: “No ken giamanim yu yet: Man i no inap trikim God. Samting man i planim, dispela samting tasol em bai kamautim.” (Gal. 6:7) Bihain, Solomon i karim hevi long ol samting em i mekim taim em i sakim tok bilong God. Baibel i tok: ‘Solomon i save laikim planti meri bilong ol arapela kantri. Em i bin maritim pikinini meri bilong king bilong Isip, na ol meri bilong kantri Moap na Amon na Idom na bilong taun Saidon na bilong lain Hit.’ (1 Kin. 11:1) Ating planti bilong ol dispela meri i no bin lusim pasin bilong ol long lotuim ol god giaman na dispela i bin pulim Solomon. Em “i mekim pasin nogut long ai bilong Bikpela,” olsem na God bilong pasin isi, i no orait moa long em.—Ritim 1 King 11:4-8.
Kisim Skul Long Pasin Bilong Em
19. Baibel i stori long wanem ol manmeri i stap olsem gutpela piksa?
19 Jehova i kirapim Pol long raitim dispela tok: “Olgeta tok ol i bin raitim long bipo, ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:4) Stori bilong ol man na meri husat i gat strongpela bilip, i insait tu long ol tok “ol i bin raitim bilong skulim yumi.” Pol i stori long ol dispela wokman bilong Jehova olsem: “Bai mi mekim wanem tok moa? Taim bai sot sapos mi stori long Gideon, Barak, Samson, Jepta, Devit na Samuel, na ol arapela profet. Ol dispela man i bilip na ol i daunim ol king, ol i bihainim stretpela pasin, ol i kisim ol tok promis i kam long God, . . . taim ol i no gat strong ol i kisim strong.” (Hib. 11:32-34) Yumi inap kisim skul long gutpela piksa bilong ol dispela kain man em Baibel i stori long ol na yumi mas bihainim pasin bilong ol.
20, 21. I gat wanem as na yumi laik stadi gut long pasin bilong ol man em Baibel i stori long ol?
20 Tasol Baibel i stori long sampela man em pasin bilong ol i stap olsem tok lukaut long yumi. Sampela bilong ol em ol man na meri em pastaim ol i bin mekim wok bilong Jehova na em i orait long ol. Taim yumi ritim Baibel, yumi inap kisim skul long popaia ol i bin mekim na bai yumi no ken mekim wankain popaia. Yumi kisim save olsem isi isi sampela i kirap kisim tingting i no stret na ol i mekim ol disisen em bihain ol i karim hevi bilong en. Bilong kisim skul long ol samting ol i mekim, yumi ken askim yumi yet olsem: Wanem samting i kirapim dispela man long kisim tingting i no stret? Kain samting olsem inap kamap long mi? Olsem wanem pasin bilong dispela man inap helpim mi na mi no mekim wankain popaia?
21 I gat gutpela as na yumi mas stadi gut long pasin bilong ol man em Baibel i stori long ol. Pol i tok: “Ol dispela samting i painim ol i stap olsem piksa ol man i ken lukim. Na ol man i bin raitim ol dispela stori bilong givim tok lukaut long yumi husat i stap nau long pinis bilong dispela taim.”—1 Kor. 10:11.
Yu Bin Lainim Wanem Samting?
• Bilong wanem yumi ken tok Baibel i gat stori bilong ol man i stap olsem gutpela piksa na tok lukaut?
• Bilong wanem isi isi Solomon i mekim ol popaia?
• Yu inap kisim wanem skul long ol popaia bilong Solomon?
[Askim Bilong Stadi]
[Piksa long pes 9]
Solomon i mekim wok long savetingting bilong God
[Ol Piksa long pes 12]
Olsem wanem ol popaia bilong Solomon inap helpim yu long abrusim hevi?
