Mi Mekim Sampela Senis na Kisim Gutpela Samting

Stori bilong James A. Thompson

Mi bon long hap saut bilong Amerika long 1928, na long dispela taim i gat tambu long ol waitskin na blakskin i bung wantaim. Man i brukim dispela tambu bai kalabus o kisim bikpela strafe.

LONG dispela taim long sampela hap bilong Amerika, ol waitskin na blakskin Witnes Bilong Jehova i mas i gat ol kongrigesen, sekit na distrik bilong ol yet. Long 1937, papa bilong mi i kamap kampani sevan (nau ol i kolim kodineta bilong lain elda) bilong kongrigesen bilong ol blakskin long Chattanooga, Tennessee. Henry Nichols em i kampani sevan bilong kongrigesen bilong ol waitskin.

Mi amamas long tingim i stap bilong mi taim mi yangpela yet. Long nait, mi save sindaun ausait long haus wantaim papa na Brata Nichols na harim ol i stori. Tru, mi no klia tumas long sampela tok bilong ol, tasol mi amamas long sindaun klostu long papa taim ol i toktok long gutpela rot bilong autim tok long dispela taim i gat tambu long ol waitskin na blakskin i bung wantaim.

Paslain long dispela, long 1930, bikpela hevi i kamap. Mama i gat 20 krismas tasol na em i dai. Nau papa tasol i mas lukautim mi na susa bilong mi Doris, em i gat 4-pela krismas na mi gat 2-pela krismas. Maski papa i no baptais longpela taim, em i kamap strong long tok i tru.

Ol i Stap Gutpela Piksa Long Mi

Long 1933, papa i bungim wanpela gutpela sista, em Lillie Mae Gwendolyn Thomas, na bihain liklik ol i marit. Tupela i stap olsem gutpela piksa long mi na Doris long i stap gut long mekim wok bilong Jehova.

Long 1938, ol i askim ol kongrigesen long sapotim wanpela tok olsem hetkota bilong yumi long Brooklyn, New York, i mas makim  ol elda bilong ol kongrigesen, na kongrigesen yet i no ken vot na makim ol. Sampela long Chattanooga i no orait long dispela, tasol papa i wanbel long dispela senis bai kamap insait long oganaisesen. Pasin bilong papa long stap gut long oganaisesen bilong Jehova, na mama i givim bel long wok gut wantaim papa, i bin helpim mi i kam inap nau.

Baptais na Autim Tok Fultaim

Long 1940, sampela long kongrigesen bilong mipela i haiarim wanpela bas na ol i go long kibung long Detroit, Michigan. Sampela long bas bilong mipela i kisim baptais long dispela kibung. Sampela i laik save wai na mi no kisim baptais, long wanem, mi bin autim tok kirap long taim mi gat 5-pela krismas, na mi insait tru long dispela wok.

Taim ol i askim mi, mi tok: “Mi no save gut long olgeta samting bilong baptais.” Papa i harim dispela na em i kirap nogut. Kirap long dispela taim em i wok strong long helpim mi long kliagut long baptais i makim wanem na bilong wanem em i bikpela samting. Orait, 4-pela mun bihain, long wanpela de i kol tru, long Oktoba 1, 1940, mi kisim baptais long liklik raunwara ausait long Chattanooga.

Taim mi gat 14 krismas, mi kirap mekim wok painia long taim bilong skul holide. Mi autim tok long ol liklik taun long Tennessee na long provins klostu, em Georgia. Mi save kirap long bikmoning, redim liklik lans, na kisim tren o bas long 6 klok moning na go long teritori. Mi save kam bek nabaut long 6 klok apinun. Mi save pinisim lans bilong mi paslain long belo. Mi gat mani, tasol mi blakskin, olsem na mi no inap go insait long wanpela stua bilong baim kaikai. Wanpela taim mi go insait long stua bilong baim aiskrim, na ol i tokim mi long lusim stua. Wanpela waitmeri i mekim gutpela pasin na i kisim wanpela aiskrim na kam givim mi.

Taim mi go long haiskul, wanpela lain long hap bilong Saut i strong long pinisim tambu i stap long ol blakskin. Ol oganaisesen olsem NAACP (National Association for the Advancement of Colored People) i wok long kirapim ol sumatin long insait long dispela samting. Sampela skul bilong ol blakskin, na skul bilong mi tu, ol i laik bai olgeta sumatin i kamap memba bilong dispela lain. Ol i subim mi long “helpim ol lain bilong mipela.” Tasol mi no laik; mi tokim ol, God i no save laikim sampela lain tasol na sampela lain nogat​—⁠em i laikim olgeta lain. Olsem na mi wetim God i stretim dispela hevi.​—⁠Jon 17:14; Apo. 10:​34, 35.

Taim mi pinisim haiskul, mi laik go stap long New York City. Mi kamap long Philadelphia, Pennsylvania, na mi go lukim sampela pren mi bin bungim bipo long kibung. Kongrigesen long dispela hap em fes kongrigesen mi go long en we i gat ol waitskin na blakskin i bung wantaim. Wasman raun i kam lukim kongrigesen na em i tokim mi olsem ol i makim mi long mekim wanpela tok long neks miting. Dispela i mekim na mi wokim tingting long stap long dispela hap.

Long Philadelphia mi bungim wanpela yangpela sista, em Geraldine White​—⁠bihain mi kolim em Gerri. Em i save gut long Baibel na pasin bilong autim tok long ol haus. Na bikpela samting tru long mi, em i gat wankain tingting olsem mi, long kamap painia. Mitupela i marit long Epril 23, 1949.

Mipela Go Long Skul Gileat

Kirap long taim mitupela i marit, mipela i gat tingting long go long Skul Gileat na kamap  misineri long narapela kantri. Mipela i amamas long stretim ol samting bambai mipela inap i go long Gileat. I no longtaim na ol i tokim mipela long go wok painia long Lawnside, New Jersey, na bihain mipela i go long Chester, Pennsylvania; na bihain long en, Atlantic City, New Jersey. Long Atlantic City, mipela i winim mak long aplai long Skul Gileat bikos mipela i marit inap 2-pela yia pinis. Tasol ol i no singautim mipela kwik. Bilong wanem?

Long kirap bilong 1950, gavman i kisim planti yangpela man long joinim ami na mekim pait long Korea. Long Philadelphia, lain bilong makim husat bai go insait long ami ol i gat tingting nogut long ol Witnes Bilong Jehova, long wanem, ol i no save insait long ol pait. Bihain wanpela jas i toksave long mi olsem ol polis i bin skelim i stap bilong mi na ol i lukim olsem, tru tumas mi no save insait long ol pait. Olsem na long Janueri 11, 1952, gavman i givim tok orait long mi long no ken insait long pait, long wanem, mi man bilong autim tok bilong lotu.

Long Ogas bilong dispela yia yet, mi na Gerri i kisim pas i singautim mipela i go long namba 20 klas bilong Gileat, em bai kirap long Septemba. Long Gileat, mipela i ting ol bai makim mipela long mekim wok misineri long narapela kantri. Susa bilong mi Doris i bin go long namba 13 klas bilong Gileat na nau em i mekim wok misineri long Brasil. Mi na Gerri i kirap nogut long kisim asainmen long mekim wok sekit na visitim ol kongrigesen bilong ol blakskin long provins Alabama long hap saut! Mipela i bel hevi liklik, long wanem, mipela i gat bikpela laik long mekim wok misineri long narapela kantri.

Fes kongrigesen mipela i visitim, em Huntsville. Taim mipela i kamap, mipela i go long haus bilong wanpela sista bilong stap wantaim em. Taim mipela i kisim ol kago i go insait long haus, mipela harim sista i toktok long fon olsem, “Ol pikinini i kam pinis.” Mitupela i gat 24 krismas, tasol mipela i luk yangpela tru. Ol i save kolim mipela olsem “Ol Pikinini” taim mipela i mekim wok long dispela sekit.

Planti man i save kolim dispela hap bilong Saut olsem Ples Bilong Baibel bikos klostu olgeta man i rispektim Baibel. Olsem na planti taim mipela i kirapim tok long man bilong haus, mipela i save stori long dispela 3-pela poin:

(1) Ol hevi i kamap long graun.

(2) Rot Baibel i kamapim bilong stretim.

(3) Ol samting Baibel i tok yumi mas mekim.

Orait nau mipela i givim ol wanpela buk bilong stadi long Baibel we i stret wantaim tok mipela i kamapim. Dispela pasin i wok gut, olsem na ol i makim mi long mekim wanpela soim long Kibung “New World Society” long New York, long 1953​—⁠long pasin bilong kamapim dispela 3-pela poin.

Long 1953, ol i makim mi long mekim wok wasman distrik long ol sekit bilong ol blakskin  long hap Saut. Teritori bilong mipela em hap bilong Virginia i go inap long Alabama na Tennessee long hap wes. Ol wasman raun i mas redi long senisim sindaun bilong ol. Planti taim mipela i stap long ol haus i no gat paip wara na mipela i mas waswas long bikpela dis baksait long kitsen stov. Tasol gutpela tru dispela hap bilong haus i no kol!

Waitskin na Blakskin i No Bung Wantaim

Bilong mekim wok wasman raun long hap Saut, mipela i mas bihainim savetingting long mekim ol samting. Ol blakskin i no inap go wasim klos bilong ol long ples i gat ol masin bilong wasim klos. Olsem na Gerri i save go na tok, ol dispela klos i bilong “Misis Thompson.” Planti i ting em i wanpela haus gel, na “Misis Thompson” em mama bilong haus. Taim ol wasman distrik i laik soim piksa wokabaut The New World Society in Action, mi save ring long stua na askim long yusim bikpela laplap bilong soim piksa, na tok em bilong “Mista Thompson.” Na bihain mi go na kisim. Mipela i mekim gutpela tok na pasin long ol man, olsem na mipela inap mekim wok autim tok na i no gat planti hevi i kamap.

Tasol long hap Saut i gat narapela hevi, ol i save tingting nogut long ol lain bilong hap Not. Wanpela niuspepa bilong dispela hap i tok, James A. Thompson, Jr., bilong Sosaiti Wastaua Bilong New York bai mekim tok long wanpela kibung. Sampela man i ting mi bilong New York, na ol i pinisim kontrak bilong mipela long mekim kibung long wanpela skul. Olsem na mi go long lain bilong bosim skul na tokim ol, mi bin skul long Chattanooga, olsem na ol i tok orait long mipela i ken mekim kibung sekit.

Long 1955 samting, pasin birua namel long ol waitskin na blakskin i wok long kamap strong, na sampela taim pait i kirap. Long sampela kibung distrik long 1954, sampela Witnes i bel nogut taim ol i no makim sampela blakskin long mekim tok long program. Mipela i strongim ol blakskin brata long stap isi na wet. Long yia antap, ol i makim mi bilong mekim wanpela tok. Bihain long en, planti blakskin brata long hap Saut i insait long program.

Bihain, pait namel long ol waitskin na blakskin long hap Saut i wok long pinis, na isi isi ol kongrigesen i gat ol blakskin na waitskin, ol i bung wantaim. Olsem na nau i gat wok long makim ol pablisa bilong go long ol narapela kongrigesen, na stretim gen teritori bilong ol kongrigesen na wok bilong ol brata i lukautim kongrigesen. Sampela blakskin na waitskin tu i no orait long dispela nupela senis. Tasol planti i bihainim pasin bilong Papa bilong yumi long heven​—⁠ol i no tingim wanpela lain i winim narapela lain. Planti i stap gutpela pren maski ol i blakskin o waitskin. Famili bilong mi i bin lukim dispela pasin namel long 1930 na 1940 samting taim mi wok long go bikpela.

Nupela Asainmen

Long Janueri 1969, mi na Gerri i kisim pas i singautim mipela i go long Gaiana, long Saut Amerika, na mipela i amamas long go. Pastaim mipela i go long Brooklyn, New York, we mi lain long lukautim wok bilong autim tok long Gaiana. Mipela i kamap long dispela hap long Julai 1969. Mipela i mekim wok wasman raun inap 16 yia pinis, na nau bikpela senis i kamap long mipela, olsem mipela i mas sindaun long wanpela hap tasol na mekim wok. Klostu olgeta  de Gerri i mekim wok autim tok olsem misineri, na mi wok long brens ofis.

Mi mas lukautim planti wok, olsem wok bilong katim gras long banis, stretim ol magasin na buk samting bilong salim i go long 28 kongrigesen, na salim ol pas i go long hetkota long Brooklyn. Mi wok inap 14 o 15 aua long olgeta de. Mitupela i wok strong tru, tasol mipela i amamas long wok bilong mipela. Taim mipela i kamap long dispela hap, i gat 950 pablisa tasol long Gaiana, tasol nau ol i winim 2,500.

Mipela amamas olsem Gaiana i no hat tumas o kol tumas, na i gat planti gutpela prut na gaden kaikai. Tasol amamas tru bilong mipela em ol dispela manmeri i gat pasin daun na ol i laik kisim save long tok Baibel i mekim long Kingdom Bilong God. Planti taim Gerri i save mekim 20 Baibel stadi insait long wanpela wik, na planti we mipela i bin stadi long ol, ol i kamap strong na kisim baptais. Bihain sampela i kamap painia, elda bilong kongrigesen, na sampela i bin go long Gileat na kamap misineri.

Sampela Hevi na Sik

Long 1983, papamama bilong mi long Amerika i nidim wanpela long helpim ol. Mi, Gerri, na Doris i bung na toktok long dispela. Doris i bin mekim wok misineri long Brasil inap 35 yia pinis, na em i tok em bai go bek na lukautim ol. Em i tok, nogut tupela misineri i lusim wok bilong ol​—⁠wanpela tasol inap mekim wok bilong lukautim papamama. Bihain long taim papamama i dai, Doris i stap long Chattanooga na em i mekim wok painia salim.

Long 1995, ol dokta i tok mi gat sik kensa na mipela mas go bek long Amerika. Mipela i sindaun long Goldsboro, North Carolina, long wanem, dispela hap i stap namel long hap bilong famili bilong mi long Tennessee na famili bilong Gerri long Pennsylvania. Sik kensa bilong mi i go daun liklik na mipela i mekim wok long wanpela kongrigesen long Goldsboro olsem ol painia salim i gat sik.

Mi bin mekim wok autim tok fultaim inap 65 yia samting. Mi tenkyu tru long Jehova i bin blesim mi na Gerri, long wanem, mipela i mekim sampela senis long laip bilong mipela bilong mekim wok bilong Em. Tok Devit i mekim long Jehova i tru: “Sapos man i no lusim yu, orait yu no save lusim em.”​—⁠2 Sml. 22:⁠26.

[Ol Piksa long pes 3]

Papa na Brata Nichols i stap olsem gutpela piksa long mi

[Ol Piksa long pes 4]

Mi na Gerri i redi long go long Skul Gileat, 1952

[Ol Piksa long pes 5]

Bihain long Skul Gileat, mipela i mekim wok wasman raun long hap Saut

[Piksa long pes 6]

Ol wasman raun na meri bilong ol i redi long kibung distrik we ol waitskin na blakskin i bung wantaim, 1966

[Piksa long pes 7]

Mipela amamas long mekim wok misineri long Gaiana