Yu Tingim Yet?

Olsem wanem? Yu bin ritim gut ol tok bilong ol nupela Wastaua? Orait, traim bekim ol dispela askim i stap daunbilo:

• Olivétan em husat, na bilong wanem yumi laik save long wok bilong em?

Dispela em narapela nem bilong wanpela man bilong Frans, em Pierre Robert. Long taim bilong Rifomesen long yia 1500 samting, em i tanim tok bilong Baibel long tokples Frans. Em i senisim tok “bisop” na raitim tok “wasman,” na tok “sios” em i raitim olsem “kongrigesen.” Na long sampela hap bilong Baibel em i putim nem “Jehova.”​—⁠9/1, pes 18-20..

• Olsem wanem God i stap olsem helpim bilong ol Livai?

Olgeta wan wan lain bilong Israel i kisim hap graun, tasol Jehova i stap olsem helpim bilong lain Livai. (Nam. 18:20) Ol i no kisim graun, tasol ol i holim gutpela wok, em wok bilong God. Jehova i lukautim ol long ol samting ol i nidim. Long nau, ol lain husat i helpim wok bilong Kingdom i ken bilip olsem Jehova bai lukautim ol long ol samting ol i nidim.​—⁠9/15, pages 7-8, 13.

• Olsem wanem yumi save long taim stret ol Babilon i bagarapim Jerusalem bilong bipo?

Ol saveman i kamapim kain kain stori long ol king bilong Babilon na wok bos bilong ol. Tasol sampela saveman i wanbel olsem Sairus Namba 2 i bin daunim Babilon long 539 B.C.E., em wanpela bikpela yia. Ol Juda i lusim kalabus na kam bek long graun bilong ol long 537 B.C.E. Baibel i tok ol i stap long Babilon inap 70 yia. Olsem na ating Jerusalem i bin bagarap long 607 B.C.E. (2 Sto. 36:​21, 22; Jer. 29:10; Dan. 9:​1, 2)​—⁠10/1, pes 26-31..

• Wanem samting inap helpim Kristen long makim ol amamas i gutpela o nogat?

Sapos em i laik bai amamas em i kisim i helpim em na em kain amamas God i orait long en, orait i gutpela em i askim em yet: Wanem kain samting i insait long en? Hamas taim bai mi lusim bilong kisim amamas? Mi ken poroman wantaim husat?​—⁠10/15, pes 9-12..

• Bilong wanem i no stret long rausim bel?

Laip em samting i holi long ai bilong God, na taim pikinini i stap olsem blut yet long bel bilong mama, God i tingim dispela olsem samting i gat laip pinis. (Sng. 139:16) Aninit long Lo, man i kilim bebi i stap long bel bilong mama, em bai kisim strafe. (Kis. 21:​22, 23)​—⁠11/1, page 6.

• Olsem wanem stori i stap long Sindaun 7:​6-23 i helpim yumi long sakim pasin bilong lukim ponografi?

Dispela skripsa i stori long wanpela yangpela man husat i wokabaut i go long rot we em i save olsem wanpela pamukmeri i stap. Dispela meri i bin grisim em. Long nau, yumi mas sakim ol Web-sait long Intenet we i gat ol vidio na piksa bilong pasin pamuk, na em i bikpela samting long beten askim God long helpim yumi paslain long yumi go long ol Web-sait long Intenet.​—⁠11/15, pages 9-10.

• Olsem wanem yumi save olsem graun bai stap yet bihain long 2012?

Olsem kalenda bilong ol Maya bilong bipo i kamapim, sampela man i ting graun bai bagarap na pinis long yia 2012. Tasol dispela samting i no inap kamap, long wanem, Jehova i wokim graun bilong ol man i ken stap long en. Baibel i tok olsem graun bai stap oltaim oltaim. (Sav. 1:4; Ais. 45:18)​—⁠12/1, page 10.

• Husat ol man bilong Baibel i bin stap long Pentikos 33 C.E.?

I luk olsem 6-pela man bilong raitim Ol Skripsa Grik i bin stap long dispela taim. Tripela aposel i bin stap, em Matyu, Jon, na Pita. Tupela brata bilong Jisas tu i bin stap, em Jems na Jut. Na i luk olsem yangpela man Mak tu i bin stap.​—⁠12/1, page 22.