Kisim Skul Long ‘Astingting Bilong Tok i Tru’
“Yu kliagut long astingting bilong save na tok i tru i stap long Lo.”—ROM 2:20.
1. Bilong wanem yumi mas kliagut long ol bikpela samting long Lo Bilong Moses?
OL SAMTING em spirit bilong God i kirapim aposel Pol long raitim long Baibel i helpim yumi long kliagut long planti bikpela samting long Lo Bilong Moses. Olsem: Long pas Pol i raitim long ol Hibru, em i kamapim olsem Jisas em i “hetpris” husat i givim em yet olsem ofa wanpela taim tasol. Ol man husat i bilip long dispela ofa, ol inap stap wanbel wantaim God na em inap ‘kisim bek ol inap oltaim oltaim.’ (Hib. 2:17; 9:11, 12) Na tu, Pol i tok olsem haus lotu sel i olsem “sedo tasol bilong ol samting bilong heven.” Na Jisas em Namelman bilong kontrak i winim Lo Bilong Moses. (Hib. 7:22; 8:1-5) Taim Pol i kamapim klia ol dispela hap bilong Lo Bilong Moses i makim wanem samting, dispela i bin helpim tru ol Kristen long taim bilong em. Ol samting Pol i bin kamapim klia i ken helpim yumi tu long pilim tru samting God i mekim bilong helpim yumi.
2. Bilong wanem ol Juda Kristen i save gut moa long God na long ol stretpela stiatok, winim ol man bilong ol arapela lain?
2 Taim Pol i raitim pas long ol Kristen long Rom, em i raitim sampela tok i go long ol Juda Kristen tu i stap long Rom, em ol i save pinis long Lo Bilong Moses. Olsem na em i tok olsem ol i kliagut pinis long “astingting bilong save na tok i tru” bilong Jehova na ol stretpela stiatok bilong em. Ol i kliagut na laikim ol tok i tru ol i kisim save long en long rot bilong Lo. Olsem ol Juda husat i stap gut long God paslain long ol, ol tu inap skulim ol arapela long ol bikpela tok i tru i stori long Jehova.—Ritim Rom 2:17-20.
EM SEDO TASOL BILONG SAKRIFAIS BILONG JISAS
3. Taim yumi kisim save long pasin bilong ol Juda long mekim ol sakrifais, dispela inap helpim yumi olsem wanem?
3 Astingting bilong tok i tru i stap long Lo Bilong Moses we Pol i stori long en, i bikpela samting long helpim yumi kliagut long samting Jehova i tingting pinis long mekim. Ol stiatok i stap long Lo Bilong Moses i gat strong yet long nau. Olsem na bai yumi kisim save long ol sakrifais na ol ofa em Lo i tok long mekim. Ol dispela ofa i bringim ol Juda i gat pasin daun long i go long Krais, na i helpim ol long kliagut long samting God i laik bai ol i mas mekim. Ol lo Jehova i givim long ol wokman bilong em i no save senis, olsem na bai yumi lukim tu olsem ol lo em i givim long ol Israel long sait bilong mekim ol sakrifais inap helpim yumi long skelim pasin bilong yumi long lotuim em.—Mal. 3:6.
4, 5. (a) Lo Bilong Moses i kirapim ol Juda long luksave long wanem samting? (b) Ol sakrifais i olsem “sedo tasol” bilong wanem samting?
4 Planti samting long Lo Bilong Moses i kirapim ol Juda long luksave olsem ol i sinman. Olsem: Sapos wanpela i holim bodi bilong daiman, orait em i mas mekim ol samting bilong kamap klin. Bilong mekim olsem, pris i mas kilim i dai wanpela retpela bulmakau i no gat sik na kukim long paia, na mekim wok long ol sit bilong paia long wokim “wara bilong mekim man i kamap klin.” Long de namba 3 na de namba 7 bihain long man i kamap doti, pris i mas kisim liklik hap bilong dispela wara na tromoi long man bilong mekim em i kamap klin. (Nam. 19:1-13) Taim meri i karim pikinini em bai stap doti inap sampela de. Bihain long dispela, em i mas givim wanpela ofa bilong kamap klin. Dispela i kirapim ol Juda long luksave olsem olgeta manmeri i gat sin taim ol i bon.—Wkp. 12:1-8.
5 Ol Juda i mas givim ol animal olsem sakrifais bilong tekewe sin long planti narapela samting ol i mekim long laip bilong ol. Maski ol i luksave o nogat, ol dispela sakrifais ol i ofaim long haus lotu sel na bihain ol sakrifais ol i ofaim long tempel, ol i olsem “sedo tasol” bilong nambawan gutpela sakrifais bilong Jisas.—Hib. 10:1-10.
STRETPELA TINGTING LONG GIVIM OL SAKRIFAIS
6, 7. (a) Ol Israel i mas tingim wanem samting taim ol i makim ol animal bilong givim olsem sakrifais? Sakrifais Jehova i laikim i makim wanem samting? (b) Yumi ken givim wanem ol askim long yumi yet?
6 Jehova i tokim ol Israel long ol i mas givim ol “gutpela” animal tasol olsem sakrifais, em ol i no aipas, i gat sampela bagarap long skin, o i gat sik. (Wkp. 22:20-22) Taim ol Israel i givim ol prut o wit olsem ofa long Jehova, ol i mas givim namba 1 kaikai i mau long gaden na i mas nambawan tru. (Nam. 18:12, 29) Jehova i no orait long ol ofa i gat sampela bagarap long en. Taim ol Israel i givim ol nambawan gutpela animal bilong ol olsem sakrifais, dispela i makim sakrifais bilong Jisas bai i no gat mak long en na em bai klin olgeta. Jehova bai givim nambawan gutpela samting i dia tumas long em olsem sakrifais bambai em inap kisim bek ol manmeri long sin na dai.—1 Pita 1:18, 19.
7 Sapos man i pilim tru olgeta gutpela pasin bilong Jehova na mekim sakrifais, orait em bai amamas long givim nambawan gutpela samting em i gat. Na em samting bilong em yet long makim wanem ofa em bai givim. Tasol em i save olsem God bai no amamas sapos em i givim sakrifais i no nambawan tru, long wanem, dispela bai makim olsem em i no ting olsem sakrifais em i bikpela samting o em i pilim olsem Jehova i askim long planti samting tumas. (Ritim Malakai 1:6-8, 13.) Dispela samting i mas kirapim yumi long skelim pasin bilong yumi long mekim wok bilong God. Yumi ken askim yumi yet olsem: Wanem as tru na mi mekim wok bilong Jehova? I gat sampela samting mi mas senisim long pasin bilong mi long mekim wok bilong Jehova? Olsem wanem? Mi givim Jehova nambawan gutpela samting mi gat?
8, 9. Yumi kisim wanem skul long tingting bilong ol Israel taim ol i givim sakrifais?
8 Long laik bilong em yet, wanpela Israel inap givim wanpela sakrifais bilong kamapim tenkyu bilong em long Jehova. O em inap givim wanpela ofa em paia i kukim olgeta bilong Jehova i ken orait long em. Long kain taim olsem, i no hatwok long em i givim nambawan gutpela animal bilong em. Em bai amamas long givim dispela animal long Jehova. Long nau, i no gat wok long yumi mas givim ol sakrifais olsem Lo Bilong Moses i tok, tasol yumi givim ol narapela sakrifais. Yumi yusim taim, strong, na mani samting bilong yumi long mekim wok bilong Jehova. Aposel Pol i tok long “yusim maus bilong yumi long tokaut” long gutpela samting yumi bilip na wetim na “long mekim gutpela pasin na serim ol samting wantaim ol arapela,” dispela i olsem sakrifais em God i orait long en. (Hib. 13:15, 16) Pasin bilong yumi o tingting bilong yumi long mekim wok bilong Jehova i soim olsem yumi tenkyu long olgeta samting em i givim long yumi. Olsem lain Israel, yumi tu mas skelim olsem yumi gat wanem tingting long wok bilong Jehova na i gat wanem as na yumi mekim dispela wok.
9 I gat sampela sin em man Israel i mekim na Lo Bilong Moses i tok em i mas givim wanpela ofa bilong tekewe sin o wanpela ofa bilong mekim i dai asua. Lo i tok long ol i mas givim ol dispela kain ofa, olsem na yu ting i hatwok long wanpela Israel long givim dispela kain ofa long laik bilong em yet? (Wkp. 4:27, 28) Bai i no hatwok sapos em i laik tru long pas gut yet wantaim Jehova.
10. Yumi inap mekim wanem sakrifais taim yumi mekim rong?
10 Long nau, ating yumi inap mekim sampela tok i bagarapim bel bilong brata, maski yumi no luksave long dispela o yumi no tingting gut paslain long yumi tromoi tok. O ating maus bilong bel i kotim yumi long wanpela rong yumi bin mekim. Sapos yumi laik amamasim Jehova, yumi bai mekim olgeta samting bilong stretim dispela rong. Dispela i makim olsem yumi mas tok sori long brata em yumi bin rongim. O sapos yumi yet i bin mekim wanpela bikpela rong, yumi yet i mas go kisim helpim long ol elda. (Mat. 5:23, 24; Jems 5:14, 15) Bilong stretim rong yumi bin mekim long wanpela brata o long God, yumi yet i mas kirap mekim sampela samting. Dispela i olsem yumi mekim wanpela sakrifais. Sapos yumi redi long mekim olsem, yumi inap pas gut wantaim Jehova na brata bilong yumi na bel bilong yumi bai i no gat tok. Dispela i kirapim yumi long bilip olsem Jehova i save long wanem samting i gutpela bilong helpim yumi.
11, 12. (a) Ol sakrifais bilong kamap wanbel wantaim God i makim wanem samting? (b) Yumi kisim wanem skul long en?
11 Ol arapela sakrifais em Lo Bilong Moses i kolim em ofa bilong kamap wanbel wantaim God, na i soim olsem man i stap wanbel wantaim God. Man i givim kain ofa olsem, em wantaim famili bilong en bai kaikai mit bilong animal em i sakrifaisim, ating insait long wanpela rum long tempel. Pris husat i mekim sakrifais long dispela animal na ol arapela pris husat i wok long tempel, ol bai kisim hap mit bilong dispela animal tu. (Wkp. 3:1; 7:31-33) As na dispela man i mekim dispela ofa, em long wanem, em i laik pas gut wantaim God. I olsem em wantaim famili bilong em, ol pris, na Jehova i amamas na kaikai wantaim na ol i stap wanbel.
12 Olsem na sakrifais bilong kamap wanbel wantaim God i olsem man i singautim Jehova long kam kaikai wantaim em. Em wanpela bikpela samting tru long dispela man taim Jehova i orait long kam long dispela kaikai. Tru tumas, em bai laik givim nambawan gutpela samting long Jehova. Ol sakrifais bilong kamap wanbel wantaim God i hap bilong astingting bilong tok i tru i stap long Lo Bilong Moses. Ol dispela sakrifais i kamapim klia olsem ol man husat i laik pas gut na stap wanbel wantaim Man Bilong Wokim ol, ol inap mekim olsem long rot bilong nambawan sakrifais em Jisas i bin givim. Long nau, yumi inap stap olsem pren bilong Jehova sapos long laik bilong yumi yet, yumi givim ol mani samting na strong bilong mekim wok bilong God.
OL SAKRIFAIS EM GOD I NO ORAIT LONG EN
13, 14. Bilong wanem Jehova i no orait long samting Sol i laik givim olsem sakrifais?
13 Jehova i save orait long ol sakrifais sapos man i gat stretpela tingting na i givim. Tasol Baibel i stori tu long sampela sakrifais em God i no orait long en. Bilong wanem God i no orait long ol dispela sakrifais? Orait yumi ken skelim 2-pela stori bilong dispela samting.
14 Profet Samuel i tokim King Sol olsem taim i kamap pinis long Jehova i mas bagarapim ol Amalek. Em i tokim Sol long kilim olgeta Amalek wantaim ol animal bilong ol. Tasol taim Sol i winim pait, em i tokim ol soldia long larim King Agak bilong ol Amalek long i stap laip. Na tu, Sol i kisim ol gutpela animal bilong ol Amalek na bai em i ken givim olsem sakrifais i go long Jehova. (1 Sml. 15:2, 3, 21) Jehova i mekim wanem? Jehova i no laik bai Sol i stap moa olsem king bilong Israel, long wanem, em i bin sakim tok. (Ritim 1 Samuel 15:22, 23.) Yumi kisim wanem skul long dispela? God bai orait long sakrifais bilong yumi sapos yumi bihainim ol lo bilong em.
15. Lain Israel i kamapim klia wanem samting taim ol i givim ol sakrifais na long wankain taim ol i wok long mekim pasin nogut?
15 I gat narapela stori olsem long Buk Aisaia. Ol Israel long taim bilong Aisaia i wok long givim ol sakrifais long Jehova, long wanem, Lo i tok ol i mas mekim. Na long wankain taim, ol i wok long mekim planti pasin nogut. Long dispela as, Jehova i no orait long ol sakrifais bilong ol. Jehova i askim ol: “Yupela i ting mi laikim ol kain kain ofa yupela i save mekim long mi, a? Nogat tru.” Na em i tokim ol: “Mi les pinis long ol sipsip yupela i save bringim olsem ofa bilong paia i kukim olgeta, na mi no laikim moa ol gris bilong ol gutpela patpela abus bilong yupela. Mi inap pinis long blut bilong ol bulmakau man na bilong ol pikinini sipsip na bilong ol meme man.” Na em i tok moa: “Yupela i no ken hatwok nating na bringim ol ofa long mi. Long wanem, mi les pinis long ol ofa bilong yupela. Na smel bilong paura yupela i save kukim i kamapim smel nogut tasol long nus bilong mi.” Bilong wanem em i no laikim ol sakrifais bilong ol? God i tok: “Maski yupela i prea planti taim, bai mi pasim yau bilong mi. Long wanem, blut bilong ol man yupela i bin kilim, em i pas yet long ol han bilong yupela. Mi lukim yupela i nogut tru. Yupela go waswas, na klinim yupela yet na rausim olgeta pasin nogut i pas long yupela. Na no ken mekim sin gen.”—Ais. 1:11-16.
16. God i orait long wanem kain sakrifais?
16 Jehova i no orait long ol sakrifais bilong ol man husat i wok yet long mekim pasin nogut. Tasol em i orait long ol beten na ol sakrifais bilong ol man husat i bihainim olgeta tok bilong em. Astingting bilong tok i tru i stap long Lo Bilong Moses i skulim kain lain olsem ol i sinman na Jehova i mas lusim sin bilong ol. (Gal. 3:19) Taim wanpela Israel i kliagut long samting Lo i laik skulim em long en, em i sori tru long ol rong bilong em na i laik bai Jehova i lusim ol sin bilong em. Wankain tu long nau, yumi mas tingim olsem long rot bilong sakrifais bilong Krais tasol, Jehova inap lusim sin bilong yumi. Sapos yumi kliagut long bikpela samting sakrifais bilong Krais i mekim na yumi pilim tru dispela samting, Jehova bai “laikim tumas” olgeta samting yumi mekim long wok bilong em.—Ritim Song 51:17, 19.
SOIM OLSEM YU BILIP LONG SAKRIFAIS BILONG JISAS!
17-19. (a) Olsem wanem yumi inap soim Jehova olsem yumi pilim tru pe bilong Jisas long baim bek man? (b) Long stadi i kamap bihain, bai yumi kisim save long wanem samting?
17 Lain Israel i lukim tasol “sedo” bilong samting God i tingting pinis long mekim. Tasol yumi lukim samting tru em sedo i makim. (Hib. 10:1) Ol lo bilong givim ol sakrifais i skulim ol Israel long samting ol i mas mekim bilong ol i ken pas gut wantaim God. Ol i mas soim em olsem ol i pilim tru samting em i mekim bilong helpim ol na ol i laik givim ol nambawan gutpela samting bilong ol long em, na ol i mas save olsem ol i sinman na em i mas lusim ol rong bilong ol. Long nau, Ol Skripsa Grik i helpim yumi long kliagut olsem long rot bilong pe bilong Jisas long baim bek man, Jehova bai pinisim sin na dai olgeta, na maus bilong bel bilong yumi inap i stap klin. Dispela pe bilong baim bek man, em wanpela gutpela presen i kam long Jehova!—Gal. 3:13; Hib. 9:9, 14.
18 Bilong kisim helpim long pe bilong baim bek man, yumi mas kliagut long dispela pe i makim wanem samting, na tu, yumi mas mekim sampela samting moa. Pol i tok: “Lo i stap olsem waspapa bilong yumi na i bringim yumi i go long Krais bai yumi ken bilip na God i ken kolim yumi stretpela manmeri.” (Gal. 3:24) Yumi mas kamapim bilip bilong yumi long rot bilong mekim ol gutpela wok. (Jems 2:26) Ol Juda Kristen long taim bilong ol aposel i kliagut long astingting bilong tok i tru, long wanem, ol i save pinis long Lo Bilong Moses. Pol i kirapim ol long bihainim samting ol i lainim. Long dispela rot, wokabaut bilong ol bai i stret wantaim tok i tru em ol i skulim ol narapela long en.—Ritim Rom 2:21-23.
19 Maski yumi no gat wok long bihainim Lo Bilong Moses, yumi mas wok yet long givim ol sakrifais em Jehova i amamas long en. Long stadi i kamap bihain, bai yumi kisim save long olsem wanem yumi ken mekim olsem.
[Askim Bilong Stadi]
[Rait long pes 17]
Ol lo Jehova i givim long ol wokman bilong em i no save senis
[Piksa long pes 18]
Bai yu givim wanem animal olsem sakrifais long Jehova?
[Piksa long pes 19]
Jehova bai orait long yumi sapos yumi givim ol sakrifais em i amamas long en
