“Tok bilong yu em i tok i tru.”—JON 17:17.

1. Long namba wan taim yu toktok wantaim wanpela Witnes Bilong Jehova, wanem wanpela bikpela samting yu luksave long ol i narapela kain?

 TINGIM namba wan taim yu bin toktok wantaim wanpela Witnes Bilong Jehova. Yu inap tingim samting yupela i stori long en? Planti bilong yumi bai tok olsem wanpela samting yumi tingim long dispela taim em olsem Witnes i yusim Baibel long bekim olgeta askim bilong yumi. Yumi amamas tru taim yumi kisim save long laik bilong God long dispela graun, wanem samting bai painim yumi taim yumi dai, na ol famili bilong yumi i dai pinis, ol bai kirap bek!

2. I gat wanem as na yu laikim tru Baibel?

² Tasol taim yumi wok yet long stadi, yumi luksave olsem Baibel i no bekim tasol ol askim bilong yumi long laip i gat as bilong en, wanem samting i painim yumi taim yumi dai, na wanem samting bai painim yumi long bihain. Yumi kirap long laikim tru Baibel, long wanem, ol tok bilong en i save helpim man. Ol man husat i bihainim gut tok bilong en ol bai amamas na ol samting ol i mekim bai kamap gutpela. (Ritim Song 1:1-3.) Ol Kristen tru i no kisim tok bilong Baibel ‘olsem tok bilong ol man, nogat. Ol i kisim olsem tok bilong God.’ (1 Tes. 2:13) Bai yumi skelim sampela stori bilong ol man bilong bipo husat i bin rispektim Tok Bilong God na bihainim, na ol man husat i sakim tok bilong en na i no rispektim.

OL I STRETIM WANPELA BIKPELA HEVI

3. Wanem hevi i kamap na inap bagarapim pasin wanbel insait long kongrigesen Kristen? Bilong wanem na i hatwok long stretim dispela hevi?

³ Inap 13 yia bihain long God i bin makim Kornilius—em man bilong arapela lain husat i no bin katim skin—planti man moa bilong ol arapela lain i kamap Kristen. Insait long dispela taim, wanpela hevi i kamap we inap  bagarapim pasin wanbel insait long kongrigesen Kristen. Wanpela askim i kamap olsem: Ol man bilong arapela lain i mas bihainim lo bilong ol Juda na katim skin paslain long ol i kisim baptais? Ol Juda i hatwok long bekim dispela askim. Ol Juda husat i bihainim Lo, ol i no inap go insait long haus bilong wanpela man bilong arapela lain. Na tu, ol i no inap bung wantaim ol. Ol man i bin mekim nogut tru long ol Juda Kristen husat i bin lusim lotu Juda. Sapos ol i amamas long bung wantaim ol man bilong arapela lain na tingim ol olsem brata bilong ol, orait dispela bai kamapim bikpela pasin birua long ol Kristen. Na tu, dispela bai mekim na ol Kristen bai stap longwe moa long ol man bilong lotu Juda.—Gal. 2:11-14.

4. Husat i bung bilong stretim hevi? Ating wanpela bai i gat wanem askim long dispela bung?

⁴ Long 49 C.E., ol aposel na ol hetman long Jerusalem, olgeta i bilong lain Juda na ol i bin katim skin, ol i “bung wantaim long skelim dispela samting.” (Apo. 15:6) Ol i no paitim toktok i go i kam long ol samting bilong lotu, nogat, ol i toktok long ol bikpela tok bilong Baibel. Olgeta husat i bung i kamapim tingting bilong ol. Olsem wanem ol inap stretim dispela samting? Bai ol i larim tingting na laik bilong wanpela i stiaim disisen bilong ol? O ol hetman bai wet inap long pasin birua long ol Kristen i kol pastaim na bihain ol i wokim disisen? O bai ol i wanbel tasol maski ol i no bilip olsem samting ol i orait long en i no stret, long wanem, ol i laik kamapim hariap wanpela disisen?

5. Olsem wanem bung long Jerusalem long 49 C.E. i narapela kain long ol miting bilong ol lida bilong sios long nau?

⁵ Long miting bilong ol lida bilong sios long nau, planti taim ol dispela lida i save orait long tingting ol narapela i kamapim maski ol i no wanbel long dispela tingting bambai ol inap kamapim wanpela disisen. Planti taim ol lida i save kirapim ol man long vot bilong sapotim tingting bilong ol. Tasol kain pasin olsem i no bin kamap long bung ol i mekim long Jerusalem. Na maski i olsem, ol aposel na ol hetman i bin kamapim wanpela disisen em olgeta i wanbel long en. Olsem wanem na ol inap mekim olsem? Em long wanem, maski ol i gat narapela narapela tingting, olgeta long dispela bung i rispektim Tok Bilong God, na ol i mekim wok long ol skripsa long stretim dispela samting.—Ritim Song 119:97-101.

6, 7. Olsem wanem ol aposel na ol hetman i yusim Tok Bilong God na stretim tok long pasin bilong katim skin?

⁶ Tok bilong Amos 9:11, 12 i helpim ol long stretim dispela tok. Aposel 15:16, 17 i kamapim tok bilong en olsem: “Mi bai kam bek, na dispela haus win bilong Devit i pundaun pinis em bai mi wokim gen. Ol samting i bagarap long en mi bai wokim na sanapim gen na bai ol manmeri bilong dispela lain husat i stap yet, na ol manmeri bilong ol arapela lain em nem bilong mi i stap long ol, ol i ken wok strong long painim Jehova. Em tok bilong Jehova.”

⁷ Long rot bilong dispela ves ol Juda Kristen bai kliagut olsem ol man bilong ol arapela lain husat i kamap Kristen, ol i no gat wok long katim skin. Bilong wanem ol bai i gat dispela tingting? Long wanem, ol i tingim “ol manmeri bilong ol arapela lain” husat i bin katim skin olsem ol i brata bilong ol. (Kis. 12:48, 49) Olsem: Esta 8:17 long Baibel Septuagint bilong Bagster, i tok: “Planti manmeri bilong arapela lain i bin katim skin na ol i joinim lotu Juda.” Olsem na dispela tok, “ol manmeri bilong dispela lain husat i stap yet,” i makim ol Juda wantaim ol man i bin katim skin na joinim lotu Juda. Tok Bilong God i tok olsem, “ol manmeri bilong dispela lain husat i stap yet” na “ol manmeri bilong ol arapela lain” husat i no bin katim skin, olgeta wantaim bai kamap wanpela lain i holim nem bilong God. Olsem na bekim bilong dispela skripsa i klia tru. Ol manmeri bilong arapela lain husat i  laik kamap Kristen, ol i no gat wok long katim skin.

8. Bilong wanem ol Juda Kristen i mas strongim bel na wokim dispela disisen?

⁸ Tok Bilong God na spirit bilong em i stiaim ol dispela Kristen long wanbel long wanpela disisen. (Apo. 15:25) Maski disisen ol i kamapim bai kirapim ol arapela long birua long ol Juda Kristen, ol man husat i stap gut long God ol i bihainim tok Baibel i mekim.—Apo. 16:4, 5.

I NARAPELA KAIN

9. Wanem wanpela as na ol bilip giaman i paulim lotu i tru? Ol i bin paulim wanem bikpela bilip Kristen?

⁹ Aposel Pol i tok profet olsem bihain long dai bilong ol aposel, ol bilip giaman bai paulim lotu i tru. (Ritim 2 Tesalonaika 2:3, 7.) Na sampela husat i holim bikpela wok insait long kongrigesen, ol tu bai sakim ol stretpela bilip. (2 Tim. 4:3) Pol i givim tok lukaut long ol hetman long taim bilong em: “Sampela man long lain bilong yupela yet bai kirap na mekim ol tok kranki bilong pulim ol disaipel i go bihainim ol.” (Apo. 20:30) Wanpela buk (The New Encyclopædia Britannica) i kamapim wanpela bikpela as na ol bilip giaman i kam insait. Em i tok olsem sampela Kristen husat i bin kisim skul long save bilong ol Grik, ol i kirap long yusim ol dispela save long kamapim mining bilong ol bilip Kristen. Dispela i mekim na ol i amamas long save bilong ol yet na ol i ting ol inap helpim ol haiden husat i gat bikpela save long kisim bilip Kristen. Wanpela bilong ol bikpela bilip Kristen em ol i paulim wantaim bilip haiden, em bilip bilong Jisas Krais em i husat. Baibel i tok em i Pikinini Bilong God, tasol ol man husat i laikim save bilong ol Grik, ol i skulim ol man olsem em i God.

10. Ol lida bilong sios inap painim we bekim bilong dispela askim long Jisas em i husat?

¹⁰ Bihain, long sampela miting bilong ol lotu, ol lida bilong sios i wok long tok pait long dispela bilip. Tru, i no hatwok long ol i painim bekim long Baibel olsem Jisas em i husat, tasol planti i no ting tok bilong Baibel i bikpela samting. Planti bilong ol i wokim pinis disisen bilong ol yet paslain long miting bilong ol i kirap, na i no gat wanpela samting inap senisim tingting bilong ol. Klostu olgeta disisen ol i mekim long ol dispela miting i no kamapim tingting bilong Baibel.

11. Ol lida bilong sios i larim wanem samting i stiaim disisen bilong ol? Bilong wanem ol i mekim olsem?

¹¹ Bilong wanem ol lida bilong sios i no yusim ol tok bilong Baibel taim ol i mekim ol disisen? Saveman Charles Freeman i tok, as bilong dispela em olsem, tok Baibel i mekim i pait wantaim tingting bilong ol olsem Jisas em i God. Tok bilong Jisas yet i kamapim olsem God i bikpela na i winim Jisas. Ol lida bilong sios i no inap daunim dispela tok, olsem na ol i larim pasin bilong lotu na tingting bilong ol man i kamap bikpela samting moa winim ol tok bilong ol Gutnius. Long nau tu, planti lida bilong ol sios i ting tok bilong ol Tisa Bilong Lotu i bikpela samting moa winim Tok Bilong God! Sapos yu toktok wantaim wanpela man husat i bilip long God Triwan, ating yu inap luksave long dispela samting.

12. Empera i gat strong long mekim wanem?

¹² Ol empera bilong Rom i bin gat strong long stiaim ol disisen bilong ol dispela miting. Olsem: Profesa Richard E. Rubenstein i stori long samting i kamap long Kibung Bilong Naisia. Em i tok olsem nupela empera Konstantin i mekim na ol bisop i kamap maniman tru. Insait long wanpela yia, em i givim bek olgeta samting em ol man i bin rausim long ol, olsem, ol haus lotu, ol wok, na ol biknem bilong ol. Em i mekim gut long ol bisop olsem em i bin mekim long ol pris haiden long pastaim. Long dispela rot, Konstantin i gat strong long stiaim ol disisen i kamap long dispela Kibung Bilong Naisia, na ating em inap senisim ol disisen tu. Na Charles Freeman i tok, bihain long dispela kibung, empera i kirap stiaim planti samting insait long lotu. Em i givim namba long lotu na em i stiaim ol bilip bilong lotu.—Ritim Jems 4:4.

13. Yu ting i gat wanem as na ol lida bilong sios i no laik bilip long ol tok i tru bilong Baibel?

 ¹³ Ol lida bilong sios i no laik bilip olsem Jisas Krais em i Pikinini Bilong God, tasol planti man nating i no bilip olsem. Ol i kliagut na bilip long ol tok ol i ritim long Baibel. Tasol ol lida bilong sios i laikim mani na namba em empera inap givim long ol, olsem na ol i sakim tok bilong Baibel. Wanpela lida bilong sios long dispela taim bipo, em Gregory bilong Nyssa, i kamapim tok bilong daunim ol man nating husat i toktok long lotu, em ol kain man olsem, ol man bilong salim klos, senisim mani, stuakipa, na ol wokboi. Gregory i no amamas olsem ol man nating inap kamapim klia olsem Pikinini em i narapela long Papa, na Papa em i bikpela winim Pikinini, na God yet i bin wokim Pikinini. Ol man nating inap yusim Baibel na kamapim klia ol dispela tok i tru. Em samting Gregory bilong Nyssa na ol lida bilong sios i no mekim. Mobeta ol i bin putim yau long tok bilong ol man nating!

“OL WIT” NA “OL GRAS NOGUT” I GRO WANTAIM

14. Olsem wanem yumi save olsem kirap long taim bilong ol aposel na i kam, i bin i gat ol Kristen tru hia long graun, em God i bin makim ol?

¹⁴ Long wanpela tok piksa, Jisas i tok olsem kirap long taim bilong ol aposel na i kam, bai i gat yet ol Kristen tru hia long graun, em God i bin makim ol. Em i tok ol i olsem “ol wit” em ol i kamap namel long “ol gras nogut.” (Mat. 13:30) Tru, yumi no save husat ol man o lain i insait long dispela lain God i bin makim. Tasol yumi save olsem long olgeta taim i bin i gat sampela husat i strongim bel na sambai long Tok Bilong God na ol i kamapim long ples klia ol bilip giaman bilong ol lotu. Orait nau yumi ken stori long sampela bilong ol.

15, 16. Husat ol man i bin sambai long Tok Bilong God?

¹⁵ Asbisop bilong Frans, em Agobard Bilong Lyons, husat i stap namel long yia 779 na yia 840, i tokaut olsem pasin bilong lotuim ol imis, dediketim ol haus lotu long ol santu, na sampela pasin bilong mekim lotu, ol i no stret. Narapela bisop husat i stap long taim bilong Bisop Agobard, em Bisop Claudius, em tu i sakim ol pasin bilong lotu, olsem pasin bilong beten long ol santu na lotu long ol bun bilong ol santu samting. Namel long yia 1001 na 1100, ol i bin rausim Nambawan Dikon Berengarius Bilong Tours, bilong Frans, long Misin, long wanem, em i sakim bilip Katolik we i tok, long rot bilong mirakel, bret na wain i senis na i kamap bodi tru na blut tru bilong Krais. Na tu, em i bilip olsem tok bilong Baibel i winim tru pasin bilong lotu.

¹⁶ Peter Bilong Bruys na Henry Bilong Lausanne, em ol i bin stap namel long yia 1101 na yia 1200, ol i bin laikim tru tok i tru bilong Baibel. Peter i lusim wok bilong em olsem pris, long wanem, em i ting olsem ol bilip Katolik olsem, baptaisim ol bebi, bret na wain i senis na i kamap bodi na blut tru bilong Krais, beten  bilong helpim ol daiman, na lotuim kruse, ol dispela samting i no stret wantaim tok bilong Baibel. Long dispela as tasol na long yia 1140, ol i kukim Peter long paia. Henry, em wanpela bruder, i tokaut long pasin korapsen bilong Misin na ol i no bihainim pasin i stret long mekim lotu. Ol i arestim em long yia 1148 na kalabusim em inap long em i dai.

17. Waldo na ol narapela husat i bihainim em i mekim wanem bikpela samting?

¹⁷ Long dispela taim we ol i bin kilim i dai Peter Bilong Bruys, mama i karim Valdès, narapela nem bilong em Waldo. a Em i bin wok strong long tokaut long tok i tru bilong Baibel long planti hap. Em i no bin go long skul bilong lotu olsem Peter Bilong Bruys na Henry Bilong Lausanne. Tasol em i laikim tru Tok Bilong God na dispela i kirapim em long lusim mani kago bilong em na em i stretim rot bambai ol inap tanim sampela hap bilong Baibel i go long tokples bilong planti man nating bilong saut-is Frans. Sampela i amamas tru long harim tok bilong Baibel long tokples bilong ol yet na ol tu i lusim ol samting bilong ol na autim tok i tru bilong Baibel long ol narapela. Ol lida bilong sios i no amamas liklik long dispela samting. Olsem na long 1184, pop i rausim long Misin ol dispela manmeri husat i givim bel long autim tok, em bihain ol i kisim nem olsem Lain Waldens, na tu, bisop i no larim ol i go bek long ples bilong ol. Dispela i mekim na tok bilong Baibel i go long ol arapela hap. Bihain, long planti hap long Yurop, ol manmeri i bihainim Waldo, Peter Bilong Bruys, na Henry Bilong Lausanne, na tu, ol arapela husat i lusim Misin, ol i kamap planti. Planti handret yia bihain, sampela narapela i sambai long tok i tru bilong Baibel, olsem: John Wycliffe (1330-1384 samting), William Tyndale (1494-1536 samting), Henry Grew (1781-1862), na George Storrs (1796-1879).

“I NO GAT WANPELA SAMTING I PASIM TOK BILONG GOD”

18. Olsem wanem ol Baibel sumatin bilong 1870 samting i stadi long Baibel? Bilong wanem dispela em i gutpela rot bilong stadi?

¹⁸ Ol birua bilong Baibel i no inap tru long pasim tok i tru long i go long planti hap. Namba 2 Timoti 2:9, i tok: “I no gat wanpela samting i pasim tok bilong God.” Long 1870 wanpela liklik grup bilong ol Baibel sumatin i kirap long kisim save long tok i tru. Ol i mekim olsem wanem? Pastaim, wanpela bilong ol bai kamapim askim long wanpela tok bilong Baibel. Na ol bai stori long dispela samting na ol bai skelim olgeta skripsa i stori long dispela tok. Na bihain, taim ol lukim olsem tok bilong ol dispela skripsa i stret wantaim, ol i tokaut long tingting ol i bin kisim long en na nau ol i raitim long notbuk. Dispela em gutpela rot bilong stadi, long wanem, ol i bihainim pasin bilong ol aposel na ol hetman long bipo. Yumi amamas tru long save olsem ol dispela gutpela Baibel sumatin bilong 1870 samting i givim bel tru long painimaut olsem bilip bilong ol i mas stret olgeta wantaim Tok Bilong God.

19. Wanem yiateks bilong 2012? Bilong wanem dispela i stret long nau?

¹⁹ Long nau, Baibel i as bilong bilip bilong yumi. Dispela em as na Gavening Bodi Bilong Ol Witnes Bilong Jehova i makim tok bilong Jisas long Jon 17:17 olsem yiateks bilong 2012: “Tok bilong yu em i tok i tru.” Ol man husat i laik bai God i orait long ol, ol i mas bihainim tok i tru. Olsem na yumi olgeta i mas wok yet long mekim olgeta samting yumi inap mekim bilong larim Tok Bilong God i stiaim yumi.

[Futnot]

[Askim Bilong Stadi]

[Rait long pes 8]

Yiateks bilong 2012: “Tok bilong yu em i tok i tru.”—Jon 17:17

[Piksa long pes 7]

Waldo

[Piksa long pes 7]

Wycliffe

[Piksa long pes 7]

Tyndale

[Piksa long pes 7]

Grew

[Piksa long pes 7]

Storrs