Yes, Dispela Em Wastaua Bilong Stadi!

Mipela i kamapim gen nupela stail long Wastaua bilong stadi na bai em i luk nais moa, na dispela bai helpim yu long stadi gut moa long Tok i Tru bilong Jehova.—Sng. 1:2; 119:97.

Fopela yia i go pinis, mipela i kirap mekim 2-pela kain Wastaua. Wanpela em bilong pablik na narapela em bilong yumi ol Witnes Bilong Jehova na ol Baibel sumatin husat i wok long kamap strong na pas gut wantaim Jehova.

Wanpela brata i stap longtaim long tok i tru, em i tok long Wastaua bilong stadi olsem: “Em i nais tru na mi kisim gut olgeta tok bilong en—dispela em samting mi pilim taim mi lukim stadi Wastaua long namba wan taim. Wastaua i kamapim gut ol bikpela tok i tru bilong Baibel na ol dispela tok i go stret long bel na tingting bilong mi. Tenkyu tru long kamapim dispela gutpela magasin.” Narapela brata i tok: “Mi bai amamas long lusim taim long stadi long dispela Wastaua, na tu, mekim wok long Baibel New World Translation of the Holy Scriptures—With References.” Mipela i bilip olsem yupela tu bai gat wankain tingting olsem ol.

Olsem yumi save, ol i bin kirap wokim The Watchtower long 1879, em wanpela bikpela wok tru, tasol long rot bilong spirit bilong Jehova na blesing bilong em dispela wok i ron yet. (Sek. 4:6) Insait long dispela 133 yia, i bin gat sampela senis long fran pes bilong magasin. Long yia 2012, olgeta Wastaua bilong stadi bai i gat piksa bilong wok autim tok em atis i bin droim, na dispela bai kirapim yumi long tingim dispela wok God i givim yumi long autim gut tru tok bilong Kingdom bilong em. (Apo. 28:23) Long pes 2, bai yu lukim poto em atis i bin lukluk long en bilong droim piksa long fran pes, na i gat liklik stori long wanem samting i kamap na ples ol i bin kisim piksa long en. Insait long dispela yia, ol piksa bai kirapim yumi olgeta long tingim olsem ol manmeri bilong Jehova i wok long autim tok bilong gutnius “long olgeta hap bilong graun.”—Mat. 24:14.

Wanem ol arapela senis i stap long magasin? Ol askim bilong riviu bai stap nau long kirap bilong stadi. Dispela bai helpim yu long tingim ol bikpela tok we yu mas painim taim yu ritim na stadi long en. Tasol brata i lukautim Stadi Wastaua bai kamapim yet ol dispela askim long pinis bilong stadi. Yu bai lukim tu olsem ol sait sait bilong pes i gat bikpela spes moa, na namba bilong pes na paragraf i stap ples klia moa.

Olsem i stap long magasin bilong dispela mun, i gat wanpela nupela hap bilong en, “Histori Bilong Yumi.” Dispela hap bai stori long ol bikpela samting i bin kamap long histori bilong ol Witnes Bilong Jehova. Na tu, long wan wan taim bai i gat ol laip stori long dispela hap, “Ol i Amamas Long Mekim.” Em bai stori long amamas na belgut em ol brata na sista i bin kisim taim ol i mekim wok long ples we i sot long ol man bilong autim tok bilong Kingdom.

Mipela i laik bai yu amamas taim yu lusim taim bilong yu long stadi long Tok Bilong God wantaim helpim i kam long dispela magasin.

Lain Bilong Wokim Dispela Nius

[Piksa long pes 3]

1879

[Piksa long pes 3]

1895

[Piksa long pes 3]

1931

[Piksa long pes 3]

1950

[Piksa long pes 3]

1974

[Piksa long pes 3]

2008