Taim Charlotte White, husat i autim tok bilong God fultaim, i go long Lousiville, Kentucky, Amerika, wantaim sutkeis i gat wil, em kirapim tru tingting bilong ol man.

Long 1908, Sista White i pulim ai bilong ol man taim em i raun wantaim wanpela nupela samting—em Wilwil Bilong Buk Dawn. Em i tok, “Dispela i mekim na ol manmeri i toktok long dispela samting na lukluk long mi.”

Ol Sumatin Bilong Baibel, nem bilong ol Witnes Bilong Jehova long bipo, i bin luksave olsem ol i mas tokim ol man long ol gutpela samting ol i bin lainim long stadi bilong ol long Baibel. Planti bilong ol i bin kisim save long Baibel long rot bilong ol buk Millennial Dawn (bihain ol i kolim Studies in the Scriptures). Ol dispela Kristen i amamas long raun i go long hap i stap longwe—ol taun, ples, na fam samting—bilong tilim ol dispela buk ol i kolim “Helpim Bilong Ol Baibel Sumatin” long ol man i laik ritim.

Long 1908, Sista White na ol arapela i autim tok bilong Kingdom i bin tilim dispela 6-pela buk long K3.50. Ol i no save tilim ol dispela buk long namba 1 taim ol i toktok wantaim man. Man i laik kisim ol dispela buk i mas putim oda na bihain—long taim bilong fotnait—ol bai bringim ol buk i kam. Wanpela birua bilong ol Baibel Sumatin i komplein na tok pe bilong ol dispela buk i liklik tumas!

Malinda Keefer i tingim taim we ol man i bin odaim 200 i go 300 buk long olgeta wik. Ol man i laikim tru ol buk Dawn, tasol dispela i kamapim wanpela hevi. Olsem, buk namba 6 i gat 740 pes! Nius The Watch Tower i tok, “Hevi bilong 50 buk  em 18 kg,” olsem na “i hatwok tru” long tilim ol buk, na moa yet long ol sista.

Bilong helpim ol long tilim buk Dawn, Brata James Cole i wokim 2-pela wil ol i ken pasim long sutkeis. Nau ol i no gat wok moa long karim ol boks i pulap long ol buk, man i wokim dispela samting i tok: “Mi no ken brukim sol bilong mi.” Long 1908, brata i soim dispela samting em i wokim long ol bratasista i bung long Cincinnati, Ohio, long kibung bilong ol Sumatin Bilong Baibel. Long hap paip i holim 2-pela wil i gat baten ol i raitim nem “Wilwil Bilong Buk Dawn” long en. Ol raitim dispela tok bikos namba 1 samting ol i putim long sutkeis em ol buk Millennial Dawn. Taim ol i lain pinis long yusim, ol i no hatwok long karim planti buk long sutkeis, ol i yusim wanpela han tasol. Ol inap senisim longpela bilong “Wilwil Bilong Buk Dawn,” na wil inap ran long kain kain rot. Taim autim tok i pinis, ol inap brukim ol wil i go antap long sait bilong sutkeis na karim i go long haus.

Ol sista i mekim fultaim sevis i ken kisim fri wanpela Wilwil Bilong Buk Dawn. Ol arapela ken baim long K5.30. Sista Keefer, em yu lukim long piksa, i save gut long yusim Wilwil Bilong Buk Dawn. Long wanpela han em inap ranim sutkeis i pulap long ol buk na long narapela han em karim narapela beg i gat ol buk long en. Long wanpela taun i gat main, em long Pennsylvania, Amerika, planti man i gat laik long harim tok, olsem na em i mas go kam long wanpela bris 3-pela o 4-pela taim long de bilong karim ol buk i go long ol man husat i bin odaim.

Long 1987, wanpela pailot i wokim sutkeis i gat ol wil na nau yumi lukim dispela samting long olgeta ples balus na long ol strit bilong ol bikpela siti. Tasol wan handret yia i go pinis, ol Sumatin Bilong Baibel i bin yusim Wilwil Bilong Buk Dawn bilong karim tok i tru i go long planti hap, na ol i amamas long ol man i lukluk long ol taim ol i mekim olsem.

[Rait long pes 32]

Sista Keefer i go kam long wanpela bris 3-pela o 4-pela taim long de bilong tilim ol buk long ol man

[Rait long pes 32]

Dispela i pinisim hevi bilong tilim Buk Dawn