‘Sanap Strong Na No Ken Surik’
‘Sanap Strong Na No Ken Surik’
“Sanap strong na yu no ken pret na surik. . . Long wanem, mi God, Bikpela bilong yu, bai mi go wantaim yu.”—JOS. 1:7-9.
BAI YU BEKIM OLSEM WANEM?
Olsem wanem Enok na Noa i bin kamapim olsem ol i gat strongpela bel?
Olsem wanem sampela meri bilong bipo tru i stap gutpela piksa tru long pasin bilong bilip na sanap strong na i no surik?
Wanem eksampel bilong ol yangpela long sanap strong na i no surik i kirapim tingting bilong yu?
1, 2. (a) Bilong mekim ol samting i stret long olgeta wan wan de, yumi mas i gat wanem pasin? (b) Bai yumi lainim wanem samting long dispela stadi?
TAIM yumi tingim man i gat strongpela bel yumi tingim man i gat strong na em i no pret na surik. Tasol sampela taim yumi mas i gat strongpela bel na bai yumi ken mekim yet ol samting yumi save i stret long mekim long olgeta wan wan de.
2 Baibel i stori long sampela manmeri husat i no pret liklik taim bikpela hevi tru i bungim ol. Sampela arapela i soim olsem ol i gat strongpela bel taim ol i bungim ol hevi i save kamap long ol wokboi bilong Jehova long olgeta de. Yumi inap lainim wanem samting long eksampel bilong ol man i gat strongpela bel em Baibel i stori long en? Yumi ken mekim wanem bilong soim olsem yumi gat strongpela bel?
OL WITNES HUSAT I GAT STRONGPELA BEL
3. Enok i mekim wanem tok profet long samting bai painim ol man nogut?
3 Paslain long Bikpela Tait i kamap long taim bilong Noa, man i mas i gat strongpela bel bilong i stap olsem witnes bilong Jehova namel long ol man nogut. Tasol Enok, “em namba 7 man i kamap long lain bilong Adam,” i no pret na surik long autim tok profet olsem: “Harim! Jehova i kam wantaim bikpela lain ensel holi bilong en bilong skelim olgeta man. Na long kotim olgeta man i sakim tok bilong em, em bai kotim ol long olgeta pasin nogut ol i bin mekim. Na em bai kotim olgeta sinman i sakim tok bilong em, long wanem, ol i mekim ol tok nogut tru long em.” (Jut 14, 15) Enok i bilip tru olsem ol dispela samting bai kamap. Na tru tumas, ol man nogut i bin dai long bikpela tait i kamap long olgeta hap bilong graun.
4. Noa i wokabaut wantaim God maski ol lain long taim bilong em i mekim wanem?
4 Bikpela Tait i bin kamap long 2370 B.C.E., em 650 yia bihain long Enok i dai. Bihain long Enok i dai na paslain long Bikpela Tait i kamap, Noa i bon, em kamapim famili, na em wantaim ol pikinini man bilong en i wokim sip. Ol ensel nogut i tanim i kamap man, kisim ol naispela meri, na kamapim ol pikinini man. Ol i kolim ol dispela pikinini man olsem Nefilim. Klostu olgeta manmeri ol i manmeri nogut, na pasin bilong bagarapim man i stap long olgeta hap. (Stt. 6:1-5, 9, 11) Maski ol dispela samting i wok long kamap, “wokabaut bilong [Noa] i stret long ai bilong God” na em i no pret na surik long autim tok olsem “man bilong tokaut long stretpela pasin.” (Ritim 2 Pita 2:4, 5.) Yumi tu i mas i gat strongpela bel long dispela taim bilong las de.
OL I GAT BILIP NA STRONGPELA BEL
5. Moses i mekim wanem bilong soim olsem em i gat bilip na strongpela bel?
5 Moses i stap gutpela piksa olsem man i gat bilip na strongpela bel. (Hib. 11:24-27) Kirap long 1513 B.C.E. i go inap long 1473 B.C.E., God i givim wok long em long helpim ol Israel i lusim Isip na kisim ol i go long ples nating. Moses i no ting em inap mekim dispela wok, tasol em i orait long mekim. (Kis. 6:12) Em wantaim brata bilong en, Aron, i go bek planti taim na toktok wantaim man nogut Fero. Ol i no bin surik long tokaut long Tenpela Bikpela Hevi em Jehova i bin yusim bilong kisim bek ol Israel na bilong kamapim klia ol god bilong Isip i no gat strong. (Kis., sapta 7-12) Moses i gat bilip na strongpela bel, long wanem, oltaim God i helpim em, na God i mekim wankain long yumi long nau.—Lo 33:27.
6. Sapos ol man i gat namba i sutim askim long yumi, wanem samting bai helpim yumi long tokaut long bilip bilong yumi wantaim strongpela bel?
6 Yumi save yumi mas i gat strongpela bel olsem Moses. Jisas i tok: “Ol bai pulim yupela i go long ol hetman na ol king, long wanem, yupela i bihainim mi. Olsem na bai yupela inap long autim tok bilong mi long ol na long ol lain man. Tasol taim ol i pulim yupela i go, yupela i no ken tingting planti long wanem tok yupela bai autim. Long wanem, long dispela taim stret yupela bai kisim tok yupela bai autim. I no yupela tasol bai toktok, nogat, spirit bilong Papa bilong yupela bai i autim tok long maus bilong yupela.” (Mat. 10:18-20) Sapos ol man i gat namba i sutim askim long wok bilong God yumi mekim, orait holi spirit bilong Jehova bai helpim yumi long soim rispek long ol taim yumi tokaut long bilip bilong yumi wantaim strongpela bel.—Ritim Luk 12:11, 12.
7. Wanem samting i mekim na Josua i gat strongpela bel na em inapim gut wok bilong em?
7 Josua i kamap lida bilong ol Israel bihain long Moses. Pasin bilong Josua long stadi oltaim long Lo Bilong God i mekim na em i gat bilip na strongpela bel. Long 1473 B.C.E. lain Israel i redi long go insait long Graun Bilong Promis. God i tokim Josua: “Yu mas sanap strong na yu no ken pret na surik.” God i tokim Josua olsem sapos em i bihainim Lo, em bai gat savetingting na em bai mekim gut wok bilong em. God i tokim em: “Yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.” (Jos. 1:7-9) Ol dispela tok i bin strongim tru Josua! Na tru tumas, God i bin stap wantaim em. Yumi save long dispela, long wanem, long 1467 B.C.E., em 6-pela yia bihain long ol i go insait long Graun Bilong Promis, ol i daunim pinis klostu olgeta birua bilong ol.
OL MERI HUSAT I GAT STRONGPELA BEL
8. Bilong wanem Rahap em i stap gutpela piksa long pasin bilong bilip na strongpela bel?
8 Long bipo, planti meri i soim olsem ol i gat strongpela bel taim ol i mekim wok bilong Jehova. Olsem, pamukmeri Rahap bilong Jeriko i bilip olsem Jehova bai lukautim em. Em i bin haitim tupela man bilong lukstil em Josua i bin salim i kam, na em i tokim ol man husat i painim dispela tupela man bilong lukstil long go painim ol long narapela hap. Em yet na famili bilong en i abrusim bagarap taim ol Israel i bagarapim Jeriko. Rahap i lusim pasin nogut na kirap lotuim Jehova na stap gut long em, na Rahap i kamap tumbuna bilong Mesaia! (Jos. 2:1-6; 6:22, 23; Mat. 1:1, 5) Long rot bilong bilip na strongpela bel, Rahap i kisim bikpela blesing.
9. Olsem wanem Debora, Barak, na Jael i soim olsem ol i gat strongpela bel?
9 Josua i dai klostu long yia 1450 B.C.E, bihain long dispela God i makim ol man long mekim wok jas long Israel. King Jabin bilong Kenan i bin mekim pasin nogut tru long ol Israel inap 20 yia. God i mekim wok long profet meri Debora long tokim Jas Barak long pait long dispela king. Barak i bungim 10,000 man long maunten Tabor na em i redi long pait long ami bilong Jabin, em Sisera i kepten bilong en. Sisera na ami bilong en wantaim 900 karis bilong pait i go insait long hap bilong wara Kison i drai pinis. Taim ol Israel i mats i go long dispela ples daun, wantu God i mekim tait wara i kamap. Graun i malumalum tru, olsem na karis bilong ol Kenan i pas. Lain bilong Barak i winim pait, na ami olgeta bilong Sisera i dai. Sisera i laik hait long haus sel bilong wanpela meri, nem bilong em Jael, tasol Jael i kilim em i dai taim em i slip i stap. Olsem Debora i tok profet, ol i givim biknem long wanpela meri na tok olsem em i daunim ol Kenan, dispela meri em Jael. Debora, Barak, na Jael i sanap strong na i no pret, olsem na ol Israel i no kisim hevi long lain Kenan inap 40 yia. (Het. 4:1-9, 14-22; 5:20, 21, 31) Planti man na meri i soim olsem ol tu i gat wankain bilip na strongpela bel.
YUMI INAP MEKIM OL TOK I STRONGIM BEL
10. Olsem wanem yumi save ol tok yumi mekim inap helpim ol arapela long sanap strong?
10 Ol tok yumi mekim inap helpim ol arapela husat i lotuim Jehova long sanap strong. Winim 1,000 yia paslain long Krais, King Devit i tokim pikinini bilong em Solomon olsem: “Sanap strong tru na mekim dispela wok, na maski long larim ol kain kain hevi i daunim yu, long wanem, God, Bikpela bilong mi, em i stap wantaim yu na em bai i helpim yu. Em bai i no inap lusim yu. Nogat. Bai em i stap wantaim yu inap yu pinisim olgeta dispela wok bilong haus bilong en.” (1 Sto. 28:20) Solomon i sanap strong na em i no surik long wok bilong sanapim tempel bilong Jehova long Jerusalem.
11. Olsem wanem tok bilong wanpela yangpela gel Israel husat i gat strongpela bel i bin helpim wanpela man?
11 Klostu 900 yia paslain long Krais, tok bilong wanpela yangpela gel Israel husat i gat strongpela bel i helpim wanpela lepraman long kamap orait na kisim save long Jehova. Ol Siria i bin kisim dispela gel i go kalabus na em i kamap wokmeri bilong kepten bilong ami. Nem bilong kepten em Naman, em wanpela lepraman. Gel i save long ol mirakel Jehova i wokim long han bilong profet Elisa. Olsem na gel i tokim meri bilong Naman olsem sapos man bilong en i go long Israel, Elisa inap oraitim sik bilong em. Naman i mekim olsem gel i tok, na long rot bilong mirakel, sik i pinis, na em i kirap lotuim Jehova. (2 Kin. 5:1-3, 10-17) Sapos yu wanpela yangpela husat i laikim God olsem dispela gel, God bai givim strong long yu long autim tok long ol tisa, ol wanskul, na ol arapela.
12. Tok bilong King Hesekia i mekim wanem long lain bilong em?
12 Sapos wanpela i mekim gutpela tok long narapela taim samting nogut i laik painim em, orait dispela tok inap strongim em. Olsem, taim ol Asiria i mats i go bilong pait long Jerusalem long 732 B.C.E., King Hesekia i tokim ol pipol bilong en: “Yupela i mas sanap strong na i no ken pret long king bilong Asiria wantaim bikpela lain ami bilong en. I tru, ol i gat bikpela strong, tasol yumi gat bikpela strong moa i winim strong bilong ol. King bilong Asiria i kisim strong bilong em long ol man, tasol strong bilong yumi i kam long God, Bikpela bilong yumi. Em i stap wantaim yumi na bai em i helpim yumi na i daunim ol birua bilong yumi.” Ol dispela tok i mekim wanem long ol Juda? Tok i strongim tru bel bilong ol. Baibel i tok: “Ol manmeri i harim tok bilong king, na dispela tok i strongim bel bilong ol.” (2 Sto. 32:7, 8) Ol gutpela tok olsem Hesekia i bin mekim inap helpim yumi na ol arapela Kristen long sanap strong na no ken surik taim ol man i mekim nogut long yumi.
13. Wanem samting i mekim na bosboi bilong King Ahap, Obadia, i stap olsem gutpela piksa olsem man i gat strongpela bel?
13 Sampela taim yumi pasim maus na dispela i kamapim olsem yumi gat strongpela bel. Long 900 B.C.E. samting, Obadia, bosboi bilong King Ahap, i gat strongpela bel na em i haitim 100 profet bilong Jehova, “50 long narapela hul na 50 long narapela hul” na bai kwin nogut Jesebel i no kilim ol i dai. (1 Kin. 18:4) Planti wokboi bilong Jehova long nau i bin kamapim olsem ol i gat strongpela bel taim ol i no tokim ol birua long nem bilong ol brata bilong ol, na long dispela rot ol i stap olsem Obadia, man husat i pret long God.
KWIN ESTA I GAT STRONGPELA BEL
14, 15. Olsem wanem Kwin Esta i soim olsem em i gat bilip na strongpela bel? Wanem samting i bin kamap?
14 Kwin Esta i soim olsem em i gat bilip na strongpela bel. Winim 400 yia paslain long Krais, man nogut Haman i stretim rot long kilim i dai olgeta Juda i stap aninit long wok bos bilong kantri Persia. Taim ol Juda i harim olsem ol man bai kilim ol i dai, ol i krai sori na tambu long kaikai. Na tu, ating ol i bin beten strong long dispela. (Est. 4:1-3) Kwin Esta i wari tru long ol Juda. Kasen bilong en, Mordekai, i salim kopi bilong lo i tok olsem ol man i mas kilim i dai ol Juda. Mordekai i tokim Esta long go long king na askim em long helpim ol wanlain bilong Esta. Tasol sapos wanpela i go lukim king taim king i no singautim em, orait ol bai kilim em i dai.—Est. 4:4-11.
15 Mordekai i tokim Esta olsem sapos em i no go toktok wantaim king, Jehova bai kisim bek ol Juda long narapela rot. Mordekai i tokim Esta olsem nogut Esta i bin kamap kwin bilong helpim lain bilong Jehova. Esta i askim Mordekai long bungim ol Juda bilong Susa na ol i mas tambu long kaikai. Esta i tok: ‘Mi tu bai i tambu long kaikai. Na bihain long dispela, mi bai go long king. Maski, mi ken sakim lo. Sapos mi mekim olsem na mi dai, i no gat tok, mi ken i dai tasol.’ (Est. 4:12-17) Esta i sanap strong na i no surik, na Buk Esta i stori olsem God i bin kisim bek lain bilong en. Long nau, ol Kristen God i bin makim na ol arapela sipsip i bihainim wankain pasin taim ol i karim hevi. Na Jehova, em Man bilong “harim beten,” i save helpim ol.—Ritim Song 65:2; 118:6.
“STRONGIM BEL”
16. Olsem wanem Jisas i stap gutpela piksa long ol yangpela?
16 Taim Jisas i gat 12-pela krismas, papamama i lukim em i stap long tempel, em i “sindaun namel long ol tisa na putim yau long tok bilong ol na givim ol askim long ol.” Na “lain husat i harim ol tok bilong en ol i kirap nogut long save bilong en na ol tok em i bekim long ol.” (Luk 2:41-50) Na maski em i yangpela tasol, bilip na pasin bilong em long sanap strong na i no surik i kirapim em long givim askim long ol tisa long tempel husat i gat bikpela krismas. Ol yangpela insait long kongrigesen Kristen i mas tingim eksampel bilong Jisas. Dispela bai helpim ol long autim tok long ol man na stori long as bilong bilip bilong ol taim rot i op.—1 Pita 3:15.
17. Bilong wanem Jisas i tokim ol disaipel long “strongim bel”? Bilong wanem yumi mas strongim bel?
17 Jisas i bin tokim sampela long “strongim bel.” (Mat. 9:2, 22) Em i tokim ol disaipel: “Harim! Taim i laik kamap, na tru tumas, nau em i kamap pinis we yupela bai ranawe i go long haus bilong yupela wan wan na lusim mi i stap wanpis. Tasol mi no stap wanpis, long wanem, Papa i stap wantaim mi. Mi tokim yupela long ol dispela samting bai yupela i ken stap bel isi long rot bilong mi. Long graun yupela i karim pen na hevi, tasol strongim bel! Mi winim pinis strong bilong dispela graun.” (Jon 16:32, 33) Ol manmeri bilong graun i heitim yumi olsem ol i bin heitim ol disaipel bilong Jisas bilong pastaim, tasol yumi no laik insait long ol samting bilong dispela graun. Yumi inap sanap strong na sakim ol samting bilong dispela graun sapos yumi skelim long bel eksampel bilong Jisas long strongim bel. Em i winim pinis strong bilong dispela graun, na yumi tu inap mekim olsem.—Jon 17:16; Jems 1:27.
“SANAP STRONG!”
18, 19. Olsem wanem aposel Pol i kamapim olsem em i bilip na i gat strongpela bel?
18 Aposel Pol i bin karim planti hevi. Wanpela taim ol Juda long Jerusalem i laik kilim Pol i dai, tasol ol soldia bilong Rom i kisim bek em. Long nait, “Bikpela i kam sanap klostu long Pol na i tok: ‘Sanap strong! Yu bin autim tok na kamapim gut stori bilong mi long Jerusalem, na yu mas tokaut long Rom tu.’” (Apo. 23:11) Pol i bihainim stret ol samting Jisas i tokim em long mekim.
19 Pol i no pret taim em i tokim “ol smatpela aposel,” husat i laik bagarapim kongrigesen long Korin, olsem pasin bilong ol i kranki. (2 Kor. 11:5; 12:11) Ol dispela man em ol giaman aposel. Tasol long rot bilong ol hevi i painim Pol, em inap kamapim klia olsem Jisas i bin salim em, em ol hevi olsem stap kalabus, ol man i paitim em, ol hevi i painim em long raun bilong en, hangre, nek i drai, planti taim em i no slip gut, na em i wari long ol kongrigesen. (Ritim 2 Korin 11:23-28.) Gutpela eksampel bilong Pol long pasin bilong bilip na sanap strong na i no surik i kamapim klia olsem em i kisim strong i kam long God!
20, 21. (a) Kamapim eksampel i soim olsem yumi mas i gat strongpela bel na bai yumi ken karim ol hevi. (b) Long wanem taim yumi gat wok long soim olsem yumi gat strongpela bel? Na yumi ken bilip tru long wanem samting?
20 I no olgeta Kristen bai karim hevi long ol man i mekim nogut tru long ol. Tasol yumi olgeta i mas i gat strongpela bel na bai yumi ken karim ol hevi i kamap long laip bilong yumi. Olsem, wanpela yangpela man long Brasil i insait long wanpela geng. Bihain long em i stadi long Baibel, em i luksave olsem em i mas mekim sampela senis. Tasol taim wanpela i lusim geng, ol i save kilim em i dai. Em i beten na yusim ol skripsa long soim lida bilong geng as na em i mas lusim geng. Ol i larim dispela yangpela man long i go na ol i no mekimsave long em, na bihain em i kamap pablisa.
21 Planti samting i mekim na yumi mas i gat strongpela bel. Yumi nidim dispela pasin na bai yumi inap autim gutnius. Ol yangpela long skul i mas i gat strongpela bel bilong holimpas bilip. Ol man i wok i mas i gat strongpela bel bilong kisim tok orait long bos long go long olgeta de bilong kibung. Na yumi inap kamapim planti narapela eksampel. Maski wanem samting i kamap, Jehova bai harim ‘beten bilong yumi ol man i bilip.’ (Jems 5:15) Na em inap givim holi spirit bilong em long yumi na bai yumi inap ‘sanap strong na i no surik’!
[Askim Bilong Stadi]
[Piksa long pes 11]
Enok i sanap strong na i no surik long autim tok long ol man nogut
[Piksa long pes 12]
Jael i gat strongpela bel
