Wanpela Pasin We Inap Bagarapim Tingting Bel Nogut

Napoleon, Julius Sisar, na King Alexander, ol i gat dispela pasin. Maski ol i gat namba, ol i gat wanpela pasin i olsem posin. Sapos man i gat dispela pasin, dispela inap bagarapim tingting bilong en. Dispela 3-pela man i bin bel nogut.

Saveman Bertrand Russell bilong Inglan i tok Napoleon i bel nogut long Sisar, na Sisar i bel nogut long Bikpela King Aleksander, na Aleksander i bel nogut long Hekulis, em man i stap insait long ol stori nating tasol. Man i gat planti mani, save long mekim ol samting, na i gat gutpela sindaun, ol kain man tu inap kisim pasin bilong bel nogut.

Man inap bel nogut long narapela husat i gat mani, namba, na ol arapela samting. Wanpela buk i stori long Baibel i tok pasin jeles i makim olsem yu laik kisim wankain samting narapela i gat, tasol pasin bilong bel nogut i nogut moa. Man i bel nogut i save jeles long samting narapela i gat na em i laik kisim long em.

Em savetingting long skelim olsem wanem yumi inap kisim pasin bilong bel nogut na dispela inap mekim wanem long yumi. Yumi mas save long samting yumi mas mekim na bai pasin bilong bel nogut i no ken bosim laip bilong yumi.

I MEKIM MAN I BEL NOGUT MOA YET

“Pasin bilong bel nogut” i stap insait long ol sinman. Tasol sampela samting inap mekim man i bel nogut moa yet. (Jems 4:5) Aposel Pol i stori long wanpela samting olsem, em i tok: “Yumi no ken hambak, na yumi no ken kirapim pasin bilong resis wantaim ol arapela, na no ken bel nogut long ol arapela.” (Gal. 5:26) Sapos yumi gat pasin we yumi laik winim ol arapela, orait pasin bilong bel nogut i stap long yumi ol sinman inap go nogut moa. Tupela Kristen, Cristina na José a i kisim save olsem dispela tok em i tru.

Cristina, wanpela painia oltaim, i tok: “Planti taim mi save bel nogut long ol arapela. Mi skelim ol samting ol i gat wantaim ol samting mi no gat.” Wanpela taim, Cristina i bung na kaikai wantaim tupela marit husat i mekim wok sekit. Cristina na man bilong en, Eric, i gat klostu wankain krismas olsem bilong wasman sekit na meri bilong en, na bipo ol i bin mekim wankain wok bilong Kingdom. So Cristina i tok: “Man bilong mi wanpela elda tu! So wai na yupela i mekim wok sekit na mipela i olsem samting nating?” Laik bilong em long winim ol arapela i mekim na em i bel nogut. Dispela laik i kirapim em long lusim tingting long ol gutpela wok em yet na man bilong en i mekim, na em i no amamas long i stap bilong ol.

José i laik kamap kongrigesen sevan. Taim ol i makim sampela long kamap kongrigesen sevan na ol i no makim em, em i bel nogut long ol. Na em i kros long kodineta bilong lain elda. José i tok em i kirap heitim dispela elda na i ting olsem dispela brata i no laik bai em i holim wok insait long kongrigesen. José i tok taim bel nogut i bosim yu, yu no inap tingting stret. Yu bai tingim yu yet tasol.

 OL EKSAMPEL BILONG BAIBEL I SKULIM YUMI

I gat planti eksampel long Baibel i stap olsem tok lukaut bilong yumi. (1 Kor. 10:11) Sampela i stori long olsem wanem pasin bilong bel nogut i kirap na i go bikpela. Na tu, ol i soim olsem wanem pasin bilong bel nogut i kain olsem posin long tingting bilong ol man husat i larim dispela pasin i bosim ol.

Olsem, fesbon bilong Adam na Iv, Kein, i kros taim Jehova i amamas long sakrifais bilong Abel, tasol bilong em yet nogat. Kein inap mekim pasin i stret, tasol em bel nogut tru long brata bilong en Abel na kilim em i dai. (Stt. 4:4-8) Olsem na Baibel i tok, Kein “i stap long sait bilong Satan”!—1 Jon 3:12.

Tenpela brata i bel nogut long Josep i pas gut tru wantaim papa bilong ol. Ol i heitim Josep moa yet taim em i tokim ol long ol driman bilong en i stori long ol samting bai kamap bihain. Ol i laik kilim em i dai. Bihain, ol i salim em go kamap wokboi nating na tokim papa olsem Josep i dai pinis. (Stt. 37:4-11, 23-28, 31-33) Planti yia bihain, ol i tokaut long rong bilong ol na namel long ol yet ol i tok: “Tru tumas, yumi bin mekim nogut long brata bilong yumi na yumi gat asua. Yumi bin lukim em i krai na singaut long yumi bilong helpim em, tasol yumi no bin harim tok bilong em.”—Stt. 42:21; 50:15-19.

Kora, Datan, na Abiram i bel nogut taim ol i skelim wok bilong ol wantaim wok Moses na Aron i mekim. Ol i tok Moses i laik stap bos bilong ol na em i mekim olsem em i winim ol arapela. (Nam. 16:13) Tasol tok ol i sutim i no tru. (Nam. 11:14, 15) Jehova yet i bin makim Moses. Tasol ol dispela man i bel nogut long wok Moses i holim. Pasin bilong ol long bel nogut i mekim na bihain Jehova i bagarapim ol.—Sng. 106:16, 17.

King Solomon i lukim ol hevi em pasin bilong bel nogut inap kirapim man long mekim. Bebi bilong wanpela meri i dai, na dispela meri i giaman na tok olsem bebi i dai i no bilong em, nogat, em bebi bilong narapela meri. Taim ol i go lukim Solomon bilong stretim dispela hevi, meri husat i giaman i wanbel taim ol i tok long ol i mas katim bebi husat i stap laip yet. Tasol Solomon i mekim ol samting na bai mama tru i kisim dispela bebi.—1 Kin. 3:16-27.

Pasin bilong bel nogut inap kamapim samting i nogut tru. Ol eksampel nau tasol yumi bin stori long en i soim olsem dispela pasin inap kirapim man long heitim narapela, mekim pasin i no stret long narapela, na kilim man i dai. Na long ol dispela eksampel, man em narapela i bel nogut long en, em i no bin mekim rong. Yumi inap mekim wanem na pasin bilong bel nogut i no ken bosim laip bilong yumi?

BILONG DAUNIM PASIN BILONG BEL NOGUT

Laikim na tingim tru ol bratasista. Aposel Pita i tokim ol Kristen: “Yupela i bin bihainim tok i tru na dispela i mekim yupela i kamap klin, na yupela i kisim pasin bilong laikim tru ol brata. Yupela i mas laikim tru ol arapela long bel olgeta.” (1 Pita 1:22) Pasin laikim em wanem samting? Aposel Pol i tok: “Man i gat pasin laikim em i no save les kwik, na em  i save mekim gutpela pasin. Em i no save jeles, em i no save hambak, em i no gat pasin antap, em i no save bikhet nabaut, em i no save tingim em yet.” (1 Kor. 13:4, 5) Sapos pasin bilong laikim ol arapela i stap long bel bilong yumi, orait dispela bai daunim pasin bilong bel nogut. (1 Pita 2:1) Jonatan i no bin bel nogut long Devit, nogat, em i laikim em tru olsem em i laikim em yet.—1 Sml. 18:1.

Bung wantaim ol lain i mekim wok bilong God. Man i raitim Song 73 i bel nogut long ol bikhetman husat i gat gutpela sindaun na i no gat hevi. Tasol em inap lusim dispela pasin bilong bel nogut taim em i go insait long ‘haus bilong God.’ (Sng. 73:3-5, 17) Pasin bilong em long bung wantaim ol lain i lotuim God i helpim em long luksave long ol blesing em i gat, long wanem, em i stap pren bilong God. (Sng. 73:28) Wankain tu, pasin bilong bung oltaim wantaim ol bratasista long miting inap helpim yumi.

Painim rot long mekim ol gutpela pasin. Taim Jehova i luksave olsem Kein i bel nogut na kros, God i tokim em: “Mekim gutpela pasin.” (Stt. 4:7) Dispela tok “mekim gutpela pasin” i makim olsem ol Kristen i mas mekim wanem? Jisas i tok yumi mas laikim tru Jehova long bel olgeta, long laip olgeta, na long tingting olgeta, na yumi mas laikim ol arapela man olsem yumi laikim yumi yet. (Mat. 22:37-39) Sapos wok bilong Jehova na pasin bilong helpim ol arapela i nambawan bikpela samting long laip bilong yumi, orait bai yumi stap amamas. Na pasin bilong stap amamas bai helpim yumi long lusim pasin bilong bel nogut. Taim yumi givim bel tru long mekim wok autim tok bilong Kingdom na kamapim ol disaipel, yumi mekim gutpela wok bilong lotuim God na yumi helpim tru ol arapela man, na Jehova bai blesim yumi.—Snd. 10:22.

“Amamas wantaim ol man i amamas.” (Rom 12:15) Jisas i amamas taim ol gutpela samting i kamap long wok ol disaipel i mekim long autim tok, na em i tok ol bai mekim planti wok moa, winim em. (Luk 10:17, 21; Jon 14:12) Ol wokboi bilong Jehova i stap wanbel. Taim gutpela samting i kamap long wanpela bilong yumi, yumi olgeta i pilim amamas. (1 Kor. 12:25, 26) So yumi mas amamas taim ol arapela i kisim bikpela wok moa, na yumi no ken bel nogut.

BEL NOGUT—I HATWOK LONG BOSIM!

Ating yumi mas wok oltaim long bosim pasin bilong bel nogut. Cristina i tok: “Mi gat hevi yet long bel nogut long narapela. Maski mi no laikim, sampela taim dispela tingting i kamap long bel bilong mi.” Olgeta taim em i mas wok long daunim dispela pasin. José tu i pilim olsem. Em i tok olsem Jehova i bin helpim em long pilim tru ol gutpela pasin bilong kodineta. José i tok em inap mekim olsem, long wanem, em i pas gut wantaim God.

Bel nogut em wanpela pasin em “laik nogut bilong bel” i as bilong en, na olgeta Kristen i mas wok strong long sakim. (Gal. 5:19-21) Sapos yumi no larim pasin bilong bel nogut i bosim yumi, orait bai yumi gat bikpela amamas moa. Na tu, yumi bai amamasim Papa bilong yumi long heven, em Jehova.

[Futnot]

[Rait long pes 17]

“Amamas wantaim ol man i amamas”