No Ken Lukluk Long “Ol Samting i Stap Baksait”

“Man i putim han long tul bilong brukim graun na lukluk i go long ol samting i stap baksait, dispela man i no fit long i go insait long Kingdom bilong God.”—LUK 9:62.

BAI YU BEKIM OLSEM WANEM?

Bilong wanem yumi mas “tingim meri bilong Lot”?

Wanem 3-pela samting yumi no ken tingim tingim?

Yumi ken mekim wanem bilong muv i go het wantaim oganaisesen bilong Jehova?

1. Jisas i mekim wanem tok lukaut? Dispela i kamapim wanem askim?

 “YUPELA i mas tingim meri bilong Lot.” (Luk 17:32) Jisas Krais i mekim dispela strongpela tok lukaut klostu 2,000 yia i go pinis. Dispela tok lukaut i bikpela samting tru long nau, winim olgeta taim bipo. Wanem mining bilong tok bilong Jisas? Em i toktok wantaim ol Juda, na ol i kliagut tru long samting i bin kamap long meri bilong Lot. Taim dispela meri i ranawe lusim Sodom wantaim famili bilong en, em i sakim tok bilong Jehova na lukluk i go bek. Long dispela as, em i tanim i kamap sol.—Ritim Stat 19:17, 26.

2. Ating i gat wanem as na meri bilong Lot i lukluk i go bek? Wanem samting i painim em taim em i sakim tok?

² Tasol bilong wanem meri bilong Lot i bin lukluk i go bek? Ating em i laik lukim wanem samting i kamap. O nogut em i tanim, long wanem, em i hatwok long bilip olsem taun i kisim bagarap. Ating bilip bilong em i no strong. O nogut em i laik go bek long ol samting em i lusim. (Luk 17:31) Maski i gat wanem as na em i lukluk i go bek, em i dai taim em i sakim tok. Tingim, em i dai long dispela wankain de olsem ol man nogut bilong Sodom na Gomora. Dispela em i as na Jisas i tok: “Yupela i mas tingim meri bilong Lot.”

3. Olsem wanem Jisas i bin kamapim poin olsem yumi no ken lukluk long ol samting i stap baksait?

³ Gutpela sapos meri bilong Lot i no bin lukluk i go long ol samting i stap baksait. Long wankain pasin yumi no ken lukluk i go bek, olsem tingim tingim ol samting yumi bin lusim. Jisas i kamapim dispela poin taim em i toktok wantaim wanpela man husat i laik kamap disaipel. Man i tok pastaim em i laik go bek long famili na tok gutbai long ol. Jisas i tokim em: “Man i putim han long tul bilong brukim graun na lukluk i go long ol samting i stap baksait, dispela  man i no fit long i go insait long Kingdom bilong God.” (Luk 9:62) Yu ting bekim bilong Jisas i strong tumas o em i mekim hatpela pasin? Nogat. Jisas i save olsem man i kamapim ol eskius nating, long wanem, man i les long ol wok bilong kamap disaipel. Jisas i tok man husat i les long mekim ol wok God i tok em i mas mekim, i olsem em i “lukluk i go long ol samting i stap baksait.” Ating man i brukim graun long gaden, i lukluk i go bek long taim em i wok long brukim graun o em i lusim tul bilong brukim graun na lukluk i go bek. Maski i gat wanem as na em i lukluk i go bek, dispela i pulim tingting bilong em na em i no mekim gut wok.

4. Yumi mas tingting long wanem samting?

⁴ Yumi mas tingting long ol samting bai kamap bihain na i no long ol samting i bilong bipo. Long Sindaun 4:25 Baibel i tok klia olsem: “Yu mas lukluk stret long rot yu laik i go long en. Yu no ken lukluk nabaut.”

5. Bilong wanem yumi no ken lukluk long ol samting i stap baksait?

⁵ I gutpela yumi no lukluk long ol samting i stap baksait. Em long wanem nau em i “taim bilong las de.” (2 Tim. 3:1) Klostu nau God bai pinisim olgeta pasin nogut bilong dispela graun, i no tupela taun nogut tasol. Yumi inap mekim wanem na ol samting i no ken pulim nabaut tingting bilong yumi olsem i bin pulim tingting bilong meri bilong Lot? Yumi mas save long ol samting em inap kirapim yumi long lukluk i go bek sapos yumi no was gut. (2 Kor. 2:11) Olsem na yumi ken skelim ol i wanem samting na yumi mas mekim wanem na bai ol dispela samting i no ken pulim tingting bilong yumi.

TING OLSEM TAIM BIPO I GUTPELA MOA

6. Bilong wanem yumi no ken bilip long pasin bilong yumi long tingim ol samting bilong bipo?

⁶ Nogut yumi ting taim bipo i gutpela moa. Pasin bilong yumi long tingim ol samting bilong bipo inap kranki liklik. Sapos yumi no was gut, yumi inap ting ol hevi yumi bin karim bipo i no bikpela tumas na yumi bin stap amamas tru winim long nau. Sapos yumi kisim tingting kranki olsem, ating bai yumi gat bikpela laik long ol samting i mas i stap olsem bipo. Tasol Baibel i tok lukaut long yumi olsem: “Yu no ken tok, ‘Olsem wanem na taim bipo i winim dispela taim nau?’ Sapos yu mekim kain tok olsem, yu no gat gutpela save.” (Sav. 7:10) Bilong wanem kain tingting olsem em inap kamapim hevi?

7-9. (a) Wanem samting i painim ol Israel long Isip? (b) Wanem ol samting i mekim ol Israel i amamas? (c) Ol Israel i kirap komplein long wanem samting?

⁷ Tingim samting i kamap long ol Israel long taim bilong Moses. Pastaim ol Israel i go sindaun long Isip, na ol Isip i amamas long ol. Tasol Josep i dai na bihain ol Isip i makim “ol bosman bilong hatim ol Israel long wok bai ol i mekim ol Israel i wok hat tru.” (Kis. 1:11) Bihain, Fero i bin tokim lain bilong em long kilim i dai ol nupela pikinini man bilong ol Israel, long wanem, em i no laik bai ol Israel i kamap planti. (Kis. 1:15, 16, 22) Olsem na Jehova i tokim Moses: “Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi long kisim bek ol long han bilong ol bosman nogut. Mi harim pinis dispela singaut na mi save tru long pen na hevi ol i karim.”—Kis. 3:7.

⁸ Tingim amamas ol Israel i bin pilim taim ol i lusim Isip na kamap fri. Ol i bin lukim pasin bilong Jehova long yusim strong bilong em  taim em i kamapim Tenpela Bikpela Hevi long bikhet Fero na ol Isip. (Ritim Kisim Bek 6:1, 6, 7.) Bihain ol Isip i larim ol Israel i go. Ol Isip i bin tokim ol Israel long go hariap na ol i givim ol Israel planti gol na silva, Baibel i tok lain bilong God i “kisim olgeta samting bilong ol Isip.” (Kis. 12:33-36) Ol Israel i bin amamas taim ol i lukim Jehova i bagarapim Fero na ami bilong em long Retsi. (Kis. 14:30, 31) I luk olsem bilip bilong ol i mas strong tru taim ol i lukim ol samting Jehova i bin mekim!

⁹ Em hat long bilipim olsem sotpela taim bihain long Jehova i wokim mirakel na mekim ol Israel i kamap fri, ol Israel i kirap komplein. Ol i komplein long wanem samting? Kaikai! Ol i no amamas moa long kaikai Jehova i givim ol, ol i tok: “Long Isip mipela i bin kaikai planti pis mipela i bin kisim nating. Na mipela i bin kisim ol kukamba na melen na olkain anian. Tasol nau strong bilong mipela i go pinis. Na mipela i no gat kaikai. Dispela mana tasol i stap na mipela i les tru long en.” (Nam. 11:5, 6) Olsem na pasin bilong ol long tingim ol samting bilong bipo i kranki olgeta. Tingting bilong ol i kranki tru, ol i laik go bek long ples we ol i bin stap wokboi nating! (Nam. 14:2-4) I olsem ol Israel i bin lukluk i go baksait, na Jehova i belhat long ol.—Nam. 11:10.

10. Ol samting i kamap long ol Israel i givim wanem skul long yumi?

¹⁰ Dispela i givim wanem skul long yumi long nau? Taim yumi gat ol hevi, yumi no ken tingim ol samting bilong bipo, ating taim yumi no kisim yet tok i tru, i gutpela moa. I no gat rong long kisim skul long ol samting i bin kamap bipo o long tingim sampela amamas yumi bin kisim bipo. Tasol taim yumi tingim ol samting bilong bipo, yumi laik tingting stret na tingim ol samting tru tru i bin kamap. Sapos yumi no mekim olsem, yumi inap bel hevi moa yet long laip bilong yumi long nau, na yumi laik bai sindaun bilong yumi i wankain olsem bipo.—Ritim 2 Pita 2:20-22.

OL GUTPELA SAMTING YUMI BIN LUSIM

11. Sampela i gat wanem tingting long ol gutpela samting ol i bin lusim?

¹¹ Sori tru, sampela i tingim ol gutpela samting ol i bin lusim na ol i ting mobeta ol i no bin lusim. Ating yu bin i gat rot long kisim bikpela skul, biknem, o planti mani, tasol yu bin wokim disisen long yu no ken kisim ol dispela samting. Planti bratasista i bin i gat ol gutpela wok mani. Olsem, ating ol i bin i gat wok bisnis bilong ol yet, o biknem long wokim musik, o mekim wok profesa long ol yunivesiti, o biknem long pilai spot. Tasol ol i lusim ol dispela wok. Nau sampela yia i lus na pinis i no kamap yet. Olsem wanem? Yu wok long tingim olsem sindaun bilong yu bai i wanem kain sapos yu no bin lusim ol dispela samting?

12. Pol i gat wanem tingting long ol samting em i bin lusim?

¹² Aposel Pol i bin lusim planti samting bilong kamap disaipel bilong Krais. (Fili. 3:4-6) Em i gat wanem tingting long ol samting em i bin lusim? Em i tok: “Ol samting em inap helpim mi, mi amamas long lusim ol dispela samting bilong bihainim Krais.” Wanem as na em i pilim olsem? Em i tok moa: “Mi tingim olgeta samting i olsem samting nating, na as bilong dispela tingting em nambawan gutpela save long Krais Jisas, Bikpela bilong mi. Long em tasol, mi orait long olgeta samting i lus na mi tingim ol olsem pipia nating. Mi mekim olsem bai mi  ken kisim Krais.” a (Fili. 3:7, 8) Sapos man i tromoi pipia, em i no save bel hevi long dispela samting long bihain. Long wankain pasin, Pol i no bel hevi long em i bin lusim ol gutpela samting bilong dispela graun. Em i no gat tingting moa olsem em ol samting i gutpela tumas.

13, 14. Olsem wanem yumi ken bihainim pasin bilong Pol?

¹³ Yumi mas mekim wanem sapos yumi wok long tingim ol gutpela samting yumi bin lusim long bipo? Yumi mas bihainim pasin bilong Pol. Olsem wanem yumi ken mekim? Tingim ol gutpela samting yu gat long nau. Yu pas gut wantaim Jehova, na em i save olsem yu save sambai long em na tok i tru. (Hib. 6:10) I no gat wanpela samting bilong dispela graun yumi inap kisim i winim ol samting Jehova i givim yumi long nau na em bai givim long bihain.—Ritim Mak 10:28-30.

¹⁴ Orait, nau Pol i kolim samting em bai helpim yumi long stap gut long Jehova na mekim yet wok bilong em. Pol i tok “mi wok long lusim tingting long ol samting bilong bipo na mi wok strong long kisim ol samting bai kamap bihain.” (Fili. 3:13) Long dispela ves Pol i stori long 2-pela samting yumi mas mekim. Namba 1, yumi mas lusim tingting long ol samting bilong bipo. Yumi no ken westim taim na strong bilong yumi long tingim tingim ol samting bilong bipo. Namba 2, olsem man i kam klostu long pinis bilong resis, yumi mas wok strong. Yumi mas tingting long ol samting bai kamap bihain.

15. Bilong wanem i gutpela long tingting long ol eksampel bilong ol gutpela wokman bilong God?

¹⁵ Tingting long eksampel bilong ol gutpela wokman bilong God bilong bipo na bilong nau. Pasin bilong ol bai strongim yumi long lukluk long ol samting bai kamap bihain na no ken lukluk long ol samting i stap baksait. Sapos Abraham na Sara i bin tingting yet long Ur, “orait rot inap op long ol i go bek.” (Hib. 11:13-15) Tasol ol i no bin go bek long Ur. Taim Moses i lusim Isip long namba 1 taim, em i lusim planti samting, winim ol samting ol Israel i bin lusim long bihain. Tasol Baibel i no stori olsem em i laik kisim bek ol dispela samting. Nogat. Baibel i tok: “Em i ting sem em i kisim olsem Man em God i Makim, dispela i gutpela samting moa, winim ol samting i dia tumas bilong Isip. Em i tingting strong long gutpela pe em bai kisim.”—Hib. 11:26.

OL HEVI YUMI BIN KARIM

16. Ating yumi gat wanem tingting long sampela samting i painim yumi long bipo na i bin givim hatwok long yumi?

¹⁶ Ating sampela samting i bin kamap long yumi long bipo na i bin givim hatwok tru long yumi. Olsem, ating oltaim yumi tingting planti long sampela sin o popaia yumi bin mekim long bipo. (Sng. 51:3) Ating yumi kros o bel hevi yet long sampela tok kaunsel yumi bin kisim. (Hib. 12:11) O wanpela i bin mekim pasin i no stret long yumi o yumi yet i ting i no stret, na yumi no inap lusim tingting long dispela. (Sng. 55:2) Yumi ken mekim wanem na yumi no tingting yet long ol dispela kain samting? Bai yumi skelim 3-pela eksampel.

17. (a) Bilong wanem Pol i pilim olsem em i no gutpela man olsem ol arapela man insait long lain holi? (b) Olsem wanem Pol i no larim rong em i mekim bipo i daunim em?

¹⁷ Ol rong yumi bin mekim bipo. Pol i tok  em i pilim olsem em i no gutpela man olsem ol arapela man insait long lain holi. (Efe. 3:8) Bilong wanem em i pilim olsem? Long wanem, em i bin mekim nogut long kongrigesen bilong God. (1 Kor. 15:9) Ating bel bilong Pol i gat tok taim em i bungim ol bratasista bipo em i bin mekim nogut long ol. Tasol em i no larim dispela tingting i daunim em. Nogat. Em i wok long tingim pasin marimari na pasin helpim God i bin mekim long em. (1 Tim. 1:12-16) Dispela i mekim na Pol i tenkyu tru long God, na em i laik mekim yet wok bilong em. Taim Pol i tok em i laik lusim tingting long ol samting bilong bipo, dispela i makim tu ol rong em i bin mekim. Ol rong yumi mekim pinis yumi no inap senisim. Yumi lusim nating strong bilong yumi sapos yumi wok long tingim tingim dispela samting. Mobeta yumi tingim pasin marimari Jehova i bin mekim long yumi na yusim strong bilong yumi long mekim wok bilong em long nau.

18. (a) Wanem samting inap kamap sapos yumi wok long tingim tingim ol strongpela tok kaunsel yumi bin kisim long bipo? (b) Olsem wanem yumi ken bihainim tok Solomon i bin mekim long amamas long kisim tok kaunsel?

¹⁸ Strongpela tok kaunsel. Ating yumi wok long tingim tingim sampela tok kaunsel yumi bin kisim long bipo. Dispela inap mekim yumi bel hevi o kros na kirapim yumi long givap. (Hib. 12:5) Sapos yumi sakim dispela tok kaunsel wantu, o yumi harim na bihain yumi givap, samting i painim yumi i wankain. Yumi no larim dispela tok kaunsel long helpim yumi. Em bai gutpela moa long bihainim tok bilong Solomon: “Oltaim yu mas holimpas dispela gutpela tok bilong mi [“bilong stretim yu,” NW ]. Em i olsem as bilong laip bilong yu, olsem na yu mas lukautim gut.” (Snd. 4:13) Olsem draiva i bihainim ol sainbot long rot, yumi mas harim tok kaunsel, bihainim, na go het.—Snd. 4:26, 27; ritim Hibru 12:12, 13.

19. Olsem wanem yumi ken bihainim pasin bilong Habakuk na Jeremaia long bilip?

¹⁹ Narapela i mekim pasin i no stret long yumi o yumi ting i no stret. Ating sampela taim yumi pilim wankain olsem profet Habakuk, em i singaut long Jehova i mas mekim stretpela kot. Em i no kliagut long as na Jehova i larim ol man i mekim pasin i no stret. (Hab. 1:2, 3) Yumi mas bihainim pasin bilong dispela profet long bilip, em i bin tok: “Maski dispela olgeta hevi i kamap, bai mi amamas na belgut. Long wanem, Bikpela em i God na em i save kisim bek mi.” (Hab. 3:18) Narapela man husat i stap gutpela piksa long pasin bilong bilip em Jeremaia, em i “wet strong long God i helpim [em].” Yumi ken bihainim pasin bilong Jeremaia sapos yumi bilip tru olsem Jehova, God bilong mekim stretpela pasin, bai stretim olgeta samting long taim stret.—Kra. 3:19-24.

20. Yumi ken mekim wanem bilong soim olsem ‘yumi tingim meri bilong Lot’?

²⁰ Ol bikpela samting tru i wok long kamap long taim bilong yumi na klostu nau sampela samting moa bai kamap. Oganaisesen bilong Jehova i wok long muv i go het, na yumi mas muv i go wantaim em. Yumi mas bihainim tok bilong Baibel long lukluk long ol samting bai kamap bihain, no ken lukluk long ol samting i stap baksait. Long dispela rot yumi bai kamapim klia olsem ‘yumi tingim meri bilong Lot’!

[Futnot]

[Askim Bilong Stadi]