“Plis Inap Yu Kisim Piksa Bilong Mipela?”

Bihain long namba 2 de bilong kibung distrik, Josué, wanpela brata i wok long brens long Meksiko, em i raun lukim Querétaro siti. Tupela marit turis bilong Kolambia, em Javier na Maru, tupela i askim Josué long kisim piksa bilong tupela. Josué na ol pren bilong em ol i Witnes, na ol i bilas gut na ol i pasim kat bilong kibung, olsem na dispela tupela marit i askim ol olsem ol i kam long wanpela gretiuesen o ol i bin go long wanpela spesel bung na kam. Josué i stori olsem ol i go long wanpela kibung bilong ol Witnes Bilong Jehova, na Josué i singautim tupela long i kam long kibung long Sande.

Tupela i no gat gutpela klos bilong kain bung, olsem na tupela i sem long i go long kibung. Maski i olsem, Josué i givim nem bilong em long tupela na telefon namba bilong brens ofis em i wok long en.

Fopela mun bihain, Josué i kirap nogut long Javier i ringim em. Dispela tupela marit i bin go long kibung. Taim tupela i go bek long ples ol i stap long en, em Mexico City, ol i laik bai ol Witnes Bilong Jehova i go lukim ol. Javier na Maru i kirap stadi long Baibel na go long ol miting. Tenpela mun bihain, tupela i kamap pablisa. Bihain ol i muv i go long Toronto long Kanada, na ol i wok yet long stadi na kamap strong, na bihain ol i kisim baptais.

Bihain, Josué i kisim pas long Javier na em i stori long samting i bin kirapim em long kisim tok i tru. Em i tok: “Paslain long mipela i bungim yupela, mi na meri bilong mi i bin toktok long mipela i mas kisim helpim long God long stiaim mipela long laip bilong mipela. Taim mipela i lukim yupela i bilas gut, mipela i ting olsem yupela i bin go long wanpela spesel bung. Taim mipela i kam long kibung, mipela i pilim tru gutpela pasin laikim bilong ol bratasista long helpim mipela long kisim ples sindaun, na long painim ol skripsa long Baibel. Maski bilas bilong mipela i no gutpela tumas, ol i mekim gutpela pasin long mipela.”

Tok bilong saveman King Solomon i kamap tru long Josué! Solomon i tok: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.” (Sav. 11:6) Olsem wanem? Yu inap planim kaikai, olsem autim tok, taim rot i op long yu tokim ol narapela long kibung o long pablik tok bai kamap? Jehova inap mekim wok long yu long helpim ol man i hangre long kisim tok i tru, wankain olsem Javier na Maru.—Ais. 55:1.

[Piksa long pes 32]

Han kais i go han sut: Alejandro Voeguelin, Maru Pineda, Alejandro Pineda, Javier Pineda, na Josué Ramírez long brens long Meksiko.