Stori bilong Lois Didur

Hamas taim long laip bilong yu, yu bin mekim kain tok olsem, ‘Wai na mi bin mekim dispela disisen’? Mi bin mekim wok bilong God fultaim inap 50 yia pinis, na i no gat wanpela samting i pasim mi long amamas long mekim wok bilong Jehova. Orait, bai mi stori long as na mi tok olsem.

MI BON long 1939 na mi kamap bikpela long Saskatchewan, long Kanada. Mi gat 4-pela susa na wanpela brata. Mipela i stap amamas long wanpela fam i stap long ples kunai. Wanpela taim ol Witnes Bilong Jehova i kam long haus bilong mipela na toktok wantaim papa, na mi askim ol olsem God i gat nem o nogat. Na ol i opim Baibel long Song 83:18 na soim mipela nem bilong God, em Jehova. Dispela i mekim na mi laik kisim save moa long God na Tok Bilong Em.

Long dispela taim bipo, ol pikinini bilong ol fama i go long wanpela skul i gat wanpela klasrum tasol—em gret 1 i go inap long gret 8. Ol i mas kalap long hos o wokabaut planti kilomita bilong i go long skul. Tisa i save stap wantaim narapela narapela famili, na ol i save lukautim tisa long olgeta samting em i mas i gat. Wanpela yia, em taim bilong papamama bilong mi long lukautim nupela tisa, nem bilong em John Didur.

Mi no save olsem dispela yangpela man i gat laik tu long save long Baibel. Wanpela taim, mi litimapim nem bilong gavman Komiunis na gavman Soselis, em papa bilong mi i save sapotim ol. John i tok isi long mi olsem: “I no gat wanpela man i gat rait long bosim narapela. God tasol i gat dispela rait.” Dispela i mekim na mitupela i save stori planti taim wantaim.

John i bin bon long 1931, na em i bin harim stori bilong ol woa. Taim Pait Bilong Korea i kirap long 1950, em i askim ol bikman bilong lotu long as na ol i insait long pait. Olgeta i tok i orait long ol Kristen i ken insait long pait. Bihain em i askim ol Witnes Bilong Jehova long wankain askim. Ol i helpim em long kisim save olsem ol Kristen bilong bipo ol i bihainim tok bilong Baibel na ol i no insait long pait. John i kisim baptais long 1955. Long yia bihain, mi tu i kisim baptais.  Mitupela wantaim i laik yusim laip na strong bilong mitupela long mekim wok bilong Jehova. (Sng. 37:3, 4) Long Julai 1957, mitupela John i marit.

Planti taim mipela i stap long kibung long seim taim olsem weding aniveseri bilong mipela. Mipela i amamas long stap wantaim planti tausen manmeri em ol i save rispektim marit. Namba 1 kibung intenesenel em mipela i bin go long en em long 1958. Mipela 5-pela i lusim Saskatchewan na ron long kar i go long New York City. Inap wanpela wik olgeta mipela i ron long rot, tasol long ol nait mipela i save stop na slip long haus sel. Mipela i kirap nogut taim wanpela brata em mipela i bungim long Bethlehem, long Pennsylvania, em i singautim mipela i go stap wantaim famili bilong em long nait paslain long mipela i go kamap long New York City. Dispela gutpela pasin bilong em i mekim na neks de mipela inap redi gut na go long New York City. Dispela bikpela kibung i kirapim mipela long pilim tru pasin bilong amamas long mekim wok bilong Jehova. Olsem man bilong raitim song i tok, “[Bikpela i] save helpim mi na bel bilong mi i amamas oltaim oltaim.”—Sng. 16:11.

WOK PAINIA

Long 1959, mipela i stap long wanpela liklik haus kar i stap antap long wanpela liklik maunten long Saskatchewan na mipela i mekim wok painia. Long dispela hap yu inap lukluk i go longwe tru. Na sampela bilong ol dispela ples em teritori bilong mipela.

Wanpela taim mi kisim wanpela pas i kam long brens ofis. Mi hariap i go givim dispela pas long John, em i wok long stretim trakta i stap. Ol i singautim mipela long mekim wok painia salim long taun Red Lake, long Ontario. Mipela i no save dispela ples i stap we, olsem na mipela kisim mep na painim dispela ples.

Em i narapela kain tru long ples mipela i bin i stap long en. Dispela hap i gat bikbus na ol liklik taun i stap klostu long ol gol main. Long namba 1 de mipela i kamap long dispela hap, mipela i wok long painim ples slip na wanpela liklik meri i harim mipela i toktok wantaim neiba bilong em. Na em i ran i go na tokim mama bilong em olsem mipela i wok long painim ples slip, na mama i orait long mipela i ken i stap wantaim ol long dispela nait. Ol i givim mipela wanpela rum i stap daunbilo long haus. Long neks de, mipela i painim wanpela haus i gat tupela rum, tasol i no gat paip wara na tebol samting long en. I gat wanpela stov bilong hatim haus. Mipela i baim sampela samting long wanpela sekenhen stua na mipela i pilim olsem ol dispela samting em inap long mipela.

Ol kongrigesen i stap longwe inap olsem 209 kilomita. Planti man i wok long ol gol main ol i bilong Yurop, na ol i askim mipela sapos mipela inap kisim Baibel long tokples bilong ol. Insait long sotpela haptaim tasol, mipela i gat 30 Baibel stadi. Insait long 6-pela mun, wanpela liklik kongrigesen i kamap.

Mipela i stadi wantaim wanpela meri, na man bilong en i ringim pris bilong em long kam stretim tingting bilong meri. Pris i kam na tokim mipela olsem mipela i mas skulim dispela meri long God Triwan. Dispela meri i kisim Katolik Baibel bilong ol na tokim pris long kamapim sampela skripsa bilong Baibel i sapotim tok bilong em. Em i tromoi Baibel i go long hapsait bilong tebol na tok olsem em i no gat wok long eksplenim dispela tok. Taim pris i lusim haus, em i mekim tokples Yukren long ol i mas rausim mipela long haus na no ken larim mipela i kam bek gen. Em i no save olsem John i save long tokples Yukren!

Bihain, mipela i lusim taun Red Lake, long wanem, John i mas kisim skul bilong mekim wok sekit. Wanpela yia bihain, taim John i mekim tok bilong baptais long wanpela kibung distrik, man bilong dispela meri mipela i bin stadi wantaim em, em tu i wanpela bilong lain i laik kisim baptais. Samting pris i mekim i kirapim dispela man long kisim save long Baibel.

 WOK SEKIT

Taim mipela i mekim wok sekit, mipela i kisim amamas long stap wantaim ol narapela narapela famili. Na mipela i pas gut wantaim ol dispela famili. Wanpela taim mipela i stap long wanpela rum we i no gat samting bilong hatim rum long taim bilong kol. Long ol moning mipela i save harim lapun sista i kam isi insait long rum na wokim paia insait long liklik stov. Bihain em kisim dis na hat wara i kam na bai mitupela i ken waswas na redi long mekim wok. Dispela gutpela pasin isi bilong em i bin skulim mi long planti samting.

Wok bilong raun na lukim ol kongrigesen i helpim mi long go klostu moa long Jehova. Long wanpela sekit long Alberta i gat wanpela main i stap long hap not, na wanpela sista i stap long dispela hap. Oganaisesen bilong Jehova i mekim wanem bilong tingim dispela sista i stap longwe? Long olgeta sikspela mun, mipela i save kisim balus na go long dispela ples sista i stap long en na stap 1-pela wik na mekim ol miting wantaim em, wankain olsem ol kongrigesen long taun. Dispela i kirapim mitupela long tingim pasin bilong Jehova long tingim tru olgeta wan wan man i olsem sipsip bilong em.

Mipela i save raitim pas i go long ol bratasista em mipela i save stap long haus bilong ol. Dispela i kirapim mi long tingim namba 1 taim John i givim mi wanpela presen—em wanpela naispela boks i pulap long ol pepa. Mipela i save mekim wok long ol dispela pepa bilong raitim pas na salim long ol pren bilong mipela. Mi save laikim tru dispela boks i gat ol pepa.

Taim mipela i mekim wok sekit long Toronto, wanpela brata long Kanada Betel i ringim mipela na askim mipela sapos mipela i laik kam long Betel o nogat. Mipela i askim em wanem taim em i laik kisim bekim bilong mipela. Em i tok, “Tumora sapos yupela inap!” Olsem na de bihain mipela tokim em, yes mipela bai kam.

WOK LONG BETEL

Long olgeta wan wan asainmen bilong mipela, Jehova i helpim mipela na mipela i amamas long mekim ol dispela wok. Na em i mekim gut yet long mipela taim mipela i go long Betel long 1977. Mipela i bung wantaim ol Kristen God i bin makim na mipela i lukim olsem ol i gat narapela narapela pasin, na tu, ol i gat bikpela rispek long Baibel.

Mipela i amamas long dispela nupela asainmen long Betel. Olsem, nau ol klos bilong mipela i stap long kabot na i no long sutkeis, na mipela i stap long wanpela kongrigesen tasol. Mi gat asainmen bilong mi long Betel, na tu, taim ol lain i kam bilong lukim Betel, mi save amamas long kisim ol i raun lukim Betel. Mi save stori gut long wok i kamap long Betel, harim tingting bilong ol, na bekim ol askim bilong ol.

Long 1997, ol i singautim John long go long Skul Bilong Ol Memba Bilong Brens Komiti i kamap long Patterson, long New York. Bihain, ol askim mipela sapos mipela i laik i go long Yukren. Ol i tokim mipela long skelim gut na beten long dispela samting. Long apinun mipela i toksave long ol olsem mipela i orait long i go.

NARAPELA SENIS—YUKREN

Long 1992, mipela i bin i go long kibung intenesenel long St. Petersburg, long Rasia, na long 1993, mipela i go long kibung long Kiev, long Yukren. Dispela ol kibung i kirapim mipela long laikim ol bratasista bilong Isten Yurop. Long Yukren, mipela i stap long Lviv, na haus bilong mipela i stap long namba 2 plua bilong wanpela olpela haus. Long windo yu inap lukluk i go daun long liklik gaden na i gat ol kakaruk i raun raun i stap. Dispela i mekim na mi pilim olsem mi stap long fam long Saskatchewan. Mipela 12-pela i stap long dispela haus. Bilong go wok long Betel, mipela mas draiv i go long narapela sait bilong taun.

Mipela i amamas long stap wantaim ol bratasista  long Yukren em ol i karim hevi long ol traim i painim ol, gavman i putim tambu long wok bilong autim tok, na sampela i bin go long kalabus. Maski i olsem ol i sanap strong yet. Taim mipela i tok amamas long pasin bilong ol long sanap strong, ol i save tok, “Mipela i mekim bilong amamasim Jehova.” Ol i pilim olsem oltaim Jehova i save stap wantaim ol. Na long nau sapos yu tok tenkyu long wanpela i mekim gutpela pasin long yu, em bai tok, “Yu ken tok tenkyu long Jehova.” Ol i luksave olsem Jehova i As bilong olgeta gutpela samting.

Long Yukren, planti i save wokabaut i go long ol miting, olsem na ol i gat taim bilong toktok wantaim na strongim narapela narapela. Ol i save wokabaut inap 1-pela o 2-pela aua samting bilong go long Haus Kingdom. I gat olsem 50 kongrigesen i stap long Lviv, 21 bilong ol i save yusim 1-pela bikpela Haus Kingdom. Long ol Sande, mipela i save amamas long lukim ol bratasista i wokabaut i kam long ol miting.

Wantu mipela i lain long ol bratasista, em ol i gat pasin isi na ol i redi long helpim ol narapela. Taim mi no kliagut long tokples bilong ol, em samting mi hatwok yet long mekim, ol i no les kwik long mi. Planti taim pes bilong ol i kamapim tingting ol i gat.

Wanpela samting i kamap ples klia long kibung intenesenel long Kiev long 2003, em pasin bilong ol brata long trastim narapela narapela. Mipela i go daun sanap long wanpela tren stesin we i bisi tru, na wanpela liklik gel i kam long mipela na tok isi long mipela, “Mi lus. Mi no inap painim bubu meri bilong mi.” Dispela gel i lukim kat bilong kibung mipela i pasim na em i save mipela i Witnes. Em i no pret na krai. Meri bilong wasman sekit husat i stap wantaim mipela em i kisim dispela liklik meri i go long Dipatmen Bilong Ol Samting i Lus long stediam we kibung i kamap long en. I no longtaim na liklik meri i bungim bubu meri bilong em. Mi pilim tru pasin bilong dispela liklik meri long trastim mipela namel long planti tausen manmeri.

Long Me 2001, planti bratasista bilong ol arapela kantri i kam long Yukren long dedikesen bilong nupela brens ofis bilong mipela. Bihain long spesel tok long Sande moning, bikpela lain bratasista i wokabaut i kam bilong raun lukim Betel. Man! Em wanpela samting mi no inap lusim tingting long en! Mi pilim tru pasin isi bilong ol na pasin bilong ol long bihainim tok. Dispela i strongim mi long amamas long mekim wok bilong God.

BIKPELA SENIS

Long 2004, John i kisim sik kensa. Mipela i go long Kanada bilong em i ken kisim marasin. Namba 1 taim em i kisim kimoterapi, dispela marasin i strong tumas na inap sampela wik em hap indai long ICU. Bihain, ai bilong em i op. Em i no inap toktok, tasol em i save amamas taim ol lain i kam lukim em.

Tasol sik i go bikpela, na em i dai. Mi pilim olsem wanpela bikpela samting long laip bilong mi i no stap moa. Mi na John i bin amamas tru long mekim wok bilong Jehova wantaim. Bai mi mekim wanem? Mi go bek long Yukren. Mi tenkyu tru long pasin laikim em famili Betel na ol bratasista long kongrigesen i mekim long mi.

I no gat wanpela taim we mipela i bel hevi long ol disisen mipela i bin wokim. Mipela i save bung wantaim ol gutpela bratasista na mipela i amamas long laip bilong mipela. Mi save olsem i gat planti samting long ol gutpela pasin bilong Jehova em mi mas kisim save yet long en, na mi laik mekim yet wok bilong Jehova, long wanem, ‘em i save helpim mi na oltaim bel bilong mi i amamas.’

[Rait long pes 6]

“I no gat wanpela taim we mipela i bel hevi long ol disisen mipela i bin wokim”

[Piksa long pes 3]

Taim mitupela John i marit

[Piksa long pes 4]

Stap painia salim long taun Red Lake, Ontario

[Piksa long pes 5]

Mitupela John long 2002