‘Pikinini i Laik Soim Papa Long Ol Man’
‘Pikinini i Laik Soim Papa Long Ol Man’
“I no gat wanpela man i save gut long Papa, nogat, Pikinini tasol i save, na man em Pikinini i gat laik long soim Papa long em, em tasol i save.”—LUK 10:22.
WANEM BEKIM BILONG YU?
Bilong wanem Jisas inap tru long soim Papa long ol man?
Olsem wanem Jisas i bin soim Papa bilong en long ol arapela?
Olsem wanem yumi inap bihainim pasin bilong Jisas na soim Papa long ol arapela?
1, 2. Planti man i hatwok long bekim wanem askim? Bilong wanem ol i hatwok?
GOD em i husat? Planti man i hatwok tru long bekim dispela askim. Klostu olgeta man husat i tok ol i Kristen, ol i save tok God em i wanpela God Triwan, tasol ol i tok ol man i no inap kliagut long dispela bilip. Wanpela pasto i tok olsem ol man i no inap eksplenim bilip bilong God Triwan, long wanem, i gat sampela samting ol man i no inap kliagut long en. Na sampela man i bilip long evolusen. Ol i tok i no gat God, na olgeta animal na diwai samting i bin kamap nating. Charles Darwin i no bin tok olsem i no gat God. Em i bin tok olsem ol man i no inap kliagut olgeta long God i makim wanem samting.
2 Maski ol man i gat wanem bilip, klostu olgeta i gat askim olsem God em i wanem kain. Tasol planti i no painim God moa, long wanem, ol bekim ol i kisim i no helpim ol. Satan i bin ‘pasim tingting bilong ol man i no bilip.’ (2 Kor. 4:4) So yumi no kirap nogut olsem planti man i paul na ol i no save long tok i tru bilong God, em Papa na Man Bilong Wokim olgeta samting!—Ais. 45:18.
3. (a) Husat i bin soim Papa long yumi? (b) Wanem ol askim bai yumi kisim bekim bilong ol?
3 Em i bikpela samting long ol man i mas i gat stretpela save long God. Bilong wanem i olsem? Long wanem, ol manmeri i “singaut long nem bilong Jehova,” ol tasol bai Jehova i kisim bek ol. (Rom 10:13) Bilong singaut long nem bilong God, yumi mas save long God em i husat na em wanem kain Man. Jisas Krais i bin skulim ol disaipel long ol dispela bikpela tok i tru. Em i soim Papa long ol. (Ritim Luk 10:22.) Dispela stadi bai bekim ol askim olsem: Bilong wanem Jisas inap tru long soim Papa long ol man? Jisas i mekim olsem wanem? Na olsem wanem yumi ken bihainim Jisas na helpim ol arapela long save long Papa?
JISAS INAP TRU LONG SOIM PAPA LONG OL MAN
4, 5. Bilong wanem Jisas inap tru long soim Papa long ol man?
4 Jisas em i nambawan man stret long helpim ol arapela long kisim save long Papa bilong en. Bilong wanem i olsem? Long wanem, paslain long God i wokim olgeta arapela samting, Jisas em i wanpela spirit i stap long heven. Em “Pikinini tru bilong God.” (Jon 1:14; 3:18) Paslain long olgeta arapela samting i kamap, Jisas i bin stap wantaim Papa. Na Papa i bin tingim Jisas wanpela tasol. Insait long planti tausen yia, Jisas i save toktok wantaim Papa bilong en, na long dispela rot em i kisim save long Papa na ol pasin bilong em. Taim ol i pas gut moa wantaim, pasin bilong ol long laikim na tingim narapela narapela i kamap strong moa. (Jon 5:20; 14:31) Man! Long dispela rot Jisas i bin kisim bikpela save tru long pasin bilong Papa!—Ritim Kolosi 1:15-17.
5 Papa i makim Pikinini long i stap mausman bilong em, olsem “Tok Bilong God.” (Rev. 19:13) So Jisas tasol i kisim wanpela spesel wok long soim Papa long ol arapela. Long dispela as Jon i stori long Jisas olsem em i dispela “Tok” na em “i stap klostu long bros bilong Papa.” (Jon 1:1, 18) Ating Jon i tingting long wanpela pasin ol man i save mekim long taim bilong kaikai. Ol bai sindaunim wanpela man klostu long narapela man we em isi long ol i ken toktok wantaim. Long wankain pasin, Pikinini “i stap klostu long bros” bilong Papa na em inap toktok gut wantaim em.
6, 7. Olsem wanem pasin bilong Jehova na Jisas long pas gut wantaim i kamap strong moa?
6 “Olgeta de [Pikinini] i bin mekim [God] i amamas.” (Ritim Sindaun 8:22, 23, 30, 31.) Pasin bilong Papa na Pikinini long pas gut wantaim i wok long kamap strong moa. Ol i wok wantaim, na Jisas i lain long bihainim ol pasin bilong Papa. Taim God i wokim ol arapela ensel, Pikinini i luksave long pasin Jehova i mekim long ol, na pasin bilong Pikinini long laikim na rispektim Papa i go bikpela moa.
7 Na taim Satan i bikhet long wok bos bilong Jehova, Pikinini i lain long olsem wanem Jehova i bin bihainim pasin laikim, stretpela pasin, savetingting, na yusim strong bilong em long stretim dispela bikpela hevi. Dispela i helpim Jisas long redi long karim ol hevi we bai painim em taim em i mekim wok bilong em hia long graun.—Jon 5:19.
8. Bilong wanem ol stori bilong Baibel long Jisas i helpim yumi long kisim save long ol pasin bilong Papa?
8 Jisas i pas gut wantaim Jehova, olsem na em tasol inap soim klia Papa long ol man. Nambawan rot bilong yumi ken kisim save long Papa, em long lain long ol tok em Pikinini tru bilong en i bin kamapim na long ol samting Pikinini i bin mekim. Olsem: Sapos yumi lukim tasol dispela tok “laikim” long dikseneri, bai yumi kliagut olgeta long mining bilong en? Nogat, em bai hatwok. Tasol taim yumi tingim ol tok bilong Baibel we i stori long wok Jisas i mekim, yumi luksave long pasin bilong em long tingim ol arapela na yumi kliagut long mining bilong dispela tok, “God em i pasin laikim.” (1 Jon 4:8, 16) Jisas i soim pasin laikim long ol disaipel. Na tu, em i soim ol arapela pasin bilong God long ol taim em i stap hia long graun.
PASIN BILONG JISAS LONG SOIM PAPA LONG OL MAN
9. (a) Long wanem 2-pela rot Jisas i soim Papa bilong en long ol disaipel? (b) Kamapim tok piksa Jisas i yusim bilong soim Papa bilong en long ol disaipel.
9 Olsem wanem Jisas i bin soim Papa long ol disaipel bilong en na long ol lain i kamap disaipel long bihain? Em i mekim long 2-pela rot: Long rot bilong ol tok em i skulim ol man long en, na long rot bilong ol pasin em i mekim. Pastaim bai yumi kisim skul long ol tok Jisas i skulim ol man long en. Tok Jisas i skulim ol disaipel long en i skulim yumi long pasin, tingting, na ol samting Jehova i pilim. Olsem, Jisas i tok Papa bilong en i kain olsem man i gat ol sipsip. Bihain wanpela sipsip i lus. Em i save tingim olgeta wan wan sipsip, olsem na em i lusim lain sipsip na go painim dispela sipsip i lus. Jisas i tok, taim man i painim sipsip i lus, “amamas bilong em long dispela sipsip bai i winim amamas bilong em long dispela 99 sipsip i no bin lus.” Bilong wanem Jisas i yusim dispela tok piksa? Em i tok: “Papa bilong mi long heven i no laik bai wanpela bilong ol dispela man i no gat nem i lus.” (Mat. 18:12-14) Dispela tok piksa i givim wanem skul long yu long Jehova? Ating sampela taim yu pilim olsem yu samting nating na ol man i lusim tingting long yu. Tasol no ken lusim tingting, Papa bilong yu long heven i save tingim yu. Em i tingim yu olsem wanpela bilong dispela lain sipsip.
10. Olsem wanem Jisas i bin soim Papa bilong en long rot bilong ol pasin em i mekim?
10 Namba 2 rot we Jisas i soim Papa bilong en long ol disaipel, em long pasin em i mekim. Olsem na taim aposel Filip i askim Jisas: “Soim Papa long mipela,” Jisas i tok: “Man i lukim mi, em i lukim Papa tu.” (Jon 14:8, 9) Yumi ken skelim sampela eksampel long olsem wanem Jisas i kamapim pasin bilong Papa. Taim wanpela lepraman i askim Jisas long oraitim em, Jisas i tatsim dispela man em “sik lepra i pulap tru long bodi bilong em,” na i tokim em: “Mi laik. Yu ken kamap klin.” Bihain long lepraman i orait, em i save olsem strong Jisas i yusim bilong oraitim em, i kam long Jehova. (Luk 5:12, 13) Na tu, taim Lasarus i dai, ating ol disaipel i pilim pasin sori bilong Papa taim Jisas “i sori tru na em i wari,” na “aiwara bilong Jisas i pundaun.” Jisas i save olsem em bai kirapim bek Lasarus, tasol maski i olsem, em i pilim wankain pen na hevi olsem ol famili na ol pren bilong Lasarus i bin pilim. (Jon 11:32-35, 40-43) Ating i gat ol Baibel stori bilong Jisas em yu laikim moa yet na i helpim yu long luksave long pasin marimari bilong Papa.
11. (a) Taim Jisas i rausim ol man long tempel, em i soim wanem pasin bilong Papa? (b) Olsem wanem dispela i mekim gut bel bilong yumi?
11 Taim yu ritim stori long Jisas i bin rausim ol man i wok bisnis long tempel, yu kisim wanem skul? Piksaim long tingting: Jisas i wokim wanpela wip long ol rop na em rausim ol man wantaim ol sipsip na bulmakau bilong ol i go ausait long tempel. Na em go kapsaitim ol koins bilong ol man i wok long senisim mani na kapsaitim tu ol tebol bilong ol. (Jon 2:13-17) Samting em i mekim i kirapim ol disaipel long tingim tok profet King Devit i mekim, olsem: “Mi laikim tru haus bilong yu, olsem na mi wok strong long mekim dispela haus i stap gut.” (Sng. 69:9) Samting Jisas i bin mekim i soim olsem em i laik tru long sambai long tok i tru. Taim yu ritim dispela stori, yu lukim olsem wanem Jisas i kamapim pasin bilong Jehova? Dispela i kirapim yumi long tingim olsem Jehova i gat strong bilong rausim pasin nogut, na tu, em i gat bikpela laik long mekim olsem. Pasin Jisas i mekim long ol man nogut inap givim save long yumi long tingting bilong Papa long ol pasin nogut i pulap long graun long nau. Dispela i strongim tru bel bilong yumi taim man i mekim pasin i no stret long yumi!
12, 13. Pasin Jisas i mekim long ol disaipel bilong en i givim wanem skul long yumi long Jehova?
12 Narapela wei Jisas i soim Papa long ol man em long pasin em i mekim long ol disaipel. Ol i wok long tok pait long husat i nambawan. (Mak 9:33-35; 10:43; Luk 9:46) Jisas i bin stap wantaim Papa inap longpela taim, olsem na em i save long tingting bilong Jehova long pasin antap. (2 Sml. 22:28; Sng. 138:6) Jisas i lukim tu pasin antap bilong Satan. Satan i save tingim em yet tasol na namba em i holim. Olsem na ating Jisas i bin bel hevi tru taim em i lukim ol disaipel em i bin skulim, i mekim yet pasin antap. Ol i tingim nem bilong ol yet tasol! Yes, dispela pasin i stap long ol man em i bin makim olsem aposel! Ol i kamapim dispela pasin antap i go inap long laspela de bilong Jisas hia long graun. (Luk 22:24-27) Tasol long gutpela pasin, Jisas i wok yet long stretim ol. Em i bilip olsem, bihain ol bai lain long bihainim pasin daun olsem bilong em.—Fili. 2:5-8.
13 Olsem wanem? Taim yu lukim pasin bilong Jisas long i no les kwik long stretim tingting kranki bilong ol disaipel, yu luksave long pasin bilong Jehova? Yu kisim save long Papa long rot bilong toktok na pasin Jisas i bin mekim? Papa bilong en i no save lusim ol manmeri bilong Em maski planti taim ol i popaia. Save bilong yumi long ol gutpela pasin bilong God i kirapim yumi long tanim bel na beten askim Jehova long lusim ol rong bilong yumi.
PIKININI I LAIK SOIM PAPA LONG OL MAN
14. Olsem wanem Jisas i kamapim olsem em i laik soim Papa bilong en long ol arapela?
14 Planti bikman bilong gavman i laik bosim strong ol manmeri, olsem na ol i pasim ol long kisim save long ol samting we inap helpim ol. Jisas i no olsem. Em i laik helpim ol arapela long kisim save long Papa bilong en, olsem na olgeta samting bilong Jehova ol i mas save long en, em i bin kamapim long ol. (Ritim Matyu 11:27.) Jisas i bin “opim tingting bilong [ol disaipel] na bai [ol] inap kisim save long God tru,” em God Jehova. (1 Jon 5:20) Dispela i makim wanem? Jisas i bin helpim ol disaipel long kliagut long ol tok em i mekim bilong skulim ol long Papa. Em i no haitim pasin tru bilong Papa long bilip bilong God Triwan, em wanpela bilip ol man i no inap kliagut long en.
15. Bilong wanem Jisas i no kamapim olgeta samting bilong Papa long ol disaipel?
15 Yu ting Jisas i bin kamapim olgeta samting bilong Papa em i save long en? Nogat. Em i bihainim savetingting taim em i no tokim ol disaipel long olgeta samting. (Ritim Jon 16:12.) Bilong wanem em i mekim olsem? Long wanem, long dispela taim Jisas i toktok wantaim ol, ol i “no inap kisimgut” ol tok. Tasol Jisas i stori long ol olsem ol bai kisim planti save moa taim “helpim” i kam. Dispela helpim em holi spirit, na em bai helpim ol long “kliagut tru long tok i tru.” (Jon 16:7, 13) Ol papamama i gat savetingting, ol i no save tokim ol pikinini long olgeta samting, ol i wet inap long ol pikinini i bikpela na ol inap kisimgut tok. Long wankain pasin, Jisas i bin wet i go inap long taim ol disaipel i redi long kisim sampela save moa long Papa. Jisas i bihainim gutpela pasin, na em i tingim skel bilong ol long mekim ol samting.
BIHAINIM JISAS NA HELPIM OL ARAPELA LONG SAVE LONG JEHOVA
16, 17. Bilong wanem yumi inap soim Papa long ol arapela?
16 Taim yu save gut long wanpela na yu luksave olsem em i gat ol pasin i gutpela tru, ating yu laik tokim ol arapela long dispela man, a? Taim Jisas i stap long graun, em i tokim ol arapela long Papa bilong en. (Jon 17:25, 26) Olsem wanem? Yumi inap mekim wankain pasin na soim Jehova long ol arapela?
17 Olsem yumi lainim pinis, save bilong Jisas long Papa i bikpela moa winim ol arapela. Em i laik skulim ol disaipel long sampela samting em i save long en, na em i givim strong long ol na bai ol inap kliagut moa long ol pasin bilong Papa. Jisas i bin helpim yumi long kisimgut save long Papa, na planti man long nau i no gat dispela save. Yumi amamas tru olsem Jisas i laik soim Papa long yumi long rot bilong ol tok na pasin bilong en! Yumi pilim olsem em i gutpela samting tru long save long Jehova. (Jer. 9:24; 1 Kor. 1:31) Yumi bin wok strong long pas gut wantaim Jehova, na nau em i stap klostu moa long yumi. (Jems 4:8) So yumi inap skulim ol arapela long save yumi gat long Jehova. Yumi ken mekim olsem wanem?
18, 19. Olsem wanem yumi ken soim Papa long ol arapela? Stori long dispela.
18 Taim yumi bihainim pasin bilong Jisas long toktok na wokabaut bilong yumi, yumi soim Papa long ol arapela. Tingim, planti man yumi bungim long wok autim tok ol i no save long God i husat. Ating ol i gat sampela tingting kranki long God, long wanem, narapela i bin skulim ol long ol bilip giaman. Long rot bilong Baibel yumi inap skulim ol long nem bilong God, samting em i tingting pinis long mekim long ol manmeri, na pasin tru bilong em. Na tu, sampela stori bilong Baibel inap helpim yumi long luksave long sampela pasin bilong God em yumi no bin kliagut long en bipo. Yumi inap toktok wantaim ol arapela insait long kongrigesen long ol samting yumi lainim, na dispela inap strongim ol tu.
19 Yumi mas bihainim pasin bilong Jisas na soim Papa long ol arapela long rot bilong pasin bilong yumi. Taim ol man i lukim yumi i bihainim pasin laikim bilong Krais long wokabaut bilong yumi, ating ol tu bai i gat laik long pas gut wantaim Jisas na Papa bilong en. (Efe. 5:1, 2) Aposel Pol i tokim yumi: “Yupela i mas bihainim pasin bilong mi, olsem mi save bihainim pasin bilong Krais.” (1 Kor. 11:1) Yumi amamas olsem long rot bilong wokabaut bilong yumi, yumi inap helpim ol man long kisim stretpela save long Jehova! Yumi olgeta i laik wok yet long bihainim pasin bilong Jisas long soim Papa long ol arapela.
[Askim Bilong Stadi]
