Yu Tingim Yet?

Olsem wanem? Yu bin ritim gut ol tok bilong ol nupela Wastaua? Yu ken traim bekim ol dispela askim i stap daunbilo:

Olsem wanem pasin bilong Solomon i olsem tok lukaut long yumi?

God i bin blesim na givim wok long King Solomon. Tasol taim Solomon i stap king, em i no bihainim gut tok bilong God. Em i maritim pikinini bilong Fero, em wanpela haiden, na em i maritim planti meri, na isi isi em i larim ol meri haiden i pulim em long insait long lotu giaman. Yumi mas was gut, nogut isi isi yumi kirap kisim sampela tingting o pasin i no stret. (Lo 7:1-4; 17:17; 1 Kin. 11:4-8)—12/15, pages 10-12.

Bilong wanem yumi ken tingim Sara olsem meri i pret long God na wanpela maritmeri i dia tumas long man bilong en?

Taim God i tokim Abraham long lusim Ur, Abraham i mas lusim famili, ol pren, na gutpela sindaun, na tu, em i no save long hap em bai go long en. Tasol Sara i wanbel wantaim man bilong en, em i bilip olsem God bai blesim em. Sara i rispektim Abraham, na em i save mekim ol gutpela pasin.—1/1, page 8.

Bilong wanem Jehova i bin askim Abraham long givim Aisak olsem ofa?

Bikpela samting yumi mas tingim i olsem, God i no larim Abraham long sakrifaisim Aisak. Tasol God i askim em long mekim olsem bilong piksaim pasin bilong em long sakrifaisim samting i dia tumas, em Pikinini bilong em, Jisas.—1/1, page 23.

Wanem samting i soim olsem i gat sampela manmeri God i makim long holi spirit i bin stap long graun kirap long taim bilong ol aposel na i kam inap long nau?

Long tok piksa bilong Jisas long “wit” na “gras nogut,” “ol gutpela sid” i makim “ol pikinini bilong Kingdom.” (Matyu 13:24-30, 38) Ol gras nogut bai gro namel long ol wit i go inap long taim bilong bungim kaikai. Dispela i soim olsem maski yumi no inap save gut tru husat ol man i insait long dispela lain em wit i makim, tasol olgeta taim i bin i gat sampela bilong ol i bin i stap long graun kirap long taim bilong ol aposel na i kam inap nau.—1/15, page 7.

Wanem ol samting bai kamap na bihain tasol Armagedon bai kam?

Ol lain man bai mekim bikpela tokaut olsem “nau em i taim bilong bel isi na gutpela sindaun!” (1 Tes. 5:3) Ol gavman bai kirap birua long lotu giaman. (Rev. 17:15-18) Ol bai pait long ol lain i lotu tru long God. Pinis bai kam.—2/1, page 9.

Yumi inap daunim pasin bilong bel nogut olsem wanem?

Yumi ken mekim ol samting olsem: Strongim pasin laikim bilong yu na pasin bilong tingim tru ol brata, bung wantaim ol lain i mekim wok bilong God, painim rot long mekim ol gutpela pasin, na “amamas wantaim ol man i amamas.” (Rom 12:15)—2/15, pages 16-17.

Husat i mekim tokples Nahuatl long nau? Na wanem gutpela samting i kamap bilong helpim ol?

Em tokples bilong lain Astek bilong bipo tru, na 1.5 milion manmeri long Meksiko i mekim yet dispela tokples. Ol Witnes i autim tok long tokples Nahuatl, na i gat sampela buk na nius bilong yumi long dispela tokples.—3/1, pages 13-14.

Taim yumi laik givim gutpela tingting long man, yumi mas tingim wanem ol stiatok?

Pastaim kliagut long ol samting i bin kamap. No ken bekim kwik tok. Mekim pasin daun na bihainim tok bilong God. Sapos yu gat rot, yusim ol buk na nius bilong Baibel. No ken wokim disisen bilong ol arapela.—3/15, pages 7-9.

Jisas i bin tok sapos man i askim narapela long i go wantaim em inap 1-pela kilomita, orait em i mas bihainim em i go inap 2-pela kilomita. (Mat. 5:41) Em i laik givim wanem skul long ol man?

Long taim bilong Jisas we ol Rom i bosim Israel, wanpela man Rom inap makim man Israel long mekim sampela wok bilong en. Taim Jisas i kirapim ol man long i go inap 2-pela kilomita, em i minim olsem ol i mas mekim ol wok ol man i gat namba i givim long ol, na ol i no ken bel nogut long dispela samting.—4/1, page 9.