Askim

Olsem wanem dai bilong ol manmeri i stap gut long God i olsem ‘samting i dia tumas long ai bilong Jehova’?

▪ Man bilong raitim song i tok: “Dai bilong ol manmeri i stap gut long Jehova em samting i dia tumas long ai bilong en.” (Sng. 116:15, NW) Laip bilong olgeta wan wan manmeri i lotu tru long Jehova i dia tumas long en. Tasol tok bilong Song 116 i no stori long indai bilong wan wan man tasol, nogat.

Taim wanpela brata i mekim fiuneral bilong wanpela Kristen, i no stret long yusim Song 116:15 bilong makim man i dai, maski em i stap gut long Jehova i go inap long em i dai. Bilong wanem yumi tok olsem? Long wanem tok bilong man i raitim song i gat bikpela mining moa. Tok bilong em i makim olsem God i no inap larim ol manmeri i stap gut long em, olsem lain olgeta, i dai, long wanem, ol i dia tumas long ai bilong en.—Lukim Song 72:14; 116:8.

Tok bilong Song 116:15 i helpim yumi long save olsem Jehova i no inap larim ol man i pinisim lain olgeta bilong em i stap long graun. Ol samting i bin painim yumi i soim olsem yumi bin sanap strong taim ol traim i kamap na ol man i mekim nogut long yumi. Na dispela i kamapim klia olsem God i no inap larim ol birua i pinisim lain bilong yumi.

Jehova i gat olgeta strong na samting em tingting pinis long mekim bai kamap, olsem na em i no inap larim ol birua i pinisim yumi olsem wanpela lain olgeta, nogat. Sapos God i larim ol birua i pinisim lain olgeta bilong en, orait ol man bai ting olsem strong bilong ol birua i winim strong bilong God. Na tu, laik bilong Jehova, olsem ol manmeri i stap gut long em i mas pulap long dispela graun, em bai i no inap kamap. Tasol yumi save, laik bilong em bai kamap! (Ais. 45:18; 55:10, 11) Na sapos i no gat man i stap yet long ples bung insait long banis bilong bikpela tempel bilong Jehova, em dispela ples bung i stap hia long graun, orait bai i no gat moa pasin bilong lotuim Jehova hia long graun. Bai i no gat namba 1 lain man bilong stap olsem “nupela graun”—em ol stretpela manmeri husat bai stap long graun aninit long “nupela skai.” (Rev. 21:1) Na tu, Wan Tausen Yia Bilong Krais i Stap King bai i no gat lain i stap aninit long wok bos bilong en hia long graun.—Rev. 20:4, 5.

Ol man bai i gat tupela tingting long namba na biknem bilong God sapos em i larim ol birua long pinisim lain bilong em hia long graun. Samting olsem bai daunim nem bilong Jehova olsem King Bilong Heven na Graun. Tasol Jehova i save rispektim em yet na nem holi bilong en, olsem na bai em i no larim dai i painim dispela lain olgeta bilong ol manmeri i stap gut long em. Tingim: God i save bihainim stretpela pasin tasol, olsem na oltaim em bai lukautim lain man husat i stap gut long wok bilong em. (Lo 32:4; Stt. 18:25) Na tu, sapos God i larim birua i pinisim lain bilong em, dispela bai i no stret wantaim tok bilong Baibel: “[God] i tingting long biknem na promis bilong en na em i no inap givim baksait long yupela.” (1 Sml. 12:22) Yes, “Bikpela i no inap lusim ol manmeri bilong en. Tru tumas, em i no inap givim baksait long ol manmeri bilong en.”—Sng. 94:14.

Bel bilong yumi i stap isi taim yumi save olsem lain bilong Jehova bai i no inap pinis long dispela graun! Olsem na, yumi mas stap gut long God, na bilip long tok promis bilong em olsem: “No gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu. Long dispela pasin mi save was gut long olgeta wokman bilong mi na mekim ol i win.”—Ais. 54:17.

[Rait long pes 22]

God bai i no inap larim ol birua i pinisim lain bilong en