Holim Gutpela Tingting Long Marit i Gat Hevi

“Mi givim tok long ol manmeri marit, tasol em i no tok bilong mi, em tok bilong Bikpela.”—1 KOR. 7:10.

YU INAP STORI LONG DISPELA?

Olsem wanem God i bungim tupela marit wantaim?

Olsem wanem ol elda inap helpim ol Kristen husat i gat hevi long marit bilong ol?

Yumi mas holim wanem tingting long marit?

1. Ol Kristen i gat wanem tingting long marit? Bilong wanem ol i gat dispela tingting?

 TAIM ol Kristen i marit, ol i mekim tok promis long God. Dispela em wanpela bikpela samting. (Sav. 5:4-6) Jehova em i as bilong marit, olsem na em i bungim, o mekim tupela marit i pas wantaim. (Mak 10:9) Sampela taim ol lo bilong ol gavman long marit i no wankain long ol lo bilong Baibel. Tasol ol wokboi bilong Jehova i mas holim wankain tingting olsem bilong Jehova long tok promis bilong marit ol i bin mekim. Dispela tok i stret tu long tupela husat i no bin lotuim Jehova taim ol i bin marit.

2. Bai yumi skelim wanem ol askim insait long dispela stadi?

² Marit inap givim bikpela amamas long tupela marit. Tasol yumi ken mekim wanem sapos yumi no stap amamas insait long marit bilong yumi? Yumi inap strongim kain marit olsem? Wanem samting inap helpim tupela marit husat i no gat bel isi insait long marit bilong tupela?

MARIT BAI STAP AMAMAS O NOGAT?

3, 4. Wanem samting inap kamap sapos yumi no bihainim gutpela tingting taim yumi makim poroman marit?

³ Taim marit bilong wanpela Kristen i wok gut, dispela i mekim Kristen i stap amamas na i givim biknem long Jehova. Tasol sapos marit i bagarap, dispela inap kamapim bikpela bel hevi tru. Ol Kristen singel husat i bihainim tok bilong God bai i gat gutpela stat long marit bilong ol. Tasol taim wanpela i no bihainim gutpela tingting taim em i makim poroman marit, ating em bai i gat hatwok na bel hevi. Olsem, sampela yangpela i kirap prenim narapela taim ol i no redi yet long mekim ol wok ol marit i mas mekim. Sampela i painim poroman long Intenet. Ol i marit hariap na i no longtaim na ol i no amamas insait long marit. Na sampela i mekim bikpela rong taim ol i pren wantaim, na bihain long ol i marit, narapela i no rispektim tumas narapela.

 ⁴ Sampela Kristen i no maritim man o meri “i bihainim Bikpela,” na ol i karim hevi, long wanem, poroman bilong ol i no lotuim Jehova. (1 Kor. 7:39) Sapos yu bin mekim olsem, prea long God i ken fogivim yu na helpim yu. Jehova i no save tekewe ol hevi yumi karim long ol rong yumi bin mekim bipo. Tasol sapos Kristen i sori tru na em i luksave olsem em yet i bin mekim rong, orait Jehova inap helpim em long karim hevi. (Sng. 130:1-4) Olsem na wok strong long mekim ol samting God i amamas long en, na pasin bilong “amamas long Bikpela” bai strongim yu.—Neh. 8:10.

TAIM MARIT I LAIK BRUK

5. Ol man i no amamas long marit bilong ol i mas abrusim wanem kain tingting?

⁵ Ating sampela husat i no amamas long marit bilong ol inap ting: ‘Maski long mekim ol samting bilong helpim marit bilong mi. Ating bai mi amamas moa sapos mi maritim nupela poroman!’ Ating long bel ol i tingting long lusim poroman na ol i tok: ‘Mi laik stap fri gen! Mi inap kisim divos? Maski mi no inap kisim divos i stret wantaim tok bilong Baibel, mi inap lusim poroman na stap amamas gen.’ Tasol Kristen i no ken holim dispela kain tingting na ting laip bai gutpela moa sapos em i lusim poroman, nogat. Mobeta em i traim bes long helpim marit bilong em na bihainim tok i kam long God.

6. Wanem mining bilong tok bilong Jisas long Matyu 19:9?

⁶ Sapos Kristen i kisim divos, dispela samting tasol i no makim olsem Baibel i orait long em i ken marit gen. Jisas i tok: “Sapos meri i no mekim pasin pamuk na man i katim marit na maritim narapela meri, orait dispela man i mekim pasin adaltri.” (Mat. 19:9) Pasin pamuk i makim tu pasin adaltri na ol arapela pasin sem nogut tru. Em i bikpela samting olsem Kristen i mas beten askim God long givim gutpela tingting long em sapos em i tingting long kisim divos taim poroman i no bin mekim pasin pamuk.

7. Ol man bai ting olsem wanem sapos marit bilong tupela Kristen i bruk?

⁷ Taim wanpela marit i bruk pinis, dispela inap soim olsem pasin bilong Kristen long pas gut wantaim God i no strong. Aposel Pol i mekim dispela bikpela askim: “Tru tumas, sapos man i no save long pasin bilong bosim gut meri pikinini bilong em yet, orait olsem wanem bai em i lukautim gut kongrigesen bilong God?” (1 Tim. 3:5) Taim tupela marit i tok ol i Kristen, tasol marit bilong ol i bruk yet, orait ol man bai ting tupela i no save bihainim pasin i stret wantaim tok tupela i save mekim.—Rom 2:21-24.

8. Ating tupela marit Kristen i gat wanem hevi sapos ol i tingting long seperet o divos?

⁸ Sapos tupela marit Kristen i tingting long seperet o divos na risen ol i mekim olsem i no stret wantaim tok bilong Baibel, orait dispela i soim olsem ol i gat sampela hevi long pasin bilong ol  long pas gut wantaim Jehova. Ating wanpela o tupela poroman wantaim i no wok long bihainim ol stiatok bilong Baibel. Sapos long bel tupela i bilip tru long Jehova, orait ol inap helpim marit bilong ol long stap gut.—Ritim Sindaun 3:5, 6.

9. Wanem gutpela samting i painim sampela Kristen husat i no bin lusim poroman marit bilong ol?

⁹ Planti marit i bin i gat planti hevi tru na ol i ting marit bilong ol bai bruk. Tasol marit bilong sampela bilong ol i bin kamap gutpela. Ol Kristen em marit bilong ol i gat hevi na ol i no hariap long lusim poroman, planti taim gutpela samting i save painim ol. Olsem, tingim samting inap kamap sapos maritman i no wanbilip. Aposel Pita i tok: “Yupela maritmeri, yupela i mas daun long ol man bilong yupela. Na sapos sampela bilong ol i no save bihainim tok bilong God, orait ol i ken lukim pasin bilong yupela. Na maski yupela i no mekim wanpela tok, ol inap kamap bilipman, long wanem, ol i lukim gutpela pasin bilong yupela na pasin bilong yupela long rispek tru long ol.” (1 Pita 3:1, 2) Gutpela pasin bilong poroman inap helpim poroman i no wanbilip long kisim tok i tru. Ol marit Kristen husat i lukautim marit bilong ol na ol i no lusim poroman bilong ol, dispela i givim biknem long God, na famili olgeta inap kisim blesing.

10, 11. Wanem ol senis inap givim hevi long marit? Ol Kristen i ken bilip tru olsem ol bai kisim wanem helpim?

¹⁰ Planti singel Kristen i maritim Kristen i baptais, long wanem, ol i laik amamasim Jehova. Maski i olsem, sampela senis inap kamap em ol i no bin ting bai kamap. Olsem, ating man o meri i kirap long kisim bikpela hevi long pasin bilong bel hevi na tingting planti. O wanpela poroman i lusim wok autim tok. Wankain samting i bin kamap long Linda, a em wanpela gutpela mama na pablisa husat i save givim bel long autim tok. Em i pilim olsem em i no inap mekim wanpela samting taim man bilong em i kirap long mekim ol pasin i no stret. Man bilong Linda i no tanim bel, olsem na em i raus long kongrigesen. Ol Kristen husat i gat wankain hevi inap pilim olsem i no gat gutpela samting bai kamap long marit bilong ol. Orait ol i mas mekim wanem?

¹¹ Ating yu laik save: ‘Olsem wanem? Mi mas wok yet long mekim ol samting na bai marit i no ken bruk maski wanem samting i kamap?’ I no gat wanpela man inap mekim disisen bilong yu. Tasol i gat ol gutpela as na yu no ken givap long marit em yu ting gutpela samting i no inap kamap long en. Sampela Kristen i karim hevi long marit, tasol ol i no lusim poroman, long wanem, maus bilong bel i no larim ol long mekim olsem, olsem na ol i dia tumas long ai bilong God. (Ritim 1 Pita 2:19, 20.) Long rot bilong Baibel na holi spirit, Jehova bai helpim ol Kristen long mekim olgeta samting ol inap long mekim bilong strongim marit bilong ol.

OL I REDI LONG HELPIM YU

12. Ol elda bai pilim olsem wanem long yumi sapos yumi askim ol long helpim yumi?

¹² Sapos marit bilong yu i gat hevi, yu ken askim ol strongpela Kristen long helpim yu. Ol elda ol i wasman bilong kongrigesen, olsem na ol bai amamas long soim yu skultok bilong God long Baibel. (Apo. 20:28; Jems 5:14, 15) Ol elda bai rispektim yu na poroman bilong yu sapos yupela i kamapim hevi bilong yupela na askim ol long helpim yupela. Ol bai laikim na rispektim yupela moa yet, long wanem, ol i lukim olsem yupela i laik tru long amamasim God.

13. Wanem skultok i stap long 1 Korin 7:10-16?

 ¹³ Taim wanpela Kristen, husat poroman marit i no wanbilip, i laik kisim helpim, ol elda i yusim skultok i kam long Pol, em i tok: “Mi givim tok long ol manmeri marit, tasol em i no tok bilong mi, em tok bilong Bikpela. Mi tok olsem maritmeri i no ken lusim man bilong en. Tasol sapos em i lusim man bilong en, orait em i mas i stap nating na no ken maritim narapela man o em i mas kamap wanbel gen wantaim man bilong en. Maritman i no ken lusim meri bilong en. . . . Tasol maritmeri, yu no save, ating yu inap helpim man bilong yu i kamap Kristen, na long dispela rot yu inap kisim bek em. Na maritman, yu no save, ating yu inap helpim meri bilong yu i kamap Kristen, na long dispela rot yu inap kisim bek em.” (1 Kor. 7:10-16) Em wanpela bikpela blesing tru taim wanpela poroman marit i kamap wokboi bilong Jehova!

14, 15. Ating long wanem taim meri Kristen bai lusim poroman bilong em? Bilong wanem meri Kristen i mas beten long dispela samting na skelim tru tingting i stap long bel bilong em?

¹⁴ I gat wanem ol as na ating meri Kristen bai lusim man bilong en? Sampela i seperet long ol bikpela risen olsem: Man i no laik tru long lukautim famili long sait bilong skin we famili i no gat mani o kaikai, o wanpela i pilim olsem laip bilong en inap lus, long wanem, poroman i wok long paitim em nogut tru, o poroman i mekim sampela samting na Kristen i no inap tru long lotuim God.

¹⁵ Sapos wanpela i laik stap yet wantaim poroman o lusim poroman, em disisen bilong em yet. Tasol Kristen i mas beten long dispela samting na skelim tru tingting i stap long bel bilong en. Olsem, poroman i no wanbilip, em tasol i wok long pasim Kristen long lotuim Jehova? O ating Kristen tu i gat asua long em i no mekim tumas Baibel stadi bilong em yet, go long ol miting, na autim tok?

16. Bilong wanem ol Kristen i no ken hariap long mekim disisen long kisim divos?

¹⁶ Yumi no ken hariap long mekim disisen long divos. Yumi tingim pasin bilong yumi long pas gut wantaim God em i dia tumas, na yumi tingim tru na rispektim marit olsem presen i kam long em. Yumi ol wokboi bilong Jehova i laik bai nem bilong em i stap holi, olsem na yumi no mekim ol disisen we bai kirapim ol man long kisim tingting kranki long em. Long dispela as, yumi no laik tru long givim baksait long poroman marit na tingting long lusim em na bai yumi ken maritim narapela.—Jer. 17:9; Mal. 2:13-16.

17. Long wanem taim i stret yumi tok “God i bin singautim yupela long i stap bel isi”?

¹⁷ Ol Kristen em poroman bilong ol i no wanbilip ol i mas mekim olgeta samting ol inap mekim bilong helpim marit bilong ol long stap strong. Tasol sapos hatwok bilong ol Kristen long lukautim marit i no wok, ol i no ken pilim olsem em asua bilong ol sapos poroman husat i no wanbilip i lusim ol. Pol i tok: “Tasol sapos dispela  man o meri i no bilip i laik lusim poroman marit bilong en, . . . Long kain taim olsem, brata o susa i no gat wok long stap yet wantaim poroman marit i no bilip. God i bin singautim yupela long i stap bel isi.”—1 Kor. 7:15. b

BILIP NA WETIM JEHOVA

18. Wanem gutpela samting inap kamap taim yumi traim long helpim marit i stap gut, maski bihain em i bruk?

¹⁸ Taim yumi gat hevi insait long marit, yumi mas beten askim Jehova long helpim yumi long sanap strong na oltaim yumi mas bilip long em. (Ritim Song 27:14.) Pastaim yumi bin stori long Linda. Inap planti yia em bin wok hat tru na bai marit bilong em i no ken bruk, tasol bihain tupela i divos. Olsem wanem? Linda i pilim olsem hatwok bilong em i lus nating? Em i tok: ‘Nogat tru. Hatwok bilong mi i stap olsem gutpela witnes long ol arapela. Maus bilong bel i no kotim mi. Tasol nambawan gutpela samting i kamap long hatwok mi bin mekim long ol dispela yia i olsem, em i bin helpim pikinini meri bilong mitupela long stap strong insait long tok i tru. Em i dediket na kamap wanpela strongpela Witnes Bilong Jehova.”

19. Wanem samting inap kamap sapos yumi wok hat long lukautim marit bilong yumi?

¹⁹ Wanpela meri Kristen, em Marilyn, em i amamas long em i bin trastim God na wok strong tru long helpim marit bilong en long stap gut. Em i tok em i bin tingting long seperet long man bilong em, long wanem, man i no lukautim em long ol samting bilong skin, na tu, man i laik bagarapim pasin bilong em long pas gut wantaim Jehova. Long bipo, man bilong en i bin stap olsem wanpela elda. Bihain em i insait long sampela wok bisnis we i no stret wantaim savetingting. Em i kirap lusim ol miting, na tupela i no toktok moa. Pasin teroris i kamap long taun na i pretim tru Marilyn, dispela i mekim na em i hatwok long stap wantaim ol arapela. Tasol em i luksave olsem em tu i gat asua long ol hevi insait long marit bilong em. Em na man bilong en i kirap toktok gen, na ol i kirap gen long mekim famili stadi, na go oltaim long ol miting. Ol elda i mekim pasin helpim long ol. I no longtaim na i olsem marit bilong ol i kirap nupela. Tupela i amamas tru. Bihain, man bilong em i kisim sampela wok insait long kongrigesen. Marilyn i tok skul ol i kisim i givim pen long ol, tasol gutpela samting i bin kamap.

20, 21. Yumi mas strong long mekim wanem long marit bilong yumi?

²⁰ Maski yumi singel o marit, oltaim yumi mas stap strong na trastim Jehova. Sapos marit bilong yumi i gat hevi, yumi mas wok strong long stretim hevi. Yumi no ken lusim tingting olsem tupela marit “i no stap olsem tupela moa, ol i kamap wanpela bodi tasol.” (Mat. 19:6) Sapos yumi stap yet wantaim poroman i no wanbilip maski dispela i givim hatwok long yumi, ating bihain bai yumi kisim amamas long lukim poroman i kirap lotuim Jehova.

²¹ Maski yumi stap olsem wanem, oltaim yumi mas bihainim ol pasin i givim gutpela witnes long ol lain i no insait long kongrigesen. Sapos marit bilong yumi i gat ol bikpela hevi na yumi tingting long lusim poroman, orait yumi mas skelim gut long bel trupela risen na yumi laik mekim olsem. Na tu yumi mas beten strong, tingim tingim long bel ol tok bilong Baibel, na askim ol elda long helpim yumi. Tasol nambawan bikpela samting tru, yumi mas strong long amamasim God Jehova long olgeta samting yumi mekim na soim olsem yumi tingim tru na rispektim marit olsem presen em i givim.

[Ol Futnot]

[Askim Bilong Stadi]

[Rait long pes 10]

Ol Kristen husat i no givap hariap taim marit i gat hevi, ol i inap kisim gutpela pe

[Rait long pes 12]

Oltaim bilip long Jehova na askim em long givim strong long yu

[Piksa long pes 9]

Jehova i save blesim ol marit Kristen husat i wok long strongim marit bilong ol i gat hevi

[Piksa long pes 11]

Kongrigesen Kristen inap mekim gut bel bilong yumi na helpim yumi long pas gut wantaim Jehova