“Lukaut Long Yis Bilong Ol Farisi”

Jisas i tok lukaut long ol disaipel olsem: “Lukaut long yis bilong ol Farisi, em pasin bilong tupela maus.” (Luk 12:1) Matyu tu i bin raitim dispela tok lukaut na em i helpim yumi long kliagut olsem Jisas i stori long ol bilip nogut bilong ol Farisi.—Mat. 16:12.

Sampela taim Baibel i yusim tok “yis,” bilong makim samting we i kirapim wanpela man long kamap man nogut. Planti man i mekim pasin nogut, long wanem, ol i bilipim tok bilong ol Farisi na bihainim tingting kranki bilong ol. Bilong wanem ol tok bilong ol Farisi inap bagarapim man?

1 Ol Farisi i gat pasin antap, na ol i ting ol i gutpela na stretpela moa winim ol arapela man.

Jisas i stori long dispela kain pasin nogut insait long wanpela tok piksa bilong em. Em i tok: “Farisi i sanap na beten long tingting bilong em yet olsem, ‘God, mi tenkyu olsem mi no olsem ol arapela man, em ol i man bilong stil, mekim pasin i no stret, na mekim pasin adaltri. Na tu, mi tenkyu olsem mi no olsem dispela takisman. Tupela taim long wik mi save tambu long kaikai na mi save givim namba 10 hap bilong olgeta samting mi kisim.’ Tasol takisman i sanap longwe na em i no laik lukluk i go antap long skai. Em i wok long paitim bros bilong em na tok, ‘God, marimari long mi, mi wanpela sinman.’”—Luk 18:11-13.

Jisas i tok amamas long pasin daun takisman i kamapim na i tok olsem takisman i stretpela moa winim dispela Farisi. Bilong wanem? “Long wanem, man i litimapim nem bilong em yet, em bai kisim sem, na man i daunim em yet, em bai kisim biknem.” (Luk 18:14) Planti man i save ting olsem olgeta takisman em ol man bilong giaman, tasol Jisas i laik helpim ol takisman husat i laik harim tok bilong em. Yumi save long tupela bilong ol em ol i bin kamap disaipel bilong Jisas, em Matyu na Sakius.

Ating yumi inap mekim sampela wok ol arapela i no inap mekim, o yumi holim sampela wok insait long oganaisesen bilong Jehova. Na ating yumi luksave long sampela pasin kranki bilong ol arapela. Yumi mas mekim wanem sapos yumi kirap kisim tingting olsem yumi winim ol arapela? Kwiktaim yumi mas rausim dispela kain tingting. Baibel i tok ol manmeri husat i laikim ol arapela, ol i save mekim pasin isi, gutpela pasin, na i no save jeles long ol arapela. Ol i no hambak na mekim pasin antap. Ol i no save tingim ol yet tasol na ol i no save amamas taim wanpela i mekim sin.—1 Kor. 13:4-6.

Aposel Pol i tok: “Krais Jisas i bin kam namel long ol manmeri bilong kisim bek ol sinman.” Na em i tok moa olsem: “Mi man tru bilong mekim sin winim olgeta arapela sinman.” (1 Tim. 1:15) Yumi mas kisim wankain tingting olsem bilong Pol.

Ol askim bilong skelim long bel:

Mi kliagut olsem mi wanpela sinman, na Jehova i bin mekim bikpela pasin helpim long mi, na long dispela as tasol em inap kisim bek mi? O mi ting mi gutpela moa winim ol arapela, long wanem, mi mekim wok bilong Jehova inap planti yia, o mi holim ol wok insait long oganaisesen bilong Jehova, o mi gat save long mekim sampela wok we ol arapela i no inap mekim?

  2 Ol Farisi i mekim ol gutpela samting long ai bilong ol man bai ol man i ken ting ol i stretpela man. Ol i laikim biknem na namba.

Tasol Jisas i tok long ol Farisi olsem: “Olgeta samting ol i save mekim, ol i mekim tasol bilong ol man i ken lukim. Ol liklik bokis ol i save pasim long poret na han kais bilong ol, ol i wokim i go bikpela moa. Na ol i save wokim bilas long arere bilong klos bilong ol i go longpela moa. Long taim bilong ol bikpela kaikai, ol i laik sindaun long hap bilong ol man i gat nem. Na long ol sinagog ol i laikim ol sia i stap long fran. Na ol i laik bai ol man i soim rispek na givim gude long ol long ol ples bung long maket. Na ol i laik bai ol man i kolim ol olsem Rabai.” (Mat. 23:5-7) Tingting bilong Jisas i narapela kain olgeta long tingting bilong ol Farisi. Em i mekim pasin daun maski em i Pikinini Bilong God na em i gutpela olgeta. Taim wanpela man i kolim Jisas “gutpela,” Jisas i tok: “Bilong wanem yu kolim mi gutpela? I no gat wanpela man i gutpela, God wanpela tasol i gutpela.” (Mak 10:18) Long narapela taim, Jisas i wasim lek bilong ol disaipel na bai ol i ken lain olsem ol i mas mekim pasin daun long olgeta taim.—Jon 13:1-15.

Ol Kristen tru i mas helpim ol bratasista bilong ol. (Gal. 5:13) Dispela i stret moa yet long ol lain husat i laik kamap ol wasman insait long kongrigesen. Em gutpela tru sapos wanpela brata i wok strong long kamap wanpela wasman. Tasol as na em i laik kamap wanpela wasman em bilong helpim ol arapela. Man i mekim wok wasman i no winim ol arapela, na em i no bos bilong ol. Nogat. Em i mas bihainim pasin bilong Jisas na mekim “pasin daun.”—Mat. 11:29; 1 Tim. 3:1, 6.

Ol askim bilong skelim long bel:

Mi save mekim gut moa yet long ol brata husat i holim wok insait long kongrigesen, winim ol arapela, long wanem, mi laik kisim sampela wok moa? Long sait bilong lotu, mi save tingting long mekim ol samting long ai bilong ol arapela na bai ol i givim biknem long mi? Oltaim mi save traim long winim ol arapela?

 3 Ol lo na ol kastam bilong ol Farisi i givim hatwok long ol man nating.

Jehova i givim Lo bilong en long ol Israel bilong soim ol long olsem wanem ol i mas lotuim em. Tasol em i no kolim olgeta liklik samting ol i mas mekim bilong bihainim Lo. Olsem, Lo i tok ol Israel i no ken wok long Sabat. Tasol Lo i no gat lista bilong ol samting ol i mas mekim o ol i no ken mekim long dispela de. (Kis. 20:10) Ol Farisi i kamapim ol lo na ol kastam bilong ol yet, long wanem, ol i ting Lo bilong Jehova i no kamapim klia ol samting ol i mas mekim. Jisas i bihainim Lo bilong God, tasol em i no bihainim ol strongpela lo ol Farisi i putim. (Mat. 5:17, 18; 23:23) Jisas i kliagut long as bilong ol lo bilong God, na em i save olsem God i laik bai ol man i kamapim pasin marimari na pasin sori long ol arapela. Maski sampela taim ol disaipel i mekim Jisas i bel hevi, em i mekim yet gutpela pasin long ol. Olsem, long nait ol i kam arestim Jisas, em i askim 3-pela aposel long was i stap. Tasol ol i wok long slip. Maski ol i mekim olsem, Jisas i mekim gutpela pasin long ol na em i tok: “Tru tumas, bel bilong man i redi long mekim olgeta samting, tasol bodi i no gat strong.”—Mak 14:34-42.

Ol askim bilong skelim long bel:

Mi save putim ol strongpela lo na tokim ol arapela long bihainim? Oltaim mi laik bai ol arapela i mekim ol samting mi yet i ting i stret? Mi laik bai ol arapela i mas mekim planti wok moa winim wok ol inap mekim?

Ol samting Jisas i lainim ol man long en i no wankain liklik long ol samting ol Farisi i lainim ol man long en. Yu inap tingim sampela samting yu inap mekim bilong bihainim moa yet pasin bilong Jisas? Maski em wanem samting, yu mas wok strong long bihainim.

[Piksa long pes 28]

Ol Farisi i save pasim ol liklik bokis we i gat ol skripsa insait long en.—Mat. 23:2, 5

[Ol Piksa long pes 29]

Ol elda Kristen i no gat pasin antap olsem ol Farisi, ol elda i gat pasin daun na ol i save helpim ol arapela

[Piksa long pes 30]

Yu bihainim pasin bilong Jisas o yu laik bai ol arapela i mas mekim planti wok, winim wok ol inap mekim?