Stori bilong Elva Gjerde

Klostu 70 yia i go pinis, wanpela visita i kam long haus na mekim tok long papa we i senisim tru laip bilong mi. Kirap long dispela de na i kam, i gat planti arapela man i bin helpim mi. Na mi kisim wanpela pren husat i dia tumas long mi winim ol arapela. Mi laik kamapim stori bilong mi.

MI BON long Sydney, Australia, long 1932. Papamama i bilip long God, tasol ol i no save go lotu. Mama i skulim mi olsem oltaim God i save lukluk long mi bilong panisim mi sapos mi mekim rong. So mi pret long God. Tasol mi gat intres yet long Baibel. Taim anti i visitim mipela long ol wiken, em i kamapim ol gutpela stori bilong Baibel. Mi save amamas long em i kam.

Taim mi tineja, papa i bin ritim ol buk wanpela lapun meri i bin givim long mama bilong mi. Dispela lapun meri em wanpela Witnes Bilong Jehova. Papa i laikim tru samting em i ritim na em i orait long stadi Baibel wantaim ol Witnes. Wanpela nait, taim papa i mekim stadi, em i lukim mi i stap hait na putim yau. Em i laik salim mi i go bek long bet, tasol brata i askim papa long larim mi i stap taim ol i mekim stadi. Dispela i mekim, na laip bilong mi i kirap long senis, na mi kirap kamap pren bilong God tru, em Jehova.

I no longtaim, mi na papa i kirap go long ol miting Kristen. Save Papa i kisim i kirapim em long mekim sampela senis long laip bilong em. Em i kirap bosim bel hat bilong em. Dispela i kirapim mama na bikpela brata bilong mi, Frank, long kam wantaim mipela long ol miting. a Mipela fopela i mekim yet ol senis long laip bilong mipela, na mipela kisim baptais na kamap Witnes Bilong Jehova. Kirap long dispela taim, mi bin i gat planti pren i gat bikpela krismas, na ol i bin helpim mi.

BAI MI MAKIM WANEM WOK?

Taim mi tineja, mi pas gut wantaim ol lapun insait long kongrigesen. Wanpela em Alice Place, em dispela lapun sista husat i bin autim tok long mipela long namba 1 taim. Em i kamap olsem bubu bilong mi. Alice i bin skulim mi long pasin bilong autim tok na kirapim mi long kisim baptais. So taim mi gat 15 krismas, mi kisim baptais.

Na tu, mi bin pas gut tru wantaim tupela lapun marit, em Percy na Madge Dunham. Helpim ol i givim mi i bin mekim bikpela samting long mi. Mi laikim tru matematiks, na mi laik tru long kamap mats tisa. Paslain long Wol Woa 2, Percy na Madge i bin wok misineri long Latvia. Tasol taim woa i kirap, ol i singautim tupela long wok long Betel long Sydney, Australia. Percy na Madge i save tingim  mi, na ol i stori long ol gutpela ekspiriens bilong wok misineri bilong ol. Mi kliagut olsem bai mi amamas moa long skulim ol man long Baibel, winim matematiks. So mi makim olsem mi laik kamap wanpela misineri.

Tupela Dunham i kirapim mi long painia na bai mi redi long mekim wok misineri. Olsem na, long 1948, taim mi gat 16 krismas, mi kirap painia. Na mi wok wantaim 10-pela arapela yangpela painia long kongrigesen husat i amamas long autim tok long Hurstville, Sydney.

Insait long 4-pela yia i kamap bihain, mi painia long 4-pela arapela taun long New South Wales na Queensland. Wanpela Baibel sumatin bilong mi bilong pastaim tru em Betty Law (nau em Betty Remnant). Betty i gat 2-pela krismas moa long mi na em i gutpela meri tru. Bihain, mitupela i painia wantaim long taun Cowra, em 230 kilomita longwe long Sydney. Maski mitupela i wok wantaim inap sotpela taim tasol, mitupela i stap pren yet.

Mi kamap painia salim na ol i salim mi i go long taun Narrandera, em 220 kilomita longwe long Cowra. Neks painia mi wok wantaim em Joy Lennox (nau em Joy Hunter). Em tu i winim mi long 2-pela krismas na em i save givim bel long mekim wok autim tok. Mitupela tasol i Witnes long dispela taun. Mi na Joy i stap long haus bilong tupela marit husat i save mekim gut long ol man, em Ray na Esther Irons. Ol i gat wanpela boi na 3-pela gel, na famili olgeta i laikim tok i tru. Ray na pikinini man i wok long wanpela fam i save lukautim sipsip na groim wit. Esther na 3-pela pikinini meri i save lukautim wanpela haus pasindia, we ol man i rentim rum na baim ol kaikai ol i redim. Long olgeta Sande, mi na Joy i save kukim bikpela kaikai bilong famili bilong Irons na bilong 12-pela man i slip long haus pasindia. Ol dispela man bilong stretim rot bilong ol tren i save hangre nogut tru! Wok kuk mitupela i mekim i helpim mipela long baim rent. Taim kaikai i pinis, mitupela i wasim ol plet kap na bihain stadi long Wastaua wantaim famili Irons. Ray, Esther, na 4-pela pikinini i kamap Witnes na ol i fes lain bilong Narrandera Kongrigesen.

Long 1951, mi kibung long Sydney na go long wanpela spesel miting bilong ol painia husat i tingting long mekim wok misineri. Mipela i bung long wanpela traipela haus sel na winim 300 i bung. Nathan Knorr bilong Brooklyn Betel i bin toktok wantaim mipela, na mipela i gat laik tru long harim olgeta tok em i mekim. Em i tokaut klia olsem i gat wok long autim tok bilong gutnius long olgeta hap. Bihain, planti painia husat i stap long dispela miting i bin kirap autim tok long hap bilong Saut Pasifik na ol arapela hap tu. Ol i singautim 17 painia bilong Australia long insait long namba 19 klas bilong Skul Gileat long 1952, na mi amamas stret olsem mi wanpela bilong ol. Mi gat 20 krismas tasol, na nau laik bilong mi long kamap misineri i wok long kamap tru!

MEKIM YET SAMPELA SENIS

Skul Gileat i bin helpim mi long save moa long Baibel na i bin strongim bilip bilong mi. Na i bin mekim bikpela samting long pasin bilong mi. Mi yangpela na sampela tingting bilong mi i kranki yet. Mi laik stap gutpela olgeta, na mi ting ol arapela tu mas mekim pasin i gutpela olgeta. Sampela taim mi save strik tumas. I gat sampela samting mi ting i gat rong long mekim, tasol tingting bilong mi i no stret. Olsem, mi no wanbel taim mi lukim Brata Knorr i pilai beisbal wantaim ol yangpela brata i wok long Betel.

Ol tisa bilong Skul Gileat i gat savetingting na ating ol i luksave olsem sampela samting i givim hatwok long mi. Long gutpela pasin ol i helpim mi long senisim tingting bilong mi. Isi isi ol i helpim  mi long kliagut olsem Jehova i save laikim ol man na em i amamas long ol samting yumi inap mekim. Em i no strik na i gat hatpela pasin. Na tu sampela klasmeit i bin helpim mi. Mi tingim wanpela klasmeit i tokim mi olsem Jehova i no save stikim yumi bilong kontrolim yumi na i no stret long mi strik tumas long mi yet! Mi pilim tru tok bilong em.

Taim mipela i pinis long Skul Gileat, ol i makim 5-pela bilong mipela long go long Namibia, Afrika. I no longtaim na mipela i lukautim 80 Baibel stadi. Mi laikim tru Namibia na wok misineri, tasol mi kirap laikim stret wanpela klasmeit long Skul Gileat husat i kisim asainmen long Swiselan. Mi stap wanpela yia long Namibia na bihain mi go long Swiselan. Mitupela i marit, na mi raun wantaim man bilong mi long mekim wok sekit.

BIKPELA BEL HEVI TRU

Mipela i mekim wok sekit inap 5-pela yia na bihain ol i singautim mipela i kam wok long Betel long Swiselan. Mi amamas long insait long Betel famili na bung wantaim planti bratasista husat i gat bikpela krismas na stap longpela taim insait long tok i tru.

Bihain liklik, bikpela hevi painim mi. Mi kisim save olsem man bilong mi i no stap gut moa long mi na Jehova. Taim em i lusim mi, mi kirap nogut na bel hevi tru. Ol gutpela pren long Betel i laikim na sapotim mi, sapos ol i no bin mekim olsem, mi no save bai mi mekim wanem. Ol i putim yau taim mi laik toktok, na taim mi taiet ol i larim mi long malolo. Tok bilong ol i mekim isi bel bilong mi, na pasin helpim bilong ol i helpim mi long karim dispela bikpela hevi. Pasin bilong mi long pas gut wantaim Jehova i kamap strong moa.

Mi tingim tu ol tok ol pren i bin mekim planti yia paslain long dispela. Ol dispela lain i gat bikpela krismas i bin larim ol traim i skulim ol. Madge Dunham i bin tokim mi olsem planti hevi bai painim mi taim mi mekim wok bilong Jehova, tasol planti taim ol traim mi bai kisim long ol lain em mi pas gut wantaim ol, bai givim hatwok moa long mi. Long ol kain traim olsem, mi mas bilip long Jehova na tingim olsem mi stap wok meri bilong em na i no bilong wanpela man bilong graun. Tok bilong Madge i helpim mi long karim planti hevi. Mi strong long no ken larim ol rong bilong man bilong mi i pulim mi i go longwe long Jehova.

Bihain mi laik go bek long Australia na painia long hap i klostu long famili. Taim mi raun i go bek long ples, mi wok long stori gut wantaim sampela pasindia long sip. Wanpela bilong ol dispela pasindia em Arne Gjerde, man Nowe i gat pasin isi, na em i laikim tok em i harim. Bihain em i visitim mi na famili long Sydney. Kwiktaim em i bilipim ol samting em i lainim na em i kisim baptais. Long 1963, mi na Arne i marit, na tupela yia bihain mi karim pikinini man, nem bilong en Gary.

NARAPELA HEVI MI MAS KARIM

Mi, Arne, na Gary i stap gut wantaim. I no longtaim na Arne i skruim sampela rum moa long haus so lapun papamama bilong mi inap stap wantaim mipela. Tasol taim mipela marit 6-pela yia pinis, ol dokta i tok Arne i gat kensa long kru. Mipela i kirap nogut na pilim olsem bikpela hevi tru i painim mipela. Arne i stap long haus sik inap longpela taim na kisim rediesen. Mi bin visitim em long olgeta de. I luk olsem em i wok long kamap orait, tasol helt i go nogut moa na em kisim sik strok. Ol i  tok em bai stap laip inap sampela wik tasol. Tasol Arne i no dai na em inap go bek long haus. Mi lukautim em na em i wok long kamap orait liklik. Bihain, em inap wokabaut gen, na i no longtaim na em inap mekim wok elda. Em man bilong amamas. Dispela i daunim sik bilong em na i helpim mi long lukautim em.

Planti yia bihain, em long 1986, Arne i kisim bikpela sik gen. Papamama bilong mi i dai pinis, na mipela i bin lusim Sydney na go sindaun long hap bilong ol Blue Maunten, we mipela i stap klostu moa long ol pren bilong mipela. Bihain Gary i bin maritim naispela sista, em Karin, na tupela i bin singautim mitupela long kam stap wantaim ol. Olsem na mipela olgeta i sindaun long wanpela haus we i klostu liklik long hap mi na Arne i bin stap long en.

Insait long laspela 18 mun Arne i stap laip em i no inap lusim bet na oltaim wanpela i mas lukautim em. Mi mas stap long haus long de olgeta, so mi save yusim 2-pela aua long olgeta de bilong stadi long Baibel na ol buk samting bilong yumi. Mi lainim planti samting i helpim mi long karim dispela hevi. Mi amamas long ol lapun bilong kongrigesen i kam lukim mi. Sampela i bin karim wankain hevi, na visit bilong ol i bin strongim mi tru! Arne i bin dai long Epril 2003, na em i bilip tru long kirap bek.

NAMBAWAN BIKPELA HELPIM

Taim mi yangpela, sampela tingting bilong mi i kranki yet na mi ting olsem olgeta samting i mas gutpela olgeta. Tasol mi kisim save olsem planti samting i no kamap olsem yumi ting em bai kamap. Mi kisim planti blesing, tasol tu mi bin karim tupela bikpela hevi. Namba 1 man bilong mi i no stap gut long mi na Jehova. Na namba 2 man bilong mi i dai bikos em i sik. Long olgeta hevi i painim mi, i gat lain i givim gutpela tok long mi na mekim isi bel bilong mi. Tasol nambawan bikpela helpim i kam long God Jehova, em “Man bilong bipo bipo yet.” (Dan. 7:9) Tok i kam long em i bin senisim pasin bilong mi, na long dispela rot mi bin kisim planti gutpela ekspiriens long wok misineri. Taim mi gat hevi, pasin laikim na pasin helpim bilong Jehova i bin helpim mi long sanap strong na mekim isi bel bilong mi. (Sng. 94:18, 19) Famili bilong mi na ol pren i laikim na sapotim mi. Ol i mekim gut long mi taim mi karim ol dispela hevi. (Snd. 17:17) Planti bilong ol em ol lapun i gat savetingting.

Gutpela man Jop i bin tok: “I tru, ol lapun i gat planti gutpela tingting na save.” (Jop 12:12) Taim mi tingim laip bilong mi, mi save olsem dispela tok em i tru. Ol gutpela tok bilong ol lapun i gat savetingting i bin helpim mi, pasin bilong ol long mekim gut bel bilong mi i bin sapotim mi, na pasin pren bilong ol i mekim laip bilong mi i gutpela moa. Mi amamas long i stap pren bilong ol.

Long nau mi gat 80 krismas. Ol samting i painim mi i mekim na mi tingim tru ol samting ol lapun i nidim. Mi amamas yet long visitim ol na helpim ol. Na tu, mi amamas long stap wantaim ol yangpela. Mi laikim pasin bilong ol long wok strong, na tu, pasin bilong ol long givim bel long mekim wok i strongim mi. Taim ol yangpela i askim mi long givim sampela tok bilong helpim ol, mi save amamas stret long mekim olsem.

[Futnot]

[Piksa long pes 14]

Mi wok painia wantaim Joy Lennox long Narrandera

[Piksa long pes 15]

Elva wantaim sampela bilong famili Betel long Swiselan long 1960

[Piksa long pes 16]

Mi lukautim Arne taim em i sik