Trastim Jehova God Bilong “Bosim Ol Taim na Ol De”

“Em i save bosim ol taim na ol de, na em i save rausim ol king na mekim ol man i kamap king.”—DAN. 2:21, NW.

BAI YU BEKIM OLSEM WANEM?

Olsem wanem ol samting God i wokim na truim bilong ol tok profet i kamapim klia olsem God inap kamapim ol samting em i tingting pinis long mekim long taim em yet i makim?

Yumi save Jehova em i God bilong “bosim ol taim na ol de,” olsem na yumi bai mekim wanem?

Maski ol man i mekim wanem, bilong wanem Jehova i no gat wok long senisim taim em i bin makim bilong kamapim samting em i tingting pinis long mekim?

1, 2. Bilong wanem yumi ken tok Jehova i kliagut tru olsem “taim” em wanem samting?

 PASLAIN tru long God Jehova i wokim ol man, em i stretim rot bilong mesarim taim. Long de namba 4 bilong wokim ol samting, God i tok san na mun i mas kamap ples klia long skai bilong “makim tulait na nait” na bilong “makim ol de na ol yia na ol kain kain taim bilong yia.” (Stt. 1:14, 19, 26) Na dispela i kamap stret olsem Jehova i laikim.

² Ol saientis i no inap long eksplenim olsem “taim” em wanem samting tru. Wanpela ensaiklopidia i tok: “No gat wanpela inap tok olsem ‘taim’ em wanem samting stret.” Tasol Jehova i kliagut tru long “taim” em wanem samting. Em Man i bin “wokim skai na graun.” Na Jehova inap save wanem samting bai kamap bihain. Baibel i tok “taim wanpela samting i no kamap yet,” God i “save tokaut long dispela samting bai i kamap na bai i go pinis olsem wanem.” (Ais. 45:18; 46:10) Nau bai yumi stori long 2-pela samting em bai strongim bilip bilong yumi long Jehova na long Baibel. Dispela 2-pela samting bai kamapim klia olsem Jehova em i Man bilong makim taim bilong ol samting, olsem olgeta samting em i tingting pinis long mekim i save kamap long taim stret em yet i save makim. Tupela samting bai yumi skelim em (1) ol samting Jehova i bin wokim na (2) truim bilong ol tok profet.

OL SAMTING JEHOVA I WOKIM I SAVE STRONGIM BILIP

3. Wanem sampela samting i save makim stret taim?

³ Planti samting Jehova i bin wokim, ol liklik na ol bikpela samting, i save makim stret taim. Olsem, ol atom a i vaibret long wankain spit long olgeta taim. Sampela spesel klok i  yusim atom bilong mesarim taim, na maski 80 milion yia i go pinis, taim bilong klok bai i no abrus long wanpela seken. Rot ol planet na ol sta i save bihainim i helpim yumi long save long wanem hap stret long skai ol bai stap long en. Dispela i bin helpim ol man long save em wanem taim bilong yia. Na ol man inap lukluk long ol sta bilong stiaim ol taim ol i laik i go long wanpela longwe hap. Jehova i wokim ol atom na ol sta, na em i “gat olgeta strong” na i stret yumi litimapim nem bilong em.—Ritim Aisaia 40:26.

4. Taim i bosim olgeta samting i gat laip, olsem wanem dispela i kamapim klia Jehova i gat savetingting?

⁴ Taim i bosim olgeta samting i gat laip. I olsem planti plaua na ol animal i bihainim wanpela klok i stap insait long ol. Dispela em i as na planti pisin i save long taim stret ol i mas lusim wanpela hap paslain long kol i kamap na flai i go long narapela hap. (Jer. 8:7) Taim i save bosim ol man tu. Olsem, bodi bilong yumi i save long taim bilong san na nait. Sapos yumi raun long balus i go long narapela hap bilong graun we “taim” i narapela, orait ating sampela de bihain bodi bilong yumi bai i lain long stap long dispela nupela “taim.” Olsem na planti samting Jehova i wokim i kamapim ples klia olsem em i God bilong “bosim ol taim na ol de.” Na em i gat bikpela strong na savetingting. (Ritim Song 104:24.) Savetingting na strong bilong Jehova i no gat pinis bilong en, olsem na yumi ken bilip olsem em inap kamapim samting em i tingting pinis long mekim!

TRUIM BILONG OL TOK PROFET LONG TAIM STRET I SAVE STRONGIM BILIP

5. (a) Wanem wanpela rot tasol bilong yumi ken save long ol samting bai kamap bihain? (b) Bilong wanem Jehova inap tokim yumi long ol samting bai kamap na em bai kamap long wanem taim?

⁵ Ol samting Jehova i wokim i skulim yumi long “ol pasin bilong en i stap hait,” tasol ol i no bekim ol bikpela askim olsem, Wanem samting bai painim ol man long bihain? (Rom 1:20) Wanpela rot tasol bilong bekim dispela askim em long stadi long tok bilong God long Baibel. I gat planti tok profet em truim bilong ol i kamap long taim stret. Jehova inap tokim yumi long ol samting bai kamap bihain bikos em i save pinis long ol dispela samting. Na tu, oltaim truim bilong ol tok profet bilong Baibel i kamap long taim stret. Dispela i tru, long wanem, Jehova inap mekim ol samting i kamap olsem em i bin tokaut pinis long mekim na long taim em i makim.

6. Olsem wanem yumi save Jehova i laik bai yumi kliagut long ol tok profet bilong Baibel?

⁶ Tingting bilong God long “taim” i no wankain olsem bilong yumi, tasol bilong makim taim stret we wanpela samting bai kamap, em i yusim ol tok yumi inap kliagut long en. (Ritim Song 90:4.) Olsem, Buk Revelesen i stori long “4-pela ensel” em ol i ‘redi pinis na wetim aua, de, mun, na yia.’ Yumi ol man inap kliagut long dispela tok aua, de, mun, na yia i makim wanem samting. (Rev. 9:14, 15) Taim yumi kliagut olsem truim bilong ol tok profet i kamap long taim stret God i makim, dispela i strongim bilip bilong yumi olsem God em i Man bilong “bosim ol taim na ol de.” Dispela i strongim bilip bilong yumi tu long Baibel. Nau bai yumi stori long sampela eksampel.

7. Olsem wanem tok profet bilong Jeremaia long Jerusalem na Juda i soim olsem oltaim Jehova i save truim tok bilong em long taim em i makim?

⁷ Pastaim yumi ken skelim samting i bin kamap klostu 700 yia paslain long Krais. “Long namba 4 yia bilong Jehoiakim, pikinini bilong Josaia, i stap king bilong Juda,” Jehova i gat tok long olgeta Juda na em i givim dispela tok long Jeremaia. (Jer. 25:1) Jehova i tok ol Babilon bai bagarapim Jerusalem na kisim ol Juda i go kalabus long Babilon. Long dispela hap ol Juda “bai i stap olsem ol wokboi nating bilong king bilong Babilon inap 70 yia.” Long 607 B.C.E., ol ami bilong Babilon i bagarapim Jerusalem na kisim ol Juda i go long Babilon. Tasol Jehova i tok wanem samting bai kamap bihain long 70 yia? Jehova i tokim lain bilong em olsem pinis bilong “70 yia bilong Babilon,” em bai i truim tok promis bilong em na bringim ol i kam bek long ples bilong ol.  (Jer. 25:11, 12; 29:10) Truim bilong dispela tok profet i kamap long taim stret. Ol Juda i go bek long ples bilong ol long 537 B.C.E., em bihain long ol Midia na Persia i larim ol long lusim Babilon na go bek long ples.

8, 9. Olsem wanem ol tok profet bilong Daniel i soim olsem Jehova em i God bilong “bosim ol taim na ol de”?

⁸ Klostu 2-pela yia paslain long ol Juda i lusim Babilon, Daniel i raitim narapela tok profet we ol Juda i insait long en. Long dispela tok profet, God i tok Mesaia bai kamap 483 yia bihain long tok i kamap long wokim gen Jerusalem. King bilong ol Midia na Persia i mekim dispela tok long yia 455 B.C.E. Orait bihain stret long 483 yia i pinis, em long 29 C.E., God i makim Jisas bilong Nasaret long holi spirit taim em i baptais, long dispela rot em i kamap Mesaia. b—Neh. 2:1, 5-8; Dan. 9:24, 25; Luk 3:1, 2, 21, 22.

⁹ Nau tingim tok profet Baibel i mekim long Kingdom Bilong God. Baibel i bin makim olsem Krais bai kamap King long heven long 1914. Olsem, Baibel i stori long “wanem sain bai kamap” bilong soim olsem Jisas i kam i stap, na tu, Baibel i tok long dispela taim bai i gat ol bikpela hevi long graun bikos ol ensel i rausim Satan long heven. (Mat. 24:3-14; Rev. 12:9, 12) Ol arapela tok profet bilong Baibel i helpim yumi long save long taim stret we “dispela haptaim bilong ol manmeri bilong ol arapela lain” i pinis na Krais i kamap King long heven. Dispela i kamap long 1914.—Luk 21:24; Dan. 4:10-17. c

10. Wanem ol samting bai kamap long taim stret?

¹⁰ Klostu nau, “traipela hevi tru,” em Jisas i bin tok profet long en bai kamap. Bihain long dispela, Jisas bai mekim wok king inap 1,000 yia. Yumi save gut tru olsem ol dispela samting bai kamap long taim stret. Taim Jisas i stap long graun, Jehova i bin makim pinis ‘de na aua’ ol dispela samting bai kamap.—Mat. 24:21, 36; Rev. 20:6.

YUSIM GUT TAIM BILONG YU

11. Sapos yumi bilip olsem yumi stap long taim bilong las de, orait yumi mas mekim wanem?

¹¹ Yumi save Krais i kamap King pinis na yumi stap long “taim bilong las de,” olsem na yumi mas mekim wanem? (Dan. 12:4) Planti manmeri i luksave olsem ol hevi bilong graun i go nogut moa, tasol ol i no kliagut olsem dispela i stret olgeta long tok profet Baibel i mekim long ol samting bai kamap long taim bilong las de. Sampela i ting ol dispela hevi bai go bikpela tru we ol man i no inap stretim. Sampela i ting ol man bai kamapim “taim bilong bel isi na gutpela sindaun.” (1 Tes. 5:3) Olsem wanem? Yumi bilip olsem yumi stap klostu tru long pinis bilong dispela taim we Satan i bosim graun? Sapos yumi bilip olsem, orait bai yumi yusim taim bilong yumi long mekim wok bilong Jehova na helpim ol arapela long kisim save long em. (2 Tim. 3:1) Yumi mas bihainim savetingting na yusim gut taim bilong yumi.—Ritim Efesus 5:15-17.

12. Yumi kisim wanem skul long ol tok Jisas i mekim long ol samting i bin kamap long taim bilong Noa?

 ¹² I gat planti samting long dispela graun em inap pulim tingting bilong yumi, na dispela i mekim na i hatwok long yusim gut taim bilong yumi. Jisas i tok lukaut olsem: “Pasin ol man i bin mekim long taim bilong Noa, wankain pasin bai i kamap long taim Pikinini bilong man i kam i stap.” Ol samting i stap olsem wanem long taim bilong Noa? God i tokim Noa pinis olsem ol manmeri long taim bilong en bai pinis. Tait wara bai kilim i dai olgeta man nogut. Noa em “man bilong tokaut long stretpela pasin.” Em i stap gut long wok bilong autim tok long ol manmeri i stap long taim bilong en. (Mat. 24:37; 2 Pita 2:5) Tasol “ol i wok long kaikai na dring, na ol man i marit” na “ol i no luksave long ol samting i wok long kamap, i go inap long taim Bikpela Tait i kam na karim ol i go.” Long dispela as Jisas i tok lukaut olsem: “Yupela tu i mas redi i stap, long wanem, long taim yupela i no ting long en, Pikinini bilong man bai i kam.” (Mat. 24:38, 39, 44) Yumi mas bihainim pasin bilong Noa, no ken bihainim pasin bilong ol man long taim bilong en. Wanem samting bai helpim yumi long redi i stap?

13, 14. Taim yumi wetim Pikinini bilong man i kam, yumi mas tingim wanem samting bilong Jehova na dispela bai helpim yumi long mekim wok bilong em?

¹³ Maski Pikinini bilong man bai kam long wanpela taim we yumi no ting em bai kam, yumi mas tingim olsem oltaim Jehova i save kamapim samting em i tingting pinis long mekim long taim em i makim. Maski wanem samting i kamap long graun o ol man i plen long mekim wanem, Jehova inap makim wanem ol samting bai kamap na em inap makim taim bilong dispela samting tu. (Ritim Daniel 2:21, NW.) d Sindaun 21:1 i tok: “Bikpela i save stiaim tingting bilong king na king i save bihainim laik bilong Bikpela, olsem wara i bihainim baret.”

¹⁴ Jehova inap kontrolim ol samting i kamap na long dispela rot em inap kamapim long taim stret samting em i tingting pinis long mekim. Planti ol bikpela senis i kamap long graun i truim ol tok profet, na moa yet ol tok profet i stori long wok bilong autim gutnius bilong Kingdom Bilong God long olgeta hap. Tingim ol samting i bin kamap long ol kantri we bipo ol dikteta na ol komiunis i bin bosim. Wan wan man tasol i ting kain bikpela senis long ol gavman inap kamap hariap tru olsem i bin kamap long ol dispela kantri. Tasol ol dispela senis i mekim na nau yumi autim gutnius long planti kantri we bipo ol i bin tambuim wok bilong yumi. So yumi laik bihainim savetingting na yusim taim bilong yumi long mekim yet wok bilong Jehova, em God bilong “bosim ol taim na ol de.”

KAMAPIM BILIP OLSEM JEHOVA I SAVE MEKIM OL SAMTING LONG TAIM STRET

15. Olsem wanem yumi ken kamapim bilip bilong yumi taim oganaisesen bilong Jehova i kamapim ol senis?

¹⁵ Bilong mekim yet wok autim tok long dispela taim bilong las de, yumi mas bilip olsem long taim stret Jehova i save kamapim ol samting em i tingting pinis long mekim. Planti samting long graun i wok long senis, olsem na sampela taim yumi mas senisim pasin bilong yumi long mekim wok autim tok. Oganaisesen bilong Jehova i save kamapim sampela senis bilong helpim yumi long autim gutnius long rot we i gutpela moa. Yumi kamapim olsem yumi bilip long God bilong “bosim ol taim na ol de” taim yumi bihainim tru ol dispela senis na stap gut long mekim wok aninit long Pikinini bilong en, em “het bilong kongrigesen.”—Efe. 5:23.

16. Bilong wanem yumi ken bilip olsem Jehova bai helpim yumi long taim stret?

¹⁶ Jehova i laik bai yumi prea long em long olgeta kain taim na em i laik bai yumi bilip tru olsem em bai helpim “yumi long taim stret.” (Hib. 4:16) Dispela i kamapim klia olsem em i laikim yumi tru na em i tingim yumi wan wan. (Mat. 6:8; 10:29-31) Yumi kamapim bilip bilong yumi  long Jehova taim yumi wok yet long beten askim em long helpim yumi na bihainim tok bilong em. Na tu, yumi no lusim tingting long beten askim Jehova long tingim ol bratasista bilong yumi.

17, 18. (a) Klostu nau Jehova bai mekim wanem long ol birua bilong em? (b) Yumi mas was gut long wanem samting?

¹⁷ Nogut bilip bilong yumi i no strong. Nau em taim we bilip bilong yumi mas strong na bai yumi no pret long bihainim laik bilong God. (Rom 4:20) Satan na ol lain em i bosim ol i laik pasim yumi long wok Jisas i bin tokim yumi long mekim. (Mat. 28:19, 20) Maski Satan i birua long yumi, yumi save olsem Jehova em i “God i gat laip, em i Seivia bilong olgeta kain man, na moa yet ol man i holimpas bilip.” Em “i save long rot bilong kisim bek ol man i save givim bel tru long Em taim traim i painim ol.”—1 Tim. 4:10; 2 Pita 2:9.

¹⁸ Klostu nau Jehova bai bagarapim pasin nogut bilong dispela graun. Yumi no save long taim na olsem wanem em bai mekim dispela samting, tasol yumi save Krais bai bagarapim ol birua bilong God long taim stret. Long dispela taim olgeta man bai save olsem Jehova tasol i gat rait long bosim olgeta samting long heven na graun. Olsem na bagarap inap painim yumi sapos yumi no kliagut long “ol taim na ol de” nau yumi stap long en. Yumi mas was gut, nogut yumi kirap na ting olsem “olgeta samting i stap wankain olsem bipo tru taim God i mekim ol samting i kamap.”—1 Tes. 5:1; 2 Pita 3:3, 4.

BIHAINIM PASIN BILONG WET

19, 20. Bilong wanem yumi mas i gat pasin bilong wetim Jehova?

¹⁹ Taim Jehova i wokim ol man, em i laik bai ol i stap oltaim na bai ol inap wok long kisim sampela save moa long em na long ol naispela samting em i bin wokim. Saveman 3:11 (NW) i stori long Jehova olsem: “Em i wokim olgeta samting i gutpela tru na i kamap long taim bilong en. Em i putim tingting bilong laip i stap oltaim long bel bilong ol man, bambai ol i no inap save long olgeta samting God tru i mekim long bipo yet i go inap long bihain tru.”

²⁰ Yumi amamas tru olsem Jehova i no bin senisim tingting bilong em long samting em i laik mekim long ol man. (Mal. 3:6) Baibel i tok God i “no save senis senis olsem sedo i save senis senis.” (Jems 1:17) Ol sedo i save senis senis bikos graun i tan tanim na “taim” i save ron, tasol “taim” i no bosim Jehova. Em i “King bilong oltaim oltaim.” (1 Tim. 1:17) Olsem na yumi mas i gat pasin bilong wetim Jehova. (Mai. 7:7) Na Baibel i tok, “Yupela olgeta manmeri i bilip long Bikpela, yupela sanap strong, na bel bilong yupela i ken kisim strong oltaim.”—Sng. 31:24.

[Ol Futnot]

[Askim Bilong Stadi]

[Piksa long pes 19]

Daniel i bilip olsem God bai truim ol tok profet bilong em

[Piksa long pes 21]

Yu save yusim gut taim bilong yu bilong mekim laik bilong Jehova?