Yu Save Kamapim Glori Bilong Jehova?
Yu Save Kamapim Glori Bilong Jehova?
“Yumi stap olsem mira i kamapim glori bilong Jehova.”—2 KOR. 3:18.
WANEM BEKIM BILONG YU?
Bilong wanem yumi inap kamapim glori bilong Jehova, maski yumi gat sin?
Olsem wanem ol beten bilong yumi na ol miting i helpim yumi long kamapim glori bilong God?
Olsem wanem yumi inap bihainim yet pasin bilong kamapim glori bilong Jehova?
1, 2. Wanem samting i mekim na yumi inap bihainim ol pasin bilong Jehova?
YUMI olgeta i gat sampela pasin bilong papamama bilong yumi. Ating yumi bin harim wanpela i tok: ‘Mangi i kisim papa bilong em stret’ o ‘dispela gel i olsem mama bilong en.’ Na planti taim ol pikinini i traim long mekim samting ol i lukim papamama i mekim. Olsem wanem long yumi? Yumi inap bihainim pasin bilong Papa bilong yumi long heven, em Jehova? Tru yumi no bin lukim em, tasol yumi ken kisim save long ol gutpela pasin bilong em long rot bilong lukim ol samting em i bin wokim. Na tu, yumi ken kisim save long pasin bilong God long rot bilong stadi long Baibel na tingim long bel ol tok yumi ritim, na moa yet taim yumi skelim ol tok Jisas i bin mekim na pasin em i bin bihainim. (Jon 1:18; Rom 1:20) So yumi inap bihainim ol pasin bilong Jehova, na long dispela rot yumi kamapim glori bilong em.
2 Paslain long God i wokim ol man, em i save pinis olsem ol bai inap bihainim laik bilong em, ol pasin bilong em, na givim glori long em. (Ritim Stat 1:26, 27.) Yumi ol Kristen i laik bihainim ol pasin bilong God. Sapos yumi mekim olsem, orait yumi kisim wanpela wok i gat nem, em wok bilong kamapim glori bilong em. Yumi inap kamapim glori bilong God maski yumi bilong wanem lain, o kalsa bilong yumi i wanem kain, o wanem kain skul yumi bin kisim. Yumi inap mekim olsem, long wanem, “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”—Apo. 10:34, 35.
3. Yumi pilim olsem wanem taim yumi mekim wok bilong Jehova?
3 Ol Kristen God i makim i save kamapim glori bilong Jehova. Aposel Pol em i wanpela bilong ol, na em i tok: “Yumi no gat laplap i karamapim pes bilong yumi, yumi stap olsem mira i kamapim glori bilong Jehova. Na dispela i senisim yumi na yumi kamap olsem piksa bilong em. Yumi kamapim glori bilong em na wok long kamapim moa yet.” (2 Kor. 3:18) Pol i stori long taim Moses i kam daun long maunten Sainai wantaim Tenpela Lo. Pes bilong Moses i lait moa yet, long wanem, Jehova i bin toktok wantaim em. (Kis. 34:29, 30) Samting i bin kamap long Moses i no bin kamap long yumi, na taim ol manmeri i lukluk long pes bilong yumi, ol i no lukim lait. Tasol ol i ken lukim amamas bilong yumi taim yumi stori long Jehova, ol gutpela pasin bilong em, na gutpela samting em i tingting pinis long mekim bilong helpim ol man. Olsem na, maski yumi bilong lain God i makim o ol arapela sipsip, wokabaut na wok autim tok bilong yumi i kamapim glori bilong Jehova, wankain olsem mira i save sutim lait i go long ol arapela. (2 Kor. 4:1) Olsem wanem? Yu save kamapim glori bilong Jehova long rot bilong mekim ol samting long laip bilong yu we God bai amamas long en na long rot bilong wok autim tok oltaim?
YUMI LAIK KAMAPIM GLORI BILONG JEHOVA
4, 5. (a) Olsem Pol, yumi mas pait strong long sakim wanem samting i stap insait long yumi? (b) Sin i save mekim wanem long ol man?
4 Yumi ol wokboi bilong Jehova i laik kamapim glori bilong em long olgeta samting yumi mekim. Tasol planti taim yumi mekim rong, maski yumi gat laik long mekim ol samting i stret. Pol tu i gat dispela hevi. (Ritim Rom 7:21-25.) Em i tokaut klia long as na yumi olgeta i mas pait strong long sakim ol laik nogut: “Olgeta man i bin mekim sin na ol i sot long kamapim ol gutpela pasin bilong God.” (Rom 3:23) Adam i mekim sin, olsem na olgeta man i stap wokboi bilong sin taim ol i bon, na sin i stap olsem king nogut i bosim ol.—Rom 5:12; 6:12.
5 Sin em wanem samting? Sin i makim olgeta pasin i pait wantaim pasin bilong Jehova, na ol samting Jehova i laikim, na samting em i laik yumi mekim. Sin i bagarapim pasin bilong man long pas gut wantaim God. Sin i save pasim yumi long kamapim glori bilong Jehova, wankain olsem samting inap pasim man long sutim spia i go stret long mak. Sampela taim yumi mekim sin long laik bilong yumi yet. Na sampela taim yumi popaia na mekim sin. (Nam. 15:27-31) Sin i gat bikpela strong long bosim yumi, na em i save mekim yumi stap longwe long Krieta bilong yumi. (Sng. 51:5; Ais. 59:2; Kol. 1:21) Klostu olgeta manmeri i bihainim ol pasin i mekim ol i stap longwe olgeta long God, olsem na ol i lus long gutpela wok bilong kamapim glori bilong God. I no gat narapela samting i bagarapim ol man olsem sin.
6. Maski yumi sinman, bilong wanem yumi inap kamapim glori bilong Jehova?
6 Maski yumi bon wantaim sin, Jehova i as na yumi ken bilip na wetim gutpela samting. (Rom 15:13) Taim Jehova i givim Jisas olsem ofa bilong baim bek ol man, Jehova i opim rot long yumi ken lusim kalabus bilong sin. Yumi bilip long dispela ofa, olsem na yumi no stap moa olsem “wokboi bilong sin,” na yumi inap kamapim glori bilong Jehova na stap pren bilong em. (Rom 5:19; 6:6; Jon 3:16) Sapos yumi stap yet olsem pren bilong God, orait yumi ken save gut olsem em bai blesim yumi long nau. Na bihain, em bai mekim yumi kamap gutpela olgeta na givim yumi laip oltaim. Maski yumi sinman, em i gutpela blesing tru olsem long tingting bilong God yumi gutpela inap long kamapim glori bilong em!
WANEM SAMTING I HELPIM YUMI LONG KAMAPIM GLORI BILONG GOD?
7. Sapos yumi laik kamapim glori bilong God yumi mas luksave long wanem samting?
7 Yumi olgeta i gat sin, olsem na yumi olgeta i gat sampela pasin kranki. Sapos yumi laik kamapim glori bilong God, yumi wan wan i mas save long ol pasin kranki bilong yumi yet. (2 Sto. 6:36) Yumi mas luksave olsem yumi gat ol dispela pasin kranki, na yumi mas pait long daunim ol na bai yumi ken givim glori long God. Olsem, sapos yumi wok long mekim sin long rot bilong lukim ponografi, yumi mas luksave olsem yumi nidim helpim bilong ol elda na yumi mas askim ol long helpim yumi. (Jems 5:14, 15) Dispela em namba 1 samting yumi mas mekim sapos tru tru yumi laik givim glori long God. Oltaim yumi mas skelim gut olsem wokabaut bilong yumi i stret wantaim laik bilong Jehova o nogat. (Snd. 28:18; 1 Kor. 10:12) Maski yumi gat wanem ol pasin kranki, yumi mas pait yet long daunim ol bai yumi ken kamapim glori bilong God.
8. Maski yumi no gutpela olgeta, yumi mas mekim wanem?
8 Wanpela man tasol i bin amamasim God long olgeta samting em i bin mekim. Na em i kamapim gut tru glori bilong God. Dispela man em Jisas. Yumi no gutpela olgeta olsem Jisas, tasol yumi mas trai hat long bihainim pasin bilong em. (1 Pita 2:21) Jehova i luksave long samting yumi kamap gutpela moa long en, na em i luksave tu long hatwok yumi mekim bilong givim glori long em.
9. Olsem wanem Baibel i helpim yumi long kamapim gut moa glori bilong God?
9 Baibel inap helpim yumi long kliagut long olsem wanem yumi ken kamapim gut moa glori bilong God. Yumi mas stadi gut long Baibel na skelim long bel ol tok bilong en. (Sng. 1:1-3) Taim yumi ritim Baibel long olgeta de, yumi kisim save long ol senis yumi mas mekim na bai yumi ken kamap gutpela Kristen moa. (Ritim Jems 1:22-25.) Save yumi kisim long Baibel i strongim bilip bilong yumi. Na tu, dispela save i strongim laik bilong yumi long abrusim ol bikpela rong na i kirapim yumi long mekim ol samting i amamasim Jehova.—Sng. 119:11, 47, 48.
10. Olsem wanem ol beten inap helpim yumi long mekim gut moa wok bilong Jehova?
10 Sapos yumi laik kamapim glori bilong God, orait yumi gat wok tu long “holim strong pasin bilong beten.” (Rom 12:12) Yumi mas beten askim Jehova long helpim yumi long mekim wok bilong em long pasin em yet i laikim. Yumi ken askim em long givim yumi holi spirit, na mekim bilip bilong yumi i kamap strong moa, na strongim yumi long sakim ol traim. Na tu, yumi ken askim em long helpim yumi long kamap gutpela tisa long ol tok bilong Baibel. (Mat. 6:13; Luk 11:13; 17:5; 2 Tim. 2:15) Yumi mas bilip long helpim yumi kisim long Papa bilong yumi, Jehova, wankain olsem pikinini i save bilip long papa bilong en. Sapos yumi askim Jehova long helpim yumi long mekim gut moa wok bilong em, yumi ken bilip tru olsem em bai helpim yumi. Yumi no ken ting Jehova bai les long ol beten bilong yumi. Olsem na yumi mas mekim ol beten we yumi preisim God, tok tenkyu long em, na askim em long soim rot long yumi, moa yet taim yumi gat hevi. Na tu, yumi ken askim Jehova long helpim yumi long givim glori long em long rot bilong ol wok lotu yumi mekim.—Sng. 86:12; Jems 1:5-7.
11. Olsem wanem ol miting i save helpim yumi long kamapim glori bilong God?
11 God i givim wok long lukautim ol sipsip bilong em long “gutpela wokboi i gat savetingting.” (Mat. 24:45-47; Sng. 100:3) Lain gutpela wokboi i laik helpim yumi olgeta long kamapim glori bilong Jehova.Wanpela rot we yumi ken lain long mekim olsem em long go long ol miting. Ol miting i helpim yumi long stretim ol samting long laip bilong yumi na i helpim ol pasin Kristen bilong yumi i kamap gutpela moa, kain olsem meri bilong samap i save stretim klos na bai ol i fit stret na luk nais moa. (Hib. 10:24, 25) Em long dispela as na yumi mas kamap long ol miting long taim stret. Sapos em pasin bilong yumi long kam leit long ol miting, orait bai yumi lus long harim sampela gutpela tok bilong helpim yumi.
BIHAINIM PASIN BILONG GOD
12. Olsem wanem yumi ken bihainim pasin bilong God?
12 Bilong kamapim glori bilong Jehova, yumi mas “bihainim pasin bilong God.” (Efe. 5:1) Wanpela rot bilong bihainim pasin bilong Jehova, em long lain long holim wankain tingting olsem bilong em. Taim yumi bihainim tingting bilong yumi yet na yumi no bihainim tingting bilong God, dispela i no givim biknem long God na i givim hevi long yumi yet. Yumi stap long graun Satan i bosim, olsem na yumi mas wok hat long heitim ol samting Jehova i save heitim na laikim ol samting Jehova i save laikim. (Sng. 97:10; 1 Jon 5:19) Long bel yumi mas kliagut tru olsem stretpela rot bilong lotuim God, em long mekim olgeta samting i givim glori long em.—Ritim 1 Korin 10:31.
13. Bilong wanem yumi mas heitim sin? Bai yumi mekim wanem sapos yumi heitim sin?
13 Yumi mas heitim sin bikos Jehova i save heitim sin. Sapos yumi heitim sin, bai yumi stap longwe tru long ol samting em inap pulim yumi long mekim sin. Olsem, yumi mas stap longwe long pasin apostet. Ol man i kamap apostet i no givim glori moa long God. (Lo 13:6-9) Yumi mas givim baksait olgeta long ol apostet na long ol man husat i tok ol i brata, tasol ol i mekim ol samting i semim God. Na maski ol i wanblut, yumi mas givim baksait long ol. (1 Kor. 5:11) Sapos yumi laik soim olsem tok bilong ol apostet na tok ol man i sutim long oganaisesen bilong Jehova i no tru, dispela i no inap kamapim wanpela gutpela samting. Na tru tumas, yumi no laik save liklik long ol tok bilong ol, maski em long ol buk samting o long Intenet, long wanem, dispela inap bagarapim pasin bilong yumi long pas gut wantaim Jehova.—Ritim Aisaia 5:20; Matyu 7:6.
14. Wanem wanpela bikpela samting yumi ken mekim bilong bihainim pasin bilong Jehova? Bilong wanem i olsem?
14 Bilong bihainim pasin bilong Jehova, wanpela bikpela samting tru em long kamapim pasin laikim. (1 Jon 4:16-19) Na pasin laikim i stap namel long yumi yet, i kamapim klia yumi stap ol disaipel bilong Jisas na yumi stap ol wokboi bilong Jehova. (Jon 13:34, 35) Yumi no gutpela olgeta, olsem na sampela taim i hat wok long kamapim pasin laikim. Tasol yumi mas trai long kamapim pasin laikim long olgeta taim. Wok bilong yumi long kamapim pasin laikim na ol arapela gutpela pasin Kristen, bai helpim yumi long abrusim sin na ol pasin i bagarapim bel bilong narapela.—2 Pita 1:5-7.
15. Sapos yumi laikim ol arapela, orait bai yumi mekim wanem pasin long ol?
15 Pasin laikim i save kirapim yumi long mekim ol gutpela pasin long ol arapela. (Rom 13:8-10) Olsem, sapos pasin laikim i stap namel long tupela marit, orait oltaim narapela bai stap gut long narapela. Sapos yumi laikim ol elda na rispektim wok bilong ol, orait bai yumi harim tok na daun long ol. Ol pikinini husat i laikim papamama bilong ol i save bihainim tok na rispektim ol na ol i no mekim tok i daunim ol. Sapos yumi laikim ol arapela, yumi no inap ting olsem ol i samting nating na yumi winim ol, o mekim tok i no soim rispek. (Jems 3:9) Na ol elda husat i laikim ol sipsip bilong God, ol i save mekim pasin isi long ol.—Apo. 20:28, 29.
16. Olsem wanem pasin laikim i helpim yumi long mekim wok autim tok?
16 Pasin laikim i mas stap insait long wok autim tok bilong yumi. Yumi laikim tru Jehova, olsem na bai yumi no bel hevi taim ol man i les long harim tok bilong yumi. Yumi bai mekim yet wok bilong autim tok. Bai yumi redi gut long mekim wok autim tok, na bai yumi traim long kamap gutpela tisa i skulim ol man long Baibel. Sapos yumi laikim tru God na ol manmeri, bai yumi no tingim autim tok olsem wanpela wok tasol yumi mas mekim. Nogat. Bai yumi tingim wok autim tok olsem wanpela wok i gat nem, na bai yumi mekim wantaim amamas.—Mat. 10:7.
WOK YET LONG GIVIM GLORI LONG JEHOVA
17. Yumi kliagut olsem sin i save pasim yumi long kamapim glori bilong God, olsem na yumi mas mekim wanem?
17 Planti manmeri long graun i no luksave olsem pasin bilong mekim sin em samting i nogut tru. Tasol yumi no olsem. Olsem na yumi save yumi mas pait strong long sakim dispela laik bilong mekim sin. Yumi save olsem yumi mas skulim maus bilong bel, na taim laik nogut i kamap, orait wantu maus bilong bel i helpim yumi long mekim stretpela pasin. (Rom 7:22, 23) Yumi ol manmeri i no gat strong, tasol God inap givim yumi strong long bihainim stretpela pasin maski wanem samting i kamap.—2 Kor. 12:10.
18, 19. (a) Wanem samting bai helpim yumi long pait strong na sakim Satan wantaim ol spirit nogut? (b) Yumi mas i gat strongpela laik long mekim wanem?
18 Yumi laik givim glori long Jehova, olsem na yumi mas pait strong long sakim Satan na ol spirit nogut. Yumi inap winim dispela pait taim yumi kisim “klos pait i kam long God.” (Efe. 6:11-13) Jehova wanpela tasol i mas kisim glori, tasol Satan i wok strong tru na bai ol man i no ken givim glori long Jehova. Na tu, Satan i trai hat long bagarapim pasin bilong yumi long stap pren bilong God. Olsem na Satan i lus tru taim yumi wantaim ol arapela husat i no gutpela olgeta, em planti milion man, meri, na ol pikinini, ol i stap gut long God na givim glori long em. So yumi laik givim biknem yet long Jehova, wankain olsem ol ensel long heven husat i tok: “Jehova, yu God bilong mipela, i stret tru long yu kisim glori na ona na strong, long wanem, yu bin wokim olgeta samting. Na long laik bilong yu yet yu bin wokim ol na ol i stap.”—Rev. 4:11.
19 Oltaim yumi mas i gat strongpela laik long givim yet glori long Jehova. Em i amamas long lukim planti wokboi bilong em i traim bes bilong ol long bihainim em na kamapim glori bilong em. (Snd. 27:11) Yumi mas i gat wankain tingting olsem bilong Devit, em i bin givim bel olgeta long givim biknem long Jehova na singsing olsem: “Mi laik litimapim biknem bilong yu oltaim oltaim.” (Sng. 86:12) Ol manmeri bilong bihainim tok bai i gat rot long kamapim glori bilong Jehova long pasin i nambawan olgeta, na ol bai givim biknem long em inap oltaim oltaim. Em bai gutpela tru long stap laip long dispela taim. Olsem wanem? Yu save kamapim glori bilong God Jehova long nau, na yu wet long mekim olsem inap oltaim oltaim?
[Askim Bilong Stadi]
[Ol Piksa long pes 27]
Yu save kamapim glori bilong Jehova long ol dispela rot?
