Askim
Askim
Wanem taim Gavman Briten-Amerika i bin kamap namba 7 strongpela gavman em Baibel i stori long en?
▪ Traipela imis King Nebukatnesar i lukim long driman, i no makim olgeta strongpela gavman i bin i stap long graun. (Dan. 2:31-45) Dispela imis i makim tasol 5-pela strongpela gavman em ol i bin pait long lain pipol bilong God kirap long taim bilong Daniel na i kam.
Stori bilong Daniel long imis i lainim yumi olsem Gavman Briten-Amerika bai kamap long rot bilong Rom, em i no pait na daunim Rom, nogat. Daniel i tok olsem hap bilong imis ol i wokim long ain i kirap long lek na i go inap long fut na tou. (Long tupela fut na ol tou, ain i miks wantaim graun.) a Dispela i makim olsem Gavman Briten-Amerika bai kamap long rot bilong Rom, em lek ain bilong imis. Dispela samting stret i bin kamap. Briten em liklik hap bilong Gavman Rom, tasol klostu long 250 yia i go pinis, Briten i kirap kamap wanpela strongpela kingdom. Bihain, Amerika i kamap strongpela kantri. Tasol Briten na Amerika i no kamap yet olsem namba 7 strongpela gavman em Baibel i stori long en. Bilong wanem? Long wanem, ol i no kirap yet long wok bung wantaim. Dispela i kamap long taim bilong Wol Woa 1.
Long dispela taim, “ol pikinini bilong Kingdom” husat i stap na mekim wok, planti bilong ol i stap long Amerika. Hetkota bilong ol i stap long Brooklyn, New York. (Mat. 13:36-43) Ol lain God i makim i wok long autim tok tu long ol kantri em Briten i bosim. Long taim bilong Wol Woa 1, Briten na Amerika i kirap wok bung wantaim. Ol i wok wantaim long pait long ol birua bilong ol. Woa i kirapim Briten na Amerika long strong moa long litimapim kantri, olsem na ol i pait tu long ol manmeri husat ol i hap bilong lain bilong “meri” bilong God. Tupela gavman i tambuim sampela buk em lain bilong meri i kamapim, na ol i kalabusim ol brata husat i go pas long mekim wok autim tok.—Rev. 12:17.
Olsem na ol tok profet bilong Baibel i skulim yumi olsem namba 7 strongpela gavman i no bin kamap 250 yia i go pinis, taim Briten i kirap kamap wanpela strongpela kingdom, nogat. Namba 7 strongpela gavman i bin kamap long kirap bilong de bilong Bikpela. b
[Ol Futnot]
a Graun i miks wantaim ain i makim ol manmeri insait long Gavman Briten-Amerika. Planti taim, dispela graun i pasim dispela strongpela gavman long mekim samting em i laik mekim.
b Dispela tingting i senisim tingting bipo yumi gat. Dispela i senisim tingting buk Tok Profet Bilong Daniel i kamapim long pes 57, paragraf 24, na long sat i stap long pes 56 na 139.
[Piksa long pes 19]
Ol i salim 8-pela brata bilong Wastaua hetkota i go long kalabus long Jun 1918
