Pasin Helpim i Daunim Kros

WANPELA lapun meri i kros liklik taim George na Manon, tupela Witnes long Netelan, i laik autim gutnius bilong Kingdom long en. Ol i kisim save olsem namba 1 na namba 2 man bilong en, na pikinini man bilong en, ol i dai pinis, na sik atraitis i givim bikpela pen long em. Meri i bel kol liklik taim ol i toktok, tasol em i no mekim pasin pren.

Tasol George i tokim Manon long tupela i ken i go baim sampela plaua bilong gaden na givim long meri, long wanem, em i stap wanpis na kros liklik. Taim ol i mekim olsem, Rie, dispela meri, i kirap nogut na i amamas. Tasol i no gutpela taim long em i ken toktok wantaim ol, so ol i pasim tok long bung long narapela taim. Taim George na Manon i go bek bilong bungim em, meri i no stap. Maski ol i traim painim em long kain kain taim, ol i no bungim em gen. Ol i kisim tingting olsem meri i wok long abrusim ol.

Bihain, George i bungim Rie long haus. Rie i tok sori long em i no bin stap long taim ol i makim na em i stori olsem em i bin slip long haus sik. Na Rie i tok: “Bai yu kirap nogut long samting mi mekim bihain long yupela i lusim mi. Mi kirap ritim Baibel!” Ol i toktok gut wantaim, na Rie i kirap stadi long Baibel.

Taim Rie i stadi i go, pasin bilong em i senis. Em i lusim pasin bilong kros na em i kamap meri bilong amamas na mekim pasin helpim. Na maski em i no inap lusim haus, wantu em i kirap autim nupela bilip bilong en long ol lain husat i kam lukim em. Sik i mekim na em i no inap i go planti taim long ol miting, tasol em i amamas taim ol bratasista i kam visitim em. Long de em i kamap 82 krismas, em i go long wanpela kibung sekit na kisim baptais bilong makim olsem em i dediket long God.

Sampela mun bihain Rie i dai, na ol i painim wanpela poem em i bin raitim. Insait long poem, em i stori long hevi bilong ol lapun long i stap wanpis na em i tok olsem pasin helpim em i bikpela samting. Manon i tok: “Mi pilim tru tok em i mekim long dispela poem, na mi amamas tru olsem Jehova i bin helpim mipela long mekim pasin helpim long em.”

Tru tumas, pasin bilong Jehova yet i save kirapim yumi long kamapim pasin laikim na pasin helpim long ol arapela man. (Efe. 5:1, 2) Wok autim tok bilong yumi bai karim gutpela kaikai taim yumi ‘kamapim klia olsem yumi ol wokman bilong God. Olsem: Yumi mekim pasin helpim.’—2 Kor. 6:4, 6.