“Bikpela Laik Bilong Mi i Kamap Tru”

Bipo Emilia i bin mekim wok painia oltaim, tasol 15 yia i go pinis em i mas lusim dispela wok. I no longtaim i go pinis em i kirap tingim amamas em bin kisim taim em i mekim wok painia, na em i laik kirap gen long mekim dispela wok.

Tasol wok bilong Emilia i pulim bikpela haptaim bilong en, na em i bel hevi long dispela. Wanpela taim, em i tokim ol wanwok olsem: “Mi gat bikpela laik long mi no ken wok planti aua!” Bos i harim tok bilong Emilia na em i askim em olsem tru tru dispela em laik bilong em o nogat? Emilia i tok yes. Tasol kampani i laik bai olgeta wokman i mas wok fultaim. Olsem na bilong kisim tok orait long daunim ol aua bilong wok, Emilia i mas toktok wantaim wanpela dairekta. Em i redim tingting long bung wantaim dairekta na em i beten long kisim bel isi na no ken pret.

Taim ol i bung wantaim, Emilia i no pret, na long pasin rispek em i askim dairekta long daunim ol aua bilong em. Emilia i stori long dairekta olsem taim em i no stap long wok, em i yusim taim bilong em long helpim ol arapela. Emilia i tok em i wanpela Witnes Bilong Jehova na em i save helpim ol man long kisim save long Baibel. Em i tok tu olsem, long nau planti man i no save long wanem samting i stret na wanem samting i no stret. Ol i nidim savetingting i kam long Baibel bilong helpim ol long mekim ol gutpela disisen. Emilia i tok em bai mekim yet gutpela wok long kampani, tasol em i laik daunim ol aua long wok na bai em i gat bikpela haptaim moa bilong helpim ol man.

Dairekta i putim gut yau na em i tok bipo em tu i tingting long mekim wok bilong helpim ol man. Em i kliagut long tingting bilong Emilia na em i tok orait long daunim sampela aua bilong em long wok. Tasol dairekta i askim em: “Yu save olsem pe bilong yu bai go daun, a?” Emilia i tok yes, tasol em bai lain long yusim gut mani. Emilia i tok em i amamas taim em i helpim ol manmeri. Dairekta i amamas long Emilia i laik yusim taim bilong en long helpim ol arapela.

Pastaim kampani i no orait long wanpela man i wok haptaim tasol. Tasol nau Emilia i wok 4-pela de long wanpela wik. Emilia i kirap nogut long kampani i apim pe bilong en na nau em i kisim wankain pe olsem bipo. Em i tok: “Bikpela laik bilong mi i kamap tru, mi inap wok painia oltaim gen!”

Olsem wanem? Yu bin tingting long kamapim sampela senis long laip bilong yu we bai yu inap painia? O sapos yu bin painia bipo, yu inap painia gen?

[Rait long pes 32]

Dairekta i amamas long Emilia i laik yusim taim bilong en long helpim ol arapela