Stori bilong Max Lloyd

Long wanpela nait long 1955, mi na narapela misineri i stap long asainmen bilong mipela long Paragwai, Saut Amerika. Na planti man i raunim haus mipela stap long en, ol i kros na singaut olsem: “God bilong mipela i save hangre long blut, na em i laikim blut bilong ol man bilong narapela ples.” Olsem wanem mitupela man bilong narapela ples i kam stap long dispela hap?

STORI bilong mi i kirap long Australia inap planti yia i go pinis, em ples we mi kamap bikpela na we Jehova i kirap long skulim mi long mekim laik bilong em. Papa bilong mi i kisim buk Enemies long wanpela Witnes long 1938. Paslain long dispela, papamama i bin bel hevi pinis long tok pasto i mekim olsem sampela hap bilong Baibel em ol stori nating tasol. Wanpela yia bihain, papamama i kisim baptais bilong soim olsem ol i dediket long Jehova. Kirap long dispela taim, laik bilong Jehova i stap nambawan samting long laip bilong famili bilong mipela. Bihain, susa bilong mi, Lesley, husat i bikpela long mi inap 5-pela krismas, i kisim baptais. Na bihain yet mi kisim baptais long 1940, taim mi gat 9-pela krismas.

Bihain tasol long Wol Woa 2 i kirap, i bin i gat tambu long prinim na tilim ol buk na nius bilong Baibel em ol Witnes Bilong Jehova i kamapim. Olsem na taim mi yangpela, mi lain long yusim Baibel tasol long kamapim bilip bilong mi. Mi kisim pasin bilong karim Baibel i go long skul bilong kamapim as na mi no save salut long fleg na sapotim ol samting bilong woa.—Kis. 20:4, 5; Mat. 4:10; Jon 17:16; 1 Jon 5:21.

Planti wanskul i no laik poroman wantaim mi bikos ol i tok mi wanpela spai bilong kantri Jeman. Long dispela taim, ol i save soim ol muvi long skul. Paslain long muvi i kirap, olgeta i mas sanap na singim song bilong litimapim kantri. Mi no save sanap, olsem na 2-pela o 3-pela mangi i save pulim gras bilong mi long mekim mi sanap. Bihain skul i rausim mi bikos mi strong long holimpas bilip bilong mi long Baibel. Tasol mi stap long haus na wokim CODE.

MI INAPIM MAK BILONG MI

Mi bin putim mak long kirap mekim wok fultaim long autim tok olsem wanpela painia taim mi gat 14 krismas. Tasol mi bel hevi taim papamama i tokim mi long painim wanpela wok mani pastaim. Ol i tok mi mas givim pe long ol long rum slip na ol kaikai mi kisim long ol, na ol i promis olsem taim mi gat 18 krismas, mi ken mekim wok painia. Dispela i mekim na planti taim mipela i toktok i go i kam long mani bilong mi. Mi tokim ol olsem mi laik bungim mani bilong mekim wok painia, tasol ol i wok long kisim.

Taim mi laik kirap mekim wok painia,  papamama i sindaun wantaim mi na tokim mi olsem ol i bin putim olgeta mani mi bin givim ol long benk. Na ol i givim olgeta mani bek long mi na bai mi ken baim klos na ol arapela samting mi nidim bilong mekim wok painia. Ol i skulim mi long pasin bilong lukautim mi yet na bai mi no ken givim hatwok long ol arapela. Taim mi tingim bek dispela trening, dispela i helpim mi tru.

Taim mi na Lesley i wok long kamap bikpela, planti taim ol painia i save kam stap long haus bilong mipela, na mipela amamas long wok autim tok wantaim ol. Olgeta wiken mipela i save autim tok long ol haus, autim tok long rot, na mekim ol Baibel stadi. Mak em pablisa bilong kongrigesen i laik winim long dispela taim em long mekim 60 aua long wanpela mun. Planti taim mama i save winim dispela mak, na dispela em i gutpela eksampel long mi na Lesley.

PAINIA LONG TASMANIA

Namba 1 painia asainmen bilong mi em long ailan Tasmania long Australia, long dispela hap mi stap wantaim susa bilong mi na man bilong en. Tasol bihain ol i lusim Tasmania na go long namba 15 klas bilong Skul Gileat. Mi man bilong sem na em fes taim bilong mi long lusim ples mi bin kamap bikpela long en. Sampela i mekim tok olsem mi bai stap 3-pela mun tasol long Tasmania. Tasol insait long wanpela yia, long 1950, ol i makim mi long mekim wok olsem kampani sevan, nau ol i kolim kodineta bilong lain elda. Bihain, ol i makim mi olsem wanpela painia salim, na wanpela yangpela brata i kamap wanwok bilong mi.

Asainmen bilong mipela em long wanpela taun i gat kopa main na i stap long longwe hap we i no gat ol Witnes. Mipela kisim bas na kam kamap long dispela hap long wanpela apinun. Fes nait mipela stap long wanpela olpela hotel. Taim mipela autim tok long neks de, mipela askim ol man long haus sapos i gat wanpela rum mipela i ken rentim. Long pinis bilong de, wanpela man i tokim mipela olsem haus bilong pasto klostu long haus lotu i stap nating na mipela i ken askim dikon long dispela haus. Dikon i gat gutpela pasin na i orait long mipela i stap long dispela haus. I narapela kain liklik long lusim haus bilong pasto long olgeta de na go autim tok.

Planti man i harim tok na mipela i kirapim planti Baibel stadi. Taim ol hetman bilong sios long biktaun i kisim save long dispela na harim olsem ol Witnes Bilong Jehova i stap long haus bilong pasto, ol i tok strong long dikon long em i mas rausim mipela wantu. Nau mipela i no gat ples slip gen!

Long neks de mipela i autim tok i go inap long 2 klok samting na bihain mipela i traim long painim ples slip. Mipela i painim tasol wanpela hap long spots stediam. Mipela haitim ol sutkeis long dispela hap na kirap autim tok gen. Maski i wok long go tudak, mipela i laik inapim sampela haus moa bilong pinisim dispela strit. Mipela i bungim wanpela man na em i tok mipela i ken stap long narapela haus long hap bilong em we i gat tupela rum!

 WOK SEKIT NA SKUL GILEAT

Bihain long 8-pela mun long dispela asainmen, brens ofis bilong Australia i salim invatesen long mi long mekim wok sekit. Mi bin kirap nogut long dispela bikos mi gat 20 krismas tasol. Mi kisim skul inap sampela wik tasol, na mi kirap visitim ol kongrigesen long strongim ol. Ol man i gat bikpela krismas moa winim mi, tasol ol i no lukim mi olsem mi liklik tumas, nogat, ol i rispektim wok mi mekim.

Mi mekim wok long kain kain trenspot bilong visitim ol kongrigesen! Long wanpela wik mi raun long bas, narapela wik mi kisim tren, bihain mi kalap long kar o sindaun long baksait bilong motobaik na holim sutkeis na bek bilong autim tok. Mi kisim bikpela amamas long stap wantaim ol wanbilip. Wanpela kampani seven i amamas long mi stap long haus bilong em, maski ol i no pinisim yet wok bilong sanapim haus. Dispela wik mi slip long bathtub, em tab bilong waswas, tasol mipela amamas long wok lotu mipela i mekim long dispela wik!

Mi kirap nogut gen long 1953 taim ol i salim aplikesen long mi bilong go long namba 22 klas bilong skul Gileat. Mi amamas na pret wantaim. Long wanem, bihain long susa bilong mi na man bilong en i grediuet long Gileat long Julai 30, 1950, ol i go long Pakistan. Tupela i no winim yet wanpela yia na Lesley i kisim sik na em i dai. Papamama bai gat wanem tingting sapos mi go long narapela hap sotpela taim bihain long dispela? Tasol, tupela i tok: “Go na mekim wok bilong Jehova long hap em i makim.” Mi no bin lukim Papa gen. Em i dai long 1957.

I no longtaim bihain na mi kalap long sip wantaim 5-pela arapela manmeri bilong Australia, mipela ron inap 6-pela wik bilong kamap long New York City. Taim mipela i stap long sip, mipela i ritim Baibel, stadi, na autim tok long ol pasindia. Paslain long mipela go long skul long South Lansing, New York, mipela go long kibung intenesenel bilong Julai 1953 long Yankee Stediam. Bikpela lain olsem 165,829 i stap!

Gileat klas bilong mipela i gat 120 sumatin, ol i kam long olgeta hap bilong graun. Ol i no toksave long asainmen bilong mipela i go inap long de mipela i grediuet. Hariap tru mipela ran i go long laibreri bilong kisim save long kantri ol i makim mipela long go long en. Mi kisim save olsem, Paragwai, asainmen bilong mi, em kantri we planti taim ol lain i pait bilong daunim gavman. Sotpela taim bihain long mi kamap long dispela hap, wanpela moning mi askim ol arapela misineri olsem bikpela pairap long nait em wanem samting. Ol i smail na tok: “Em fes taim bilong yu long stap taim ol man i pait long gavman. Lukluk i go long ausait.” Ol soldia i stap long olgeta kona!

NARAPELA KAIN EKSPIRIENS

Wanpela taim, mi go wantaim wasman sekit long visitim wanpela kongrigesen i stap longwe, mipela i laik soim piksa The New World Society in Action. Mipela ron klostu 8 o 9–pela aua, fes mipela kalap long tren, na bihain long hos na karis, na bihain gen  mipela kalap long karis em bulmakau i pulim. Mipela karim jenareta i kam na wanpela projekta bilong soim piksa. Mipela kamap long hap kongrigesen i stap long en na neks de mipela i visitim ol fam na singautim ol man long kam lukim piksa long nait. I gat 15 manmeri i kam.

Mipela soim dispela piksa inap 20 minit na mipela kisim toksave long mipela i mas go insait long haus hariap. Mipela kisim projekta na bihainim tok. Nau ol man i kirap bikmaus, sutim gan, na singaut olsem: “God bilong mipela i save hangre long blut, na em i laikim blut bilong ol man bilong narapela ples.” I gat tupela man tasol bilong narapela ples, na mi wanpela bilong ol! Ol man husat i kam long lukim piksa i bin stopim ol dispela birua long kam insait long haus. Tasol ol birua i kam bek long 3 klok moning, ol i sutim gan na tok olsem hevi bai painim mipela taim mipela i go bek long taun.

Ol brata i toksave long polisman, na em i kam long apinun wantaim 2-pela hos bilong kisim mipela i go long taun. Taim mipela i ron long rot i go bek na kamap long ol hap we i gat ol diwai samting, polisman i holim gan na go pas bilong sekim sapos birua i stap o nogat. Mi luksave olsem hos em i bikpela helpim tru, olsem na bihain mi baim wanpela.

SAMPELA MISINERI MOA I KAM

Wok autim tok i karim gutpela kaikai maski ol pasto i save birua. Long 1955, 5-pela nupela misineri i kam. Wanpela bilong ol em yangpela sista bilong Kanada, Elsie Swanson, em i bin gretiuet long namba 25 klas bilong Gileat. Mipela i bin stap long brens ofis long seim taim na bihain em i kisim asainmen long narapela taun. Elsie i yusim laip bilong em long mekim wok bilong Jehova maski papamama i no helpim em tumas na ol i no insait long tok i tru. Long Disemba 31, 1957, mi na Elsie i marit, na mitupela yet i stap long wanpela haus misineri long hap saut bilong Paragwai.

Haus i no gat paip wara, olsem na mipela mas kisim wara long wanpela hulwara tasol i stap baksait long haus. No gat sawa rum, toilet, wasin masin, na frits. Olgeta de mipela mas baim fres kaikai. Tasol liklik samting mipela i gat na pasin laikim namel long ol bratasista long kongrigesen i mekim na mipela i amamas tru.

Long 1963, sotpela taim bihain long mipela i go long Australia long lukim mama bilong mi, mama i kisim hat atek. I luk olsem em i kisim bikos em i tingting planti tru long lukim pikinini man bilong em bihain long 10-pela yia. Klostu long taim mipela  i mas go bek long asainmen bilong mipela long Paragwai, mipela mas mekim wanpela bikpela disisen tru long laip bilong mipela. Olsem, bai mipela go bek long Paragwai, em hap mipela i laikim tru, na lusim mama long haus sik, na hop olsem wanpela bai lukautim em? Bihain long mipela i beten planti, mi na Elsie i wokim disisen long stap bek na lukautim mama. Mipela bin mekim olsem na insait yet long fultaim sevis inap long mama i dai long 1966.

Mi amamas tru long ol i makim mi long mekim wok sekit na wok distrik long Australia inap sampela yia na long skulim ol elda long Skul Bilong Wok Kingdom. Bihain narapela senis i kamap long laip bilong mitupela. Ol i makim mi long stap memba bilong fes Brens Komiti long Australia. Na taim mipela laik wokim nupela brens ofis, ol i makim mi long stap siaman bilong komiti bilong wokim dispela bilding. Planti brata husat i gat save long mekim wok, ol i wok gut wantaim na long dispela rot naispela brens ofis i kamap.

Bihain ol i makim mi long wok long Dipatmen Bilong Wok Autim Tok, wok bilong dispela dipatmen em long lukautim wok autim tok bilong kantri. Mi kisim tu gutpela wok olsem wasman son na go visitim ol arapela brens ofis long olgeta hap bilong graun bilong helpim na strongim ol brata. Samting i bin strongim tru bilip bilong mi em long taim mi bin go long sampela kantri na visitim ol lain husat i bin stap planti yia long kalabus bikos long pasin bilong ol long bihainim tok bilong Jehova.

ASAINMEN BILONG MIPELA LONG NAU

Long 2001, bihain long mipela kam bek long wanpela raun bilong mi olsem wasman son, mi kisim wanpela invatesen long go long Brooklyn, New York. Ol i singautim mi long kamap memba bilong Brens Komiti bilong Amerika we ol i kamapim long namba 1 taim. Mi na Elsie i beten long dispela invatesen, na mipela i orait long mekim dispela asainmen. Winim 11-pela yia na mipela stap yet long Brooklyn.

Mi amamas tru long meri bilong mi i wanbel long mekim olgeta samting Jehova i askim em long mekim. Nau mi na Elsie i winim pinis 80 krismas, na helt bilong mitupela i orait liklik. Mipela i amamas long tingim skul mipela bai kisim long Jehova inap oltaim oltaim, na long tingim ol gutpela blesing em bai givim long ol man i bihainim yet laik bilong em.

[Rait long pes 19]

Long wanpela wik mi raun long bas, narapela wik mi kisim tren, bihain mi kalap long kar o sindaun long baksait bilong motobaik na holim sutkeis na bek bilong autim tok

[Rait long pes 21]

Mipela i amamas long tingim skul mipela bai kisim long Jehova inap oltaim oltaim

[Ol Piksa long pes 18]

Han kais: Taim mi mekim wok sekit long Australia

Han sut: Mi wantaim papamama bilong mi

[Piksa long pes 20]

De mitupela i marit, Disemba 31, 1957