Lotuim Dispela God i Mekim Ol Man i Kamap Fri
Lotuim Dispela God i Mekim Ol Man i Kamap Fri
“Pasin bilong laikim God i olsem, yumi bihainim ol lo bilong en na ol lo bilong en i no givim hevi long yumi.”—1 JON 5:3.
YU INAP BEKIM?
Satan i laik bai yumi gat wanem tingting long ol lo bilong God?
Bilong wanem yumi mas was gut tru long husat yumi makim olsem pren bilong yumi?
Wanem samting bai helpim yumi long stap gut yet long dispela God i mekim ol man i kamap fri?
1. Jehova i mekim wanem wok long pasin bilong em long i stap fri? Em i larim Adam na Iv i stap fri long mekim wanem?
JEHOVA tasol i stap fri tru, em i ken mekim olgeta samting em i laikim. Tasol oltaim em i save bihainim pasin i stret. Na em i no kontrolim olgeta liklik samting ol wokboi bilong en i save mekim. Nogat. Em i larim ol i stap fri long wokim ol disisen bilong ol yet na bilong inapim ol stretpela laik bilong ol. Olsem, Jehova i tokim Adam na Iv long wanpela samting tasol ol i no inap mekim. Em i tokim ol long ol i no ken kaikai prut bilong “dispela diwai bilong givim gutpela save long wanem samting i gutpela na wanem samting i nogut.” (Stt. 2:17) Olsem na ol inap bihainim laik bilong God na long seim taim ol i stap fri tru long makim ol arapela samting ol i laik mekim!
2. Olsem wanem Adam na Iv i bin kamap ol wokboi bilong sin?
2 Bilong wanem God i bin larim Adam na Iv i stap fri olsem? Em long wanem, Jehova i wokim tupela i kain olsem em yet na ol i gat maus bilong bel. Em i ting tupela bai bihainim stretpela pasin, long wanem, tupela i laikim em olsem Krieta bilong ol. (Stt. 1:27; Rom 2:15) Tasol sori tru, Adam na Iv i no bin pilim tru pasin bilong Krieta bilong ol long larim ol i stap fri. Ol yet i laik makim wanem samting i stret na wanem samting i no stret. Ol i ting olsem dispela bai mekim ol i stap fri moa, tasol tru tru, rot ol i makim i kalabusim ol wantaim ol pikinini bilong ol long sin, dispela i kamapim pen na hevi na indai.—Rom 5:12.
3, 4. Satan i laik bai yumi gat wanem tingting long ol lo bilong God?
3 Sapos Satan inap kirapim tupela manmeri i gutpela olgeta na planti ensel long sakim wok bos bilong God, orait em inap mekim olsem long yumi tu. Ol trik bilong Satan i no senis. Em i laik bai yumi ting olsem ol lo bilong God i pasim yumi tumas. Satan i laik bai yumi ting olsem sapos yumi lotuim God, bai yumi no inap mekim ol samting we yumi kisim bikpela amamas long en. (1 Jon 5:3) Ol manmeri bilong dispela graun i gat tingting olsem, na sapos oltaim yumi poroman wantaim ol, bai yumi kisim wankain tingting olsem bilong ol. Wanpela sista i gat 24 krismas i tok olsem ol pren nogut i bin pulim tru tingting bilong en. Em i no laik bai tingting bilong en i narakain long ol arapela yangpela. Olsem na dispela sista i bin mekim pasin pamuk. Ating yu tu i bin pilim olsem ol pren i gat bikpela strong long pulim tingting bilong yu.
4 Sori tru, ating sampela insait long kongrigesen Kristen inap kamap olsem ol poroman nogut. Wanpela yangpela brata i tok sampela pren bilong en insait long kongrigesen i bin prenim ol meri husat i no lotuim Jehova. Taim em i raun planti wantaim ol dispela poroman, pasin bilong em i kamap wankain olsem ol. Em i tok: ‘Pasin bilong mi long pas gut wantaim Jehova i no strong tumas. Mi no amamas long ol miting, na klostu mi lusim wok autim tok olgeta. Long dispela taim mi luksave olsem mi no ken poroman moa wantaim ol, na mi mekim olsem!’ Olsem wanem? Yu luksave olsem ol pren bilong yu i gat bikpela strong bilong pulim tingting bilong yu? Tingim wanpela eksampel bilong Baibel we em inap helpim yumi long nau.—Rom 15:4.
EM I PULIM TINGTING BILONG OL MAN
5, 6. Olsem wanem Apsalom i bin giamanim planti man? Plen bilong em i wok gut o nogat?
5 I gat planti eksampel long Baibel long sampela husat i bin pulim ol arapela long mekim pasin nogut. Apsalom, pikinini bilong King Devit, em wanpela bilong ol. Apsalom i luk nais tru. Olsem Satan, em i larim tingting nogut i kamap strong long bel bilong em. Apsalom i laik kisim ples bilong papa na kamap king, maski em i no gat rait long kamap king. a Bilong kisim samting em i laikim, Apsalom i kirapim ol manmeri long ting olsem em yet i laik helpim ol na king i no laik helpim ol. Olsem Satan long gaden Iden, Apsalom i mekim olsem em i tingim ol manmeri na long seim taim em i sutim bikpela tok giaman long papa bilong en.—2 Sml. 15:1-5.
6 Olsem wanem? Plen bilong Apsalom i wok gut? Yumi save em i wok gut liklik. Baibel i tok olsem “Apsalom i pulim tingting bilong ol man bilong Israel na ol i save laikim em.” (2 Sml. 15:6) Apsalom i giamanim planti man, tasol em i no win. Pasin hambak bilong en i mekim na em yet i dai na planti tausen man husat em i bin trikim ol, ol tu i dai.—2 Sml. 18:7, 14-17.
7. Yumi kisim wanem skul long eksampel bilong Apsalom? (Lukim piksa long pes 14.)
7 Bilong wanem Apsalom i no hatwok long giamanim ol Israel? Ating ol i laikim ol samting em i promis long givim long ol. O ating ol i bihainim em bikos em i luk nais. Tasol maski i gat wanem as, i klia tru olsem: Ol i no bin stap gut long Jehova na long king em i makim. Long nau, Satan i yusim yet ol kain man olsem Apsalom long giamanim ol wokboi bilong Jehova. Ating ol dispela man i tok olsem lo bilong Jehova i strik tumas o ol manmeri husat i no lotuim Jehova i kisim bikpela amamas moa. Taim yu harim ol kain tok olsem, bai yu stap gut yet long God na luksave olsem ol i giaman? Bai yu luksave olsem lo bilong Jehova i “gutpela olgeta,” em lo bilong Krais, em tasol inap mekim man i kamap fri tru? (Jems 1:25) Sapos olsem, soim olsem yu laikim tru dispela lo, na yusim pasin bilong yu long i stap fri long mekim ol samting Jehova i amamas long en.—Ritim 1 Pita 2:16.
8. Wanem sampela eksampel i soim olsem pasin bilong sakim ol lo bilong Jehova i no mekim ol man i stap amamas?
8 Satan i gat bikpela laik moa yet long giamanim ol yangpela. Wanpela brata husat i winim 30 krismas i tok taim em i tineja, em i no ting olsem ol lo bilong Jehova i bilong lukautim em. Em i pilim olsem em i no gat fridom. Olsem na em i mekim pasin pamuk. Tasol dispela i no mekim em i amamas, nogat. Inap planti yia, bel i kotim em na em i bel hevi long rong em i bin mekim. Wanpela sista husat i bin mekim pasin pamuk taim em i tineja, i tok bihain em i bel hevi na pilim olsem em i nogut tasol. Em i tok: “Maski em 19 yia i go pinis, ol memori nogut i save kamap yet.” Narapela sista i tok em i bel hevi tru taim em i tingim olsem wanem pasin em i bin mekim i bin givim bikpela pen na hevi long ol lain em i laikim tumas. Sista i tok moa olsem, “Em i nogut tru taim Jehova i no orait long yu.” Satan i no laik bai yu tingim ol hevi em pasin bilong mekim sin inap kamapim.
9. (a) Yumi mas givim wanem ol askim long yumi yet long Jehova na long ol lo na stiatok bilong en? (b) Bilong wanem em bikpela samting long save gut tru long God?
9 Olsem ol dispela stori i kamapim, pasin bilong sakim tok bilong God i gat pe nogut bilong en. Sori tru, planti yangpela long tok i tru, na sampela manmeri i bikpela pinis, i mas karim pen na hevi pastaim bilong save long dispela samting. (Gal. 6:7, 8) So askim yu yet: ‘Mi luksave long ol trik Satan i yusim bilong giamanim mi? Mi tingim Jehova olsem bes Pren bilong mi husat i save tok tru long olgeta taim na i laik bai ol gutpela samting i painim mi? Mi bilip olsem Jehova i no inap tok nogat long mi long samting we tru tru em i gutpela na bai mekim mi amamas?’ (Ritim Aisaia 48:17, 18.) Bilong tok yes long ol dispela askim, yu mas save gut tru long Jehova. Yu mas luksave olsem ol lo na stiatok bilong Baibel i soim olsem Jehova i laikim yu, i no olsem em i laik kalabusim yu.—Sng. 25:14.
BETEN LONG KISIM SAVETINGTING NA GUTPELA BEL BILONG BIHAINIM TOK
10. Bilong wanem yumi mas bihainim pasin bilong yangpela King Solomon?
10 Taim Solomon i stap yet olsem yangpela man, long pasin daun em i beten long Jehova na tok: “Mi mangi nating na mi no save long wanem pasin mi mas mekim bilong bosim ol manmeri.” Nau Solomon i askim Jehova long givim em savetingting na gutpela bel bilong bihainim tok. (1 Kin. 3:7-9, NW; 1 Kin. 3:12) Jehova i harim beten bilong Solomon. Sapos yu askim Jehova long wankain samting olsem, em bai harim beten bilong yu tu, maski yu yangpela o yu lapun. Jehova bai i no inap givim savetingting long yu wantu. Tasol em bai givim savetingting long yu sapos yu stadi gut long Baibel, askim em long holi spirit, na bihainim ol tok yu harim insait long kongrigesen Kristen. (Jems 1:5) Yes, Jehova i mekim na savetingting bilong ol yangpela wokboi bilong em i winim savetingting bilong ol man husat i no bihainim tok bilong em, na i winim tu ol man bilong dispela graun husat i “gat savetingting na ol klevaman.”—Luk 10:21; ritim Song 119:98-100.
11-13. (a) Yumi kisim wanem bikpela skul long Song 26:4, Sindaun 13:20, na 1 Korin 15:33? (b) Bai yu mekim wanem long dispela skul yu kisim?
11 Nau yumi ken skelim sampela skripsa i givim bikpela skul long yumi long pasin bilong makim ol pren. Dispela bai helpim yumi long kliagut olsem em i bikpela samting long stadi long Baibel na tingim long bel ol tok bilong en na bai yumi ken save gut long Jehova. Song 26:4 i tok: “Mi no save raun wantaim ol man nogut. Mi no save wokabaut wantaim ol man bilong giaman [“ol man i haitim pasin tru bilong ol,” NW].” Na Sindaun 13:20 i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” Na 1 Korin 15:33 i tok: “Ol poroman nogut i save bagarapim ol gutpela pasin bilong man.”
12 Yumi kisim wanem skul long ol dispela skripsa? (1) Jehova i laik bai yumi makim gut ol pren bilong yumi. Em i laik pasim yumi long mekim ol samting em inap nogutim yumi na bagarapim pasin bilong yumi long stap pren bilong em. (2) Ol pren bilong yumi inap kirapim yumi long mekim gutpela pasin o pasin nogut. Dispela em trupela tok. Ol tok ol man i yusim long ol dispela ves i soim olsem Jehova i laik bai yumi pilim tru dispela tok. Tingim, ol dispela ves i kamapim ol tok i tru i no hatwok long kliagut long en, ol i no kamapim ol lo, olsem “yu no ken mekim olsem” o “yu mas mekim olsem.” I kain olsem Jehova i tokim yumi: ‘Em ol trupela tok. Orait bai yu mekim wanem? Wanem tingting i stap long bel bilong yu?’
13 Orait tingim, dispela 3-pela ves i kamapim ol tok i no hatwok long kliagut long en, tok bilong ol i tru long taim ol i bin raitim na i tru long nau tu, na ol inap helpim ol man i gat kain kain sindaun. Askim yu yet olsem: Long wanem ol rot mi inap bungim ol man i save “haitim pasin tru bilong ol”? Mi ken mekim wanem na bai mi no kamap pren bilong ol? (Snd. 3:32; 6:12) Husat ol “man i gat gutpela tingting” em Jehova i laik bai yumi stap pren bilong ol? Na husat “ol man i no gat gutpela tingting” em i no laik bai yumi poroman wantaim ol? (Sng. 111:10; 112:1; Snd. 1:7) Wanem “ol gutpela pasin” bilong mi bai bagarap sapos mi makim ol pren nogut? “Ol poroman nogut” i stap ausait long kongrigesen tasol o olsem wanem? (2 Pita 2:1-3) Bai yu bekim ol dispela askim olsem wanem?
14. Olsem wanem yu inap mekim gut moa Famili Lotu bilong yu?
14 Nau tasol yumi skelim pinis 3-pela skripsa, na long wankain pasin yumi ken skelim ol arapela skripsa bilong kisimgut tingting bilong God long ol arapela samting i bikpela samting long yu na famili bilong yu. b Ol papamama, yupela i ken skelim ol dispela samting long taim bilong Famili Lotu. As na yu laik mekim olsem em bilong helpim olgeta wan wan insait long famili long kliagut olsem ol lo na ol stiatok bilong God i soim olsem em i laikim yumi tumas. (Sng. 119:72) Sapos famili bilong yu i bihainim dispela pasin bilong stadi, orait pasin bilong yupela long pas gut wantaim Jehova na long ol narapela narapela bai kamap strong moa.
15. Olsem wanem bai yu save olsem tru tru yu wok long kisim savetingting na pasin bilong bihainim tok?
15 Olsem wanem bai yu save olsem tru tru yu wok long kisim savetingting na pasin bilong bihainim tok? Wanpela rot em bilong skelim tingting bilong yu wantaim tingting bilong ol wokman bilong God long bipo, olsem King Devit. Em i bin tok: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” (Sng. 40:8) Na tu, man bilong raitim Song 119 i tok: “Mi laikim tru lo bilong yu. Mi save tingting long en long san na long nait.” (Sng. 119:97) Yu mas wok strong tru bilong holim dispela kain pasin laikim. Dispela pasin laikim i save go bikpela taim yu stadi gut long Baibel, beten, na skelim long bel ol tok bilong Baibel. Na tu, em i go bikpela moa taim yu luksave olsem yu kisim planti blesing long laip bilong yu yet bikos yu bihainim ol lo bilong Jehova.—Sng. 34:8.
PAIT BILONG STAP KRISTEN I FRI!
16. Sapos yumi laik winim pait bilong i stap fri, orait yumi mas tingim wanem samting?
16 Kirap long bipo yet, ol kantri i redi long insait long ol pait nogut na bai ol i ken stap fri. Yu mas redi moa yet long pait bilong stap Kristen i fri! Tingim, i no Satan na ol tingting nogut bilong dispela graun tasol i stap birua bilong yu, nogat. Yu no gutpela olgeta na bel bilong yu i save giamanim yu, olsem na yu mas pait long ol dispela samting tu. (Jer. 17:9; Efe. 2:3) Taim Jehova i helpim yu, yu inap winim dispela pait. Olgeta taim yu makim stretpela rot long bihainim, i gat 2-pela gutpela samting i save kamap. Namba 1, yu mekim Jehova i belgut tru. (Snd. 27:11) Namba 2, olgeta wan wan taim yu luksave olsem pasin bilong bihainim “dispela lo i gutpela olgeta na i mekim man i kamap fri” i save helpim yu, dispela bai strongim yu long bihainim yet rot i go long laip oltaim. Bihain, bai yu stap fri tru olsem Jehova i promis long ol manmeri husat i stap gut long em.—Jems 1:25; Mat. 7:13, 14.
17. Taim yumi mekim rong, bilong wanem yumi no ken larim bel hevi i daunim yumi? Jehova i helpim yumi olsem wanem taim yumi mekim rong?
17 Yumi olgeta i save mekim rong long sampela taim. (Sav. 7:20) Taim dispela samting i kamap, no ken bel hevi o pilim olsem yu nogut tasol. Sapos yu mekim rong, orait mekim ol samting bilong stretim. Na sapos yu mas askim ol elda long helpim yu, orait mekim olsem. Jems i tok: “Beten bilong man i bilip bai mekim sikman i kamap orait, na Jehova bai helpim em long kamap strong. Na tu, sapos man i bin mekim sin, orait God bai fogivim em.” (Jems 5:15) No ken lusim tingting olsem God em i man bilong marimari na laik bilong Em i as na yu stap insait long kongrigesen, long wanem, em i lukim olsem yu gat sampela gutpela pasin. (Ritim Song 103:8, 9.) Oltaim Jehova bai helpim yu sapos yu givim bel olgeta long mekim wok bilong en.—1 Sto. 28:9.
18. Yumi mas mekim wanem na Jehova bai lukautim yumi?
18 Long nait paslain long Jisas i dai, em i beten wantaim 11-pela gutpela aposel na askim Papa bilong en long lukautim ol. Em i mekim dispela bikpela tok: “Mi ting long dispela man nogut na mi askim yu long lukautim ol.” (Jon 17:15) Jisas i bin tingim tru ol aposel bilong en long bipo, na em i tingim tru ol manmeri i bihainim em long nau. Olsem na yumi ken bilip tru olsem Jehova bai harim prea bilong Jisas na em bai lukautim yumi long dispela taim bilong planti hevi. Sindaun 2:7, 8 i tok Jehova i save lukautim ol man i bihainim em, na em bai ‘banisim ol na was long rot bilong ol.’ Sampela taim i hatwok long bihainim tok bilong Jehova. Tasol ol man i bihainim tok bilong Jehova bai kisim laip oltaim na stap fri tru. (Rom 8:21) Ating sampela man bai i gat narapela tingting, tasol no ken larim ol i giamanim yu!
[Ol Futnot]
a Apsalom i bon pinis taim God i promisim Devit olsem wanpela pikinini man bilong en bai kamap king. So i stret Apsalom i mas save olsem Jehova i no makim em long kamap king.—2 Sml. 3:3; 7:12.
b Sampela skripsa yu ken skelim wantaim famili em 1 Korin 13:4-8, we Pol i stori long pasin laikim, na Song 19:7-11, we i stori long ol blesing yumi inap kisim sapos yumi bihainim ol lo bilong Jehova.
[Askim Bilong Stadi]
[Ol Piksa long pes 14]
Olsem wanem yumi ken luksave na sakim ol man bilong nau husat i bihainim pasin bilong Apsalom?