Ol i Amamas Long Givim Ol Yet​—Long Ekwado

Bruno, wanpela yangpela brata long Itali, i mas wokim bikpela disisen. Em i pinisim skul, na em i kisim ol bikpela mak winim ol arapela wanklas. Ol wantok na ol tisa i bin tokim em olsem em i mas i go long yunivesiti. Tasol sampela yia paslain, Bruno i bin dediketim laip bilong en long Jehova na mekim promis long putim wok bilong Jehova i stap nambawan. So em i wokim disisen long mekim wanem? Em i tok: ‘Mi beten long Jehova olsem mi bai truim tok promis bilong mi na putim em i stap nambawan.’ Tasol long prea, Bruno i tokaut stret olsem em i laik mekim kain kain wok bilong Jehova we i kirapim tru tingting bilong em.

 Sampela yia bihain, Bruno i go stap long Ekwado, Saut Amerika. Bruno i tok Jehova i bin givim em planti samting winim ol samting em i bin beten askim Jehova long en. Taim em i kam kamap long Ekwado, em i kirap nogut long bungim planti ol arapela yangpela husat tu i bin lusim ples na kam long Ekwado bilong mekim bikpela wok moa bilong Jehova.

OL YANGPELA HUSAT I TRASTIM JEHOVA

Jehova i singautim yumi long givim bel tru long em na bilip olsem em bai givim planti blesing long yumi. Jehova i tok: “Yupela i mas tilim olgeta samting bilong yupela long 10-pela hap na bringim wanpela hap olgeta long haus bilong mi. . . . Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.” (Mal. 3:10) Bruno na planti tausen arapela yangpela i bihainim singaut bilong Jehova. Ol i laikim tumas God, olsem na ol i wokim disisen long yusim taim, strong, na mani bilong ol long mekim wok bilong em long wanpela kantri we ol i sot long ol manmeri bilong autim gutnius bilong Kingdom.

Bihain liklik long ol dispela yangpela i kam kamap long nupela kantri, ol i luksave olsem “planti kaikai i mau pinis long gaden, tasol i no gat planti wokman.” (Mat. 9:37) Jaqueline bilong Jemani i salim pas long brens ofis bilong Ekwado, na tok: “Winim 2-pela yia mi mekim wok hia long Ekwado, na mi gat 13 Baibel stadi, na 4-pela i save kam oltaim long ol miting. Dispela i gutpela tru, laka?” Chantal bilong Kanada  i tok: “Long 2008, mi muv i go long wanpela hap long nambis bilong Ekwado we i gat wanpela kongrigesen tasol. Nau i gat 3-pela kongrigesen na winim 30 painia oltaim i stap long dispela hap.” Sista i tok em gutpela tru long lukim planti nupela i wok long kamap strong insait long tok i tru. I no longtaim i go pinis na em i muv i go long wanpela siti i stap antap long maunten Andes inap olsem 2,743 mita. Dispela siti i gat moa long 75,000 manmeri na wanpela kongrigesen tasol. Chantal i tok olsem planti i wok long kisim tok i tru na em i amamas long autim tok long dispela hap.

SAMPELA TAIM I HATWOK

Sampela taim i hatwok long mekim wok long narapela kantri. Na tu, disisen bilong i go long narapela kantri i givim hatwok long sampela yangpela. Kayla bilong Amerika i tok sampela long kongrigesen bilong em long ples i tokim em olsem em i no ken i go. Ol i no kliagut long as na em i laik painia long narapela kantri. Em i save olsem ol i laik helpim em, tasol tok bilong ol i mekim em i bel hevi. Sampela taim em i no save disisen bilong em i gutpela o nogat. Em i beten planti long Jehova na toktok wantaim ol strongpela bratasista. Dispela i helpim em long kliagut olsem Jehova i save blesim ol lain husat i givim bel tru long mekim wok bilong em. Olsem na Kayla i muv i go long Ekwado.

Planti i hatwok long lainim narapela tokples. Siobhan bilong Aialan i tok: “Mi bel hevi bikos mi no inap kamapim tingting bilong mi. Mi mas lain long bosim gut bel, stadi gut tru long tokples, na lap long mi yet taim mi mekim ol popaia.” Anna bilong Estonia i tok: “Wok bilong lain long stap long ples hat, planti das, na no gat hatwara bilong waswas, dispela i no hatwok olsem pasin bilong lainim tokples Spen. Sampela taim mi laik givap. Mi mas lain long amamas long ol tok mi kolim gut, na mi no ken tingting tasol long ol popaia mi mekim.”

Na tu, em hatwok long stap longwe long ol famili na ol pren. Jonathan bilong Amerika i bin pilim olsem bihain liklik long em i go long Ekwado. Tasol em i stat long pilim orait liklik taim em i kirap lusim sampela taim moa long stadi long Baibel na mekim wok autim tok. Bihain liklik, ol gutpela ekspiriens i painim em long wok autim tok na ol nupela poroman bilong en insait long kongrigesen i helpim em long kisim amamas gen.

 Na tu, ating em i hatwok long lain long sindaun long narapela kantri. Ol samting i no wankain olsem long asples. Beau bilong Kanada i tok olsem long asples oltaim haus i gat pawa na paip wara, tasol nau long Ekwado i no olsem long olgeta taim. Na tu, long planti kantri trenspot i no gutpela tumas. Ating planti man i stap rabis na planti i no save long rit rait. Ines bilong Ostria i save tingim ol gutpela pasin bilong ol manmeri, na dispela i helpim em long i stap amamas. Em i tok: “Ol manmeri i save mekim gut long ol man, stap isi, bihainim pasin helpim, na pasin daun. Na bikpela samting moa, ol i gat laik tru long kisim save long God.”

KISIM PLANTI BLESING

Maski ol dispela yangpela long Ekwado i bin lusim planti samting, Jehova i givim ol olgeta samting ol i nidim. Ol i kisim planti blesing, winim ol blesing ol i ting ol bai kisim. (Efe. 3:20) Ol i pilim olsem em i ‘givim planti gutpela samting long ol na ol i no sot.’ (Mal. 3:10) Tingting bilong ol long wok autim tok i olsem:

Bruno: ‘Mi kirap mekim wok hia long Ekwado long hap bilong Amazon. Bihain, mi helpim wok konstraksen long Ekwado brens ofis. Nau mi wok long Betel. Taim mi stap long Itali, mi makim olsem mi bai putim Jehova i stap nambawan, na tru tumas, em i bin givim mi kain kain wok we i kirapim tru tingting bilong mi.’

Beau: ‘Mi stap pren bilong Jehova na dispela pasin i kamap strong tru bikos long Ekwado mi yusim olgeta taim bilong mi long mekim wok bilong Jehova. Na tu, mi inap raun lukim ol narapela ples, em laik bilong mi long bipo yet.’

Anna: ‘Mi wanpela singel meri, olsem na mi no ting mi inap mekim wankain wok olsem ol misineri i save mekim. Tasol nau mi save olsem mi inap. Jehova i blesim mi na mi wok long kamapim ol disaipel, sanapim ol Haus Kingdom, na kisim ol nupela pren. Mi amamas stret.’

Elke: ‘Taim mi stap long ples long Ostria, planti taim mi bin beten askim Jehova long mi ken painim wanpela husat i laik stadi long Baibel. Tasol long hia, mi lukautim 15 Baibel stadi! Mi amamas tru long lukim amamas ol i pilim taim ol i kisim save long Jehova.’

Joel: ‘Em gutpela tru long mekim wok bilong Jehova long narapela kantri. Yu lain long larim ol samting i stap long han bilong Jehova, na yu amamas stret taim yu lukim em i blesim hatwok bilong yu! Insait long fes yia we mi bin lusim Amerika i kam, namba bilong ol pablisa long grup mi stap long en i go antap long 21 we bipo em 6-pela tasol. Na i gat 110 manmeri i bin kam long Memorial.’

OLSEM WANEM LONG YU?

Yupela ol yangpela brata na sista, yupela inap mekim wok long hap we ol i sot long ol manmeri bilong autim tok? Bilong mekim olsem yu mas plen gut paslain long yu wokim kain disisen olsem. Nambawan samting, yu mas laikim tumas Jehova na laikim tumas ol arapela. Sapos kain pasin laikim i stap long yu na yu inap muv i go long narapela hap, orait beten long Jehova long dispela samting. Na tu, toktok wantaim papamama na ol elda long kongrigesen long samting yu laik mekim. Ating yu tu bai wokim disisen long mekim wok bilong Jehova long pasin we i kirapim tru tingting bilong yu na mekim yu stap belgut.

[Rait long pes 3]

“Mi bin beten planti long Jehova na toktok wantaim ol strongpela bratasista. Dispela i bin helpim mi long kliagut olsem Jehova i save blesim ol lain husat i givim bel tru long mekim wok bilong en.”—Kayla, bilong Amerika

[Blok/Piksa long pes 6]

Bilong redi long mekim wok long narapela kantri

• Oltaim mekim stadi bilong yu yet

• Ritim Wok Kingdom Bilong Yumi bilong Ogas 2011, pes 4-6

• Toktok wantaim ol arapela husat i bin mekim wok long narapela kantri

• Mekim wok painimaut long kalsa na histori bilong kantri

• Kisim sotpela kos bilong lainim tokples

[Blok/Piksa long pes 6]

Sampela husat i bin go long narapela kantri i bin sapotim ol yet long rot bilong . . .

• go long asples long olgeta yia na wok skin inap sampela mun

• rentim haus, o bisnis bilong ol i go long narapela

• yusim Intenet bilong mekim wok mani

[Piksa long pes 4, 5]

1 Jaqueline bilong Jemani

2 Bruno bilong Itali

3 Beau bilong Kanada

4 Siobhan bilong Aialan

5 Joel bilong Amerika

6 Jonathan bilong Amerika

7 Anna bilong Estonia

8 Elke bilong Ostria

9 Chantal bilong Kanada

10 Ines bilong Ostria