Wokabaut Olsem Ol Sitisen Bilong Kingdom!

‘Yupela i mas wokabaut long pasin i stret long gutnius.’—FILI. 1:27.

WANEM BEKIM BILONG YU?

Husat inap stap olsem sitisen bilong Kingdom?

Olsem wanem man bai lain long tokples, histori, na ol lo bilong Kingdom?

Olsem wanem ol sitisen bilong Kingdom i soim olsem ol i laikim tru ol lo bilong God?

1, 2. Bilong wanem dispela tok “wokabaut olsem ol sitisen” i gat bikpela mining long kongrigesen bilong Filipai?

 APOSEL POL i bin strongim kongrigesen long Filipai long ‘wokabaut long pasin i stret long gutnius.’ (Ritim Filipai 1:27.) Tok Grik ol i tanim olsem “wokabaut” long dispela ves inap makim pasin bilong “wokabaut olsem ol sitisen.” Dispela tok i gat bikpela mining long kongrigesen bilong Filipai. Bilong wanem i olsem? Long wanem, i luk olsem Gavman Rom i larim ol Filipai i stap olsem sitisen bilong Rom na lo bilong Rom i lukautim ol. Ol Filipai i amamas long stap sitisen bilong Rom, long wanem, ol i kisim sampela helpim em planti man long dispela taim i no kisim.

² Ol manmeri insait long kongrigesen Filipai i gat gutpela risen moa long i stap amamas. Pol i tokim ol dispela Kristen God i bin makim olsem: “Tasol yumi, yumi ol sitisen bilong heven.” (Fili. 3:20, futnot.) Ol i sitisen bilong Kingdom Bilong God, na em i winim tru ol gavman bilong ol man. I no gat wanpela gavman bilong graun inap lukautim na helpim ol olsem Kingdom Bilong God i mekim.—Efe. 2:19-22.

3. (a) Husat inap stap olsem sitisen bilong Kingdom? (b) Bai yumi skelim wanem samting long dispela stadi?

³ Tok bilong Pol long “wokabaut olsem sitisen” i bilong ol man husat bai mekim wok king wantaim Krais long heven. (Fili. 3:20) Tasol em i stret tu long ol lain husat bai stap long graun na stap aninit long Kingdom Bilong God. Bilong wanem i olsem? Long wanem, yumi olgeta i stap aninit long seim King, em Jehova, na i gat wankain lo long olgeta wokboi bilong em. (Efe. 4:4-6) Long nau, planti man i wok strong long kamap sitisen bilong kantri i gat planti wok mani. Tasol pasin bilong i stap sitisen bilong Kingdom i bikpela samting moa. Bilong helpim yumi  long kliagut olsem dispela em i bikpela samting, yumi ken skelim sampela samting man i mas mekim bilong kamap sitisen bilong wanpela gavman bilong graun wantaim ol samting man i mas mekim bilong kamap sitisen bilong Kingdom Bilong God. Bai yumi skelim 3-pela samting yumi mas mekim sapos yumi laik stap yet olsem sitisen bilong Kingdom.

OL MAK BILONG KAMAP SITISEN

4. Dispela gutpela tokples em i wanem samting? Olsem wanem yumi inap mekim dispela gutpela tokples?

⁴ Lainim tokples. Sampela gavman i tok ol man i laik kamap sitisen i mas lainim tokples bilong kantri. Sampela manmeri i mas wok strong inap planti yia bilong mekim gut dispela tokples, maski ol i kamap sitisen pinis. Ating kwiktaim ol i lainim ol lo bilong kolim stret ol tok, tasol ol i mas lusim bikpela haptaim moa bilong kolim gut ol tok. Ol man i laik kamap sitisen bilong Kingdom Bilong God, ol tu i mas lainim nupela tokples. Baibel i kolim dispela tokples olsem “gutpela tokples.” (Ritim Sefanaia 3:9, NW.) a Wanem dispela tokples? Em tok i tru bilong Baibel long God na ol samting em i tingting pinis long mekim. Bilong mekim gut dispela gutpela tokples, man i mas bihainim ol lo na stiatok bilong God. Ating kwiktaim yumi ol sitisen bilong Kingdom i bin lainim ol as tok bilong Baibel na kisim baptais. Tasol bihain long yumi baptais pinis, yumi mas wok strong long mekim gut moa dispela gutpela tokples. Yumi inap mekim olsem wanem? Yumi wan wan i mas wok strong yet long bihainim ol tok yumi lainim long Baibel.

5. Bilong wanem yumi laik lain long histori bilong ol manmeri bilong Jehova long taim bilong yumi?

⁵ Stadi long histori. Man i laik kamap sitisen bilong wanpela kantri, ating em i mas lain long histori bilong gavman bilong dispela kantri. Yumi laik stap sitisen bilong Kingdom Bilong God, olsem na yumi laik save long olgeta samting bilong dispela kingdom. Yumi laik bihainim pasin bilong ol pikinini man bilong Kora long Israel bilong bipo tru. Ol i laikim Jerusalem na hap we ol i mekim lotu na ol i laik stori long histori bilong dispela taun. Ol i no mekim olsem bikos taun i luk nais tru, nogat. Ol i mekim, long wanem, em i “taun bilong nambawan king,” Jehova. Ples lotu long Jerusalem em hap we ol manmeri i lain long ol Lo bilong Jehova na lotuim em. Ol manmeri i stap aninit long wok bos bilong Jehova, em King bilong Jerusalem, em ol manmeri Jehova i orait long ol na laikim ol. (Ritim Song 48:1, 2, 9, 12, 13.) Long taim bilong yumi, God i gat wanpela lain bilong em i stap hia long graun. Olsem ol pikinini man bilong Kora, yumi mas i gat laik long stadi na tokim ol arapela long histori bilong ol manmeri  bilong God. Taim yumi kisim save moa long lain bilong Jehova na olsem wanem em i helpim ol, dispela i mekim na yumi bilip moa long Kingdom Bilong God. Dispela bai strongim laik bilong yumi long autim gutnius bilong Kingdom.—Jer. 9:24; Luk 4:43.

6. Bilong wanem yumi ken ting olsem Jehova i laik bai yumi mas lainim ol lo na ol stiatok bilong em na bihainim?

⁶ Save long ol lo. Ol gavman bilong graun i tok ol sitisen bilong ol i mas lainim ol lo bilong kantri na bihainim. Olsem na i stret long ting olsem Jehova i laik bai ol sitisen bilong Kingdom bilong em i mas lain long ol lo na ol stiatok bilong em na bihainim. (Ais. 2:3; Jon 15:10; 1 Jon 5:3) Ol lo bilong ol man i no gutpela olgeta na sampela taim ol i no fea. Tasol “lo bilong Bikpela em i stret olgeta.” (Sng. 19:7) Yu save amamas long ritim Baibel long olgeta de na kisim save long ol lo na ol stiatok bilong God? (Sng. 1:1, 2) Yumi wan wan i mas wok strong long stadi long ol lo bilong God. Em wanpela wok yumi yet i mas mekim.

OL SITISEN BILONG KINGDOM I LAIKIM TUMAS OL LO BILONG GOD

7. Bilong wanem ol sitisen bilong Kingdom i bihainim ol lo bilong God?

⁷ Bilong i stap yet olsem sitisen bilong Kingdom, yumi mas save long ol lo bilong God na laikim ol tumas. Planti sitisen bilong ol gavman long graun i save tok olsem ol i wanbel long ol lo bilong kantri. Tasol taim i gat wanpela lo ol i no laikim na ol i ting i no gat man i lukim ol, ol i save brukim dispela lo. Planti taim ol i save bihainim ol lo bilong amamasim ol man tasol. (Kol. 3:22) I gat narapela as na ol sitisen bilong Kingdom i bihainim ol lo bilong God. Yumi laikim tumas Jehova, olsem na yumi amamas long bihainim ol lo bilong em, maski i gat man i lukim yumi o nogat.—Ais. 33:22; ritim Luk 10:27.

8, 9. Hau bai yu save olsem yu laikim tru ol lo bilong God o nogat?

⁸ Hau bai yu save olsem yu laikim tru ol lo bilong God o nogat? Pasin yu save mekim taim yu kisim sampela tok kaunsel inap givim sampela save long yu. Ating yu kisim sampela tok kaunsel long samting yu pilim olsem em bilong yu yet long makim, olsem klos yu save werim. Paslain long yu kisim tok i tru, ating yu no bisi long lukluk bilong yu, o ating yu bin pasim ol klos we inap kirapim bel bilong narapela. Taim pasin bilong yu long laikim God i go bikpela moa, yu bin lain long bilas na pasim klos i givim biknem long God. (1 Tim. 2:9, 10; 1 Pita 3:3, 4) Ating nau yet yu no ting olsem klos na bilas bilong yu i gat rong long en. Tasol sapos wanpela elda i tokim yu olsem planti long kongrigesen i pilim olsem klos na bilas bilong yu i no stret, bai yu mekim wanem? Bai yu kamapim ol eskius, bel hat, o strong long bihainim yet laik bilong yu? Wanpela bikpela lo ol sitisen bilong Kingdom i mas bihainim em long bihainim pasin bilong Krais. (1 Pita 2:21) Pol i tok “Krais tu i no bin amamasim em yet,” na long wankain pasin yumi laik “mekim ol gutpela samting i amamasim ol arapela na i helpim ol long kamap strong.” (Rom 15:2, 3) Bilong helpim pasin wanbel insait long kongrigesen, oltaim wanpela strongpela Kristen bai i gat laik long abrusim ol pasin we inap bagarapim maus bilong bel bilong ol arapela.—Rom 14:19-21.

⁹ Orait nau skelim tingting bilong yu long pasin pamuk na marit. Ol man husat i no sitisen bilong Kingdom Bilong God inap ting olsem i no gat rong long lukim ponografi, mekim pasin adaltri, divos, na tupela man i slip wantaim. Tasol ol sitisen bilong Kingdom i lain pinis long tingim ol samting em inap kamap long pasin ol i bihainim, na dispela bai mekim wanem long ol arapela. Planti manmeri i bin insait long pasin pamuk paslain long ol i lainim tok i tru. Nau ol i save olsem maritpasin na marit em ol presen i kam long God. Ol i laikim tumas ol lo bilong Jehova na ol i save olsem ol man i sakim ol lo bilong God long marit na maritpasin  i no inap stap sitisen bilong Kingdom. (1 Kor. 6:9-11) Na ol i luksave olsem bel bilong ol inap kirapim ol long mekim pasin i no stret. (Jer. 17:9) Olsem na ol i amamas long kisim ol tok lukaut i helpim ol long bihainim yet ol lo bilong God.

OL SITISEN BILONG KINGDOM I AMAMAS LONG OL TOK LUKAUT

10, 11. Kingdom bilong God i givim wanem ol bikpela tok lukaut long yumi? Yu gat wanem tingting long ol kain tok lukaut olsem?

¹⁰ Sampela gavman i save tok lukaut long ol sitisen bilong ol long sampela kaikai o marasin. I no olgeta kaikai na marasin i nogut, nogat. Tasol sapos sampela samting i nogut, gavman bai lukautim ol sitisen bilong en na toksave long hevi inap kamap. Em wok bilong gavman long givim tok lukaut. Kingdom Bilong God tu i save givim tok lukaut long ol sitisen bilong en. Kingdom Bilong God i givim tok lukaut long yumi long ol samting we inap kirapim yumi long sakim ol lo bilong God na bagarapim pasin bilong yumi long pas gut wantaim em. Olsem, planti i yusim Intenet bilong toktok wantaim, mekim skul wok, na painim amamas. Oganaisesen bilong God i yusim Intenet long mekim planti gutpela samting. Tasol planti Web-sait long Intenet inap nogutim ol man husat i laik bihainim stretpela pasin. I klia tru olsem ol Web-sait i soim ponografi i nogutim man. Inap planti yia gutpela wokboi i bin tok lukaut long yumi long ol kain Web-sait olsem, na yumi amamas tru long ol dispela tok lukaut!

¹¹ Long nau planti ol i yusim narapela kain Web-sait. Em ol social networking Web-sait. Ol dispela kain Web-sait i gat gutpela wok bilong en na wok nogut bilong en tu. Olsem na yumi mas was gut sapos yumi yusim ol dispela kain Web-sait. Nogut long dispela rot yumi poroman wantaim ol man nogut. (1 Kor. 15:33) Em as na gutpela wokboi i givim ol tok lukaut bilong helpim yumi long kisim stretpela tingting long ol dispela kain Web-sait. Olsem wanem? Yu ritim pinis ol tok em gutpela wokboi i kamapim long pasin bilong yusim ol social networking Web-sait? Hevi inap painim yumi sapos yumi yusim ol dispela kain Web-sait paslain long yumi ritim ol dispela tok. b Em kain olsem yu dringim wanpela strongpela marasin paslain long yu ritim ol tok lukaut i stap long botol marasin.

12. Bilong wanem em i longlong pasin long sakim ol tok lukaut?

¹² Ol lain husat i sakim ol tok lukaut i kam long gutpela wokboi bai bagarapim ol yet na ol pren na famili bilong ol. Pasin bilong lukim ponografi i kalabusim sampela na sampela i bin mekim pasin pamuk. Ol i ting Jehova i no inap lukim samting ol i mekim. Em longlong pasin long ting olsem yumi inap haitim pasin yumi mekim na Jehova i no inap lukim! (Snd. 15:3; ritim Hibru 4:13.) Jehova i no inap larim ol man husat i wok long sakim ol lo bilong en long stap sitisen bilong Kingdom bilong em, wankain olsem gavman bilong graun i no inap larim ol man i stap sitisen yet sapos ol i brukim sampela bikpela lo bilong kantri. c (1 Kor. 5:11-13) Tasol Jehova i save marimari long ol man na em i yusim ol elda bilong traim long helpim ol man husat i bin mekim sin. (Gal. 6:1) Ol man husat i tanim bel na i lusim pasin nogut inap kamap pren bilong Jehova gen na stap yet olsem sitisen bilong Kingdom. (2 Kor. 2:5-8) Em i gutpela samting tru long mekim wok bilong wanpela gutpela King olsem!

 OL SITISEN BILONG KINGDOM I TINGIM TRU EDIUKESEN

13. Olsem wanem ol sitisen bilong Kingdom i soim olsem ol i tingim tru ediukesen?

¹³ Planti gavman i wok strong long helpim ol sitisen bilong ol long kisim ediukesen. Ol i sanapim ol skul we ol pikinini i ken kisim save. Ol sitisen bilong Kingdom Bilong God i amamas long ol dispela skul we ol inap lain long rit na rait na kisim sampela save long mekim wok. Ol i wok strong long lain gut taim ol i stap long dispela skul. Tasol ol i amamas moa long ediukesen i kam long Jehova long rot bilong oganaisesen bilong em. Olsem, oganaisesen bilong em i strongim yumi long rit. Oganaisesen i strongim ol papamama long rit long ol pikinini bilong ol. Long olgeta mun, gutpela wokboi i save wokim nius Wastaua na Kirap! Ol dispela nius i kamapim planti stori bilong Baibel. Sapos yu ritim 2-pela o 3-pela pes long olgeta de, orait yu bai kisim helpim yet long ediukesen i kam long Jehova.

14. (a) Yumi save kisim wanem trening? (b) Yu bin bihainim wanem ol tok long pasin bilong mekim Famili Lotu?

¹⁴ Long olgeta wik, ol sitisen bilong Kingdom i save kisim trening long ol miting bilong kongrigesen. Olsem, winim 60 yia Skul Tiokratik Bilong Autim Tok i bin helpim ol sumatin long kamap ol gutpela tisa bilong Baibel. Olsem wanem? Yu insait long dispela skul? Na tu, gutpela wokboi i strongim yumi long makim wanpela apinun long olgeta wik long mekim Famili Lotu. Dispela i strongim pasin wanbel insait long famili. Olsem wanem? Yu bin bihainim ol tok ol buk na nius bilong yumi i bin kamapim long pasin bilong mekim Famili Lotu? d

15. Yumi holim wanem gutpela wok tru?

¹⁵ Planti sitisen bilong ol gavman bilong graun i laik kirapim ol man long sapotim wanpela politikol pati. Bilong mekim olsem sampela i save kempein raun long olgeta wan wan haus. Ol sitisen bilong Kingdom long olgeta hap bilong graun i soim olsem ol i sapotim Kingdom Bilong God taim ol i autim tok long ol manmeri long rot na long olgeta haus. Olsem, wok bilong nius Wastaua em bilong tokaut long Kingdom Bilong Jehova. Na olsem yumi kamapim long namba 1 stadi, namba bilong ol Wastaua ol i tilim i winim olgeta arapela nius long dispela graun! Yumi pilim olsem em i wanpela gutpela wok tru long tokim ol arapela long Kingdom Bilong God. Yu save givim bel tru long autim gutnius bilong Kingdom?—Mat. 28:19, 20.

16. Yu inap mekim wanem bilong kamapim klia olsem yu wanpela gutpela sitisen bilong Kingdom Bilong God?

¹⁶ Klostu nau bai i gat wanpela gavman tasol i bosim dispela graun, em Kingdom Bilong God. Ol man bai bihainim ol lo bilong Kingdom tasol. Bai yu stap olsem wanpela gutpela sitisen bilong Kingdom Bilong God long dispela taim? Nau em taim bilong kamapim klia dispela samting. Long olgeta disisen yu mekim long olgeta de, mekim olgeta samting bilong givim glori long Jehova na soim olsem yu wokabaut olsem gutpela sitisen bilong Kingdom Bilong God.—1 Kor. 10:31.

[Ol Futnot]

[Askim Bilong Stadi]

[Rait long pes 14]

Yu save bihainim ol tok lukaut i stori long ol hevi bilong Intenet?

[Piksa long pes 12]

Olsem ol pikinini bilong Kora, yu save amamas long lotu i tru na histori bilong en?

[Piksa long pes 15]

Famili Lotu bilong yu inap helpim yu na famili bilong yu long i stap olsem ol gutpela sitisen bilong Kingdom